Kaddek Kadkad Ko Me Remaroñ Jibañ Yuk Ñan Kõmman Ri Kalor Ro
“Inem komin ilok, im kõmõn dri ailiñ ko otemjej bwe ren dri kalora.”—MATU 28:19.
1. Ri karejar ro an Jehovah jeman rar aikwij kain kabel im lemnak rot ko?
JET ien ri karejar ro an Jehovah rej aikwij kaddeklok kabel ko im wãwen air lemnak bwe ren maroñ kõmanman ankilan. Ñan wanjoñok, Abraham im Sarah rar bokake Anij im illok jen bukwon eo emweie etan Ur im tokelik rar aikwiji kadkad ko im kabel ko me rej menin aikwij ñan ro rej jokwe ilo em nuknuk. (Dri Hibru 11:8, 9, 15) Ñan tel Ri Israel ro ñan Enen Kallimur, Joshua ear aikwij beran, liki ilo Jehovah, im jelã kin Kien ko an. (Joshua 1:7-9) Im jitõb eo an Anij ear kõmanmanlok jabdewõt kabel ko ear wõr ibben Bezalel im Oholiab bwe ren maroñ in lo tõbrak ilo jerbal eo ñan kalek imõn kabbed eo im jerbal ko eierlok wõt.—Exodus 31:1-11.
2. Jenaj bwebwenato kin kajitõk rot ko rej ekkejellok ñan jerbal in kõmman ri kalor?
2 Elõñ buki yiõ ko tokelik, Jesus Christ ear kakien ri kalor ro an: “Inem komin ilok, im kõmõn dri ailiñ ko . . . katakin ir bwe ren bokake nan ko otemjej I ar jiroñ kom.” (Matu 28:19, 20) Jerammõn in ejañin kar bed ibben armij ro mokta. Ta kadkad ko kar aikwiji ñan kajejjet jerbal eo ñan kõmman ri kalor ro? Ewi wãwen jemaroñ kaddek kadkad kein?
Kwalok Yokwe eo Emũlal kin Anij
3. Kien eo ñan kõmman ri kalor ro ej letok ien emõn bwe jen ta?
3 Ad konono ibben armij ro im kajeoñ kareel ir bwe ren kabuñ ñan Anij eo emol ej menin aikwij ñan kwalok yokwe eo ad emũlal kin Jehovah. Ri Israel ro rar maroñ kamol yokwe eo air ñan Jehovah ikijen air bokake kien ko an kin aolepen burueir, ilo air lelok men in katok ko remõn, im ilo air nebar e ilo al. (Duteronomi 10:12, 13; 30:19, 20; Sam 21:13; 96:1, 2; 138:5) Einwõt ro rej kõmman ri kalor ro, jej debij im bokake kien ko an Anij, ak bareinwõt jej kwalok yokwe eo ad kin Jehovah ikijen ad konono ibben ro jet kin e im karõk ko an. Jej aikwij konono ilo beran kin tõmak eo ad, kãlet nan ko rejimwe im kwalok eñjake ko jen buruõd kin kejatdikdik eo jen Anij.—1 Dri Tessalonika 1:5; 1 Piter 3:15.
4. Etke Jesus ear lo mõnõnõ ilo an katakin armij ro kin Jehovah?
4 Kinke kar wõr ibben juõn yokwe emũlal kin Jehovah, Jesus ear lo mõnõnõ ke ear konono kin karõk ko an Anij, Ailiñ eo, im kabuñ eo emol. (Luk 8:1; Jon 4:23, 24, 31) Ilo mol, Jesus ear ba: “Kijiõ bwe In kõmõnmõn ankil an Eo e ar jilkintok Iõ, im bwe In kamwijlok jerbal eo An.” (Jon 4:34) Nan ko an ri jeje Sam ej konono kin Jesus: “I lõñliñ in kõmõnmõn ankil Am, O aõ Anij, aet kiõm ej ber iloan buruõ. I ar kwalok wãnik ilo jar eo elap: lo I jamin bor tiõ: O Jeova kwo jela.”—Sam 40:8, 9; Dri Hibru 10:7-10.
5, 6. Ta kadkad eo elap juõn ej aikwiji ñan kõmman ri kalor ro?
5 Kinke rej yokwe Anij, ro rekãl me rej kab katak mol eo jen Bible eo, jet ien rej konono kin Jehovah im Ailiñ eo ilo beran im elap air lo tõbrak ñan kareel ro jet ñan etale Jeje ko. (Jon 1:41) Yokwe Anij ej unleplep in air bõk kunair ilo jerbal in kõmman ri kalor ro. Inem, jen debij wõt yokwe in ikijen ad keini ad read im bõk ien ñan kalmenlokjen kin Nan eo an.—1 Timote 4:6, 15; Reveles̃õn 2:4.
6 Ejelok bere bwe yokwe ilo Jehovah ear jibañ Jesus Christ bwe en kijejeto wõt ilo an katakin armij. Ak ear jab un eo in wõt unin an kar lo tõbrak einwõt juõn ri keañ kin Ailiñ eo. Inem, ta kadkad eo juõn ear kõmman bwe Jesus en lo tõbrak ilo jerbal in kõmman ri kalor?
Kwalok Itoklimo Eyokwe kin Armij Ro
7, 8. Ewi wãwen an kar Jesus watõk armij ro?
7 Jesus ear itoklimo kin armij ro im ear lukkun kwalok an kea kin ir. Mokta jen an itok ñan lal ke ear jerbal einwõt “ri mejedik” an Anij, ear itoklimo kin men ko rej ekkejel ibben armij ro. (Jabõn Kennan Ko 8:30, 31) Ke ear bed ion lal einwõt juõn armij, Jesus ear tiriamo kin armij ro, ear kaemololo ro rar kebak e. (Matu 11:28-30) Ear kwalok yokwe eo an Jehovah make im tiriamo eo an, im menin ear kareel armij ro ñan kabuñ ñan Anij eo emol. Armij ro rekajju wãweir rar roñjake Jesus kinke ear kwalok an itoklimo kin ir im wãwen ko ibbeir.—Luk 7:36-50; 18:15-17; 19:1-10.
8 Ke juõn emaan ear kajitõk ta eo ear aikwij kõmmane ñan jolet mour indio, “Jisõs ej lale e im yokwe e.” (Mark 10:17-21) Ikijen ro rar katak jen Jesus ilo Bethany, jej read: “Jisõs ej yokwe Marta, im jãtin kõra, im Lazerõs.” (Jon 11:1, 5) Joñan an lap an Jesus kea kin armij ro ear karmijeteik ien ko ear aikwiji ñan kakije bwe en katakin ir. (Mark 6:30-34) Itoklimo rot in eyokwe im emũlal kin armij ro ear jibañ Jesus bwe en lo tõbrak ilo an kareel elõñlok armij jen ro jet ñan kabuñ eo emol.
9. Kar ta lemnak eo an Paul kin jerbal eo an ñan kõmman ri kalor ro?
9 Ri jilek Paul bareinwõt ear mol an itoklimo kin ro ear kwalok nan ibbeir. Ñan wanjoñok, ear jiroñ ro rar erom ri Christian ro ilo Tessalonika: “Ein drein kin an lap am yokwe kom, kim ar kõnan lewoj ñõn kom jab gospel eo wõt, a bareinwõt am mour, bwe kom jitenburu ibem.” Kin an Paul kwalok yokwe im lelok jibañ, jet armij ilo Tessalonika rar ‘illok jen ekjõp ko, ñõn korijer ñan Anij eo emour im emol.’ (1 Dri Tessalonika 1:9; 2:8) Elañe enaj mol ad itoklimo kin armij ro, einwõt Jesus im Paul, kij bareinwõt jemaroñ bõk lañliñ ke jej lo an news eo emõn tõbar buruen ro “emwij kãlet ir ñõn mour indrio.”—Jerbal 13:48.
Kwalok juõn Jitõb in Karmijete Kij Make
10, 11. Etke juõn jitõb in karmijete kij make eaorõk ñe jej kajeoñ im kõmman ri kalor ro?
10 Ro rebolemen in kõmman ri kalor ewõr ibbeir juõn jitõb in karmijete ir make. Korlok mweiuk ejjab men eo eaorõktata ibbeir. Ilo mol, Jesus ear jiroñ ri kalor ro an: “Ro dri mweie re nañin ban dreloñ iloan ailiñ in Anij!” Ri kaloran Jesus rar bwilõñ ke rej roñ men in, ak Jesus ear kobaik nan kein: “Ajiri rõn, ro rej liki mweiuk re nañin ban dreloñ iloan ailiñ in Anij! Ebiruru an kamel dreloñ ilo drelil in ii, jen dri mweie dreloñ iloan ailiñ in Anij.” (Mark 10:23-25) Jesus ear rejañ ri kalor ro an bwe mour eo air en lamwan. Inem, remaroñ kajejjet jerbal eo ñan kõmman ri kalor ro. (Matu 6:22-24, 33) Etke juõn jitõb in karmijete kij make enaj jibañ kij kõmman ri kalor ro?
11 Elap ad aikwij kate kij ñan katakin armij aolep men ko Jesus ear jiroñ kij. Juõn ri Christian ewõr an kõnan ñan kõmman ri kalor ro ej kate wõt ñan katak Bible ibben ro rej itoklimo kajjojo week. Ñan kalaplok kunair ñan kabukõt ro emol burueir, jet ri keañ kin Ailiñ eo emwij air ukõt jerbal ko air jen air jerbal full-time ñan jerbal part-time ilo jikin jerbal ko air. Elõñ thousand ri Christian ro emwij air katak bar juõn kajin kinke rekõnan kwalok nan ibben armij ro jen alliñ ko jet. Bar jet ri Christian ro rar beek ñan illok jen moko imwiir im emmakit ñan bar juõn jikin ak ailiñ bwe remaroñ kalaplok iju kunair ilo jerbal in jonikõn. (Matu 9:37, 38) Ñan kõmmane men kein juõn enaj aikwij kwalok jitõb in karmijete. Bõtab, ebar wõr aikwij ko jet ñan an lo tõbrak ilo jerbal in kõmman ri kalor ro.
Kwalok Meanwõd Bõtab Jab Kokkure Ien
12, 13. Etke meanwõd elap an aorõk ilo jerbal eo ñan kõmman ri kalor ro?
12 Meanwõd ej bar juõn kadkad me enaj jibañ kij ñan kõmman ri kalor ro. Ennan ko jej kwalok ibben ro jet ej kitibuj aikwij eo ñan air kõmman oktak ko kiõ, ak jenaj aikwij likit ien ko relap im kwalok meanwõd. (1 Dri Korint 7:29) Jesus ear kwalok meanwõd ñan James, leo jatin. Meñe James emaroñ kar jelã jerbal eo an Jesus kin kwalok nan, juõn men ear bõpraik e jen an erom juõn ian ri kaloran Jesus ilo mõkaj. (Jon 7:5) Bõtab, ilo ien eo ekadu ikõtan ien mij eo an Jesus im Pentecost 33 C.E., James ear erom juõn ian ri kalor ro, kinke, Bible eo ear kwalok bwe James ear kwelok im jar ibben jinen, leo jein, im ri kalor ro. (Jerbal 1:13, 14) James ear wõnmanlok ilo jitõb einwõt juõn ri kaloran Jesus, im tokelik ear ineki eddo ko ilo congregation eo an Christian.—Jerbal 15:13; 1 Dri Korint 15:7.
13 Einwõt ri kallip ro, ri Christian ro rej kaddek men ko me ejjab mõkaj air eddek—melele kin Nan in Anij, yokwe Jehovah, im jerbale kadkadin Christ. Melelen men in bwe jenaj aikwij kwalok meanwõd. James ear je: “Ro jatũ, komin kijenmij mae ien Iroij ej itok. Komin lale mõk, wãwen an ri kallib kijenmij ilo an kõttar an walok leen ko remmõn ilo jikin kallib eo an. Ej kijenmij im kõttar wut in añeneañ im wut in rak. Bareinwõt kom, komin kijenmij! Ami kejatdrikdrik en lab, bwe ran in itok eo an Iroij ebak.” (Jemes 5:7, 8) James ear rejañ ri tõmak ro mõttan ñan ‘kijenmij mae ien Iroij ej itok.’ Elañe ri kalor ro rar jab melele kin juõn katak, ilo meanwõd Jesus ear kameleleiki ak kajerbal wanjoñok ko ñan kalikare. (Matu 13:10-23; Luk 19:11; 21:7; Jerbal 1:6-8) Kinke Jesus ej iroij kiõ, jej aikwij kijenmij ak meanwõd ñe jej kõmman ri kalor ro. Jenaj aikwij meanwõd ñe jej katakin armij ro ilo ran kein bwe ren erom ri kalor ro an Jesus.—Jon 14:9.
14. Meñe jej kwalok meanwõd, ewi wãwen jemaroñ kajerbal ien ko ad make ilo meletlet einwõt ri kõmman ri kalor ro?
14 Meñe jej kwalok meanwõd, ejjab melelen bwe ro me rej ijjino im katak Bible eo ibbed renaj jebar leen ko remõn. (Matu 13:18-23) Inem, elikin ad kate kij ñan jibañ armij rein, ilo meletlet, jenaj bõjrak jen ad katak Bible ibbeir elañe rejjab wõnmanlok ilo jitõb im bukõt ro me renaj kaorõk im jerbale katak ko remol jen Bible eo. (Ekklisiastis 3:1, 6) Mekarta, ro elap air kamolol kin katak ko remol jen Bible eo renaj bar aikwij bõk jibañ jen kij ñan kõmman oktak ko ilo lemnak, mwiliir, im men ko rej kaorõklok ilo mour. Inem jej kwalok meanwõd, einwõt wãwen eo Jesus ear make kwaloke ñan ibben ro ri kaloran ro me kar aikwij wõt air ien ñan ukõt mwil ko mwiliir.—Mark 9:33-37; 10:35-45.
Kaddek Kabel in Katakin
15, 16. Ilo ien jej kõmman ri kalor ro etke katakin armij ilo juõn wãwen ebidodo an melele kake im kebojak lok iman raorõk?
15 Un ko unin an ri kwalok ro lo tõbrak ñan kõmman ri kalor ro ej kinke rej yokwe Anij, rej itoklimo kin armij, rej karmijete kõnan ko air make im rej kwalok meanwõd. Bareinwõt, renaj aikwij kaddek kabel in katakin kinke men in enaj jibañ kij ñan kamelele katak ko ilo juõn wõt wãwen ebidodo im alikar ñan air melele. Ñan wanjoñok, elõñ katak ko an Ri Kaki Elap, Jesus Christ, kar lel buruen armij kaki im bolemeir kinke ear bidodo air melele. Bõlen kwoj ememej ennan ko an Jesus einwõt: “Koorlok mweiuk ñõn kom i lõñ.” “Jab lelok men eo ekwojarjar ñõn kiru rorror ko.” “Kowãnik jelalokjen kin jerbal ko an.” “Lelok ñõn Sizar men ko an Sizar, im ñõn Anij men ko an Anij.” (Matu 6:20; 7:6; 11:19; 22:21) Emol, Jesus ear jab katakin armij kin ennan ko rekadu wõt. Ear katakin ilo alikar im ear kameleleik men ko ilo ien ko rekkar. Ewi wãwen kwomaroñ anõk Jesus ilo wãwen an katakin armij ro?
16 Bõk ien ñan am kebojak lok iman ej men eo eaorõk bwe en alikar am katakin. Ñe juõn ri kwalok ejjab bojak in kwalok nan, ekkã an bwebwenato ibben ri mweo ellã jen joñan. Kinke elap an kajerbal nan ko rejjab lukkun aorõk ñe ej konono, emaroñ kamad ro jet jen point ko relap kinke elap an konono ellã jen joñan kin juõn katak. Oktan men in, ñe juõn ri kwalok ej kebojak lok iman, ej lemnak kin armij eo ej katakini, ej bõk ien ñan kalmenlokjen kake kin katak eo, im ej kwalok katak eo ilo an kajerbal point ko raorõk im jejjet. (Jabõn Kennan Ko 15:28; 1 Dri Korint 2:1, 2) Ej lemnak kin ewi joñan an juõn ri katak Bible jelã kadede kin katak eo im ej beek kin ta point ko enaj aikwij kwaloke ilo ien eo ñe rej katak ibben don. Ri katakin armij emaroñ jelã kin elõñ kamelele ko ilo tibdikin kin katak eo, ak elañe ekõnan katakin ilo alikar enaj aikwij jab kobaik kamelele ko rejjab lukkun aorõk im jejjet ñan katak eo.
17. Ewi wãwen jemaroñ jibañ armij ñan uak ilo kõmmanwa kin katak ko jen Bible eo?
17 Jesus ear bareinwõt bõk ien ñan jibañ armij ro ñan kamelele ilo kõmmanwa, jen air baj kwalok wõt nan ko remol. Ñan wanjoñok, juõn ien ear kajitõk: “Ta am lemnok Saimõn? Kiñ ro an lõl rej bõk owõj ak wõnan jen wõn? Jen ro nejir ke, ak jen ro drua maijet?” (Matu 17:25) Kinke elap ad mõnõnõ in kameleleik Bible eo bwe jej aikwij debij ad konono im kõtlok bwe ri katak Bible eo en kwalok lemnak im eñjake ko an ak kamelele kin juõn men ej katak kake ilo ien ad katak Bible ibbeir. Ilo mol, jej jab kõnan kabwer armij ro ilo ad kajerbale elõñ kajitõk ko ele jen joñan. Ijellokin men in, ilo joij, im ilo ad kajerbale wanjoñok ko im kajitõk ko rejejjet, jemaroñ jibañ ir ñan melele kake mol ko jen Bible eo me rej walok ilo katak ko rej bedbed ion Bible eo.
18. Ta eo ej kitibuj ad kaddeklok ‘kabel ilo katakin’?
18 Jeje ko ilo Bible eo rej konono kin “nan in katak ejime,” ilo kajin Bible eo etto, rar jitõñlok ñan kabel ilo katakin. (Taitõs 1:9) Kain wãwen rot in ñan katakin armij ej kitibuj elõñlok men ko jen ad baj jibañ wõt juõn armij ñan kile im kememej nan ko remol. Emõn elañe jej kajeoñ in jibañ ri katak Bible eo ñan an kile im melele oktak eo ikõtan men ko remol im jab mol, men ko remõn im nana, meletlet im jajelokjen. Ñe jej kate kij ñan kõmman men in im kaddek yokwe kin Jehovah ilo buruen ri katak Bible eo, emaroñ melele unin an aikwij bokake E.
Kwon Kijejeto ilo Jerbal in Kõmman Ri Kalor Ro
19. Ewi wãwen ri Christian ro aolep rej bõk kunair ñan kõmman ri kalor ro?
19 Congregation in Christian eo ej juõn dolul me ro rej bed ie rej kate ñan kõmman ri kalor ro. Ñe juõn ej erom juõn ri kalor ekãl, ejjab ri kwalok eo wõt me ear katak Bible ibben ej lañliñ. Ñe armij ro rej kabukõt juõn ajiri ejebwãbwe, juõn wõt armij ibwiljin ro me rej bukõte naj lo e. Ak ñe ajiri eo ej bar lo jemen im jinen, im aolep ro me rar jolok ien ñan kabukõt e rej mõnõnõ ibben don. (Luk 15:6, 7) Ilo ejja wãwen eo wõt, jerbal in kõmman ri kalor ro ej juõn jerbal ej kitibuj aolep ro ilo congregation eo. Ri Christian ro aolep rej bõk kunair ñan kabukõt ro remaroñ erom juõn ian ri kaloran Jesus. Im ñe juõn eo ekãl ej jino kwelok ilo Kingdom Hall eo, ri Christian ro aolep ijo ewõr kunair ñan lelok jibañ bwe en kaddek an kamolol kin kabuñ eo emol. (1 Dri Korint 14:24, 25) Kin men in, ri Christian ro aolep rej lañliñ ilo air jelã bwe thousand im thousand ro rekãl ilo kajjojo yiõ rej erom ri kalor ro.
20. Ta eo kwoj aikwij kõmmane elañe kwo kõnan katakin ro jet kin mol eo ilo Bible?
20 Elõñ ri Christian ro retiljek renaj lañliñ ñan katakin juõn armij kin Jehovah im kabuñ eo emol. Meñe rej kate wõt ir, elõñ iair rejjab lo tõbrak. Elañe ej eindein ibbam, kwon wõnmanlok im kakajur yokwe eo am kin Jehovah, kwon kwalok am kea kin armij ro, ilo mõnõnõ kwon karmijeteik kõnan ko am, kwon kwalok meanwõd, im kajeoñ im kakõmõnmõnlok am kabel ilo katakin. Elaptata, kwon jar ñan Anij kin kõnan eo am ñan katakin ro jet kin mol eo. (Ekklisiastis 11:1) Kwon ainemõn ilo am jelã bwe jabdewõt men kwoj kõmmane ilo jerbal eo an Jehovah ewõr tokjen ñan jerbal in kõmman ri kalor ro me ej kaibujuij Anij.
Kwomaroñ Ke Kamelele?
• Etke jerbal eo ñan kõmman ri kalor ro ej melejoñe yokwe eo ad ilo Anij?
• Ta kadkad ko me ro rej kõmman ri kalor ro rej aikwiji?
• Ta eo ej kitibuji ad konono kin “nan in katakin ejimwe”?
[Pija eo ilo peij 3]
Ri Christian ro rej kwalok yokwe eo emũlal ñan Anij ilo air jerbal ñan kõmman ri kalor ro
[Pija eo ilo peij 5]
Ta unin ro rej kõmman ri kalor ro renaj aikwij itoklimo kin ro jet?
[Pija eo ilo peij 6]
Ta jet ian kadkad ko me ro rej kõmman ri kalor ro rej aikwiji?
[Pija eo ilo peij 7]
Ri Christian ro aolep rej kijoror ñan air loe tõbrak ko ilo jerbal in kõmman ri kalor ro