Kwonañin ke kar Jerawiwi Nae Jitõb Kwojarjar?
“Juõn jerawiwi e ñõn mij.”—1 JON 5:16.
1, 2. Ewi wãwen ad jelã bwe jemaroñ jerawiwi nae jitõb kwojarjar eo an Anij?
“E AR to aõ bõk lemnak eo bwe iar jerawiwi nae jitõb kwojarjar eo.” Eindein an kar juõn kõrã ilo Germany jeje, meñe ear karejar ñan Anij. Juõn Ri Christian emaroñ ke jerawiwi nae jitõb kwojarjar, ak kajur eo ej jerbal an Anij?
2 Aet, emaroñ jerawiwi nae jitõb kwojarjar eo an Jehovah. “Naj jeorlok an armij jerawiwi im blaspim otemjej,” Jesus Christ ear ba, “a jamin jeorlok blaspim nae Jitõb Kwojarjar.” (Matu 12:31) Jej bõk nan in kakkõl in: “Elañe jej jerawiwi ke buñburuer kake elikin ar bõk jela mol, ejelok bar juõn men in katok kin jerawiwi ej berwõt, a eor kiljake im lelñoñ kin ekajet.” (Dri Hibru 10:26, 27) Im ri jilek John ear jeje: “Juõn jerawiwi e ñõn mij.” (1 Jon 5:16) Ak ej kunan ke armij eo ear kõmman juõn jerawiwi elap ñan bebe elañe ear kõmmane “juõn jerawiwi e ñõn mij”?
Ukwelok ej Bõktok Jeorlok Bwid
3. Ta eo emol elañe jej lukkun buromõj kin juõn bwid jaar kõmmane?
3 Jehovah ej Ri Ekajet eo elaptata an ro ri kõmman nana. Aet, kij aolep aikwij in uak ñan e, im ien otemjej ej kõmman men eo ejimwe. (Jenesis 18:25; Dri Rom 14:12) Ej an Jehovah bebe elañe jaar kõmmane juõn jerawiwi ejelok jeorlok bwid ie, im emaroñ bõk jitõb eo an jen kij. (Sam 51:11) Kin menin, elañe jej lukkun buromõj kin bwid eo jaar kõmmane, alikar bwe jej lukkun ukwelok ilo mol. Ta in ukwelok eo emol?
4. (a) Ta melelen ñan ukwelok? (b) Etke nan ko ilo Sam 103:10-14 elap air kainemõn?
4 Ñan ukwelok ej melelen bwe jej ukõt lemnak eo ad kin bwid eo jaar kõmmane ak jaar lemnak in kõmmani mokta jen ad ukwelok. Ej melelen bwe jej buromõj ak ajlok im oktaklok jen juõn ial ebwid. Elañe jaar kõmman juõn bwid elap ak emwij ad bõk buñten nee ko rekkar me rej kalikar bwe jaar lukkun ukwelok, jemaroñ bõk kainemõn jen nan ko an ri jeje sam eo: “E [Jehovah] ar jab kõmõn ñõn kim einwõt jerawiwi ko am, ak nawõnam ekar ñõn bwir ko am. Bwe einwõt lõñ ko reutiej jen lõl, ein drein e killip An tiriamokake ro remjõk E. Einwõt rear etolok jen kabilũñ, ein drein E ar likit bwir ko am etolok jen kim. Einwõt jemeir ej tiriamokake ro nejin, ein drein Jeova ej tiriamokake ro remjõk E. Bwe E jelã wãwen kõmõnmõn kim; E kememej bwe kim bõñõlñõl.”—Sam 103:10-14.
5, 6. Kwalok point eo elap ilo 1 Jon 3:19-22, im kameleleik nan ko an ri jilek eo.
5 Nan ko an ri jilek John rej bareinwõt kainemõn: “Ilo men in je naj jela bwe kij jen mol im je naj karel buruer iman mejen. Bwe elañe buruer ej liakelok kij, Anij elap jen buruer im E jela men otemjelok. Kom, ro jitenburu, elañe buruer e jab liakelok kij, jej beran ñõn Anij; Im jabrewõt men eo jej kajitõk iben jej bõk jen E, bwe jej kejbãrok kien ko An, im kõmõn men ko rej men in mõnõnõ iman mejen.”—1 Jon 3:19-22.
6 Je “jela bwe kij jen mol” kinke jej kwalok yokwe kin ro jeid im jatid im jab kõmmani men ko rebwid. (Sam 119:11) Elañe jej bõk juõn eñjake enana kin jet un ko, jej aikwij kememej bwe “Anij elap jen buruer im E jela men otemjelok.” Jehovah ej kwalok joij im tiriamo ñan kij kinke ejelã kin yokwe in “jaje mon” eo ad, tarinae eo ad nae jerawiwi, im kate ko ad ñan kõmanman ankilan. (1 Piter 1:22) Buruõd ej “jab liakelok kij” elañe jej liki Jehovah, kwalok yokwe ñan ro jeid im jatid, im ejelok ruõd kin jerawiwi ko. Jenaj “beran ñõn Anij” ilo jar, im enaj uak kij kinke jej bokake kien ko an.
Ro Rar Jerawiwi Nae Jitõb Eo
7. Ta eo ej kalikar elañe juõn jerawiwi ej tellokin jeorlok bwid ke ak jaab?
7 Ta jerawiwi ko naj jamin jeorlok? Ñan uake kajitõk in, jen etale jet ian wanjoñok ko ilo Bible. Menin enaj kainemõn kij elañe jej ukwelok ak elap ad inebata wõt kin jerawiwi ak bwid ko ad. Jenaj lo bwe ejjab lukkun aorõk kin jerawiwi rot eo juõn armij ear kõmmane, jen menin, ej unin ear kõmmane, wãwen buruen, im joñan kõnan eo ibben ke ear kõmmane jerawiwi eo ej kalikar elañe jerawiwi eo ej tellokin jeorlok bwid ke ak jaab.
8. Ewi wãwen jet ian ri tel ro an kabuñ in Ri Jew ilo ebeben eo kein kajuõn rar jerawiwi nae jitõb kwojarjar?
8 Ri tel ro an kabuñ in Ri Jew ilo ebeben eo kein kajuõn me rar jumae Jesus Christ rar jerawiwi nae jitõb kwojarjar eo. Rar lo an jitõb eo an Anij jerbal ibben Jesus ke ear kõmman men in bwilõñ ko me rar bõktok nebar ñan Jehovah. Bõtab, ri kijirãt rein an Christ rar ba bwe kajur in ear itok jen Satan Devil eo. Ekkar ñan Jesus, ro me rar blasphem ak konono nana nae jitõb kwojarjar eo an Anij rar kõmman juõn jerawiwi me naj jamin jeorlok “jab ilo lõl in, jab ilo eo e naj itok.”—Matu 12:22-32.
9. Ta in blasphem, im ta eo Jesus ear ba kin menin?
9 Blasphem ej nan in ruruwe, nan ko renana, ak konono nae. Kinke jitõb kwojarjar eo ej itok jen Anij, ñe juõn ej konono men ko nae jitõb eo an ej einwõt ñe ej konono nae Jehovah. Kajerbal nan rot kein jen kõnan in buruen im jab buromõj kake, naj jamin jeorlok. Nan an Jesus kin jerawiwi rot in ej kalikar bwe Jesus ej jitõñlok ñan ro me rekõnan jumae jerbal eo an jitõb kwojarjar eo an Anij. Kinke jitõb eo an Jehovah ear jerbal ibben Jesus ak ri kijirãt ro an rar ba bwe kajur in ear itok jen Devil eo, rar jerawiwi ilo air konono nae jitõb eo. Kin menin, Jesus ear ba: “Jabrewõt eo e naj blaspim nae Jitõb Kwojarjar, E jamin jeorlok an jerawiwi, a eor ruõn in drio.”—Mark 3:20-29.
10. Etke Jesus ear naetan Judas “drien mij eo”?
10 Jen lale bwebwenato eo kin Judas Iscariot. Ear bõk juõn ial ejjab mol, ikijen an kar kwot jen box in money eo kar lelok bwe en lale. (Jon 12:5, 6) Tokelik Judas ear illok ñan ibben ri tel ro an Ri Jew ro bwe en karõk juõn ien ñan an ketak Jesus kin 30 mõttan silver ko. Aet, Judas ear buromõj elikin an kar kinaake, ak ear jab ukwelok kin jerawiwi eo an. Kin men in, Judas ejjab tellokin bõk jerkakbiji. Eñin unin Jesus ear naetan “drien mij eo.”—Jon 17:12; Matu 26:14-16.
Ro Rar Jab Jerawiwi Nae Jitõb Eo
11-13. Ewi wãwen an kar King David jerawiwi ibben Bath-sheba, im ta kainemõn eo jemaroñ bõk jen wãwen an kar Anij jerbal ibbeir?
11 Jet ien, Ri Christian ro me rar kwalok bwid ko air renana im rar bõk jibañ jen elder ro ilo congregation eo ñan air bar ejaake kõtan eo air ibben Jehovah remaroñ buromõj wõt kin bwid ko rar kõmmani nae kien ko an Anij. (Jemes 5:14) Elañe jej inebata rot in, alikar jenaj bõk tokjen jen ad lale ta eo Jeje ko ilo Bible rej ba kin ro kar jeorlok bwid ko air.
12 King David ear lap an bwid kin men eo ear kõmmane ibben Bath-sheba, lio belen Uriah. Ke ear reilok jen bõrwoj in mweo imõn im lo an kõrã in edeeo tutu, David ear kõmman bwe ren bõktok kõrã in ñan mweo imõn im ear babu ak lũñ ibben. Tokelik ke lio ear kennanik e bwe ebõroro, ear karõk bwe leo belen, Uriah, en babu ibben lio belen ñan noj bwid eo enana ear kõmmane. Ke ear jab tõbrak karõk eo an, king eo ear kõmman bwe ren likit Uriah iman tata in jar in tarinae eo bwe en mij. Tokelik, Bath-sheba ear erom lio belen David im ear lotak ñane juõn ajiri eo me ear mij.—2 Samuel 11:1-27.
13 Jehovah ear jerbale wãwen ko kar ibben David im Bath-sheba. Anij ear jeorlok an David bwid, alikar bwe ear kememej men ko einwõt ukwelok eo an jen bwid eo enana ear kõmmane im bujen Ailiñ eo kar kõmmane ibben. (2 Samuel 7:11-16; 12:7-14) Ear alikar an wõr juõn lemnak eukwelok ibben Bath-sheba, kinke ear bõk jerammõn eo ñan erom jinen King Solomon im jibwin Jesus Christ. (Matu 1:1, 6, 16) Elañe jaar jerawiwi ak kõmman juõn bwid elap, emõn ñe jej kememej bwe Jehovah ejelã kin jitõbõn ukwelok eo ad.
14. Ewi wãwen joñan jeorlok bwid eo an Jehovah kar kwalok kake ilo wanjoñok eo kin King Manasseh?
14 Joñan eo kin jeorlok bwid eo an Jehovah ej bareinwõt walok ilo wanjoñok eo kin King Manasseh in Judah. Ear kõmman nana iman mejen Jehovah. Manasseh ear kõmõnmõn lokatok ko ñan Baal, kabuñ ñan “aolepen jaran lõñ ko,” im kalek lokatok ko ñan anij ko rewan iloan worwor ko ruo ilo temple eo. Ear kõmman bwe lõmaro nejin ren dribuk kijeek, kowõnmanlok mantin kajitõbtõb, im karel Judah im ro Ri Jerusalem ñan air “kõmõn nana elap jen ro dri ailiñ ko Jeova e ar kokkure ir iman ro nejin Israel.” Rar jab bokaki nan in kakkõl ko ri kanan ro an Anij rar kwaloki. Ejjab to tokelik, king eo an Assyria ear bõk Manasseh einwõt juõn ri kamakoko. Ke ear bed ilo kamakoko, Manasseh ear ukwelok im ilo ettã buru ear keini an jar ñan Anij, eo me ear jeorlok an bwid im bar kajeblak e ñan jerbal in king ilo Jerusalem, ijo ear kowõnmanlok kabuñ eo emol.—2 Kronikel 33:2-17.
15. Ta eo enana ear walok ilo mour eo an ri jilek Peter im ej kwalok bwe Jehovah ej “kanuij wujlep in” jeorlok bwid?
15 Elõñ buki yiõ ko tokelik, ri jilek Peter ear jerawiwi ilo juõn wãwen elap kin an kar karmijete Jesus. (Mark 14:30, 66-72) Bõtab, Jehovah ear “kanuij wujlep in” jeorlok bwid eo an Peter. (Aiseia 55:7) Etke? Kinke ear mol an Peter ukwelok. (Luk 22:62) Ear wõr juõn kein kamol ealikar kin jeorlok bwid eo an Anij 50 ran ko tokelik ke ilo ran in Pentecost eo, Peter ear bõk juõn jerammõn ejej uan ñan kwalok nan ilo beran kin Jesus. (Jerbal 2:14-36) Ewõr ke un ko ñan tõmak bwe Anij enaj diklok an jeorlok bwid ko an Ri Christian ro rainin me emol air ukwelok? “Elañe Kwe, O Jeova, kwo naj kakõle jerawiwi ko, O Iroij, wõn e naj jutõk?” ri jeje sam ear al, “a jolok jerawiwi ej ibõm.”—Sam 130:3, 4.
Kadiklok Mijak eo Kin Jerawiwi Nae Jitõb Kwojarjar
16. Ilo wãwen et ko Anij ej jeorlok bwid ko?
16 Wanjoñok kein rej aikwij jibañ ñan kadiklok inebata ko ad kin jerawiwi nae jitõb kwojarjar. Rej kalikar bwe Jehovah ej jeorlok bwid ko an ri jerawiwi ro rej ukwelok. Men eo eaorõktata ej niknik ilo jar ñan Anij. Elañe jaar jerawiwi ak kõmman juõn bwid, jemaroñ kajitõk jeorlok bwid eo ej bedbed ion katok in binmour eo an Jesus, tiriamo eo an Jehovah, jab wãppen eo jaar jolete, im lokbook in jerbal ko ad retiljek. Ilo ad jelã kin joij eo an Jehovah, jemaroñ bukõt jeorlok bwid, im liki bwe jenaj bõk jeorlok bwid.—Dri Epesõs 1:7.
17. Ta eo jej aikwij kõmmane elañe jaar jerawiwi im jej aikwij jibañ ilo jitõb?
17 Ta elañe jaar jerawiwi ak jej jab maroñ jar kinke bwid eo ad ear kõmman bwe jen nañinmij ilo jitõb? Ikijen wãwen rot in, ri jilek James ear jeje: “En [armij rot in] añiñintok elder ro an eklisia, im ren jar ion im kabit e kin oil ilo etan Iroij. Im jar in tõmak e naj kemour dri nañinmij eo, im Iroij e naj kejerkak e; im elañe e kar kõmõn jerawiwi ko, naj jeorilok jen e.”—Jemes 5:14, 15.
18. Etke bwid eo an juõn armij naj maroñ wõt in jeorlok meñe emwij bukwelok jen congregation eo?
18 Meñe ri kõmman bwid eo ejjab ukwelok ilo ien eo im emwij bukwelok jen congregation eo, ejjab melelen bwe naj jamin jeorlok jerawiwi eo an. Ikijen juõn ri kõmman bwid ri kabit kar bukwelok e ilo Corinth, Paul ear jeje: “E bwe ñõn armij in liakelok eo elõñ r’ar kõmõne; Inem ein juõn emõn bwe komin jolok an nana im kainemõn e, ñe ab juõn einwõt en jo ilo an buromõj elaplok.” (2 Dri Korint 2:6-8; 1 Dri Korint 5:1-5) Ñan an maroñ bar jeblak mour in jitõb eo air, ri kõmman bwid ro rej aikwij mõnõnõ in bõk nan in jibañ ko rej bedbed ion Bible jen Christian elder ro im rej aikwij kalikar im kamol bwe rej lukkun ukwelok. Rej aikwij “jebar leen ekar ñõn ukwelok.”—Luk 3:8.
19. Ta eo emaroñ jibañ kij ñan bedwõt im “jime ilo tõmak”?
19 Ta eo emaroñ kõmman eñjake in bwe jaar jerawiwi nae jitõb kwojarjar? Un ko remaroñ itok jen jorrãn ilo lemnak im mõjno ilo enbwin. Ilo wãwen rot in, jar im bõk ien ñan am kakije renaj lukkun jibañ. Elaptata jen jab kõtlok bwe Satan en kabwer kij, bwe jen bõjrak jen ad jerbal ñan Anij. Kinke Jehovah ejjab mõnõnõ kin mij eo an ri nana ro, ejelok bere bwe ejjab mõnõnõ in lo an jabdewõt ian ri karejar ro an jako. Inem elañe jej lemnak bwe jaar jerawiwi nae jitõb eo, jej aikwij wõnmanlok ilo ad najidik kij kin Nan in Anij, ekoba mõttan ko rekainemõn einwõt Sam Ko. Jej aikwij keini ad bed ilo kwelok ko im bõk kunad ilo jerbal in kwalok nan kin Ailiñ eo. Ilo ad kõmmane menin enaj jibañ kij ñan ad “jime ilo tõmak” im rõlok jen inebata eo kin kõmman jerawiwi eo ejamin jeorlok.—Taitõs 2:2.
20. Ta un ko remaroñ jibañ juõn armij ñan an lo bwe ear jab jerawiwi nae jitõb kwojarjar?
20 Jabdewõt ro me rej mijak bwe rar jerawiwi nae jitõb kwojarjar remaroñ kajitõk ibbeir make: ‘Iar blasphem ke nae jitõb kwojarjar? Ear ke mol aõ ukwelok jen jerawiwi ko aõ? Ij tõmak ke ilo jeorlok bwid eo an Anij? Ij ke juõn ri jumae eo me ear kajekdon meram eo ilo jitõb?’ Bõlen, rein renaj kile bwe rar jab blasphem nae jitõb kwojarjar eo an Anij, ak jab oktak im jet ri jumae ro. Rar ukwelok, im ear wõr tõmak ebin ibbeir ilo jeorlok bwid eo an Jehovah. Ñe eindein, rar jab jerawiwi nae jitõb kwojarjar eo an Jehovah.
21. Katak eo tok juõn enaj uaki kajitõk et ko?
21 Ej juõn jerammõn ñan jelã bwe jaar jab jerawiwi nae jitõb kwojarjar eo! Bõtab, ekkejel ibben jitõb kwojarjar in, ej jet kajitõk ko me jenaj etali ilo katak eo tok juõn. Ñan wanjoñok, jemaroñ kajitõk ibbed make: ‘Ij kõtlok ke bwe jitõb kwojarjar eo an Anij en tel iõ? Leen jitõb ej alikar ke ilo mour eo aõ?’
Ta Uak Eo Am?
• Etke jej ba bwe jemaroñ jerawiwi ak bwid nae jitõb kwojarjar eo?
• Ta melelen ñan ukwelok?
• Wõn ro rar jerawiwi nae jitõb eo ke Jesus ear bed ion lal?
• Ewi wãwen am maroñ anjo ion inebata eo kin am kar kõmman juõn jerawiwi eo naj jamin jeorlok?
[Pija eo ilo peij 4]
Ro me rar ba bwe Jesus ear kõmman men in bwilõñ ko kin kajur eo an Satan rar jerawiwi nae jitõb kwojarjar eo an Anij
[Pija eo ilo peij 7]
Meñe ear karmijete Jesus, Peter ear jab kõmman juõn bwid me ejelok jeorlok bwid ie