Jibõñ Ro Rejebwãbwe Jen Bwij Eo
“Komin lõñliñ iba; bwe I ar lo s̃ip eo aõ e kar joko.”—LUK 15:6.
1. Ewi wãwen an kar Jisõs kamol bwe ej juõn s̃eperd eo ej yokwe?
JISÕS KRAIST eo ej mõke wõt nejin Jeova, kar naetan “S̃eperd eo elap.” (Hib. 13:20) Jeje ko rar kanan kin itok eo an im kalikar bwe ear juõn S̃eperd ejej uan eo ear bukot “s̃ip rej jebwãbwe” an Israel. (Mat. 2:1-6; 15:24) Bareinwõt, einwõt juõn s̃eperd ej mõnõnõ in lelok mour eo an ñõn kejbãrok s̃ip ko an, Jisõs ear mij einwõt juõn katok in binmour kin ro rej einwõt s̃ip me rej likit air kejatrikrik ilo katok eo an.—Jon 10:11, 15; 1 Jon 2:1, 2.
2. Ta eo emaroñ kar kõmõn bwe jet dri Kristian ro ren bwijrõk jen air jerbal ñõn Anij?
2 Ekaburomõjmõj bwe, jet ian ro rar kamolol kin katok eo an Jisõs im wujleplok mour eo air ñõn Anij, ejoko kiõ air kobalok iben congregation eo an Kristian. Menin kabwerer ko, abañ ko kin ejmour, ak men ko jet remaroñ kar kadriklok air kijejeto im kõmõn bwe ren bwijrõk jen air jerbal ñõn Anij. Bõtab, ien eo wõt remaroñ lõñliñ kin jokõne im mõnõnõ eo me Devid ear konono kake ilo Sam 23, ej ñe rej mõtõn bwij eo an Anij. Ñõn wanjoñok, ear al: “Jeova aõ S̃epherd, I jamin aikwij.” (Sam 23:1) Ro ilo bwij eo an Anij eor ibeir men otemjej rej aikwiji ñõn kejbãrok juõn kõtan emõn iben Anij, ak ejjab eindrein iben s̃ip ro rar jebwãbwe. Wõn emaroñ jibõñ rein? Ewi wãwen remaroñ bõk jibõñ? Ak, ta men ko jemaroñ kõmõni ñõn jibõñ ir jeblaktok ñõn bwij eo?
Wõn Emaroñ Jibõñ?
3. Ewi wãwen Jisõs ear kwalok menin aikwij eo ñõn lomoren s̃ip eo ejebwãbwe jen congregation eo an Anij?
3 Kate ej juõn menin aikwij ñõn lomoren s̃ip ro rej jebwãbwe jen congregation eo an Anij. (Sam 100:3) Jisõs ear kwalok juõn wanjoñok kin men in ke ear ba: “Elañe jibuki s̃ip an armij, im juõn iair ej jebwãbwe, e jab likit ko druatimjuõnñoul im druatimjuõn, im ilok ñõn tol ko, im bukot eo ej jebwãbwe ke? Im elañe ej lo e, emol Ij ba ñõn kom, elap an lõñliñ kin s̃ip in jen druatimjuõnñoul im druatimjuõn ko r’ar jab jebwãbwe. Ein drein Jememiuij ej ber i lõñ E jab kõnan bwe juõn ian rein redrik en joko.” (Mat. 18:12-14) Wõn ro remaroñ jibõñ ro einwõt s̃ip me rar jebwãbwe jen bwij eo?
4, 5. Ta lemnok eo elder ro rej aikwij kwaloke ñõn bwij eo an Anij?
4 Elañe Kristian elder ro rekõnan jibõñ s̃ip ro rejebwãbwe, rej aikwij kememej bwe bwij eo an Anij ej juõn congregation in armij ro emwij air wujleplok air mour ñõn Jeova, aet juõn bwij in ‘s̃ip ko an melaj eo an Anij’ me raurõk. (Sam 79:13) S̃ip rein rej aikwij bõk kejbãrok ilo yokwe, im men in ej melelen bwe s̃eperd ak elder ro rej yokwe rej aikwij kwalok air itoklimo kake ir. Im elap an naj or tokjen ñe elder ro rej lolok ir. Nan in rejañ ko s̃eperd ro rej lelok ilo yokwe emaroñ kakajurlok tõmak eo air im kalaplok kõnan eo air ñõn jeblak ñõn bwij eo.—1 Kor. 8:1.
5 S̃eperd ro an bwij eo an Anij eor ibeir erro eo ñõn bukot s̃ip ro rar jebwãbwe inem kajeoñ in jibõñ ir. Dri jilik Paul ear kakememej elder ro jen Epesõs eo etto kin erro ko air ñõn lale s̃ip ko ke ear ba: “Inem komin kejbãrok kom im lale aolepen bwij eo Jitõb Kwojarjar e ar likit kom dri kaki ilo e, bwe komin najirik eklisia an Iroij, eo E ar wiaik kin bõtõktõk eo An.” (Jerb. 20:28) Eindrein, dri jilik Piter ear rejañ dri kabit elder ro: “Komin s̃eperd bwijin Anij ej ber ibemi, im lale e, jab ilo makoko, a kin ami kõnan, ekar ñõn ankil an Anij; jab kin wõnan dala, a kin ami yokwe; Im komin jab iroij ion men eo emwij likite na ibemi, a komin mõke joñok ñõn bwij eo.”—1 Pit. 5:1-3.
6. Etke elap an s̃ip ro an Anij aikwij bõk kejbãrok jen s̃eperd ro ranin?
6 Kristian s̃eperd ro rej aikwij kajeoñwe Jisõs, ‘s̃eperd eo emõn.’ (Jon 10:11) Ear lap an itoklimo kin s̃ip ro an Anij im ear kalikar aurõkin air kejbãrok ir ke ear jiroñ Saimõn Piter ñõn ‘s̃eperd s̃ip ko an.’ (Riit Jon 21:15-17.) Ranin elap an armij ro rej einwõt s̃ip aikwij bõk kejbãrok, kinke Devil eo ear kalaplok jibarbar ko an ñõn rupe tiljek eo an ro emwij air wujleplok air mour ñõn Anij. Setan ej kajerbal mõjino ko an armij im menin kareelel ko an lõl in ñõn tel s̃ip ro an Jeova ñõn air kõmõn men ko renana. (1 Jon 2:15-17; 5:19) Ro rar bwijrõk jen air jerbal ñõn Jeova elap air mõjino im kin men in rej aikwij jibõñ bwe ren maroñ jerbale nan in kakabilek eo ñõn ‘etetal kin jitõb.’ (Gal. 5:16-21, 25) Ñõn jibõñ s̃ip rein jej aikwij atartar ion Anij, bõk tel jen jitõb eo an, im kajerbal Nan eo an ilo kabel.—Ken. 3:5, 6; Luk 11:13; Hib. 4:12.
7. Ewi joñõn an aurõk ñõn an elder ro kejbãrok ro rej einwõt s̃ip iomin tel eo air?
7 Ilo Israel eo etto, juõn S̃eperd ear kajerbal juõn jokon ak alal eaitok ñõn tel bwij eo an. Ñe s̃ip ko rej dreloñ iloan ak drioij jen worwor eo, rar aikwij ‘etal iomin alal eo’ im ilo wãwen in s̃eperd eo ear maroñ bwini ir. (Liv. 27:32; Mic. 2:12; 7:14) Bareinwõt, juõn s̃eperd ilo congregation eo ej aikwij jela kin wãwen ber eo an bwij eo an Anij iomin tel eo an. (Keiri Jabõn Kennan Ko 27:23.) Kin men in, jerbal in lale ro kajuju ilo congregation eo ej juõn ian men ko raurõk kumi in elder ro rej konono kake. Men in ej kitibuj air kõmõn karõk ko ñõn jibõñ s̃ip ro rar jebwãbwe. Jeova mõke ear ba bwe enaj bukot s̃ip ro an im kejbãrok ir. (Ezek. 34:11) Inem Anij ej mõnõnõ ñe elder ro rej kõmõni ejja jibarbar ko wõt ñõn jibõñ s̃ip ro rejebwãbwe ñõn air bar jeblak ñõn bwij eo.
8. Ilo wãwen it ko elder ro remaroñ kejbãrok kajuju s̃ip ko?
8 Ñe juõn dri tõmak enañinmij, ej juõn menin kalõñliñ im kõkãtok ñe juõn s̃eperd ak elder an Anij ej lolok e. Enaj eindrein ñe rej kwalok air kea im lolok juõn s̃ip emõjino ilo tõmak. Elder ro remaroñ riiti eon ko, kwalok point ko jen juõn buk, bwebwenato kin men ko relap kar katak kake ilo kwelok, jar iben, im men ko eierlok wõt. Remaroñ kalikar bwe ro ilo congregation eo renaj mõnõnõ ñe rej lo an bar jeblak ñõn kwelok ko an congregation. (2 Kor. 1:3-7; Jem. 5:13-15) Air lolok e, konono iben ilo telephone, ak jeje juõn letter emaroñ lap an jibõñ e! Ñe elder eo etiriamokake ej lelok jibõñ ñõn juõn s̃ip me ejoko jen bwij eo, men in emaroñ bareinwõt kalaplok lõñliñ eo an mõke.
Kij Aolep Jemaroñ Kate ñõn Jibõñ
9, 10. Etke kwomaroñ ba bwe ejjab elder ro wõt rej aikwij kwalok air itoklimo kin s̃ip ro rar jebwãbwe?
9 Jej mour ilo ien ko elap boub im nana, inem jemaroñ jab kile ñe juõn dri tõmak eo mõtar ej jebwãbwe jen congregation eo. (Hib. 2:1) Ak, s̃ip ro an Jeova relukkun aurõk iben. Kajuju iair eaurõk, einwõt an aurõk kajuju mõtõn ko ilo enbwinin juõn armij. Kin men in, kij aolep jej aikwij kwalok ar itoklimo kin ro jeer im jãtir im lukkun kea kake ir. (1 Kor. 12:25) Ej eindrein ke lemnok eo am?
10 Meñe elder ro rej bõk erro eo ñõn bukot im jibõñ s̃ip ro rar jebwãbwe, ejjab ir wõt rej aikwij kwalok air itoklimo kake ro me rejoko jen congregation eo. Ro jet remaroñ jibõñ s̃eperd rein. Jemaroñ im ej juõn menin aikwij ñõn lelok nan in rejañ im jibõñ ñõn ro jeer im jãtir man im kõra me rej aikwij jibõñ ñõn jeblak ñõn congregation eo. Ewi wãwen jemaroñ lelok jibõñ ñõn rein?
11, 12. Ewi wãwen kwomaroñ bõk jerammõn eo ñõn jibõñ juõn eo ej aikwij jibõñ ilo jitõb?
11 Jet ien, elder ro remaroñ karõk bwe dri kwalok ro me eor air iminene ren katak Baibel iben ro rar bwijrõk jen air jerbal ñõn Anij ak kiõ rekõnan bõk jibõñ. Unin jej kõmõn jibarbar rot kein ej ñõn jibõñ rein ñõn bar ejaak ‘yokwe eo air mokta.’ (Rev. 2:1, 4) Jemaroñ kõkãtok dri tõmak rein im jibõñ ir ñõn kakajurlok tõmak eo air ilo ar etale ibeir katak ko rar jab roñjake kin air kar joko jen congregation eo.
12 Elañe elder ro rej kajitõk ibõm ñõn katak iben juõn dri tõmak me ej aikwij jibõñ ñõn kakajurlok tõmak eo an, jar ñõn Jeova bwe en tel im kejerammõn jibarbar ko am. Aet, “kwon likit jerbal ko am na iben Jeova, im naj kabin bebe ko am.” (Ken. 16:3) Kwon kalomõnlokjen kin eon ko ilo Baibel im point ko rej kakajur tõmak me kwomaroñ kajerbali ñe kwoj katak iben ro rej aikwij jibõñ ko ilo jitõb. Lemnok kin joñok eo emõn an dri jilik Paul. (Riit Dri Rom 1:11, 12.) Paul ear kanuij lap an kõnan lo dri Kristian ro ilo Rom ñõn kakajur ir kin menin jerammõn ko ilo jitõb bwe ren maroñ jutõk bin ilo tõmak. Ear bareinwõt reimanlok ñõn an bõk kõkãtok jen ir. Etke jejjab bõk ejja lemnok rot in ñe jej jibõñ s̃ip ro rejebwãbwe jen bwij eo an Anij?
13. Ta eo kwomaroñ bwebwenato kake iben juõn eo ear bwijrõk jen an jerbal ñõn Anij?
13 Ilo ien eo kwoj katak iben, kwomaroñ kajitõk, “Ewi wãwen am kar jela mol eo?” Rejañ e ñõn kwalok kin men ko rekalõñliñ ear iioni ke ear ber ilo kwelok ko, ilo jerbal in kwalok nan, im ilo kwelok ko relap. Kwalok kin ien ko remõn komro ar iioni iben dron ilo amiro kar korijer ñõn Jeova. Im kwalok kin lõñliñ eo am ilo am ruaklok ñõn Jeova. (Jem. 4:8) Kwalok am kamolol kin wãwen an Anij kabwe aikwij ko an armij ro an, elaptata ilo an letok kainemõn im kejatrikrik ilo ien ko jej iion iñtan ko.—Rom. 15:4; 2 Kor. 1:3, 4.
14, 15. Ta jerammõn ko jemaroñ kakememej ro remõjno ilo tõmak me rar lõñliñ kaki mokta?
14 Bwelen, emaroñ or tokjen ñõn kakememej e kin jet jerammõn ko ear lõñliñ kaki ke ear jerbal ilo congregation eo. Ñõn wanjoñok, ekar or jerammõn eo ñõn bõk jelalokjen eo kin Nan eo an Anij im karõk ko an. (Ken. 4:18) Ke ear “etetal kin Jitõb,” ejelok berre bwe ear birurulok an jumae menin in kabo ko ñõn jerawiwi. (Gal. 5:22-26) Im juõn bõklikõt erreo ear kamaroñ e ñõn kebak Jeova ilo jar im ñõn an lõñliñ kin ‘ainemõn jen Anij, eo ej elã jen jela otemjej, im ej kejbãrok buruer im lemnok ko ar.’ (Pil. 4:6, 7) Kwon kememej point kein, kwalok itoklimo eo emol, im ilõñin men otemjej, kwon rejañ eo jeõm ak jãtõm ñõn jeblak ñõn congregation eo.—Riit Dri Pilippai 2:4.
15 Ak ta elañe kwoj juõn elder me ej lolok ro me rar bwijrõk jen air jerbal ñõn Anij. Kwomaroñ rejañ dri belele ro ñõn air kememej tok ien eo rar katak kin mol eo ilo Nan eo an Anij. Mol eo ear lukkun aibujuij, alikar, kajuburu, im kar kanemkwoj ir jen katak ko rewan! (Jon 8:32) Burueir ear obrõk kin kamolol kin ta ko rar katak kaki kin Jeova, yokwe eo an, im karõk ko an raibujuij! (Keiri Luk 24:32.) Kakememej ir kin kõtan eo ebak iben Jeova im jerammõn eo kin jar me ro emwij air wujleplok air mour rej lõñliñ kake. Kanuij rejañ ro remõjno ilo jitõb ñõn bar emmakit ñõn “gospel e aibujuij an Anij e mõnõnõ,” Jeova.—1 Tim. 1:11.
Wõnmanlok im Kwalok Yokwe ñõn Ir
16. Kwalok juõn wanjoñok ñõn kalikar bwe jibarbar ko ñõn lelok jibõñ ilo jitõb elap an or tokjen.
16 Nan in rejañ kein remaroñ ke jerbal? Aet. Ñõn wanjoñok, juõn jodrikdrik eo ear jino an jerbal einwõt juõn dri kwalok kin Ailiñ eo ke ear 12 an yiõ ear bwijrõk an kõmõne ke ear 15 yiõ ridtõn. Bõtab, tokelik ear bar niknik ilo jerbal in kwalok full-time iomin 30 yiõ ko. Unin an bar niknik im kajur ilo tõmak ej kinke elap an kar bõk jibõñ jen juõn elder ilo congregation eo im elap an kar kamolol kake.
17, 18. Ta karkar ko renaj jibõñ yuk ñõn jibõñ juõn eo ear jebwãbwe jen bwij eo an Anij?
17 Yokwe ej kamakit dri Kristian ro ñõn jibõñ ro rar bwijrõk jen air jerbal ñõn Anij ñõn air bar jeblak ñõn congregation eo. Ke Jisõs ear konono ñõn dri kalor ro an ear ba: “Kien ekãl Ij lewoj ñõn kom, komin yokwe dron; einwõt I ar yokwe kom, komin bareinwõt yokwe dron. Ilo men in armij otemjej re naj jela bwe komij dri kalora, elañe komij yokwe dron.” (Jon 13:34, 35) Aet, yokwe ej kakõlõn dri Kristian ro remol. Jej aikwij ke kwalok yokwe in ñõn dri Kristian ro emwij air baptais ak ejoko air jerbal ñõn Jeova? Aet jej aikwij! Ak ñe jej jibõñ rein, jej aikwij kememej ñõn kwalok karkar ko karkarin Kristian.
18 Elañe kwokõnan jibõñ juõn eo ear jebwãbwe jen bwij eo an Anij, ta karkar ko kwoj aikwij kwaloki? Ijellokin yokwe, kwoj aikwij kwalok tiriamo, joij, inemõn, im meanwõr. Kwomaroñ bareinwõt aikwij kwalok jitõbõn jeorlok bwir ekkar ñõn wãwen ko kwoj iioni. Paul ear je: “Komin kõnõk buruen tiriamo, joij, etã buru, inimõn, jejanunoij; Im komin meamiwõr ñõn dron, im jeorilok nana jen dron, elañe iben jabrewõt iami eor ruõn iben bar juõn; im einwõt Kraist e ar jeorilok ami nana, en ein drein bareinwõt ami kõmõn ñõn dron: Ak ion men kein otemjej komin kõnõk yokwe, eo ken lukwõj ej kowãppemi.”—Kol. 3:12-14.
19. Etke eor tokjen ñõn kõmõn jibarbar ko ñõn jibõñ ro rej einwõt s̃ip ñõn air jeblak ñõn congregation eo?
19 Katak in tok juõn enaj etale un ko unin an jet jebwãbwe jen bwij eo an Anij. Enaj bareinwõt kwalok kin wãwen ko ro rejebwãbwe remaroñ kõtmene kake ñe rej jeblak. Ñe kwoj etale katak eo tok juõn, im kalomõnlokjen kin katak in, enaj or am liki bwe jabrewõt jibarbar ko kwoj kõmõni ñõn jibõñ rein rej einwõt s̃ip ñõn jeblak ñõn congregation eo eor tokjen. Ilo jukjuk im ber in kiõ, elõñ armij rej kajerbal ien ko air ñõn koorlok mweiuk, ak mour eo an juõn armij elaplok an aurõk jen aolep mõnni ko ilo lõl in. Jisõs ear kalikare men in ilo wanjoñok eo an kin s̃ip eo ejebwãbwe. (Mat. 18:12-14) Kimij kejatrikrik bwe kwonaj kememej men in ñe kwoj kõmõn jibarbar ko ñõn jibõñ s̃ip ro an Jeova me rar jebwãbwe jen bwij eo.
Ewi Wãwen Kwonaj Uak?
• Ta erro eo an Kristian s̃eperd ro kin ro rej einwõt s̃ip me rar jebwãbwe jen bwij eo?
• Ewi wãwen am maroñ jibõñ ro me rej bwijrõk jen air kobalok iben congregation eo?
• Ta karkar ko remaroñ jibõñ yuk ñõn jibõñ ro me rar jebwãbwe jen bwij eo?
[Pija eo ilo peij 10]
Ilo yokwe Kristian s̃eperd ro rej kate ir ñõn jibõñ ro me rar jebwãbwe jen bwij eo an Anij