Nan eo an Jehovah Ej Mour Wõt
Katak ko Relap Jen Letter eo ñan Dri Rom
ILO enañin 56 C.E., ke ear etal ilo ial in missionary eo an kein kajilu, ri jilek Paul ear tõkeãklok ilo jikin kwelok eo ilo Corinth. Ej kab jelã bwe lemnak ko an Ri Jew ro im Ri Ailiñ ko rej Christian ilo Rome rar oktak jen don. Kin an kõnan kaburukuk ir ilo Christ, Paul ear emmakit im je juõn letter ñan ir.
Ilo letter eo ñan Ri Rome ro, Paul ej kamelele kin ewi wãwen kar kowãnik armij ro im wãwen rein kajjojo ren kar mour. Letter eo ej kalaplok jelã eo ad kin jelãlokjen eo an Anij im Nan eo an, ej kalikar joij eo an Anij ejjab tellokid ak ej letok, im ej kautiej jerbal eo an Christ ilo lomor eo ad.—Hib. 4:12.
KAR KOWÃNIK IR—EWI WÃWEN?
“Bwe otemjej r’ar jerawiwi, im rej likjõp jen aibujuij an Anij,” Paul ej jeje. “[Anij ear] kowãnik ir, im ejelok wõnan, ilo An joij, kin men in wiaik eo ej ilo Kraist Jisõs.” Paul ej bareinwõt ba: “Inem jej lemnok bwe kowãnik armij kin tõmak, e jibil jen jerbal ko an kien.” (Rom. 3:23, 24, 28) Kin tõmak ilo “juõn kõmõn in wãnik,” kar maroñ “kowãnik” Christian ri kabit ro im ro uan ‘jar eo elap’ in sheep ro jet—Christian ri kabit ro ñan mour ilañ einwõt iroij ro mõttan Christ im jar eo elap einwõt ro jeran Anij, kin jerammõn eo ñan ellã im mour jen “iñtan eo elap.”—Rom. 5:18; Rev. 7:9, 14; Jon 10:16; Jem. 2:21-24; Mat. 25:46.
“Jen jerawiwi ke, bwe je jab bed iomin kien a iomin joij?” Paul ej kajitõk. “En jab eñin!” ej uak. Inem Paul ej kamelele: “Kom korijeran . . . , elak an jerawiwi ñõn mij, ak an bokake ñõn wãnik.” (Rom. 6:15, 16) Ej ba: “Elañe komij mour ekar ñõn kõniek kom naj mij; a elañe kom kajeeklok jerbal ko an enbwinemi kin Jitõb, kom naj mour.”—Rom. 8:13.
Emwij Uaki Kajitõk ko Rej Bedbed ion Bible:
1:24-32—Mwil eo etton kar konono kake ilo eon kein ej jitõñlok ñan Ri Jew ro ke ak Ri Ailiñ ko? Meñe kamelele eo emaroñ kar jejjet ñan juõn ian kumi kein, Paul ear jitõñlok elaptata ñan Ri Israel ro rejjab tiljek me elõñ ebeben ko in air kar likjap in lore Kien eo. Meñe rar jelã kin kien eo ewãnik an Anij, “r’ar abwin bwe Anij en ber ilo air jela.” Inem ir eo rar nana.
3:24, 25—Ewi wãwen “men in wiaik eo [binmour eo] ej ilo Kraist Jisõs” ej kõllã wõnãn “jerawiwi ko lok” mokta jen kar kõllãiki? Kanan eo moktata kin Messiah eo, kar je ilo Jenesis 3:15, ear jejjet kitien ilo 33 C.E. ke rar mõn Jesus im totoik e ion alal in eñtan eo. (Gal. 3:13, 16) Bõtab, ilo ien eo wõt Jehovah ear ba kanan eo, ear maroñ lemnak kin wõnãn binmour eo einwõt ñe emwij kadede kõllãiki, kinke ejelok men en emaroñ kabõjrak Anij jen an kajejjet karõk ko an. Inem ion bedbedin katok in binmour eo an Jesus Christ, Jehovah ear maroñ jolok jerawiwi ko an ro nejin Adam, ro me rar jerbale air tõmak ilo kallimur eo. Binmour eo ej bareinwõt kõmman bwe en maroñ wõr juõn jerkakbiji ñan ro rar mour mokta jen ien ko an Ri Christian ro.—Jerb. 24:15.
6:3-5—Ta melelen baptais ilo Christ Jesus im baptais ilo mij eo an? Elañe Jehovah ej kabit ri kalor ro an Christ kin jitõb kwojarjar, rej burukuk ibben Jesus im erom mõttan congregation in Christian ri kabit ro, me ej enbwinin Jesus, eo ej Bõr eo. (1 Kor. 12:12, 13, 27; Kol. 1:18) Eñin ej melelen baptais ilo Christ Jesus. Christian ri kabit ro rej bareinwõt “baptais ilo mij [eo an Christ]” ilo air katok kin mour ko air im karmijeteik jabdewõt kejatdikdik ñan mour indio ion lal. Kin men in, meñe mij eo air ejelok aorõkin katok in binmour eo ie, ej juõn kein katok, einwõt kar mij eo an Jesus. Baptais in ilo mij eo an Christ ededelok ñe rej mij im rej jerkakbiji ñan mour ilañ.
7:8-11—Ewi wãwen an kar ‘jerawiwi, lo ien ekar, kin nan in kaiñi’? Kien eo ear jibañ armij ro ñan melele aolep men ko me rej kitibuj jerawiwi, im kalaplok air kile bwe rej ri jerawiwi. Tokjen men in, rar lo ir make einwõt ri jerawiwi ro ilo elõñ wãwen ko, im elõñlok armij ro rar kile bwe rej ri jerawiwi jen kar mokta. Inem jemaroñ ba bwe jerawiwi ear lo ien ekar kin Kien eo.
Tokjen Katak ko ñan Kij:
1:14, 15. Elõñ un ko ibbed ñan keañ kin news eo emõn ilo kijejeto. Juõn iair ej bwe jej muri ñan armij ro kar wiaik ir kin bõtõktõkin Jesus im ej eddo eo ad ñan jibañ ir jelã kin Anij im karõk ko an.
1:18-20. Armij ro renana im rejjab wãnik “ejjelok air kein jekbin,” kinke kadkad ko jejjab loi kadkadin Anij rej alikar ilo menin kõmanman ko.
2:28; 3:1, 2; 7:6, 7. Elikin an ba men ko me remaroñ kar kaillu Ri Jew ro, Paul ej kwalok nan ko rej kõmera lok men ko ear ba. Men in ej likit juõn joñok ñan kij kin wãwen jemaroñ kamadmõdi aitwerõk ko ilo lolokjen im ilo kabel.
3:4. Elañe nan eo an armij ej idaptõk ibben men eo Anij ej ba ilo Nan eo an, jej kõtlok bwe “Anij en mol” ikijen ad liki ennan eo ilo Bible eo im jerbal ekkar ñan ankilan Anij. Ikijen ad kijejeto im bõk kunad ilo kwalok nan kin Ailiñ eo im jerbal in kõmman ri kalor, jemaroñ jibañ ro jet ñan lo bwe Anij emol.
4:9-12. Kin tõmak eo an Abraham kar watõk e einwõt ri wãnik moktalok wõt jen an kar mwijmwij ke ear 99 yiõ dettan. (Jen. 12:4; 15:6; 16:3; 17:1, 9, 10) Ilo wãwen emmakit in ekajur, Anij ear kwalok ta eo ej kõmman bwe juõn en maroñ jutak ibben ilo wãnik.
4:18. Kejatdikdik ej juõn mõttan eaorõk ilo tõmak. Tõmak eo ad ej bedbed ion kejatdikdik.—Hib. 11:1.
5:18, 19. Kin jejjo wõt nan ko Paul ej baj kamelele kin wãwen Jesus ej einlok wõt Adam, im ilo wãwen in Paul ej kamelele ilo alikar im ilo tukadu kin wãwen juõn armij emaroñ “lelok An mour bwe En binmour ñõn ro relõñ.” (Mat. 20:28) Jej aikwij kajeoñe joñok in kin kilen katakin ilo juõn wãwen ebolemen im kadu.—1 Kor. 4:17.
7:23. Mõttan kein ilo enbwinid einwõt peid, need, im loõd remaroñ ‘kajibokweik kij ñõn kien jerawiwi,’ inem jej aikwij kejbãrok bwe en jab bwid ad kajerbali.
8:26, 27. Elañe jej jelmae wãwen ko relukkun bin im jejjab jelã ta eo jen jar kake, “Jitõb ej akwelap kin kij.” Inem Jehovah, ‘Ri Roñjake jar,’ ej roñjake jar ko rej bed ilo Nan eo An einwõt rej itok jen kij.—Sam 65:2.
8:38, 39. Jorrãn ko, jitõb ro renana, im kien ko an armij rejjab maroñ kabõjrak Jehovah jen an yokwe kij; rejjab aikwij bar kabõjrak kij jen ad yokwe e.
9:22-28; 11:1, 5, 17-26. Elõñ kanan ko kin jeblak eo an Israel ear jejjet kitieir ibben congregation in ri kabit ro, me ro uair kar ‘kir ir, jab jen dri Ju wõt, a bareinwõt jen dri ailiñ ko.’
10:10, 13, 14. Kobalok ibben yokwe eo ad ñan Anij im ñan armij ro, tõmak eo emol ilo Jehovah im kallimur ko an emaroñ kamakit kij bwe en wõr juõn kijejeto ibbed ñan bõk kunad ilo jerbal in kwalok nan eo an Christian.
11:16-24, 33. Eaibujuij wõt an baj jokkin wõt juõn “joij im bin an Anij”! Aet, “Ejman Eo, An jerbal e wãppen; bwe ial ko An otemjej re wãnik.”—Dut. 32:4.
BED ILO BURUKUK KINKE KAR KOWÃNIK IR
“Inem ij akwelap ñõn kom, ro jeiõ im jãtiõ, kin tiriamokake ko an Anij,” Paul ej ba, “bwe komin lelok enbwinemi men in jurtak emour, ekwojarjar, men in kabuñburuen Anij.” (Rom. 12:1) “Inem,” ak kin men in, kinke kar kowãnik Ri Christian ro kin tõmak eo air, nan ko tok ilal ilo eon in ren kar jelet wãwen air lemnak kin ir make, ro jet, im kin maroñ ko an kien.
“Ij ba ñõn jabrewõt armij iami, bwe en jab lemnok kin e mõke eutiej jen emõn en lemnok kake,” Paul ej jeje. “Yokwe en jab ankiliriõp,” ej kakabileklek. (Rom. 12:3, 9) “Armij otemjej ren kiblie ñõn ro routiej jen ir.” (Rom. 13:1) Ikijen men ko rej kitibuj kõmman bebe ko ekkar ñan bõklikit eo an juõn make, ej rejañ Ri Christian ro ñan ‘jab ekajete dron.’—Rom. 14:13.
Emwij Uaki Kajitõk ko Rej Bedbed ion Bible:
12:20—Ewi wãwen jej “ejoji melle kijeek” na ion bõran juõn ri kijirãt? Ilo ien ko ilo Bible, rar likit mãl eo ilo juõn kijeek iloan juõn um, im rar likit melle kijeek eo ion im bareinwõt iumin mãl eo. Ejoji melle kijeek ion mãl eo ej kalaplok an bwil im kin men in ej õnlok ak kajenolok menoknok ko im etton ko ilo mãl eo. Ilo ejja wãwen in lok wõt, jej likit melle kijeek ion bõran juõn ri kijirãt ikijen ad kõmman jerbal ko rejoij ñan e bwe nana eo ilo buruen en õnlok im kwalok kadkad ko remõn kadkadin.
12:21—Ewi wãwen jej “anjo jen nana kin emõn”? Juõn wãwen jej kõmman men in ej ikijen ad beran in kõmmane jerbal eo letok in Anij ñan kwalok kin news eo emõn kin Ailiñ eo mae ien eo ededelok ekkar ñan kõnan eo an Jehovah.—Mark 13:10.
13:1—Ilo wãwen et eo “Anij e ar likiti” ri utiej ro? “Anij ear likiti” ri utiej ro an kien ikijen an kotlok bwe ren iroij, im kin jet iair, Anij ear lolok iman kin iroij eo air. Ej alikar men in ikijen men eo Bible ear kanan kake kin juõn oran kumi in iroij ro.
Tokjen Katak ko ñan Kij:
12:17, 19. Ilo ad idenwõne kin kij make jej bõk men eo me ej kunan wõt Jehovah kõmmane. Elap wõt ad naj wãlok elañe jenaj “ukõt nana kin nana”!
14:14, 15. Jejjab aikwij in kaburomõj eo jeid im jatid ak kalõkatip e kin mõñã ak den ko jej lelok ñan e.
14:17. An wõr juõn kõtan emõn ibben Anij ejjab bedbed ion ta eo juõn ej mõñã ak idak im ejjab bar kin men eo juõn ej bõprae jen an mõñã ak ñan idak. Jen men in, ej jitõñlok ñan wãnik, ainemõn, im lañliñ.
15:7. Jej aikwij jab kalijeklok ilo ad karuwaineneik aolep ro emol air bukõt mol eo ñan loan congregation eo im bar ilo ad keañ kin ennan eo an Ailiñ eo ñan aolep ro jej iion ir.
[Pija ko ilo peij 31]
Binmour eo emaroñ ke jerbal ñan jerawiwi eo kar kõmmane mokta jen kar kõllãiki?