Katakin Ajiri Ro Nejõm

Timothy​—Ear Bojak im Mõnõnõ ñan Jerbal

“KWO bojak ke?” Renañin ke kar kajitõk ibbam kajitõk in?​​— Eokwe, bõlen armij eo ear kõnan kajitõk ñan jelã elañe kwo bojak. Ñan wanjoñok, emaroñ melelen an kar ba: ‘Ewõr ke book in katak ko ibbam? Kwonañin ke readi katak ko?’ Einwõt ad naj loe, Timothy ear bojak.

Timothy ear bareinwõt mõnõnõ. Kwo jelã ke ta melelen men in?​​— Ke kar kir Timothy ñan jerbal ñan Anij, ear bõk ejja eñjake eo wõt an bar juõn ri karejaran Anij, ke ear ba: “Ña e; Kwon jilkinlok iõ.” (Aiseia 6:8) Kinke ear bojak im mõnõnõ in jerbal, Timothy ear bed ilo juõn mour ekamõnõnõ. Kwo kõnan ke roñ kin men in?​—

Timothy ear lotak elõñ buki mile ko rettolok jen Jerusalem, ilo Lystra. Jibwin Lois im jinen, Eunice, rar ri katak ro rekabel kin Bible eo. Meñe Timothy ear juõn niñniñ, rar jino katakin e jeje kein.​​—2 Timote 1:5; 3:​15.

Ke Timothy ear bõlen jodikdik wõt, ri jilek Paul, ekoba Barnabas, rar lolok Lystra ilo ien eo ear jinoe juõn jerbal eaetok kin kwalok nan eo an. Alikar bwe ilo tõre in jinen im jibwin Timothy rar erom Ri Christian. Kwo kõnan ke roñ kin abañ ko Paul im Barnabas rar iioni?​​— Eokwe, armij ro me rar dike ri Christian ro rar kade Paul, mõne, im kekaake inabõjin jikin kwelok eo. Rar lemnak emij.

Armij ro me rar tõmak kin katak ko Paul ear kwalok kaki rar jutak iturin, im ear jerkak. Ilo ran eo tok juõn, Paul im Barnabas rar illok, ak ejjabto tokelik rar bar jeblak ñan Lystra. Ke rar jeblak, Paul ear kwalok juõn katak im ba ñan ri kalor ro: “Jen dreloñ ilo ailiñ in Anij kin elõñ iñtan.” (Jerbal 14:​8-​22) Kwo jelã ke ta melelen an Paul ba men in?​​— Ear ba bwe ro jet renaj kaeñtan ro rej jerbal ñan Anij. Tokelik Paul ear jeje ñan Timothy: ‘Ro otemjej re kõnan mour im kwojarjar renaj lo iñtan.’​​—2 Timote 3:​12; Jon 15:20.

Elikin an Paul im Barnabas illok jen Lystra, rar jeblak ñan ijo jikiir. Jet alliñ ko tokelik, Paul ear bõk Silas ñan itoitak ibben, im erro jimor rar jeblak ñan kakajur ri kalor ro rekãl ilo jikin ko Paul ear lolok. Ke rar tõbarlok Lystra, Timothy ear lukkun mõnõnõ ke ear bar lo Paul! Ear laplok an Timothy mõnõnõ ke rar kajitõk ibben ñan itoitak ibben Paul im Silas. Timothy ear mõnõnõ in bõk nan in kir eo. Ear bojak im mõnõnõ ñan etal.​​—Jerbal 15:40–16:​5.

Erjil ar itoitak ibben don, etetal elõñ mile ko, im tokelik rar iuwe ilo juõn wa. Elikin rar itaklok ilo ene eo, rar etetal ñan Thessalonica ilo Greece. Ilo ijin elõñ rar erom Ri Christian ro. Bõtab ro jet rar illu im kokweloktok juõn jar. Mour eo an Paul, Silas, im Timothy ear bed ilo kauwatata, inem rar illok ñan Beroea.​​—Jerbal 17:​1-​10.

Paul ear inebata kin ri tõmak ro rekãl ilo Thessalonica, inem ear bar jilkinlok Timothy ñan ijo. Kwo jelã ke etke?​​— Tokelik Paul ear kamelele ñan Ri Christian ro ilo Thessalonica: ‘Ñan kabin kom im kainemõne kom bwe enjelok emaroñ ebwer.’ Etke Paul ear jilkinlok Timothy ñan bõk jerbal in ekauwatata, meñe ej juõn eo emõn ded wõt?​​— Eokwe, kinke ri jumae ro rar jab lukkun jelã kin Timothy, im ear mõnõnõ in etal. Men in ear aikwij elap beran! Ta tõbrakin lolok eo? Ke Timothy ear jeblak ñan ibben Paul, ear ba ñan Paul kin tõmak eo an Ri Thessalonica ro. Inem Paul ear jeje ñan ir: “Ami tõmak e ar kainemõne kim kin kom.”​​—1 Dri Tessalonika 3:​2-7.

Timothy ear bar jerbal ibben Paul joñoul yiõ ko. Inem Paul ear bed ilo jikin kalbuj ilo Rom, im Timothy, eo ej kab rõlok jen kalbuj, ear etal ñan ibben Paul. Ke ej bed ilo kalbuj, Paul ear jeje juõn letter ñan Ri Philippi ro, bõlen ear kajerbale Timothy einwõt juõn secretary. Paul ear ba: ‘Ij kõtõmene in mõkaj in jilkinwoj Timote ñõn kom bwe ejelok armij iba me elukkun tiljek im enaj emanlok an jerbal ibbemi.’​​—Dri Pilippai 2:​19-​22; Dri Hibru 13:23.

Emaroñ kar lap an nan kein kamõnõnõik Timothy! Paul ear lukkun yokwe Timothy kinke ear bojak im mõnõnõ ñan jerbal. Jej kejatdikdik bwe kwonaj eindein bareinwõt.

Kajitõk Ko:

○ Ia eo Timothy ear rittolok ie, im ta eo ear walok ilo lolok eo an Paul jinointata ijo?

○ Ta eo Timothy ear kõmmane ke Paul im Silas rar kir e ñan itoitak ibbeir?

○ Ewi wãwen Timothy ear kwalok beran, im etke Paul ear lukkun yokwe e?

[Pija eo ilo peij 16]

Ta eo ear walok?