Ta In Jitõb Kwojarjar?

JUÕN ien Jisõs ear kajitõk iben dri kalor ro an: “Eor ke iami lõma, enaj kar lelok ñõn nejin juõn serpent ñe ej kajjitõk eek? Ak ñe ej kajjitõk lib kom naj lelok juõn medrebeb ke?” (Luk 11:​11, 12, UBS) Ear lukkun enno lep im iik iben ajiri ro ilo Galili im rar jela ta ko rekõnan mõña.

Jisõs ear ba bwe jej aikwij wõnmanlok wõt im kajitõk kin jitõb kwojarjar eo, einwõt juõn ajiri ekwuli im ej kajitõk kijen mõña. (Luk 11:​9, 13) Ar jela kin jitõb kwojarjar eo ej kamaroñ kij ñõn melele ewi joñõn an aurõk bwe en or iber. Inem, mokta jen etale ta eo Baibel ej katakin kij kin jitõb kwojarjar.

“Kajur an Eo Eutiejtata”

Jeje ko ilo Baibel rej kemelele ilo alikar bwe jitõb kwojarjar eo ej juõn kajur me Anij ej kajerbale ñõn kajejit ankilan. Ke enjel Gebriel ear kajela ñõn Meri bwe enaj or juõn nejin ladrik meñe ear juõn virjin, enjel eo ear jiroñ e: “Jitõb Kwojarjar e naj itok iom, im kajur an Eo Eutiejtata e naj kalur yuk; im kin men in Eo kwojarjar e naj lotak naj likit etan Nejin Anij.” (Luk 1:​35) Ekkar ñõn nan ko an Gebriel, jitõb kwojarjar ej ekkejel iben “kajur an Eo Eutiejtata.”

Ebar or jikin ko ilo Baibel eo me ej kwalok ejja lemnok in wõt. Dri kanan Maika ej ba: “Ak kin ña, Iroij ej kobrak iõ kin jitõb eo an im kin kajur.” (Maika 3:8, UBS) Jisõs ear kalimuri dri kalor ro an: “Kom naj obrak kin kajur, ñe Jitõb kwojarjar ej itok iomi.” (Jerbal 1:8, UBS) Im dri jilik Paul ear konono kin “kajur an Jitõb Kwojarjar.”​—Dri Rom 15:​13, 19.

Inem, ta eo jemaroñ katak jen kemelele kein? Jitõb kwojarjar eo ej ekkejel iben kajur eo an Anij. Jitõb kwojarjar eo ej kajur eo an Jeova me ej kajerbale ñõn kajejite karõk eo an. Ej juõn kajur ekabwilõñlõñ! Jejjab maroñ melele ewi joñõn kajur eo kar aikwiji ñõn kõmõne men ko otemjej ilõñ im ilõl. Ikijen dri kanan Aiseia, Jeova ear ba bwe jen kalomõnlokjen kake nan kein: “Komin reiliñlok, im lo wõn eo E ar kõmõnmõn men kein, eo Ej kadrioijlok ir kin orair; Ej ãñiñin ir otemjej; kin An kajur elap, im kin An bin ilo maroñ potata, ejelok juõn ej likjõp.”​—Aiseia 40:26.

Inem Baibel eo ej kwalok bwe unin men ko otemjej ilõñ im ilõl rej kon im burukuk ej kin ‘kajur eo elap’ an Anij eo Ekajur Potata. Alikar kajur eo an Anij ekanuij lap, im mour eo ar ej berber wõt ion kajur in.​—Lale box eo “Wãwen Jitõb Kwojarjar Ej Jerbal.”

Jeova emaroñ kajerbal jitõb kwojarjar eo an ilo juõn wãwen ekanuij lap, einwõt ke ear kõmõnmõn men ko otemjej ilõñ im ilõl. Ak emaroñ bar kajerbale ñõn tokjen eo an armij ro. Ekanuij lõñ wanjoñok ko ilo Baibel me ej kwalok kin ewi wãwen jitõb kwojarjar eo an Anij ear kakajur dri korijer ro an.

“Jitõb Õn Iroij Ej Ioõ”

Jerbal in kwalok nan eo an Jisõs ej letok ñõn kij juõn kemelele ekaitoktoklimo kin wãwen jitõb kwojarjar eo an Anij emaroñ kakajur dri korijer ro an. Jisõs ear ba ñõn dri Nazeret ro: “Jitõb õn Iroij ej Ioõ.” (Luk 4:​18) Jisõs ear kajerbal “kajur an Jitõb” ñõn kõtõbrõk ta? (Luk 4:​14) Ear kemour armij ro jen elõñ kain nañinmij, kalur no ko relap, najirik tausan armij ro kin jet wõt bred im iik, im bareinwõt kejerkakbijeik ro remij. Dri jilik Piter ear kwalok kin Jisõs einwõt “juõn armij, eo jerbal eo an ekkwojarjar ear alikkar ilo menin bwilõñ ko, im jerbal ko rellab, im kakõlle ko, ko Anij ear kõmmõni ilo Jesus.”​—Jerbal 2:​22, UBS.

Jitõb kwojarjar ejjab kõmõne menin bwilõñ kein kiõ. Meñe eindrein, emaroñ kõmõni men ko rekanuij emõn ñõn kij. Jeova ej mõnõnõ in lelok jitõb kwojarjar eo an ñõn ro rej kabuñ ñõn e, einwõt an kar Jisõs kalimuri dri kalor ro an. (Luk 11:13) Kin men in, dri jilik Paul ear maroñ ba: “I maroñ in kõmõn men otemjej ilo Eo ej kakajur iõ.” (Dri Pilippai 4:​13) Jitõb kwojarjar emaroñ ke jelet mour eo am ilo wãwen in? Katak in tok juõn enaj uake kajitõk in.

[Kamelele in juõn pija ilo peij 21]

Unin jitõb kwojarjar ejjab juõn men emour

Baibel eo ej keiri jitõb kwojarjar ñõn dren. Ke Anij ear kalimuri armij ro an kin jerammõn ko me renaj walok ilo ran ko renaj itok, ear ba: “I naj lutõk dren ion eo e maro, im river ko ion brij e mõra; I naj lutõklok Aõ Jitõb ion ineõm, im Aõ men in jerammõn ion ro nejõm:”​—Aiseia 44:3.

Ñe Anij ej lutõk jitõb eo an ion dri korijer ro an, rej “obrõk kin Jitõb Kwojarjar.” Jisõs, Jon dri Baptais, Piter, Paul, Barnebas im dri kalor ro jet me rar koba iben dron ilo ran in Pentekost eo ilo yiõ eo 33, kar kwalok bwe rein rar obrõk kin jitõb kwojarjar.​—Luk 1:​15; 4:1; Jerbal 4:8; 9:​17; 11:​22, 24; 13:9.

Lemnok mõk kin men in: Remaroñ ke kar “lutõk” juõn men emour ñõn ion kajjojo armij ro? Kwomaroñ ke ba bwe juõn men emour emaroñ ‘kobrõk’ juõn kumi in armij? Ejjab jime men in. Baibel eo ej kwalok kin an kar armij ro obrõk kin meletlet im jelalokjen, bõtab ejjab kwalok kin an jabrewõt armij obrõk kin juõn men emour.​—Exodus 28:3; Luk 2:​40; Dri Kolosse 1:9.

Nan in Grik eo me kar ukote ñõn “jitõb” ej pnevʹma, me ej bar melelen juõn kajur kwojjab maroñ loe. Ekkar ñõn juõn dictionary, nan in pnevʹma “enañin aolep ien ej jitõñlok ñõn kõto . . . bareinwõt kitoõn; inem, elaptata jitõb, me ej einwõt kõto, jejjab maroñ loe, ejelok jekjekin im ekajur.” Bareinwõt kemelele eo itulõl kin Jenesis 1:2 ilo ukok in Baibel eo ekãl ilo kajin Majõl jen United Bible Society (UBS), ej ba: “Jitõbõn Anij: bar juõn melelen nan kein ilo kajin Hebrew, ‘kituõn Anij’ ak ‘kajur an Anij.’”

Inem ealikar bwe jitõb kwojarjar ejjab juõn men emour.a

[Kamelele eo itulal]

[Kamelele in juõn pija ilo peij 21]

Photodisc/SuperStock