Baibel eo Ej Ukot Mour Ko

Ta eo emaroñ kamakit juõn ian ro uan kumi in jodrikdrik in Mexico ro me rej naetair Junior Satan ñõn an oktõk im erom juõn eo emol, im eniknik ilo jerbal? Etke juõn kõra in Japan eo me business eo an ear lap an lo tõbrõk, ear bwijrõk jen an jibarek mweiuk einwõt mejenkajjik eo an elaptata ilo mour, im ewi wãwen an lemnok kin oktõk ko ear kõmõni? Ta eo emaroñ kamakit juõn dri Russia eo me ej kõmõn im wiakake bu ko im kein tõrinae ko ñõn an jolok jerbal eo an elap an kõmõn jããn ak ear jumae kien? Jen lale ta eo rein kajuju rej ba.

PROFILE

ETAN: ADRIAN PEREZ

RIDTAN: 30

AILIÑ: MEXICO

MOUR EO AN KAR MOKTA: JUÕN UAN KUMI ELEJ

MOUR EO AÕ KAR MOKTA: Ke ear 13 yiõ ridta, baamle eo aõ ear emmakitlok ñõn juõn jikin kwelok ilo Mexico. Ilo ien eo, jodrikdrik ro ilo jikin in ear lap air kõmõni men ko renana, kokkuri men ko rejjab air, im kajerbal uno ko rekajur. Ejjabto ear tarjen joñõn aõ irak dren in karek, kokkure moko im men ko mweien armij ro, im iar mour in lũñ.

Tokelik, kimar emmakitlok ñõn San Vicente, bukwon eo iar lotak ie. Bõtab, kajerbal uno ko rekajur ear oktõk im juõn abañ elap ijo. Ekkã ar lo jodrikdrik ro remij iturin ial ko. Iar kobalok iben juõn kumi etan Junior Satan. Kimar kwot im kajerbal uno in karek ko, elaptata kimij menonoik bwin paint thinner ak juõn kain glue ekajur bwe kimin karek kake. Ekkã aõ jab kememej ewi wãwen aõ kar rol ñõn mweo imõ, im jet ien joñõn aõ jajelokjen ij babu ion ial eo. Jet ian ro mõta rar kalbuj kin air kar kwot im mõnmõn armij.

Meñe elõñ men ko renana iar kõmõni, iar tõmak ilo Anij. Ñõn kadriklok an abnõnõ bõklikõt eo aõ, iar bõk kunaõ ilo kwojkwoj ko an kabuñ. Ilo ien eo rej naetan Wiik eo Ekwojarjar, iar bõk kunaõ ilo kwojkwoj eo me kimij jar ak kõmõn makõtkit ko jet iman kajuju drebail ko 14 rar kajerbali. Bõtab, elikin kwojkwoj eo, kim aolep, ekoba leo me ear einwõt ñe e Kraist, kimar irak dren in karek ele jen joñõn kin am kar bõk kunam ilo ien eo.

WÃWEN AN KAR BAIBEL EO UKÕT MOUR EO AÕ: Ilo ien eo iar jodrikdrik wõt, iar jino katak Baibel iben dri Kennan ro an Jeova. Iar kile bwe mour eo aõ ear ejelok tokjen im elañe iar wõnmanlok wõt ilo wãwen mour eo aõ enana, inaj kar iion wõt jorran. Men eo ear kaitoklimoõ kar nan ko kar je ilo Dri Galetia 6:8: “Bwe eo ej jeor ñõn kõniekin, jen kõniekin e naj marmir wabõnbõn; a eo ej jeor ñõn Jitõb, jen Jitõb e naj marmir mour in drio.” Eon in ear kõmõn aõ kile bwe elañe ikõnan bwe en emõn men otemjej ilo mour eo aõ, iar aikwij jeor ilo aõ lemnok kin ilju im jeklaj.

Ke iar katak Baibel eo, iar jino melele bwe Jeova ej juõn Anij emour eo me ej itoklimo kin iõ, im bwe ej mõnõnõ in jeorlok bwir ko me iar kõmõni ilo ien ko remotlok. Jen men ko kar walok ñõn iõ, iar katak bwe Anij ej roñjake im uaki jar ko.

Ear jab biruru ñõn kõmõn oktõk ko ilo wãwen mour eo aõ. Ear bin ñõn kabwijrõk aõ kobalok iben kumi eo aõ. Meñe iar jab kiõ juõn iair, ear mo ak bin aõ le jen jikin ko me kumi ko relej rej ber ie. Jet ien, iar aikwij kũttiliek jen ro mõta kar mokta kinke rekin kajeoñ bukot iõ im jiber iõ bwe in bar rol ñõn mõnit ko aõ renana.

Ilo oktan, ke iar jino ber ilo kwelok ko ilo Kingdom Hall eo iben dri Kennan ro, iar lo bwe elap air kwalok yokwe ilo congregation eo. Iar bwilõñ bwe tõmak eo an armij rein ear lukkun kajur im bwe rej mour ekkar ñõn ta eo rej katakin kake. Mejatoto eo ie ear lap an oktõk jen ijo ikin ber ie.

WÃWEN AÕ KAR BÕK TOKJEN: Iar baptais einwõt juõn ian dri Kennan ro an Jeova iomin joñoul yiõ ko kiõ. Ij lukkun kate iõ ñõn jerbali katak ko ilo Baibel eo ilo mour eo aõ. Tokjen men in, ij bõk koutiej jen baamle eo aõ. Kiõ rejela kajjiõ einwõt juõn dri jerbal eniknik, im kin men in, iar maroñ jibõñ ak lelok mõnni ñõn ir. Jinõ ear jino katak Baibel im kiõ ej juõn ian dri Kennan ro an Jeova. Jema ej bareinwõt kõmõn oktõk ko ilo wãwen mour eo an. Enañin aolep ro ilo baamle eo aõ rejjab dri Kennan ro an Jeova, bõtab elikin air lo oktõk ko iar kõmõni, rej kile bwe Baibel eo emaroñ jibõñ juõn armij ñõn kõmõnmõnlok mour eo an.

PROFILE

ETAN: YAYOI NAGATANI

RIDTAN: 50

JIKIN: JAPAN

MOUR EO AN KAR MOKTA: JUÕN KÕRA ELAP AN LO TÕBRÕK ILO BUSINESS EO AN

MOUR EO AÕ KAR MOKTA: Iar ridtolok ilo juõn bukwon edrik me eobrõk kin armij ro rejoij. Ear or juõn an jema mõn wia ekilep ilo jikin eo im ear or joñoul dri jerbal ro ie. Mweo imwem ear ber iturin mõn wia eo, inem meñe Jema im Jinõ rar boub, iar jab eñjake aõ mõke iaõ.

Ña ridtotata ian jilu ledrik ro, im jen ke iar ajiri, kar katakin im kamineneik iõ bwe in maroñ naj lale business eo an baamle eo. Iar jodrikdrik wõt ke iar mare. Leo beleiõ ear kamwij an jerbal ilo bank bwe en jibõñ ilo business eo an baamle eo aõ. Ear mõkaj an or jilu nejimro ajiri. Jinõ ear lale ajiri ro im kõmõni jerbal ko ilo mweo, ke ij jerbal jen jiboñ ñõn boñ ilo mõn wia eo. Meñe eindrein, ear or wõt jet ien ko rar bellok ñõn am ber ak kõmõni men ko iben dron einwõt juõn baamle.

Inem kin an driklok mõnni, ear jelet aolep jikin kaikujkuj ko, im business eo am ear jino jorranlok. Ñõn kamarmire abañ eo, kimar bebe ñõn kebellok juõn mõn wia kin men ko kõbwebweien em iturin ial leplep eo. Ilo ran eo mokta jen ien kejerammõn eo ñõn jino ekkal, jema, eo me ej president ñõn company eo am, ear bõk juõn nañinmij in kamelij ilo jidimkij im ear okjak. Ear jab maroñ konono ak kennan, inem iar bõk erro eo ñõn lale mõn wia eo ekãl, im leo beleiõ ear lale mõn wia eo mokta. Kiõ ear lukkun laplok am boub.

Mõn wia eo am ekãl ear lap an lo tõbrõk. Kin aõ mõnõnõ kin tõbrõk ko iar kõmõni, ear drik ien aõ kiki kin aõ kõnan jerbal wõt. Meñe iar yokwe ajiri ro nejiõ, men eo wõt ear lap aõ lemnok kake kar jerbal eo aõ. Ear ejelok ien aõ konono iben leo beleiõ, im ñe kimij konono, elap wõt amro akwail. Ñõn kadriklok ak jolok aõ mõk, iar jino etal enañin aolep boñ im karek iben ro jera im dri jerbal ro mõta. Men ko wõt ij kõmõni aolep ien kar jerbal, karek, im kiki. Ear lukkun lõñ aõ jããn ak iar eñjake an laplok aõ jab mõnõnõ im iar jab melele etke.

WÃWEN AN KAR BIBLE EO UKÕT MOUR EO AÕ: Ke iar jino katak Baibel iben dri Kennan ro an Jeova, ear or jilu bwebwenato ko jen Baibel eo me rar jelet iõ. Iar jõñ ke iar melele kin melelen Matu 5:3, UBS: “Emõnõnõ ro rejelã ke rej aikwiji men ko an Jitõb; bwe air Ailiñ in lõñ!” Eon in ear kemelele kin etke iar eñjake aõ buromõj meñe ear lõñ aõ jããn im dri jerbal ro mõta rar koutiej iõ. Ñõn aõ maroñ bõk mõnõnõ eo emol, iar aikwij kabwe aikwij eo aõ einwõt juõn Kristian.

Ilo ien eo, ear walok juõn abañ kin mõnni iben kien eo an Japan, im wãwen ko dri jerbal ro mõta rar iioni rar kõmõn bwe in kile an mol nan ko ilo 1 Timote 6:9 ñe ej ba: “A ro re kanuij kõnan bwe ren dri mweie, re buñ ilo kabo im oujir im elõñ mõm ko re bwebwe im nana, rej kamaloñ armij im kokkure ir ilo jikin joko.” Iar eñjake bwe nan kein an Jisõs ilo Matu 6:​24, “Kom ban dri korijeran Anij im mweiuk,” rar jejit ñõn iõ, inem iar bebe ñõn kõmõn jet oktak ko ilo mour eo aõ.

Iar kile bwe iar jerwane jema im jinõ, leo beleiõ, im ajiri ro nejiõ. Ear bareinwõt alikar bwe ear or iba jet karkar ko renana. Ear utiej buruõ, iar jaje meanwõr, im emõkaj aõ illulu. Mokta, iar lemnok bwe ijamin naj kar maroñ oktõk im erom juõn dri Kristian. Bõtab, iar lukkun yokwe ajiri ro nejiõ im kile bwe ilo aõ kar jerbale nan in kakabilek ko ilo Baibel ñe ij jerbal iben baamle eo aõ, ajiri ro nejiõ rar mõnõnõ in roñjake iõ. Iar jolok elaplok ien ibeir im bõk ir ñõn kwelok ko an Kristian.

WÃWEN AÕ KAR BÕK TOKJEN: Ilo aõ jela kin karõk eo kin mour im aõ maroñ jerbal ñõn Anij, ak mour ilo juõn wãwen me ej kamõnõnõik e, men in ear letok mõnõnõ eo emol im ekajuburu. Jerbal ejjab men eo moktata im eaurõklok jen baamle eo aõ einwõt kar mokta, inem kiõ iar maroñ bar bõk koutiej eo iar luji.

Ilo an jinõ lo an oktõk karkar ko karkariõ ke iar jerbale nan in kaiñi ko ilo Baibel eo, men in ear kamakit e ñõn katak Baibel eo im erom juõn dri Kristian. Elap aõ mõnõnõ bwe jema im leo beleiõ rar jab jumae bebe ko amro jinõ. Kõtan eo aõ iben ajiri ro nejiõ ear lukkun ebak, im kiõ ij lõñliñ kin juõn mour in baamle elemõnõnõ im ejej uan.

PROFILE

ETAN: MIKHAIL ZUYEV

RIDTAN: 51

JIKIN: RUSSIA

MOUR EO AN KAR MOKTA: JUÕN EO EJ KÕMÕN IM WIAKAKE BU AK KEIN TÕRINAE KO

MOUR EO AÕ KAR MOKTA: Iar ridtolok ilo Krasnogorsk, ijo eobrõk kin men in edrek ko remaroro. Moscow River eo eber turõkin bukwon in. Bukwon wijki ko rar kabole bukwon ko rar ber turilik im tueañin jikin kwelok eo.

Ke iar drik, ear lukkun emõn iba keir pã im ikkure kin kein mõnmõn ko. Iar jolok elap ien ñõn kamineneik enbwiniõ. Iar bareinwõt kõmõn kein mõnmõn ko me kien eo ear kamoiki einwõt bu ko, jot ko, im bakbõk ko. Ejjabto, iar kajutak business in aõ. Ear emõn aõ karõk business eo im iar lo elap tõbrõk ñõn wiakake men ko iar kõmõni ñõn dri nana ro.

WÃWEN AN KAR BAIBEL EO UKÕT MOUR EO AÕ: Ilo jinoin 1990 ko, iar iion dri kennan ro an Jeova, ak mokta iar jab liki ir. Elukkun lap air kajinet.

Juõn ran, juõn iair ear riiti tok ñõn ña Dri Rom 14:12: “Jabrewõt iar e naj lelok nan kin e mõke ñõn Anij.” Iar lemnok kin ta eo inaj kar ba ñõn Anij. Eon in ear kamakit iõ ñõn katak kin ta eo Anij ekõnan bwe in kõmõne.

Iar lukkun kate iõ ñõn jerbale nan in kakabilek eo ilo Baibel eo ilo Dri Kolosse 3:5-10: “Inem komin kajeeklok ra ko rami rej ber ion lõl; lũñ, etton, kijoñ, mõm enana, im arõk mweiuk eo kabuñ ñõn ekjõp; Bwe kin men kein illu an Anij ej itok ion ro dri kiblia. . . . Komin bareinwõt julok men kein otemjej; illu, buru karu, illu aitok, konono nae, im nan ko retton jen loemi: Komin jab riõp ñõn dron, bwe kom ar wutik armij eo mokta kab jerbal ko an. Im kom ar kõnõk armij ekãl.”

Ear lukkun bin iba ñõn kõmõn oktõk rot kein. “Dri nana ro” me rekin itok im wia kein mõnmõn ko jen ña ejjab bwijrõk air kar letok jããn ko ñõn wiaik men kein, im iar lo bwe ear bin aõ drebij aõ illu ke armij ro rar kajirere kake iõ. Meñe kar eindrein, iar kokkure aolep kein mõnmõn ko aõ relõñ im lap wõnair. Ke iar katak kin yokwe eo me Anij im Kraist rar kwalok ñõn iõ, ear kamakit iõ ñõn aõ yokwe ir. Iar niknik ilo aõ katak Baibel, ber ilo kwelok ko an congregation eo, im jar ñõn Anij kin jibõñ.

WÃWEN AÕ KAR BÕK TOKJEN: Jidrik kin jidrik, kin aõ lukkun kate iõ im kin jibõñ eo an ro jeiõ im jãtiõ ilo congregation eo, iar maroñ kakõmõnmõnlok karkar ko karkariõ. Ilo aõ melele bwe Jeova Anij ej kea kake kij kajuju, ekoba ro rar mij, men in elap an kamõnõnõik iõ. (Jerbal 24:15) Elap aõ kaurõk joñok ko an dri Kennan ro an Jeova ilo wãwen air kwalok mol. Im ij kamolol kin itoklimo eo emol rar kwaloke ñõn iõ im kin tiljek eo air ñõn Anij.

Ilo jinoin, jet ian ro ilo baamle eo aõ im ro mõta rar jumae tõmak eo aõ. Ak rar kainemõn ir mõke ilo air lemnok bwe emõnlok aõ bõk kunaõ ilo kabuñ jen aõ ber iben rolul in dri kowaroñ ro. Ij mõnõnõ bwe ejoko aõ kajerbal mour eo aõ ñõn wiakake kein mõnmõn ko ak ij kajerbale ñõn jibõñ ro jet ñõn katak kin Anij in ainemõn eo.

[Pija eo ilo peij 27]

Iar bõk kunaõ ilo kwojkwoj ko an kabuñ in Catholic ñõn kainemõn bõklikõt eo aõ

[Pija eo ilo peij 28]

Ear lõñ aõ jããn ak iar jab mõnõnõ