Ta eo ej Lukkun Walok ñõn Juõn Armij ñe Emij?
“An eo an aolep armij eban mij, meñe eo an ro renana . . . Kin air bõk kaje eo kin kijeek eo ejaje kun, im kin air jab mij, eban jemlok air iñtan.”—Clement jen Alexandria, juõn dri jeje me ear mour ilo enañin rubuki yiõ ko elikin an kar Jisõs ber ion lõl.
EINWÕT Clement, ro me rej kowõnmanlok katak eo bwe hell ej juõn jikin iñtan rej lemnok bwe an eo an juõn armij eban mij. Baibel eo ej ke rejetake katak in? Jen lale ta eo Nan eo an Anij ej ba ilo an uaki kajitõk kein ilõl.
Armij eo moktata, Adam, ear ke or iben juõn an eo eban mij? Ukok in Baibel eo an Protestant etan King James Version, ak Authorized Version, ej ba kin ien eo kar kõmõnmõn Adam: “Iroij Anij ear kõmõnmõn im nawãwen armij eo jen bõñõlñõl in ene, im uk botin kin menono in mour, im armij eo ear erom juõn an emour.” (Jenesis 2:7) Lale mõk bwe eon in ejjab ba bwe kar lelok ñõn Adam juõn an.
Ta eo ear walok ñõn Adam elikin an kar jerawiwi? Kaje eo Anij ear lelok ñõn e ear jab ñõn an iñtan in drio ilo hell. Jen an eindrein, ukok in Baibel eo ilo kajin Majõl ej ukõte ilo wãwen in: “Kin menokaru in mejõm kwo naj mõña ekõn, ñõn ien eo kwoj jeblak ñõn brij; bwe ar bõk yuk jen e: bwe brij kwe, im ñõn brij kwo naj jeblak.” (Jenesis 3:19) Nan in keañ eo an Anij ejjab kwalok bwe ear or juõn an me ear mour manlok wõt elikin an kar Adam mij. Ke Adam ear mij, an ear mij.
Eor ke juõn an eban mij ej ber iben armij ro? Anij ear ba ñõn dri kanan Ezekiel: “An eo ej jerawiwi e in naj mij.” (Ezekiel 18:4, The Holy Bible––New Internaltional Version) Dri jilik Paul ear je: “Kin men in, einwõt kin juõn armij [Adam], jerawiwi ej dreloñ ilo lõl, im mij kin jerawiwi; im ein drein mij e ar itok ion armij otemjej, bwe ir otemjej r’ar jerawiwi.” (Dri Rom 5:12) Elañe armij otemjej rej jerawiwi, inem ealikar bwe an otemjej rej mij.
Juõn an emij ej ke jela ak eñjake jabrewõt men? Nan eo an Anij ej ba: “Bwe ro re mour re jela bwe re naj mij: a ro re mij ejelok air jela.” (Ekklisiastis 9:5) Ilo an kemelele kin ta eo ej walok ñõn juõn armij ñe ej mij, Baibel eo ej ba: “Ej jeblak ñõn lõl eo an; ilo ran eo lemnok ko an rejokolok.” (Sam 146:4) Elañe ro remij “ejelok air jela” im ‘lemnok ko air rejokolok,’ ewi wãwen renaj eñjake air iñtan ilo hell?
Jisõs Kraist ear keiri mij einwõt ñe juõn ej kiki. (Jon 11:11-14) Ak, jet remaroñ jumae im ba bwe Jisõs ear katakin bwe hell ej juõn jikin ebwil im bwe renaj jolok dri nana ro na iloan. Jen lale ta eo Jisõs ear lukkun ba kin hell.