Ear Or ke Kwonam Mokta ilo Congregation Eo? Kwomaroñ ke Bar Bõk Kwonam?
KWAR ke mokta bõk juõn jerbal ilo Kristian congregation eo? Bwelen mokta kwar juõn ministerial servant ak juõn elder. Ak bwelen kwar jerbal full time ilo juõn ian jerbal ko an rolul in. Ejelok berre kwar lo lõñliñ im mõnõnõ ilo jerbal eo am, bõtab kwar aikwij bwijrõk kin jet un ko.
Bwelen unin am kar bwijrõk kinke kwar aikwij in jibõñ ro uan baamle eo am. Ijo turãjet, bwelen kwar aikwij bwijrõk kinke ejmour eo am ear jab emõn ak kwo ridtolok. Bebe eo am ñõn bwijrõk kin un kein ejjab melelen bwe kwo likjõp. (1 Tim. 5:8) Ilo ran ko an dri jilik ro mokta, Pilip ear jerbal einwõt juõn mejinede, bõtab tokelik ear jokwe ilo Seseria, ñõn lale baamle eo an. (Jerb. 21:8, 9) Ke ear bwijwõlã, Kiñ Devid ear karõk bwe leo nejin, Solomon, en bõk tron eo an. (1 Kiñ 1:1, 32-35) Meñe eindrein, Jeova ear yokwe wõt Pilip im Devid im armij ro ilo ran kein rej kaurõk wõt ir.
Emaroñ bwe kwar luji jerbal eo am ilo congregation eo. Bwelen kwar kõmõn juõn bwir elap ak kar or abañ ko ilo baamle eo am. (1 Tim. 3:2, 4, 10, 12) Bwelen kwojjab errã kin air bõk jerbal eo am jen kwe im kwoj lõkatip kake ñõn kiõ.
Kwomaroñ Bar Jibarek Jerammõn Kein
Kwomaroñ ke bar bõk jerammõn ko kwar luji? Aet, bõtab ej aikwij or am kõnan ñõn jibareki. (1 Tim. 3:1) Etke ej aikwij or am kõnan? Kin ejja un eo wõt unin am kar wujleplok mour eo am ñõn Anij, ej yokwe eo am ñõn Jeova im ro rej korijer ñõn e. Elañe kwokõnan kwalok yokwe in ikijen am bar bõk kwonam ilo jerbal ko ilo congregation eo, Jeova emaroñ kajerbal jela eo am kin jerbal eo kwar kõmõne moktalok im elikin am kar luji jerammõn eo am ilo congregation eo.
Jemaroñ kememej kin kalimur eo Jeova ear kwalok ñõn ailiñ in Israel ke rar luji jerammõn ko air jen e. Nan eo An ej ba: “Ña ij Iroij im ijjab oktak. Innem kom ro inen Jacob, komij jañin lukkun jako.” (Mal. 3:6, UBS) Jeova ear yokwe dri Israel ro im ear kõnan wõnmanlok wõt im kajerbal ir. Jeova ej bareinwõt itoklimo in kajerbal yuk ilo ran ko rej ber iman. Ta eo kwomaroñ kõmõne kiõ ke ejelok am jerbal ilo congregation eo? Ñõn bõk jerbal ko an Anij ej wawa ion kõtan eo ar iben Jeova jen ar atartar ion maroñ ko ar mõke. Inem kinke ejelok am erro ilo congregation eo, kwomaroñ lemnok kin wãwen ko kwomaroñ kakajur kõtan eo am iben Jeova.
Ñõn “kajur” ilo tõmak, kwoj aikwij “bukot Jeova im An kajur.” (1 Kor. 16:13; Sam 105:4) Juõn wãwen ej ikijen am jar jen buruõm. Ñe kwoj kwalok abañ ko am ñõn Jeova, kwon kwalok iñjake ko am ñõn e im kajitõk kin jitõb kwojarjar eo an. Ilo am kõmõne men in, kwonaj ebakelok Jeova, im tõmak eo am enaj bin. (Sam 62:8; Pil. 4:6, 13) Bar juõn wãwen kwomaroñ kakajur kõtan eo am iben Jeova ej ikijen am katak kin Nan eo An. Kinke edrik erro ko am ilo congregation eo, emaroñ kamaroñ yuk ñõn kalaplok am katak ibõm mõke im iben baamle eo am, im bwelen kwomaroñ jeblak ñõn karõk eo am kar mokta.
Emol, kwoj juõn ian Dri Kennan ro an Jeova wõt. (Ais. 43:10-12) Jerammõn eo elap jabrewõt iar emaroñ bõke ej bwe jen “dri jerbal iben Anij.” (1 Kor. 3:9) Ñe jej kalaplok jerbal eo ar kin kwalok nan, jej kakajurlok kõtan eo ar iben Anij im iben dri kwalok ro mõtar.
Kijenmij ion Iñjake ko Am
Ñe kwoj luji jerammõn ko am ilo congregation eo, kwomaroñ jook ak ajlok kake. Kwomaroñ kowãnik yuk mõke bwe kwar jab aikwij in to jen jerbal eo am. Bõtab, ta elañe elder ro rar roñjake am kwalok am jab errã ak rar wõnmanlok im bebe bwe kwon to jen jerbal eo am? Emaroñ to am drebij lemnok ko renana nae elder ro, im men in emaroñ bõprae yuk jen am jibarek jerbal ko ilo congregation eo ak kõmõn bwe en bin am katak jen men eo ear walok ñõn yuk. Jen lale ewi wãwen bwebwenato ko kin Job, Menassa, im Josep remaroñ jibõñ kij ñõn kijenmij ion iñjake ko rejjab jime.
Job ear jutõk ikijen armij ro jet iman Jeova im ear jerbal einwõt juõn elder im juõn dri ekajet ilo ailiñ eo an. (Job 1:5; 29:7-17, 21-25) Ilo ien eo ear mweie, im elõñ ro nejin, im emõn ejmour eo an, Job ear luji aolep men kein. Koba iben men kein, armij ro jet rar jino kajirereik e. Job ear ba: ‘Ro jobrik jen ña rar kajirere kake iõ.’—Job 30:1.
Job ear lemnok bwe kar ejelok an bwir im ear kõnan kowãnik e iman mejen Anij. (Job 13:15) Bõtab, Job ear kõtar wõt Jeova im kin men in ear lo tokjen. Ear kile bwe ear aikwij bõk kajime, elaptata kin wãwen an kar emmakit ñõn melejoñ ko ear iioni. (Job 40:6-8; 42:3, 6) Tokjen etã buru eo an Job ear kamaroñ e ñõn bõk jerammõn ko relap jen Anij.—Job 42:10-13.
Elañe kwar luji juõn jerammõn ilo congregation eo kin juõn bwir kwar kõmõne, kwomaroñ lemnok elañe Jeova im ro jeõm im jãtõm ilo congregation eo renaj jolok bwir eo am im melokloke. Eokwe, lemnok kin bwebwenato eo an Kiñ in Juda, Menassa. Ear “kõmõn nana elap iman mejen Jeova, bwe en kaillu E wõt.” (2 Kiñ. 21:6) Meñe eindrein, Menassa ear juõn kiñ ear tiljek ñõn mij. Ewi wãwen an men in walok?
Menassa ear ukwelok im kajime mour eo an. Elikin an kar kejekron nan in kakkõl ko an Jeova, ear kõtlok bwe dri Assiria ro ren liabe im kajebokweik e im bõklok e ñõn jikin eo etolok, Babilõn. Ilo ijo, Menassa “e ar akwelap ñõn Jeova Anij eo an, im kanuij kõtaik e mõke iman Anij an ro jemen. Im e ar jar ñõn E.” Ukwelok jen buruen ear kamakit e bwe en kõmõn men ko rejime, im kin men in Anij ear jolok bwir eo an Menassa.—2 Kron. 33:12, 13.
Ejeja ar bõk aolep jerammõn ko jar luji ilo congregation eo ilo juõn wõt ien. Tokelik, jidrik kin jidrik kwomaroñ bar bõk jet jerammõn ko kwar luji. Ñe kwoj kate joñõn wõt am maroñ im mõnõnõ in bõk jerammõn kein, enaj tel yuk ñõn bõk jerammõn ko jet ilo congregation eo. Ejjab melelen bwe kwoj kõtõmene bwe enaj mõkõj am bõki jerammõn kein. Emaroñ or menin kabañbañ ko, bõtab am mõnõnõ im kijenmij wõt ilo men ko kwoj kõmõni ilo congregation eo enaj bõktok tokjen ko remõn.
Ñõn wanjoñok, lemnok mõk kin bwebwenato eo an leo nejin Jekõb, Josep. Ke ear 17 an yiõ, lõmaro jein Josep rar wiakake e bwe en dri kamakoko. (Jen. 37:2, 26-28) Josep ear jab kõtõmene bwe lõmaro nejin jemen renaj kar kõmõn eindrein ñõn e. Meñe eindrein, ear mõnõnõ in jerbale wãwen ko rar walok ñõn e, im kin an Jeova kejerammõn e, ear erom dri lale mweo imõn karo eo an. (Jen. 39:4) Tokelik, kar kalbuji Josep ilo prisõn. Bõtab ear kamol an tiljek wõt, im Jeova ear ber iben, im kin men in dri lale prisõn eo ear lelok bwe Josep en bõk erron dri kalbuj ro jet.—Jen. 39:21-23.
Josep ear jab jela bwe ear or juõn un, unin an kar ber ilo aolepen melejoñ kein. Ear wõnmanlok wõt im kijenmij ilo men kein aolep. Kin men in, Ine eo kar kalimur kake ear itok jen menmenbwij eo an. (Jen. 3:15; 45:5-8) Meñe jemaroñ jab kõmõne ejja men eo Josep ear kõmõne, bwebwenato in Anij ear kakõrmole ej kwalok bwe jerammõn ko dri korijer ro An rej bõki, rej jen Jeova. Jen lor wõt joñok eo emõn an Josep.
Katak Jen Melejoñ ko Rebin
Job, Menassa, im Josep rar iion melejoñ ko rebin. Lõmarein jilu rar kijenmij wõt iomin men ko me Jeova ear kõtlok bwe ren walok ñõn ir, im eor men ko rar katak jeni. Ta eo kwomaroñ katak jen ir?
Bukot men eo Jeova ej kajeoñ in katakin yuk kake. Ilo an kate wõt bwe en jab ebwer, Job ear jino lemnok kin kõnan eo an mõke im ear kabiloik e jen lemnok ko raurõklok. Bõtab kin an Jeova kajime e ilo yokwe, Job ear bõk juõn lemnok ejime im ba: “I ar konono men eo I jab melele.” (Job 42:3) Elañe kwoj lõkatip kin am luji jerammõn ko ilo congregation, ‘kwon jab kautiej am lemnak kin kwe make elab jen joñan. Ak kwon kõttãik yuk ilo lemnak ko am.’ (Rom. 12:3, UBS) Emaroñ bwe Jeova ej kajeoñ in kajimeik yuk ilo juõn wãwen me kwojañin lukkun melele kake.
Bõk kaje. Ilo jinoin, Menassa emaroñ kar lemnok bwe ear lã jen joñõn kaje eo ear bõke kin bwir eo ear kõmõne. Bõtab, ear bõk kaje, ukwelok, im ellok jen bwir eo an. Jekron ta lemnok eo am kin kaje eo kwar bõke, ‘kwon kõtãik yuk iman mejen Iroij, im E naj koutiej yuk.’—1 Pit. 5:6; Jem. 4:10.
Kwon meanwõr im mõnõnõ in katak. Men ko rar walok ñõn Josep remaroñ kar kamakõt e bwe en kijirãte ro jein. Jen an eindrein, ear kwalok lolokjen im tiriamo ñõn ir. (Jen. 50:15-21) Elañe kwojjab errã kin kaje eo kwar bõke, kwon kwalok wõt meanwõr im mõnõnõ bwe Jeova en katakin yuk.
Ear or ke jerbal ko kwonam mokta ilo congregation eo? Kõtlok bwe Jeova en bar lewoj ñõn yuk jerammõn ko ilo ran ko rej ber iman. Kakajurlok kõtan eo am iben Jeova. Kwon kwalok jadõr ilo am jerbale meanwõr im etã buru. Kwon mõnõnõ in bõk jabrewõt jerbal rej lewoj ñõn yuk. Kwon liki bwe Jeova “ejjab drebij men ko remmõn jen ro rej kõmmõni men ko rejimwe.”—Sam 84:11, UBS.
[Naan ko ilo peij 30]
Kwon kakajurlok tõmak eo am ikijen am jar jen buruõm
[Pija eo ilo peij 31]
Kalaplok am jerbal in kwalok nan ej juõn wãwen emõn kwomaroñ kakajurlok kõtan eo am iben Anij
[Pija eo ilo peij 32]
Kõtlok bwe Jeova en lewoj ñõn yuk jerammõn ko ilo ran ko rej ber iman