Kwar Jelã Ke?
Ñããt ri jedjed iju ro rar lolok Jesus?
Ilo Gospel eo an Matthew, ej jiroñ kij bwe “ri jedjed iju rar itok jen rear” ñan air lolok Jesus, im bõktok ñan e menin lelok ko. (Matthew 2:1-12) Ejjab alikar oran ri jedjed iju ro rar lolok niñniñ eo Jesus, im ejelok juõn bedbed ebin kin lemnak eo an elõñ armij bwe ekar wõr jilu orair; im ejelok etair ilo bwebwenato eo ilo Bible.
Ilo book eo New International Version Study Bible ej kwalok kamelele in kin Matu 2:11: “An oktak jen bwebwenato in etto, Ri Kanbil ro rar jab lolok Jesus ilo manger eo (nien mõñã an menin mour ko) ilo boñin eo ear lotak, jab einwõt kar ri lale sheep ro bwe rar lolok e ijo. Rar itok jet alliñ ko tokelik im lotok e ke ear juõn “ajiri” wõt ilo ‘mweo imõn.’ Men in ej alikar ikijen kõmman eo an Herod, ke ear kabukõt ajiri jidik ro ñan an mõn ir, ear lelok nan in jiroñ ko bwe ren mõn aolep ladik ro ruo air yiõ lallok ilujen Bethlehem im ene ko iturin. Ear kãlet yiõ kein ikijen an kar bwinbwin “ekkar ñõn an kar roñ jen ri lotok ro kin ien eo iju eo ear walok.”—Matthew 2:16.
Elañe ri jedjed iju rein rar lolok Jesus ilo boñin eo wõt ear lotak im bõktok gold im mweiuk aorõk ko jet, Mary en kar jab lelok an jortak kin ruo wõt bao elikin 40 ran ko tokelik ilo ien eo ear bõktok Jesus ñan temple eo ilo Jerusalem. (Luk 2:22-24) Men in kar juõn karõk ilo Kien eo kin armij ro rejeramel me rejjab maroñe juõn sheep koman. (Livitikõs 12:6-8) Bõtab, family eo an Jesus remaroñ kar kajerbal mweiuk aorõk kein, me ewõr tokjeir im rar itok ilo juõn ien ejejjet, ñan kõllãik wõnãn air bed ilo Egypt.—Matu 2:13-15.
Etke ear bõk emen ran ñan an Jesus tõkeãktok ñan lũp eo an Lazarus?
Ilo mol, Jesus ear karõk bwe en eindein. Etke jemaroñ ba menin? Lemnak kin kamelele in bwebwenato eo ilo Jon chapter 11.
Ke Lazarus, juõn eo ear jokwe ilo Bethany im juõn eo kar jeran Jesus, ear lukkun nañinmij, limaro jein im jatin rar jilkinlok ennan ñan Jesus. (Eon 1-3) Ilo ien eo, kar ruo wõt ran in ial eo an Jesus jen Bethany. (Jon 10:40) Lazarus ear mij ilo ien eo wõt ke ennan eo ej tõbarlok Jesus. Ta eo Jesus ear kõmmane? Ear “berwõt ruo ran ijo e ar ber ie,” inem ear etal ñan Bethany. (Eon 6, 7) Kin men in, ikijen an kar kõttar ruo ran inem etetal ruo ran, ekar tõbarlok lũp eo emen ran elikin an Lazarus mij.—Eon 17.
Moktalok, Jesus ear kajerkakbiji ruo armij—juõn ear kajerkakbiji elikin wõt an mij im eo juõn ear kajerkakbijeik e tokelik ilo ejja ran eo wõt. (Luk 7:11-17; 8:49-55) Emaroñ ke kajerkak juõn eo ear mij iumin emen ran im enbwinin emwij an kõt kadede? (Eon 39) Ekaitoktoklimo bwe juõn book in kamelele Bible ej ba bwe ibwiljin Ri Jew ro, rar tõmak bwe ear ejelok kejatdikdik “kin juõn eo ear mij ilo iumin emen ran ko; bwe enbwinin emwij an kõt, im aan, eo ej ekãke ilõñin enbwin eo ilo mejatoto iumin jilu ran, emwij an illok.”
Elañe ro rar bed ilo lũp eo ear wõr air bere, rar bojak im lo kajur eo an Jesus ion mij. Jesus ej jutak imanin lũp eo lũpen Lazarus ebellok, im ear lamõj kin ainikien elap: “Lazerõs, kwon itok!” Inem, “eo e ar mij ej itok.” (Eon 43, 44) Jerkakbiji, ej kejatdikdik eo emol kin ro remij, im ejjab tõmak eo ebwid an aolep bwe aan armij ej mour manlok wõt elikin mij.—Jon 11:25.