Ilo Yokwe Jehovah Ej Kea Kin Ri Karejar Ro An Reritto

“Bwe Anij e wãnik wõt, im E jamin meloklok ami jerbal im yokwe, eo kom ar kwalok kin etan.”​—HIB. 6:​10.

1, 2. (a) Ta eo ej kakememej yuk kake ñe kwoj lo juõn armij euwõn? (b) Ewi lemnak eo an Jehovah kin Ri Christian ro reritto?

ÑE KWOJ lo ritto ro reowõn ilo congregation eo, ej kakememej yuk ke kin bwebwenato eo ilo book in Daniel ilo Bible eo? Ilo juõn vision Jehovah Anij ear lelok ñan Daniel, ear pijaik e make einwõt juõn eo euwõn. Daniel ear je: “Ke iar reilok wõt, iar lo air kellajrak jet tron. Juõn eo ekar mour indrio ear jijet ion juõn ian tron ko. Nuknuk ko an rar mouj im einwõt snow, im kolan bõran ear einwõt kolan sheep ekanuij erreo.”​​—Dan. 7:9.

² Wãwen kolan sheep ekkã an lukkun mouj. Kin men in, kol eo euwõn im title eo ‘Eo jen Ien ko Etto’ rej jitõñlok ñan joñan ritto in im meletlet eo an Anij, im men kein jimor rej kalikar bwe ej tellokin an bõk kautiej eo elap jen kij. Inem, ewi lemnak eo an Jehovah, Eo jen Ien ko Etto, kin ritto ro retiljek? Nan in Anij ej ba bwe “uõn in juõn armij ej belin aibujuij, elañe rej loe ilo ial in wãnik.” (Ken. 16:​31) Aet, elañe juõn Ri Christian etiljek euwõn kin an ritto, men in eaibujuij iman mejen Anij. Kwoj errã ke ibben lemnak eo an Jehovah kin ritto ro jeid im jatid?

Etke Raorõk?

3. Etke jej kaorõk ri tõmak ro mõttad reritto?

³ Elõñ ro jeid im jatid reritto im retiljek ñan Anij ilo congregation ko ibelakin lal. Ibwiljin rein reritto rej ro uan Governing Body eo an Ri Kennan ro an Jehovah, circuit im district overseer ro kar mokta im kiõ, pioneer ro rekijejeto, im ri kwalok ro an Ailiñ eo reritto ilo jitõb. Kwomaroñ jelã kajjen jet ro rekijejeto me rar kwalok kin news eo emõn iumin elõñ yiõ ko im joñok ko air remõn kar kamakit buruen ro redik im jelet mour ko air ilo jimwe. Jet ro jeid im jatid reritto rar inek eddo ko relap im rar kijenmij ilo ien matõrtõr kin air kwalok nan kin news eo emõn. Elap an Jehovah im “dri kõrijer etiljek im meletlet” kamolol rein kin aolep jerbal ko air im rar kõmmane mokta im kiõ kin Ailiñ eo.​​—Mat. 24:45.

4. Etke jej aikwij kautiej Ri Christian ro reritto im jar kin ir?

⁴ Ritto rein retiljek rej tellokiir bõk nebar im kautiej jen ri karejar ro jet an Jehovah Anij. Ilo mol, Kien eo Anij ear lelok ñan Moses ej kitibuj ad kautiej im nebar ritto ro ñan ad mijak Jehovah. (Liv. 19:​32) Jej aikwij keini ad jar kin rein retiljek im kamolol Anij kin jerbal ko air ilo yokwe. Ri jilek Paul ear jar kin ri jerbal ro mõttan rejitenburu ibben, ro emõn ded im ro reritto.​​—Read 1 Dri Tessalonika 1:​2, 3.

5. Ewi wãwen am maroñ bõk tokjen jen am kamao ibben ri kabuñ ro reritto an Jehovah?

⁵ Bareinwõt, aolep ro ilo congregation eo remaroñ bõk tokjen jen air kamao ibben Ri Christian ro reritto. Ri kabuñ ro an Jehovah reritto im tiljek rar bõk jelãlokjen eo eaorõk ilo air katak, lale, im kamineneik ir kin men ko rar katak kaki. Rar katak ñan jerbale meanwõd im lemnak kin eñjake ko an ro jet, im ñe rej katakin ro jet kin men ko rar katak kaki men in ej kamõnõnõik im kajuburueir. (Sam 71:​18) Kom jodikdik ro, komin meletlet im bõk jelãlokjen in einwõt ñe kwoj itõk den jen juõn aebõjlõl emũlal.​​—Ken. 20:5.

6. Ewi wãwen jemaroñ kwalok ñan ritto ro bwe jej lukkun kaorõk ir?

⁶ Kwoj kwalok ke ñan ritto ro bwe elap am kaorõk ir einwõt Jehovah? Juõn wãwen kwomaroñ kõmmane men in ej ikijen am make jiroñ ir bwe elap am yokwe ir kin air tiljek im bwe kwoj lukkun kaorõk lemnak ko air. Bareinwõt, ñe kwoj lor nan in kakabilek ko jen ir, kwoj kwalok am kautiej ir. Elõñ Ri Christian ro reritto rej kememej nan in kakabilek ko rar bõki jen ritto ro retiljek mokta im tokjen ko rar walok ilo mour eo air ke rar jerbali.a

Kwalok Am Yokwe ilo Wãwen ko Rekeie

7. Wõn ro mokta Jehovah ej lelok eddo eo ñan kabwe aikwij ko an ritto ro?

⁷ Anij ej lelok ñan family ko an ritto ro eddo eo ñan kabwe aikwij ko air. (Read 1 Timote 5:​4, 8.) Jehovah emõnõnõ im ej kajerammõn family ko ñe rej inek eddo ko air ñan lale ritto ro im kwalok air yokwe ir einwõt ej kõmmane.b

8. Etke congregation ko rej aikwij lemnak kin Ri Christian ro reritto?

⁸ Bareinwõt, Jehovah emõnõnõ ñe congregation ko rej jibañ ritto ro retiljek me rej aikwij jibañ ak ejelok ro nukiir rej ri tõmak ak ro uan family eo air rej mõnõnõ in lale ir. (1 Tim. 5:​3, 5, 9, 10) Ilo wãwen in congregation kein rej kwalok air ‘buru wõt juõn, tiriamokake, im yokwe’ lellab im lõllab rein. (1 Pit. 3:8) Paul ear kwalok juõn wanjoñok kin lemnak eo an congregation eo kin ritto ro uair ke ear ba bwe elañe juõn ra ilo enbwinin armij ej bõk eñtan, “ra ko otemjej rej iñtan iben.” (1 Kor. 12:​26) Ñe rej kwalok tiriamo ñan ritto ro im jibañ ir ilo juõn wãwen ekeie, rej jerbale nan in kakabilek eo an Paul: “Komin bõk men in erro ko an dron, im ein drein komin kajejit kien Kraist.”​​—Gal. 6:2.

9. Ilo wãwen et ko bwijwõlã emaroñ kabañ ro reritto?

⁹ Ta eddo ko ritto ro rej ineki? Elõñ emõkaj air mõk. Ebin air kõmmane men ko ekin bidodo air kõmmani mokta, einwõt etal ñan doctor, make kõllã muri ko air, karreoik mweo imwiir, im kamat kijeir. Kinke ekkã an diklok air kõnan mõñã im idak ñe rej rittolok, remaroñ lemnak bwe ejjab menin aikwij ñan air mõñã ak idak einwõt kar mokta. Emaroñ eindein ñe rej katak Bible ibbeir make im bed ilo kwelok ko. Air rittolok ej kautameik air maroñ read kin an tab mejeir im ebin air roñjake katak ko lor jitõb. Kebojak ñan etal ñan kwelok ko ebar bin ñan ir kin air mõk. Inem, ta eo ro jet remaroñ kõmmane ñan jibañ ritto ro?

Wãwen Am Maroñ Jibañ Ir

10. Ta ko elder ro remaroñ kõmmani ñan jibañ ritto ro ilo wãwen eo ekeie?

¹⁰ Elõñ congregation ko rej likit juõn joñok emõn ikijen air jibañ ritto ro. Ilo yokwe Christian maan im kõrã ro rej jibañ ir ñe rej aikwij kaikujkuj, kamat, im karreo. Rej jibañ ritto ro ñan katak Bible eo, kebojak kin kwelok ko, im keini air bõk kunair ilo jerbal in kwalok nan. Ri Kennan jodikdik ro rej ektak ir im jerbal ibbeir ilo kwalok nan. Elañe lellab ak lõllab ro rejjab maroñ etal ñan kwelok ko, rej bauri katak ko ikijen telephone, ak kanne cassette ko bwe ren roñjake. Enañin aolep ien elder ro rej lolorjake bwe karõk kein ñan kabwe aikwij ko an ritto ro ren tõbrak.c

11. Kwalok juõn bwebwenato kin wãwen eo juõn family ear jibañ juõn lõllab.

¹¹ Bareinwõt Ri Christian ro kajjojo remaroñ kwalok jitõbõn karuwainene im joij. Ke lio belen ear mij juõn brother eritto ear jab maroñ kõllã wõnãn rent eo an kinke ejako jibañ jen lio belen. E kab lio rekin katak Bible eo ibben juõn ri belele im ledik ro ruo nejiir. Ekar wõr juõn em kileplep imwiir. Ke lellab eo ear mij rar lelok ruo room bwe en jokwe ie. Iumin 15 yiõ ko rar mõñã, ettõñ ibben don, im kwalok air yokwe don. Ledik ro nejiir rar bõk tokjen jen tõmak im iminene ko an kin mour, im e bareinwõt ear bõk tokjen jen an kamao ibbeir. Lõllab in ear jokwe ibbeir mae ien ear mij ke ear 89 an yiõ. Family in ejjab bõjrak air kamolol Anij kin aolep jerammõn ko rar bõk kin air kamao ibben ke ear jokwe ibbeir. ‘Ejamin joko jinekjij eo air’ kin air kar jibañ juõn eo ear lor Jesus Christ.​​—Mat. 10:42.

12. Ta eo kwomaroñ kõmmane ñan kwalok am kautiej ritto ro?

¹² Bõlen kwojjab maroñ jibañ juõn ri tõmak eo elõllab ak elellab einwõt family eo ear kõmmane, ak kwomaroñ ektak ir ñan kwelok ko im jerbal in kwalok nan. Bareinwõt kwomaroñ kir ir ñan mweo imõm im bar ãñin ir ñe kwoj jambo. Kwomaroñ lolok ir, elaptata ñe rej nañinmij ak rejjab maroñ etal jen moko imwiir. Bareinwõt, kwoj aikwij kautiej ir ien otemjej im jab likit ir einwõt ajiri. Jej aikwij kobaiki lemnak ko air ñe jej kõmman bebe ko otemjej mae ien eo relukkun emmãlele im ejako air maroñ kõmman bebe ko. Meñe ejako air maroñ kõmman bebe ko, remaroñ kile wõt elañe jej kautiej ir ak jab.

Jehovah Ejamin Meloklok Am Jerbal

13. Etke eaorõk bwe jen kwalok ad lemnak kin eñjake ko an Ri Christian ro reritto?

¹³ Eaorõk bwe jen lemnak kin eñjake ko an ritto ro. Emakijkij an ritto ro lukkun buromõj ñe rejjab maroñ kõtõbrak aolep men ko rekõnan kõmmani kin air ritto im mõjno enbwiniir. Ñan wanjoñok, juõn Christian lellab me ear jerbal ñan Jehovah ilo kijejeto einwõt juõn eo ej kwalok nan full-time iumin 50 yiõ ko ear bõk juõn nañinmij ej kamõjnoik enbwinin im ekanuij bin an bed ilo kwelok ko. Ear jino jañ ke ear keidi jerbal ko an mokta ibben jerbal ko an kiõ me ewõr joñan an maroñ kõmmani. Inem ear jillok im ba, “Ijjab maroñ kõmman jabdewõt men kiõ.”

14. Ta nan in kõketak ko ri karejar ro reritto an Jehovah remaroñ bõk jen sam ko?

¹⁴ Elañe kwo ritto, kwonañin bõk ke kain eñjake rot kein? Ak kwoj ke lemnak jet ien bwe Jehovah ear ellok jen kwe? Bõlen ri jeje sam ear bõk kain eñjake rot kein ke ear rittolok, kinke ear akwelap ñan Jehovah im ba: “Kwon jab jolok iõ kiõ ke ilõllab; kwon jab ellok jen iõ kiõ ke imõjno! . . . Kiõ ke irritto im euwan kolan bõra, O aõ Anij, kwon jab jolok iõ.” (Psa. 71:​9, 18) Emol, Jehovah ear jab illok jen ri jeje sam, im Ejamin ellok jen yuk. Ilo bar juõn sam, David ear kwalok an liki kin wãwen an kar Anij jurake. (Read Sam 68:19.) Kwon liki bwe elañe kwoj juõn Ri Christian lellab ak lõllab etiljek, Jehovah ej bedwõt ibbam im enaj kakajur yuk ran otemjej.

15. Ta eo emaroñ jibañ ritto ro bwe ren debij juõn lemnak ejimwe kin ir make?

¹⁵ Kom Ri Kennan ro reritto, Jehovah ejamin meloklok jerbal ko otemjej komar kõmmani mokta im kiõ ñan kaibujuij E. Bible eo ej ba: “Anij e wãnik wõt, im E jamin meloklok ami jerbal im yokwe, eo kom ar kwalok kin etan.” (Hib. 6:​10) Kin men in, kwon jab bõk lemnak eo ebwid bwe Jehovah ejjab kõnan kajerbal yuk kin am bwijwõlã. Jen an eindein, kwon bõk lemnak ko rejimwe. Kwon lañliñ kin jerammõn ko am im kejatdikdik eo am kin juõn ilju emõn! Ewõr ibbed men ko remõn jej “kejatdrikdrik kaki kin ilju” me Ri Kõmanman eo ad emwij an kallimur kaki. (Jerm. 29:​11, 12; Jerb. 17:31; 1 Tim. 6:​19) Kwon kalmenlokjen kin kejatdikdik eo am, im kate yuk bwe kwon debij juõn lemnak ejimwe. Kwon jab watõk kwe make einwõt juõn armij ejelok tokjen ilo congregation eo!d

16. Etke juõn Christian lõllab ear kõnan bõjrak jen jerbal in elder, ak ewi wãwen kumi in elder ro mõttan rar rejañ e?

¹⁶ Lemnak kin Johan, eo ke ear 80 an yiõ ear lale, Sannie, lio belen etiljek im emij rãjet in enbwinin kiõ.e Christian kõrã ro rej bõk kunair ñan bed ibben Sannie bwe Johan en maroñ etal ñan kwelok ko im kwalok nan. Bõtab, ilo ran ko moktalok, Johan ear iten ebwer im ear jino bõk juõn lemnak bwe ejelok tokjen jerbal eo an einwõt juõn elder ilo congregation eo. Ear toor denin kemjalal jen mejen ke ear kajitõkin emake, “Ta tokjen jerbal eo aõ einwõt juõn elder? Men ko kunaõ kiõ ejjab lap an jibañ congregation eo.” Elder ro mõttan rar lukkun kalikar ñan e bwe iminene im lemnak ko an rar kanuij lap tokjeir ke rar aikwij kõmman bebe ko rej jelet congregation eo. Rar rejañ e bwe en wõnmanlok ilo jerbal eo an einwõt elder, meñe ear jab lap kunan ilo jerbal ko jet. Men in ear lukkun rejañ e, im Johan ej jerbal wõt einwõt juõn elder, einwõt juõn men in jerammõn ñan congregation eo an.

Jehovah Elap An Kea

17. Ta eo Bible ej kallimur kake kin Ri Christian ro reritto?

¹⁷ Jeje ko ilo Bible rej kalikar bwe Christian ro reritto remaroñ mweie lok wõt ilo jitõb meñe rej rittolok wõt ilo enbwin. Ri jeje sam ear ba: “Rej einwõt wijki ko emwij kalbwini iturin imõn Iroij, . . . Rej kalle wõt meñe elab air kenato, im rewãmourur ien otemjej.” (Psa. 92:​13, 14) Meñe ri jilek Paul, emaroñ kar wõr juõn nañinmij ibben, ear ‘jab ebwer; meñe enbwinin e lotlok.’​​—Read 2 Dri Korint 4:​16-​18.

18. Etke ri tõmak ro reritto im ro rej lale ir rej aikwij bõk jibañ jen ro jet?

¹⁸ Elõñ wanjoñok ko rainin rej kamol bwe ritto ro ewõr wõt tokjeir einwõt juõn wijki ej “kalle wõt” meñe rekenato. Ak abañ ko rej waloktok jen nañinmij im bwijwõlã remaroñ kainebataik ritto ro, ekoba ro uan family ko air me rej jibañ ir. Ro rej jibañ ritto ro remaroñ mõk bareinwõt. Ej juõn eddo im bareinwõt juõn jerammõn ibben congregation eo ñan kamole yokwe eo air kin ritto ro im ro rej lale ir. (Gal. 6:​10) Kain jibañ rot in ej kwalok bwe jejjab baj ba wõt ñan ritto ro bwe ren “mãnãn im mãt” ak jej jibañ ir ilo juõn wãwen ekeie.​​—Jem. 2:​15-​17.

19. Etke Ri Christian ro reritto im retiljek rejjab aikwij bere kin juõn ilju im jeklaj emõn?

¹⁹ Bwijwõlã emaroñ ukõt wãwen an juõn Ri Christian jerbal ak emmakit, ak oktak in ejjab kadiklok yokwe eo an Jehovah kin ri karejar rein reritto im retiljek. Jen an eindein, Ej lukkun kaorõk aolep Ri Christian rein retiljek, im ejamin ellok jen ir. (Sam 37:28; Ais. 46:4) Jehovah enaj wõnaak im tel ir ilo ien air bwijwõlã.​​—Sam 48:14.

[Kamelele ko itulal]

Ewi Wãwen Kwonaj Uak?

• Etke kwoj kaorõk Ri Christian ro reritto im retiljek?

• Ewi wãwen jemaroñ kwalok yokwe ñan ri tõmak ro mõttad reritto?

• Ta eo emaroñ jibañ ri karejar ro an Jehovah reritto bwe ren bõk juõn lemnak ejimwe kin juõn ilju im jeklaj emõn?

[Pija ko ilo peij 18]

Ro uan congregation eo rej lukkun kautiej ritto ro