Kejbãrok Yuk Mõke jen Jitõb ro Renana

JEMES ear drik im ridtolok ilo juõn jikin etolok ilo ene eo etan Malaita ilo ailiñ in Solomon Islands. Jen ke ear jodrikdrik, kar katakin e ñõn koutiej jitõb ro. Ej ba, “Ijamin naj kar kajitõk iben jitõb ro ñõn kejorran ro jet, ak ijjab lemnok bwe jemaroñ lo mõnõnõ ilo mour ijellokin ar kajerbal rarafono [mõnit eo an ailiñ eo ñõn kajitõk jibõñ jen jitõb ro] ñõn bõk kejbãrok jen jorran ko.”

Einwõt wãwen ko an armij ro ilo elõñ ailiñ ko ilo lõl in, ro rej jokwe ilo Solomon Islands rej tõmak bwe jitõb ro remaroñ jibõñ ak kejorran juõn armij. Ilo mol, elõñ armij ro jen ailiñ ko ilo Melanesia einwõt Fiji, Solomon Islands im Papua New Guinea, rej yokwe jitõb ro me rej ba rejoij im rejjab mijõk ir.

Tõmak kin jerbal ko an jitõb ro ej alikar ilo elõñ wãwen ko. Ñõn wanjoñok, ke Jemes ear drik, kõra ro ilo bukwon eo an rekin kaiur kin ajiri ro nejiir im dreloñ iloan moko jabrewõt ien rar roñ ainiken an jõñ bao eo ekilmej etan korokoro. Etke? Rar tõmak bwe an jõñ ainiken bao eo ej melelen bwe juõn enaj jorran.

Jet armij in bukwon eo rej likit juõn dreka emouj im ejej uan ion kejem in moko imwiir. Jemes ear kõmõn eindrein kinke ear tõmak bwe dreka eo enaj kejbãrok e jen jitõb ro me remaroñ kejorran e. Im ke Jemes ear ber ilo jikin jerbal, ear aini bween mõña in raelip ko kijen im likiti ilo juõn bãg ñõn jokobiji tokelik. Men eo elaptata ear inebata kake ej bwe juõn dri ekkõbel enaj kar lo bween mõña ko im kajerbali ñõn kõbel e bwe en nañinmij.

Meñe ejeja air kõmõne mõnit kein ilo ailiñ eo am, bwelen einwõt Jemes kwoj iñjake bwe ej menin aikwij ñõn lor mõnit ko an ailiñ eo am ñõn bõk kejbãrok jen jitõb ro renana. Kwomaroñ tõmak bwe elañe kwojjab bõk kwonam ilo mõnit kein inem jorran enaj walok ñõn yuk.

Elañe kwoj koutiej Baibel eo, ejelok berre kwonaj kõnan jela ta eo ej ba ñõn uak kajitõk kein: (1) Ta jorran ko jitõb ro renana remaroñ bõktok iom? (2) Am lor jet mõnit ko an ailiñ eo remaroñ ke kõmõn bwe kwon ber iomin kajur eo an dimon ro? (3) Ewi wãwen kwomaroñ lo kejbãrok eo emol jen jitõb ro renana im mõnõnõ wõt?

Wãwen Jitõb ro Renana Rej Bõktok Jorran

Baibel eo ej kwalok bwe jitõb ro renana rejjab armij ro rar mij. Nan in Anij ej ba: “Ro re mour re jela bwe re naj mij: a ro re mij ejelok air jela.” (Ekklisiastis 9:5) Ilo mol, jitõb ro renana rej enjel ro rar jumae im kobalok iben Setan ilo air kajeoñ in mone armij ro.​—Reveles̃õn 12:9.

Baibel eo ej lukkun kalikar bwe jej aikwij bõk kejbãrok jen jitõb ro renana. Dri jilik Paul ear jeje ñõn dri Kristian ro ilo Epesõs: “Aruij oktak e jab iben bõtõktõk im kõniek, a . . . iben jaran jitõb renana ijo ko i lõñ.” Dri jilik Piter ear kwalok kin iroij eo an aolep jitõb ro renana, Setan Devil eo, einwõt juõn “laiõn e rorror, ej etetal wõt im bukot eo ej maroñ in kõñi.”​—Dri Epesõs 6:​12; 1 Piter 5:8.

Setan ej kejorran armij elaptata ikijen an tel biloik ir, mone ak kabo ir ñõn kõmõni men ko ilo juõn wãwen me ej kaillu Anij. Baibel eo ej ba bwe Setan “ej mõke kõmõne enjel in maram.” (2 Dri Korint 11:14) Ej kõmõn e mõke einwõt ñe ej juõn jitõb in kejbãrok, ak ilo mol, kõtõbar eo an enana. Setan ej kabiloik lemnok ko an armij jen mol eo kin e im mol eo kin Anij. (2 Dri Korint 4:4) Ta mejenkajik eo an ilo an mone armij ro?

Setan elukkun kõnan bwe armij ro ren kabuñ ñõn e ilo air jela ak jab jela kake. Ke Jisõs, Eo ej mõke wõt Nejin Anij, ear ber ion lõl, Setan ear kõnan bwe en “bero im kabuñ” ñõn e. Jisõs ear ba: “Kwon ilok, Setan: bwe ar je, Kwon kabuñ ñõn Iroij am Anij, im kwon jerbal ñõn E wõt.” (Matu 4:​9, 10) Jisõs ear makoko in kõmõn jabrewõt men me enaj kar kwalok bwe ear kõtãik e ak kabuñ ñõn Setan.

Jeova ej eo ekajur otem kajur ian aolep jitõb ro im ejamin kõtlok bwe ro rej bokake e ren lo jorran ñõn in drio. (Sam 83:18; Dri Rom 16:20) Bõtab elañe jenaj kabuñburuen Jeova Anij einwõt kar Jisõs, jej aikwij kejbãrok bwe jen jab kõtãik kij ak kabuñ ñõn Setan im dimon ro an. Ñõn kõmõn eindrein, jej aikwij kile mõnit ko me rej kitibuj koutiej im kabuñ ñõn jitõb ro renana. Ewi wãwen jemaroñ kõmõne men in?

Kile Mõnit ko Rejjab Kabuñburuen Anij

Jeova Anij ear kakkõl armij ro an ilo ran ko etto, dri Israel ro, bwe ren jab anõk jet ian mõnit ko an dri ailiñ ko rar ber ituriir. Ear ba: “Ren jab lo ibõm jabrewõt eo . . . ej anijnij, ak juõn ej marmir, ak juõn ej drikanij, ak juõn ej kõmao iben dimon ro, ak juõn ej bebe iben anij dri komao iben.” Ikijen ro rar lor mõnit kein, Baibel eo ej ba: “Jabrewõt eo ej kõmõn men rõt kein, ej men in jõjõik ñõn Jeova.”​—Duteronomi 18:10-​12.

Inem, ñe kwoj etale mõnit ko ekkã air kõmõni ilo ijo jikõm, lemnok kin kajitõk kein: Mõnit eo ej ke kowõnmanlok tõmak eo kin kabuk kakõle ko? Ej ke kwalok bwe jet men ko eor air kajur ñõn kejbãrok kij? Ej ke kitibuj ekkõbel ak bõk kejbãrok jen ekkõbel? Enaj ke kitibuj ar kõtãik ak kabuñ ñõn jitõb ro im jab ñõn Jeova ak Jisõs, eo ear kãlete bwe en jutõk ikijen?​—Dri Rom 14:11; Dri Pilippai 2:​9, 10.

Eaurõk bwe kwon karmijete jabrewõt mõnit ko me rej kowõnmanlok jerbal in marmir ko. Etke? Kar kakõrmol dri jilik Paul ñõn je: “Kom jab maroñ in mõña jen tebel an Iroij, im jen tebel in dimon rõn.” Ear kakkõl bwe ro rej kajeoñ in kabuñburuen Anij im jitõb ro jet jimor renaj “kaillu Iroij.” (1 Dri Korint 10:20-​22) Jeova Anij ej tellokin ar kabuñ ñõn e wõt im ej kakien bwe jen kõmõn eindrein.​—Exodus 20:​4, 5.

Bareinwõt, lemnok kin kajitõk in: Mõnit eo ej ke kowõnmanlok lemnok eo bwe juõn armij ejjab bõk erron kõmõn ko an? Ñõn wanjoñok, lejen im babu iben dron mokta jen mare rej jet men ko me elõñ jukjuk im ber ko rejjab mõnõnõ kaki im Baibel eo ej kananaiki. (1 Dri Korint 6:​9, 10) Bõtab, ilo jet mõnit ko ilo Pacific, ejelok nana elañe juõn ledrik ej ba bwe kar kanõke, melelen, ej ba bwe kar kareel e ñõn babu iben juõn armij kin air kar kõbel e.

Bõtab, Baibel eo ej katakin bwe jej bõk erron kõmõn ko ar. (Dri Rom 14:12; Dri Galetia 6:7) Ñõn wanjoñok, kõra eo moktata, Iv, ear lemnok bwe Setan ear mone ñõn jab bokake Anij, ilo an ba: “Serpent eo e ar mone iõ, im I ar mõña.” Bõtab, Jeova ear kõmõn bwe Iv en uak ekkar ñõn kõmõn ko an. (Jenesis 3:​13, 16, 19) Ej bareinwõt kõmõn bwe jen uak ekkar ñõn mwil eo mwilid.​—Dri Hibru 4:​13.

Ta eo Kwoj Aikwij Kõmõne?

Elañe kwokõnan kabuñburuen Anij im mour ekkar ñõn nan in kakabilek ko ilo Baibel eo, kwoj aikwij kõmõn jabrewõt men ñõn kejbãrok yuk mõke jen Setan im dimõn ro an. Ro emol burueir me rar jokwe ilo Epesõs ilo ebeben eo kein kajuõn rar likit juõn joñok emõn ikijen men in. Ñõn kajenolok ir mõke jen kajur eo an jitõb ro renana, rar aini aolep buk ko air me rej kitibuj jerbal in anijnij im “tili iman mejen armij otemjej.”​—Jerbal 19:19.

Mokta jen air kar tili buk ko, armij rein kajjojo rar “itok, im kwalok, im kajela kin kõmõn ko air.” (Jerbal 19:18) Katak eo an Paul kin Kraist ear kamakit burueir ñõn kokkure buk in anijnij ko air. Bareinwõt rar ukot lemnok ko air ikijen mõnit ko an ailiñ eo air.

Emol, jolok mõnit ko an ailiñ eo emaroñ jab juõn men ebiruru ñõn kõmõne. Jemes, me kar konono kake moktalok ear jelmae aituerõk in. Ear jino katak Baibel iben Dri Kennan ro an Jeova im ear lo lõñliñ ilo men ko ear katak kaki. Bõtab, ear wõnmanlok wõt im kajerbal rarafono. Ke ear etale lemnok eo an kin mõnit kein, ear lo bwe ear tõmak ilo kalimur ko an Jeova kin ilju im jeklaj, bõtab ear iñjake bwe ñõn an bõk kejbãrok jen jorran kiõ, ear aikwij atartar wõt ion mõnit kein.

Ta eo ear jibõñ Jemes ñõn ukot lemnok eo an? Ej ba: “Iar jar ñõn Jeova bwe en kejbãrok im jibõñ iõ ñõn likit aõ liki ilo e. Ilo ejja ien eo wõt, iar jolok mõnit ko an ailiñ eo aõ.” Ear ke or jorran ear walok ñõn e? Jemes ej ba, “Jaab. Men eo wõt ear walok ej bwe iar katak ñõn liki Jeova. Emwij aõ lo kin wãwen Jeova emaroñ einwõt juõn jerar ebak.” Ilo mol, iomin jiljilimjuõn yiõ ko, Jemes ear jerbal einwõt juõn full-time dri kwalok nan im jibõñ ro jet ñõn katak kin ta eo Baibel ej katakin.

Etke kwojjab lore joñok eo an Jemes? Etale mõnit ko me jukjuk im ber eo am rej kejbãroki, im kajerbal maroñ in jela eo am ñõn lale elañe rej errã iben “ankil an Anij.” (Dri Rom 12:​1, 2) Inem kwon beran ñõn kajenolok yuk jen mõntin kajitõbtõb. Elañe kwoj kõmõn eindrein, kwomaroñ liki bwe Jeova enaj “bõk” yuk im kejbãrok yuk. (2 Dri Korint 6:​16-​18) Einwõt Jemes, kwonaj lo bwe emol kalimur in ilo Baibel: “Etan Jeova juõn imõn bar e kajur; dru wãnik ej kone inem ejelok an uota.”​—Jabõn Kennan Ko 18:10.

[Pija eo ilo peij 11]

“Korokoro”

[Credit Line]

Jen Dr. Bakshi Jehangir

[Pija eo ilo peij 11]

Juõn ledrik ej aini bween mõña ko bwe ren jab maroñ kajerbali ñõn ekkõbel