Rõlok Jen Abõnõnõ eo Kin Mour in Jodikdik

Ekkar ñan EUSEBIO MORCILLO

Ilo September 1993, iar lolok juõn jikin kalbuj. Unin aõ etal ñan ijo ej bwe juõn ri kalbuj, Marivi, kõrã eo jatiõ ear bojak in baptais. Jet ri kalbuj im ri utiej ro ilo kalbuj rar aluij ilo kautiej ke iar baptaise jatiõ. Mokta jen aõ kamelele kin ewi wãwen kimro kar bed ijo, in kamelele kin mour eo amro mokta.

IAR lotak ilo Spain ilo May 5, 1954, im iar manje eo ian ralitõk ajiri ro. Marivi kar ajiri eo kein kajilu. Jibwimro ar kakajiririk im katakin kim bwe kimin Ri Catholic, im ij kememej wõt ke iar bed ibben iar eñjake bwe iar ebake Anij. Ak ke iar bed ibben jema im jinõ ear jab eindein. Jema ekin mõn jinõ im kimeañ ajiri ro. Kimar mour ilo mijak, im iar lukkun buromõj ke iar lo an jinõ eñtan.

Ilo school, iar jelmae melejoñ ko jet rekaburomõjmõj. Juõn ian ri kaki ro, ej juõn priest, ear kaitak bõran ajiri ro na ion kiin mweo elañe kimar jab uak ilo jimwe. Bar juõn priest ear kokkure ri school ro ke ear etale katak ko air ibbeir. Bareinwõt, katak ko an Catholic einwõt eñtan ilo jikin kijeek eo hell ear bwokwoj im kamijak iõ. Ejjabto tõmak eo aõ kin Anij ear jakolok.

Lorak ilo juõn Wãwen Mour Ejelok Tokjen

Kinke iar jab emmakit ilo juõn wãwen Anij ej buñburuen kake, iar kalaplok aõ bed ibben armij ro relej im etton wãwen air mour ilo imõn disco ko. Ekkã an kar walok ire, im rar kajerbal bakbõk, tomere, bato ko, im jea ko einwõt kein ire. Meñe iar jab bõk kunaõ ilo ire ko, juõn ien juõn ri ire ear baiti ña im iar lotlok.

Tokelik iar kabuk imõn disco ko me ejelok ire ie. Ak ilo imõn disco kein ekkã an walok bwe armij ro ie rar kajerbal ak wiakake uno in kadõk ko rekajur. Jen an uno kein kainemõn iõ, ke iar kajerbali iar lelñoñ kin men ko iar loi im rar kõmman aõ inebata.

Meñe iar jab juburu, iar kareel juõn ian ladik ro jatiõ, José Luis, im juõn jera ebak, Miguel, bwe ren bed ilo ejja wãwen mour rot eo einwõt ña. Ibben elõñ jodikdik ro jet ilo Spain ilo ien eo, kimar lorak ilo juõn lal eankeke. Inaj kar kõmman jabdewõt men ñan bõk money im wiaik uno in kadõk ko. Iar watõk iõ einwõt juõn armij bata.

Jehovah Ej Karõlok Iõ

Ilo ien eo, elõñ alen iar bwebwenato ibben ro jera kin bed eo an Anij im kin unin mour. Iar jino bukõt Anij ilo aõ bukõt juõn armij eo ear melele im errã ibben eñjake ko aõ. Iar lo bwe Francisco, juõn ian ri jerbal ro mõtta, ear oktak jen ro jet. Kin an kar mõnõnõ, mol, im joij, iar beek in kwalok buruõ ñan e. Francisco ear juõn ian Ri Kennan ro an Jehovah, im ear letok juõn magazine etan Imõniaroñroñ eo me ear wõr juõn katak kin uno in kadõk ko.

Elikin aõ readi katak eo, iar jar kin jibañ jen Anij: “Iroij, ijelã bwe kwo mour, im ikõnan jelã kajjiõm im kõmanman ankil am. Joij im jibañ iõ!” Francisco im Ri Kennan ro jet an Jehovah rar kajerbal Bible eo ñan rejañ iõ im rar letok book ko rej bedbed ion Bible bwe in readi. Iar kile bwe rar letok jibañ eo me iar kajitõkin Anij bwe en letoke. Ejjabto tokelik iar jino konono ibben ro jera im José Luis kin men ko iar katak kaki.

Juõn ran ke iar illok jen juõn concert in kajañjañ im al ibben ro jera, iar kajenolok iõ jen ir. Iar kalimjek ir, im ij kab kile bwe mwilim ear lukkun nana kin am bõk uno in kadõk ko. Ilo ien eo, iar bebe bwe in karmijeteik kain mour rot in im erom juõn ian Ri Kennan ro an Jehovah.

Iar kajitõk ibben Francisco elañe emaroñ letok juõn Bible, im ear letok juõn im juõn book etan Mol Eo Ej Tellok ñan Mour In Drio.a Ke iar read kin kallimur eo an Anij bwe naj kõmõraik den in kemjalal jen mejen armij im jolok mij, iar kile bwe iar lo mol eo me emaroñ kanemkwoj armij jen jorrãn. (Jon 8:​32; Reveles̃õn 21:4) Tokelik, iar bed ilo juõn kwelok an Ri Kennan ro an Jehovah ilo Kingdom Hall eo. Jitõbõn karuwainene eo iar loe ijo ear kamõnõnõik buruõ.

Joñan aõ kijoror in jiroñ ro jet kin men ko iar loi ilo imõn kwelok ak Kingdom Hall eo, iar kir José Luis im ro jera im jiroñ ir kake. Jejjo ran ko tokelik, kim aolep kar bed ilo kwelok eo. Juõn jiroñ eo ear jijet imam ear ilbõk ke ear reilik im kalimjek kim. Bõlen ear ilbõk ke ear lo juõn kumi in likao ro eaetok kool in bõrair. Ear jab bar reitok ñan kim. Ear bwilõñ ke kimar bar jeblak week eo tok juõn, im kiõ kimar kõnak suit im necktie.

Ejjabto tokelik, kimro Miguel ear bed ilo juõn kwelok elap ak circuit assembly eo an Ri Kennan ro an Jehovah. Kar jab lo kain kwelok rot in mokta​​—juõn dolul in jimjãn jimjatin emol kin armij ro redik im ritto. Im bar juõn men ekabwilõñlõñ kar bwe, jikin eo rar kõmmane kwelok eo elap ie kar ejja jikin eo wõt kimar bed ke rar kõmmane concert in kajañjañ im al ie. Ak ilo ien in, al ko im mejatoto in armij ro ijo ear kakajur kim ilo jitõb.

Kimeañ aolep ear jino katak Bible eo. Enañin ralitõk alliñ ko tokelik, ilo July 26, 1974, kimro Miguel ar baptais. Kimar 20 wõt amro yiõ. Bar emen armij ro ilo kumi in am rar baptais emen alliñ ko tokelik. Katak ko jen Bible rar kamakit iõ ñan jibañ jinõ kõmman jerbal ko ilo mweo. Iar bareinwõt kõnan kwalok ñan e men ko rekãl iar tõmak kake. Kimro ar ebake don. Bareinwõt iar jolok elap ien ñan jibañ ladik im ledik ro jatiõ.

Tokelik, jinõ im enañin aolep ro jatiõ rar katak im bõk mol eo im baptais einwõt Ri Kennan ro an Jehovah. Ilo 1977, iar belek Soledad. E kar jiroñ eo me ear reilik im ilbõk kake kim ilo ien eo moktata kimar bed ilo mõn kwelok eo. Elikin jejjo wõt alliñ kimro ar erom pioneer, einwõt Ri Kennan ro an Jehovah rej naetan ro rej kwalok nan kin news eo emõn full-time.

Lomor Juõn eo Ejitenburu

Juõn ri nana ear kokkure jatiõ Marivi ke ear dik, im men in ear lukkun jelet e. Ke ear juõn jiroñ, ear ber ilo juõn wãwen mour etton me ear koba an bõk uno in kadõk ko, kwot, im mour in kijoñ. Ke ear 23 an yiõ, rar kalbuje, ak ear wõnmanlok im mour ilo ejja wãwen eo wõt.

Ilo ien eo, iar jerbal einwõt juõn circuit overseer, ak juõn ri kwalok an Ri Kennan ro an Jehovah me ej lolok elõñ congregation ko. Ilo 1989, rar jitõñ kimro Soledad bwe kimin jerbal ilo jikin eo me Marivi ear bed ilo kalbuj ie. Ri utiej ro rar bõk ajiri eo nejin jen e, im ear lukkun buromõj, im jab kõnan mour manlok. Juõn ran iar lolok e im rejañ e bwe en katak Bible ibba, im ear errã. Elikin an katak Bible iumin juõn alliñ, ear bõjrak an bõk uno in kadõk ko im kõbatat. Ear kamõnõnõik buruõ ke iar lo bwe Jehovah ear kakajur e bwe en kõmman oktak kein ilo mour eo an.​​—Dri Hibru 4:12.

Ejjabto elikin an jino katak Bible eo, Marivi ear jino kwalok kin men ko ear katak kaki ilo Bible ibben ri kalbuj ro mõttan im ri utiej ro rej jerbal ilo kalbuj eo. Meñe rar kamakit e ñan elõñ jikin kalbuj ko, ear wõnmanlok im kwalok nan. Ilo juõn jikin kalbuj ear kwalok nan jen room ñan room. Iumin elõñ yiõ ko, Marivi ear jino katak Bible ibben elõñ ri kalbuj ro mõttan ilo elõñ jikin kalbuj ko.

Juõn ran Marivi ear kejelãik iõ bwe ekõnan wujleplok mour eo an ñan Jehovah im baptais. Ak ear jab maroñ bõk melim ñan dioj jen jikin kalbuj eo, im rar jab kõtlok bwe jabdewõt armij en deloñ ñan an baptais e. Iumin emen yiõ ko ear kijenmij wõt ke ear bed ilo kalbuj eo me eobrak kin men ko renana. Ta eo ear jibañ e bwe en jutak bin ilo tõmak? Ilo ejja ien eo wõt congregation eo ear kwelok ilo mõn kwelok eo, ear katak kin ejja program eo wõt ilo room eo an ilo jikin kalbuj eo. Ear bareinwõt keini in katak Bible ibben make im jar.

Tokelik, rar likit Marivi ilo juõn jikin kalbuj rej naetan high-security (jikin eo me ekkã an ri kalbuj ro relukkun nana rej bed ie) ak ekar wõr juõn swimming pool ak jikin tutu ijo. Ear lemnak bwe wãwen kein rekãl remaroñ kõmman an maroñ baptais. Im men in ear walok, Marivi ear bõk melim ñan an baptais. Eñin unin iar bed ijo im bojak ñan baptais e. Iar bed ibben ilo ran eo eaorõktata ilo mour eo an.

Kin an kar bed ilo manit ko retton mokta, Marivi ear bõk nañinmij in AIDS. Mekarta, mwil eo emõn mwilin ear kamakit ri utiej ro ilo kalbuj eo bwe ren kõtlok e jen kalbuj, ilo March 1994. Ear bed ibben jinõ im niknik wõt einwõt juõn Ri Christian mae ien eo ear mij ruo yiõ ko tokelik.

Bõk Anjo Ion Eñjake ko Rekabwerer

Ña bareinwõt iar jab lukkun deor jen jorrãn ko rar walok kin men ko iar kõmmani mokta. Eñtan ko iar bõk jen jema im bareinwõt wãwen mour eo aõ ke iar juõn jodikdik rar lukkun jelet mour eo aõ. Ilo mour eo aõ kiõ, ekkã an nana bõklikit eo aõ im ij watõk ña make einwõt juõn armij bata. Jet ien iar lukkun buromõj im kõnan ebwer. Ak, Nan in Anij ear lap an jibañ iõ bwe in tarinaik kain eñjake rot kein. Iumin elõñ yiõ ko rej kab motlok, kin an kar ekutkut aõ kalmenlokjen kin eon ko einwõt Aiseia 1:​18 im Sam 103:​8-​13 iumin elõñ yiõ ko ej jibañ iõ ñan anjo ion kain eñjake rot eo bwe ewõr ruõ.

Jar ej bar juõn kein tarinae ilo jitõb ij kajerbale ñan anjo ion lemnak ko rekabwerer bwe ejelok tokjen mour eo aõ. Jet ien iar jañ ke ij jar ñan Jehovah. Mekarta, nan ko ilo 1 Jon 3:​19, 20 rar kakajur iõ: “Ilo men in je naj jela bwe kij jen mol im je naj karel buruer iman mejen. Bwe elañe buruer ej liakelok kij, Anij elap jen buruer im E jela men otemjelok.”

Kinke ij kebak Anij kin juõn “buru erup,” ij kile bwe ijjab kanuij nana einwõt I kar lemnak mokta. Bible eo ej kallimure aolep ro rej bukõt Jehovah bwe ejjab dike ro rej ukwelok jen men ko rar kõmmane mokta im kiõ rekõnan kõmanman ankil an.​​—Sam 51:17.

Ñe ikõnan ebwer, ij kalmenlokjen wõt kin lemnak ko remõn im men ko ilo jitõb einwõt ej ba ilo Dri Pilippai 4:8. Iar kiili Sam 23 im eon ko ilo Katak eo an Jesus ion Tol eo. Ñe ij jino bõk lemnak ko renana, ij elij eon kein ibba make. Ilo aõ kõmman men in, ear lap an jibañ iõ ilo ien ko ñe ebin aõ kiki ilo boñ.

Bar juõn men in jibañ ej itok jen nan in nebar im kamolol ko jen lio ibba im Ri Christian ro jet reritto ilo jitõb. Meñe ilo jinoin ear bin aõ tõmak nan in rejañ kein jen ir, Bible eo ear jibañ iõ ñan melele bwe yokwe ej “tõmak men otemjej.” (1 Dri Korint 13:7) Emol, ilo ettã buru, iar katak jidik kin jidik bwe in kile mõjno im likjap ko aõ.

Ijo turãjet, tarinae eo aõ nae eñjake ko rekabwerer ear jibañ iõ bwe in juõn overseer eo elloetak ñe ij itoitak im lolok congregation ko. Kimro lio ibba ar bed ilo jerbal in kwalok nan full-time iumin 30 yiõ ko ñan kiõ. Lañliñ eo iar bõk jen aõ karejar ñan ro jet ej jibañ iõ ñan kajekdon eñjake ko renana rar waloktok jen melejoñ im abañ ko iar iioni mokta.

Kiõ ñe ij reiliklok im kalmenlokjen kin aolep jerammõn ko Jehovah ear letok ñan ña, imaroñ ba einwõt ri jeje sam: “Kwon kamõnõnõik Jeova, . . . Eo ej jeorlok jerawiwi ko am otemjej, Eo ej kãejmour yuk jen nañinmij ko am otemjej. Eo ej wiaik am mour jen lũp eo; Eo ej kabelbil yuk kin joij im tiriamokake ko.”​​—Sam 103:​1-4.

[Kamelele eo itulal]

[Kareelel ilo page 30]

Ekkã aõ buromõj kin mõjno im likjap ko aõ. Ak, Nan in Anij ear lukkun jibañ iõ bwe in tarinaik kain eñjake rot kein rekabwerer

[Pija ko ilo page 27]

Jatiõ Jose Luis im jera Miguel, rar lor joñok eo aõ enana im emõn

[Pija ilo page 28]

Family eo an Morcillo ilo 1973

[Pija ilo page 29]

Marivi ke ear juõn ri kalbuj

[Pija ilo page 30]

Ibben lio ibba, Soledad