Ruaklok ñan Anij

Juõn Jemen Jeban Keidi

Matu 3:​16, 17

“JEMEMUIJ.” Jejjo wõt nan ko rej kamakit eñjake ko remũlal an armij ro. Juõn jemen eo elukkun yokwe ajiri ro nejin ej jibañ ir ñan lo tõbrak ilo air rittolok. Kin juõn un emõn, Bible eo jitõñlok ñan Jehovah Anij einwõt “Jememuij.” (Matu 6:9) Kain Jemen rot Jehovah? Ñan uake kajitõk in, jen etale nan ko Jehovah ear konono ñan Jesus ilo ien eo Jesus ear baptais. Kin men in, wãwen eo juõn jemen ej konono ñan ro nejin ej kwalok kin kain jemen rot e.

Ilo October 29 C.E., Jesus ear etal ñan river Jordan bwe en baptais. Bible eo ej kwalok ta ko rar walok: “Im ke emwij an Jisõs baptais, emõkõj An ato jen dren: im lo, emjãllok lõñ ñõn E, im Ej lo Jitõb õn Anij ej kãlõltak einwõt mule, im jok ion; Im lo, ainiken jen lõñ ej ba, E in Nejiõ jitenburu iba, Ij mõnõnõ kake.”a (Matu 3:​16, 17) Nan kein rejoij Jehovah make ear konono, rej kwalok ñan kij kin kain jemen rot e. Lale men ko jilu me Jehovah ear kwalok ñan Nejin.

Moktata, ikijen nan kein “E in Nejiõ,” me Jehovah ear ba, ej einlok wõt ba, ‘Ij loudiñdiñ bwe ña ij Jemõm.’ Juõn jemen elolokjen ej kajuburuen kõnan eo an ajiri ro nejin ilo an kamolol im nebar ir. Ajiri ro rej aikwij bõk kainemõn ilo air jelã bwe relukkun aorõk einwõt juõn uan family eo. Lemnak mõk kin ta kar melelen men in ñan Jesus​​—meñe ej juõn ritto​—ear bõk nan in nebar jen Jemen!

Kein karuo, ilo an kar jitõñlok Nejin einwõt “jitenburu,” Jehovah ear kwalok ilo alikar yokwe eo an ñan Jesus. Ilo bar juõn wãwen, Jemen ear ba, ‘Ij yokwe yuk.’ Juõn jemen emõn ej ba ñan ro nejin bwe elap an yokwe ir. Nan rot kein​—ekoba air kwalok yokwe einwõt atbokwõj​—ej jibañ ajiri ro bwe ren eddek ilo jimwe im lo tõbrak ilo air mour. Elap wõt an kar kamõnõnõik buruen Jesus ke ear roñ ainikien an Jemen ba ej yokwe e!

Kein kajilu, ikijen nan ko “Ij mõnõnõ kake,” Jehovah ej kwalok an buñburuen kake Nejin. Ear einwõt ñe Jehovah ear ba, ‘Nejiõ, ij mõnõnõ kin men eo kwar kõmmane.’ Juõn jemen eyokwe ej lale ien ko rebellok ñan an ba ñan ro nejin bwe emõnõnõ kin men ko rej ba im kõmmani. Ajiri ro rej kajurlok im beranlok ñe jineir im jemeir rej kwalok air buñburueir kake ir. Ilo mol men in ear bar kõketak Jesus ke ear roñ bwe Jemen ear buñburuen kake!

Emol, Jehovah ej juõn Jemen jeban keidi. Kwokõnan ke bwe en wõr juõn jemõm einwõt in? Elañe aet, inem kwomaroñ bõk kainemõn ilo am jelã bwe kwomaroñ bõk kain kõtan rot in ibben Jehovah. Elañe ilo tõmak kwoj katak kin e im mol ilo am kõmanman ankilan, enaj uak. Bible eo ej ba: “Komin druaklok ñõn Anij, im E naj druakwoj ñõn kom.” (Jemes 4:8) Ta eo emaroñ kar kõmman am lo elaplok jokane jen am bõk juõn kõtan ebak ibben Jehovah Anij, Jemen eo emõntata?

[Kamelele eo itulal]