Katakin Ajiri Ro Nejõm
Mark Ear Jab Ebwer
MARK ear je juõn ian Gospel ko emen kin mour eo an Jesus. Book in ej book eo ekadu tata im bidodo tata ñan readi. Wõn kar Mark? Ear ke jelã kajjen Jesus?—a Jen lale ta melejoñ ko relap Mark ear jelmae im katak kin etke Mark ear jab ebwer einwõt juõn Ri Christian.
Elikin an kar King Herod Agrippa kalbuji ri jilek Peter, Bible eo ear jino konono kin Mark. Juõn boñ juõn enjel ear kanemkwoj Peter, im ilo mõkaj ear etal ñan mweo imõn jinen Mark, etan Mary, eo me ear jokwe ilo Jerusalem. Kar kanemkwoj Peter jen jikin kalbuj eo enañin joñoul yiõ ko elikin air kar mõn Jesus ilo ien Kwojkwoj in Kijone eo ilo 33 C.E.—Jerbal 12:1-5, 11-17.
Kwoj jelã ke ta unin an kar Peter etal ñan mweo imõn Mary?— Bõlen kinke ear jelã kajjen ro uan family eo im ear jelã bwe ri kalor ro an Jesus rar kwelok ibben don ilo mweo imõn. Barnabas, eo nukin Mark, ear juõn ri kalor jen mokta, bõlen jen jinoin Kwojkwoj in Pentecost eo ilo 33 C.E. Bible eo ej kamelele kin ien eo ear kwalok joij ilo an jibañ ri kalor ro rekãl. Inem Jesus emaroñ kar jelã kajjen Barnabas, im bareinwõt Mary im Mark, likao eo nejin.—Jerbal 4:36, 37; Dri Kolosse 4:10.
Ilo Gospel eo an, Mark ear jeje bwe ilo boñin eo rar ketak Jesus, juõn likao eo ej kõnak nuknuk “ej kabol enbwinin ekelwan” ear bed. Ke ri kijirãt ro rar jibwe Jesus, Mark ear je bwe likao eo ear ko. Kwoj jelã ke wõn likao in?— Aet, bõlen kar Mark! Inem ke Jesus im ri jilek ro an rar illok ilo boñin eo, alikar Mark ear kõnak ilo mõkaj juõn nuknuk im lor ir.—Mark 14:51, 52.
Emol, elõñ alen an kar Mark maroñ kobalok ibben ri karejar ro an Anij im lo men ko raorõk rar walok me rej ekkeijaklok ñan karõk eo an Anij. Bõlen ear bed ilo ien eo ke kar lutõklok jitõb kwojarjar eo ion armij ro ilo Pentecost 33 C.E., im ear bed ebake ri karejar ro retiljek an Anij, einwõt Peter. Ak ear bareinwõt itoitak ibben Barnabas, eo me ear jibañ Saul ilo an ãñinlok e ñan Peter jilu yiõ ko elikin an kar Jesus waloklok ñan Saul ilo juõn vision. Enañin jilu yiõ ko tokelik, rar jilkinlok Barnabas ñan Tarsus bwe en bukõt Saul ijo.—Jerbal 9:1-15, 27; 11:22-26; 12:25; Dri Galetia 1:18, 19.
Ilo 47 C.E., kar kãlet Barnabas im Saul bwe ren jerbal einwõt missionary. Rar bõklok ibbeir Mark bareinwõt, ak kin juõn un ejjab alikar, Mark ear illok jen ir im rol ñan mweo imõn ilo Jerusalem. Saul, eo me armij ro rar jelã kajjen einwõt Paul, eo ej ãt in Rome eo etan, ear illu. Im ear jab kajekdon likjap eo elap an Mark.—Jerbal 13:1-3, 9, 13.
Ke rar jeblak jen jerbal in missionary eo air, Paul im Barnabas rar kwalok tõbrak ko air ñan armij ro. (Jerbal 14:24-28) Elõñ alliñ ko tokelik, erro rar karõk in jeblak im lolok ro rekãl ilo jikin ko rar kwalok nan ie mokta. Barnabas ear kõnan bõklok Mark ibbeir, ak kwoj jelã ke ta kar lemnak eo an Paul?— Ear “lemnok e jab emõn” kinke Mark ear illok jen ir mokta im rol ñan mweo imõn. Men eo ewalok kiõ ear lukkun kaburomõj Mark!
Paul im Barnabas rar “aikwaile dron,” im jebel jen don. Barnabas ear ãñinlok Mark im erro rar kwalok nan ilo Cyprus, im Paul ear kãlet Silas im erro rar jeblak im lolok ibben ri kalor ro rekãl, einwõt rar karõk kake lok iman. Mark ear lukkun buromõj kinke kar e eo ear kokkure juõn kõtan emõn ikõtan Paul im Barnabas!—Jerbal 15:36-41.
Jejjab jelã kin unin an kar Mark jeblaklok ñan mweo imõn mokta. Bõlen ear lemnak bwe ekar wõr juõn un emõn unin an jeblak. Ak, Barnabas ear kile bwe abañ in ejamin naj bar walok. Im ear jimwe. Mark ear jab ebwer! Tokelik ear jerbal einwõt missionary ibben Peter ilo Babylon. Jen ijo, Peter ear jilkinlok nan in yokyokwe, im ba, “bareinwõt Mark, nejiõ.”—1 Piter 5:13.
Ear juõn kõtan ebak ilo jitõb ikõtan Peter im Mark! Men in ej bareinwõt alikar ñe jej read Gospel in Mark. Peter ear lo aolep makitkit ko an Jesus im Mark, ilo book in Gospel eo an, ear kwalok ta eo Peter ear jiroñ e kin men ko ear loi. Einwõt juõn wanjoñok, keidi bwebwenato ko kin juõn lañ ear walok ilo Lomalo in Galilee. Mark ej kobaike tibdikin kamelele ko kin ia eo Jesus ear kiki ie ilo waan lojet eo im ta eo ear kiki ion, men ko me juõn ri eñwõd einwõt Peter ear maroñ loi. Emõn bwe jen make lale men kein ilo ad konono im keidi bwebwenato kein ilo Bible eo ilo Matu 8:24; Mark 4:37, 38; im Luk 8:23.
Tokelik, ke Paul ear bed ilo kalbuj ilo Rome, ear nebar im kamolol Mark kin an tiljek in jurake e. (Dri Kolosse 4:10, 11) Im ke rar bar kalbuj Paul ijo, ear jejelok ñan Timothy im kajitõk ibben bwe en bõktok Mark, im kamelele: “Ej kakajuror iõ kin an jibõñ.” (2 Timote 4:11) Emol, elõñ jerammõn ko Mark ear bõki kinke ear jab ebwer!
[Kamelele eo itulal]
a Elañe kwoj read ibben juõn ajiri, lain in (—) ej kakememej yuk bwe kwon bõjrak jidik im rejañ eo nejõm bwe en uak im kwalok lemnak eo an.
Kajitõk ko:
○ Mark ear jokwe ia, im etke jemaroñ ba bwe ear jelã kajjen Jesus?
○ Wõn eo ear jibañ im rejetake Mark?
○ Ta eo emaroñ kar kabwer Mark?
○ Ewi wãwen ad maroñ jelã bwe Mark ear bõk buñburu eo an Paul?
[Pija eo ilo peij 25]
Emaroñ kar wõn likao in? Ta eo ej walok ñan e, im etke?
[Pija eo ilo peij 26]
Ta jerammõn ko Mark ear bõki kin an kar jab ebwer?