Am Katak Mol eo kin Hell, Ewi Wãwen an naj Jelet Yuk?
RO IM rej katakin bwe hell ej juõn jikin iñtan rej kowõnmanlok juõn lemnok elap an bwir kin Jeova Anij im karkar ko karkarin. Emol, Baibel eo ej ba bwe Anij enaj kokkure ro renana. (2 Dri Tessalonika 1:6-9) Ak illu eo ewãnik ejjab karkar eo elaptata karkarin Anij.
Anij ejjab juõn eo ej irenwõne nana kin nana. E mõke ej kajitõk:“Komij lemnak imõnõnõ ke in lale an juõn dri jerawiwi mij?” (Ezekiel 18:23) Elañe Anij ejjab mõnõnõ kin mij eo an ro renana, emõnõnõ ke in lo air iñtan ñõn in drio?
Yokwe ej karkar eo elaptata karkarin Anij. (1 Jon 4:8) Emol, “Jeova emõn ñõn ro otemjej, im men in joij ko An ilõñin men ko otemjej E ar kõmõnmõni.” (Sam 145:9) Ilo okõtõn, Anij ekõnan bwe jen e yokwe kin aolepen buruer.—Matu 22:35-38.
Mijõk kin Hell ak Yokwe Anij, Ewi Iair ej Kamakit Yuk?
Katak eo bwe an otemjej rej iñtan ilo hell ej kowõnmanlok juõn mijõk ejakkar kin Anij. Ilo okõtõn, juõn armij eo ej katak mol eo kin Anij im ej yokwe e enaj kadreklok juõn mijõk ejime kin e. Sam 111:10 ej kemelele: “Mijõk Jeova jinoin meletlet; jelalokjen emõn iben ro otemjej rej kõmõn ein drein.” Mijõk in kin Anij, ejjab bwe juõn ej lukkun lelñoñ, ak ej melelen bwe eor an koutiej dri Kõmõnmõn eo. Ej kõmõn bwe en or iber juõn mijõk ejime ñõn jab kaburomõj Anij.
Lemnok kin ewi wãwen katak kin mol eo kin hell ear jelet Kathleen, juõn kõra 32 an yiõ me ekin kajerbal uno in karek ko. Wãwen mour eo an ear obrõk kin party ko, kõmõn ko relej, drike e mõke im lũñ. Ear ba: “Ikin kalimjek ledrik eo nejiõ me juõn an yiõ im lemnok iba mõke, ‘Lale mõk men in ij kõmõne ñõne. Inaj bwil ilo hell kin men in.’” Kathleen ear kajeoñ in kabwijrõk an bõk uno in karek ko, ak ear jab lo tõbrõk. Ear ba: “Iar kõnan bwe in juõn armij emõn ak aolep men ko ilo mour eo aõ im ilo lõl in rar nana. Einwõt ear ejelok unin ñõn aõ erom juõn armij emõn.”
Inem Kathleen ear iion dri Kennan ro an Jeova. Ear ba: “Iar katak bwe hell ejjab juõn jikin eurur. Eon in kamol ko rar lukkun alikar. Ilo aõ jela bwe ijamin bwil ilo hell, men in ear lap an kainemõn iõ.” Ak ear bareinwõt katak kin kalimur eo an Anij bwe armij renaj maroñ mour in drio ion juõn lõl im emwij karreoiki jen nana otemjej. (Sam 37:10, 11, 29; Luk 23:43) Ear ba, “Eor iba kiõ juõn kejatrikrik emol, kejatrikrik eo ñõn mour in drio ilo Paredais!”
Kiõ ke ejelok an Kathleen mijõk kin iñtan ilo hell, men in enaj ke kabwijrõk e jen an bõk uno in karek ko? Ear ba: “Ñe ij añũri uno in karek ko, ij jar im akwelap ñõn Jeova Anij bwe en jibõñ iõ. Iar lemnok kin wãwen eo ej watõk mõnit kein retton, im iar jab kõnan kaburomõj E. Ear uaki jar ko aõ.” (2 Dri Korint 7:1) An mijõk ñõn kaburomõj Anij ear kamaroñ Kathleen ñõn an jolok an kajerbal uno in karek ko.
Aet, ejjab mijõk eo kin iñtan ilo hell, ak ej ilo ar ejaak juõn yokwe ñõn Anij im juõn mijõk ejime kin e me emaroñ kamakit kij ñõn kõmõnmõn ankil an Anij ñõn ar maroñ bõk mõnõnõ eo in drio. Dri jeje Sam ear je: “Emõnõnõ jabrewõt eo ej mijõk Jeova, eo ej etal ilo ial ko An.”—Sam 128:1.
[Bo̦o̦k/Pija ko ilo peij 9]
WÕN RO NAJ KÕTLOK IR JEN HELL?
Jet ukok in Baibel ko rej kõmõn an walok bwok ilo air ukot ruo nan ko reoktak jen dron ilo kajin Grik, Geʹen·na im Haiʹdes, ñõn melelen juõn wõt nan, “hell.” Ilo Baibel eo, nan in Geʹen·na ej jitõñlok ñõn joko eo ñõn in drio me ejelok kejatrikrik eo ñõn jerkakbiji. Ilo okõtõn, ro ilo Haiʹdes, ak Hedis, eor ibeir kejatrikrik eo ñõn jerkakbiji.
Eñin unin, elikin an kar Jisõs mij im ear jerkakbiji, dri jilik Piter ear kalimuri dri roñjake ro an bwe ar jab likit Jisõs bwe en “berwõt ilo hell.” (Jerbal 2:27, 31, 32; Sam 16:10, King James Version) Nan eo kar ukote “hell” ilo eon in ej nan in Grik eo Haiʹdes. Jisõs ear jab etal ñõn juõn jikin iñtan. Hedis, ak “hell,” ej lũp eo lũpõn armij. Ijellokin Jisõs, eor ro jet im Anij enaj kõtlok ir jen Hedis.
Ikijen jerkakbiji eo, Baibel eo ej ba: “Mij im Hell rar lelok ro remij ilo ir.” (Reveles̃õn 20:13, 14, KJ) Ilo an jolok koban “hell,” men in ej melelen bwe Anij enaj lelok mour ñõn aolep ro ej watõk ir bwe rej tellokin ñõn an kajerkakbiji ir. (Jon 5:28, 29; Jerbal 24:15) Ej juõn kejatrikrik elap an emõn ilo ran ko renaj itok ñe jenaj lo an ro rejitenburu iber drioijtok jen lũp ko! Jeova, Anij eo elap an yokwe, enaj kõmõne men in.