Enaj Ke Jorrãn Lal In Ad?

KWONAÑIN ke kar baj lemnak, ‘Ta eo enaj walok ñan lal in ad ilju im jeklaj?’ Kin men ko rej loi me rej walok ñan lal in ad eaibujuij, elõñ armij rej tõmak bwe lal in ad emaroñ jab ellã jen jorrãn.

Emol, rainin lal in ejorrãn kin air kokkure men ko raorõk ie, einwõt den ko, wijki ko, im mejatoto eo. Bareinwõt, jet scientist ro rej kakkõl bwe lal im men ko otemjej rej mour ie remaroñ jorrãn jen dekã ko rekilep rej wõtlok tok jen lañ ñan lal in, jen iju ko rej eddoboklok, ak kin an diklok kajurin al.

Scientist ro rej tõmak bwe lal in enaj jidik kin jidik​​—bõlen iumin elõñlok jen billion yiõ ko​​—luji maroñ eo ñan kowõnmanlok mour an armij. Ilo Encyclopædia Britannica ej kwalok bwe ej einwõt “wõnmanlok wõt ñan jorrãn im eban oktak.”

Ej menin kamõnõnõ bwe Bible eo ej kallimur ñan kij bwe Jehovah Anij ejamin kõtlok bwe lal in ad en jorrãn ak kar jab kõmmane bwe en kauwatata ñan ad jokwe ie. Einwõt Ri Kõmanman eo, ejelok joñan “kajur elap” ibben, inem emaroñ kejbãrok lal in ñan indio. (Aiseia 40:​26) Kin men in, kwomaroñ tõmak nan kein: “[Anij] E ar likit loñtak ko an lõl, bwe en jab makõtkit ñõn in drio.” “Komin nebar E, al im aliñ; komin nebar E, kom iju ko in maram. . . . bwe E ar kaiñi inem emwij kõmõnmõn ir. E ar bareinwõt kabini ñõn in drio im in drio.”​​—Sam 104:5; 148:​3-6.

Karõk eo An Anij kin Lal In

Ejjab kar karõk eo an Anij in bwe lal in en jorrãn im etton einwõt ej walok rainin. Jen an eindein, Anij ear kõmanman maan im kõrã eo moktata, Adam im Eve, im likit erro ilo juõn jikin kallip eaibujuij. Emol, jikin kallip eo rar jokwe ie eban kar make bed im aibujuij. Anij ear karõk bwe erro “en jerbal e im kejbãrok e.” (Jenesis 2:​8, 9, 15) Ej jerbal eo ekamõnõnõ im ekajuburu Anij ear lelok ñan ro jined im jemed me rar wãppen mokta!

Ak karõk eo an Anij kin lal in ej kitibuj elaplok jen baj kejbãroke jikin kallip eo kar mokta. Ear kõnan bwe aolepen lal in en oktak ñan juõn paradise. Eñin unin Anij ear lelok kien in ñan Adam im Eve: “Komin timon im orlok, im kobrõk lõl, im kajur jen e; im komin iroij ion iik in lojit, im ion bao in mejatoto, im ion men otemjej rej mour im makõtkit ion lõl.”​​—Jenesis 1:​28.

Ekaburomõjmõj bwe juõn enjel eutiej buruen, eo im tokelik kar naetan Satan, ear jumae karõk eo an Anij. Ear lukkun kõnan bwe Adam im Eve ren kabuñ ñan e. Ilo an kajerbal juõn serpent ñan an konono im kabo ir, Satan ear kõmman bwe ren jumae iroij eo an Anij. (Jenesis 3:​1-6; Reveles̃õn 12:9) Kibbon eo air im an ejelok air kwalok kamolol emaroñ kar lukkun kõmetak buruen Ri Kõmanman eo ad! Bõtab jumae eo airro ear jab ukõt karõk eo an Jehovah Anij kin lal in. Ej ba: “Nan eo ej waloklok jen loñiõ: e jamin jeblaktok ñõn iba im ejelok tokjen, a e naj kõmõn men eo I kõnan, im e naj jerammõn ilo men eo Ij jilkinlok e kake.”​​—Aiseia 55:11.

Kin juõn un emõn, Jehovah ear kõtlok jumae eo an Satan bwe en wõnmantak ñan ran kein ad. Iloan ien in, armij rar maroñ kajeoñ kajutak elõñ kien ko air make, im tokjen ko rar walok ear kamol bwe ad jenolok jen Anij, einwõt an kar Satan bõkmantak, elukkun likjap.a​​—Jeremiah 10:23.

Meñe aolep jorrãn ko rej walok itok wõt jen jumae eo an Satan, Anij ear kajerammõn armij ro remol ilo elõñ wãwen ko. Ear bareinwõt likit ilo Bible juõn lokbook kin tokjen ko rej walok kin bokake Anij ak karmijete iroij eo an. Bareinwõt, Jehovah emwij an kõmmani men ko remõn kin tokjen eo ad ilju im jeklaj. Ilo yokwe ear letok ñan armij juõn Ri Lomor ikijen an kar jilkintok Nejin eo ej make wõt yokwe, Jesus Christ, ñan an katakin kij kin wãwen mour eo emõntata im letok mour eo an kin kij. (Jon 3:​16) Kinke ear jab tellokin Jesus bwe en mij, Anij ear kajerbal mij eo an einwõt juõn wãwen ekkar, ñan an wiaik men eo Adam im Eve rar luji, eñin ej kejatdikdik eo kin mour indio ilo paradise ion lal.b Bwe men in en jejjet kitien, Jehovah Anij ear kajutak juõn kien ilañ ñan an iroij ion armij otemjej, im ear jitõñ Nejin, eo ear jerkakbiji, Jesus Christ, ñan an iroij ilo Ailiñ in. Karõk in ekabwilõñlõñ enaj kajejjet karõk eo an Anij kin lal in.​​—Matu 6:​9, 10.

Kin men in, kwomaroñ lukkun liki nan in kallimur kein rej walok ilo Bible: “Ro rej kõmõn nana re naj joko; a ro re kõtar Jeova re naj jolit ene eo. Ro remõn re naj jolit ene eo, im jokwe iloan ñõn in drio.” “Lo, imõn Anij ej iben armij rõn, im E naj jokwe ibeir, im re naj driloabjen, im Anij e naj ber ibeir, im naj air Anij: Im E naj kõmõraik jen mejeir dren in kemjãlãl otemjej, im e naj ejelok bar mij, im re jamin bar liãjlol, ak jõñ, ak iñtan; bwe men ko mokta re joko. Im Eo ej jijõt ion tron eo Ej ba, Lo, Ij kõmõn men otemjej bwe ren ekãl.”​​—Sam 37:​9, 29; Reveles̃õn 21:​3-5.

Eon Ko ilo Bible Eo Rejjab Idaptõk Ibben Don

Bõtab, jet remaroñ lemnak, ‘Ewi wãwen jemaroñ kõmman bwe eon ko rar walok moktalok ren errã ibben eon ko jet me rej kwalok kin lal in bwe enaj jako?’ Jen lemnak kin jet wanjoñok ko. Ad naj etale men in enaj kalikar bwe eon ko ilo Bible eo rejjab idaptõk ibben don.

Mokta jen an scientist ro kar kile bwe menin kõmanman ko jej loi rej “wõnmanlok wõt ñan jorrãn,” ri jeje sam ilo Bible eo ear je: “Kw’ar [melelen, Anij] likit loñtak ko an lõl: im lõñ ko jerbal in peiõm. Re naj joko, a Kwo naj berwõt; aet ir otemjej re naj morlok einwõt nuknuk ko; einwõt kobe Kwo naj ukot ir, im naj mwij ukot ir wõt. A Kwe kwoj einwõt juõn, im yiõ ko Am re jamin jemlok.”​​—Sam 102:​25-​27.

Ilo an ri jeje sam eo kar je nan kein, ear jab jumae karõk eo ej indio an Anij kin lal in. Jen men in, ear kwalok oktak eo kin bed eo an Anij me ej ñan indio ibben men ko Anij ear kõmanmani me remaroñ jako. Ñe ejjab kajur eo ej indio an Anij im ej kõkãl wõt, inem ijoko otemjej ilañ im ilal​​—ekoba solar system eo jej wawa ion kin meram im kajur im an debij lal in bwe en jab makitkit​—enaj kar oktak ñan lukkun jorrãn im jako. Kin men in, ñe ejelok juõn ej kejbãroke, lal in ad enaj kar “morlok,” ak jako ñan indio.

Ebar wõr jet eon ko ilo Bible me kwomaroñ kar lemnak ilo jinoin bwe rej jumae karõk eo an Anij me ear kwalok kake kin lal in. Ñan wanjoñok, Bible eo ej konono kin lañ im lal bwe ‘renaj joko.’ (Reveles̃õn 21:1) Emol nan kein rejjab jumae kallimur eo an Jesus: “Emõnõnõ ro etã burueir; bwe re naj jolit lõl.” (Matu 5:5) Inem, ta melelen an Bible eo ba bwe lañ im lal ‘renaj joko’?

Bible eo ekkã an kajerbal nan in “lal” ilo juõn wãwen kõkkar, melelen jukjuk im bed in armij. Ñan wanjoñok, baj lemnak mõk kin eon in: “Aolepen lõl konono wõt juõn, im juõn wõt ainikeir.” (Jenesis 11:1) Alikar, “lõl” in ijin me ej konono kake ej jitõñlok ñan armij ro rej jokwe ion lal. Bar juõn wanjoñok ej ilo Sam 96:​1, ekkar ñan King James Version ej ba: “Al ñõn IROIJ, aolepen lõl.” Ealikar, ilo eon in im eon ko jet, rej kajerbal nan in “lal” ilo kõkkar ñan armij.​​—Sam 96:13.

Jet ien Bible eo ej kõkkar kin kien ko rekajur rej iroij ion lal einwõt lañ ko ak men ko ilañ. Ñan wanjoñok, ri utiej ro relej an Babylon kar pijaik ir einwõt iju kinke rar make kautiej ir ion armij ro. (Aiseia 14:​12-​14) Einwõt kar kanan kake, Babylon eo me kar kõkkar kake einwõt “lõñ,” ak kumi in armij ro rej iroij, im “lõl,” ro rar jurake wãwen iroij eo air, ear jemlok ilo jemlokinlok 539 yiõ ko mokta jen an Christ lotak. (Aiseia 51:6) Men in ear kõtlok an Ri Jew ro rar ukwelok jeblak ñan Jerusalem, ijo juõn “lõñ ko rekãl,” juõn dolul in dri kien ekãl, ear iroij ion juõn “lõl ekãl,” ej jarlepju in armij ro rewãnik.​​—Aiseia 65:17.

Nan ko ilo Bible kin lañ im lal “re joko” ilo mol ej jitõñlok ñan jemlokin kien ko renana rainin im ri nana ro me rej jurake ir. (2 Piter 3:7) Men in enaj kabellok juõn ial ñan an kien eo an Anij ilañ kajerammõn juõn kumi in armij ekãl, ro rewãnik, bwe “ekar ñõn kalimur eo An, jej kõtõmene kin lõñ ko rekal im lõl ekal, eo kwojarjar ej jokwe iloan.”​​—2 Piter 3:​13.

Kin men in, kwomaroñ tõmak ilo kallimur eo an Anij bwe lal in ad enaj bed ñan indio. Bareinwõt, Bible eo ej kwalok ta eo kwoj aikwij kõmmane ñan am bõk kunam ilo ien in eaibujuij ñe lal in enaj oktak ñan juõn paradise. Jesus ear ba: “Im men in mour in drio, bwe ren jela Kwe juõn wõt Anij emol, im Jisõs Kraist, eo Kw’ar jilkintok.” (Jon 17:3) Etke kwojjab kõmman bwe en am mejenkajjik ñan etale men ko Bible ej katakin kaki kin ilju im jeklaj eo an lal im armij? Ri Kennan ro an Jehovah ilo bukwon eo am renaj mõnõnõ in jibañ yuk kin men in.

[Kamelele Ko Itulal]

[Naan ko ilo peij 20]

Bible eo ej kallimur bwe lal in ad enaj bed wõt ñan indio

[Pija An Eo Ej Komman ilo peij 18]

Background globe: NASA/The Visible Earth (http://visibleearth.nasa.gov/); polar bear: © Bryan and Cherry Alexander Photography