Wãwen Iroij eo an Setan Ejamin Lo Tõbrõk
“A e jamin emõn iben eo dri nana.”—EKK. 8:13.
1. Etke ien ekajet eo ej itok nae ro renana ej juõn nuuj ekamõnõnõ?
EJJABTO jen kiõ naj ekajete ro renana. Renaj aikwij uak kin men ko rar kõmõni. (Ken. 5:22; Ekk. 8:12, 13) Ej juõn nuuj ekamõnõnõ, elaptata ñõn ro rej yokwe wãnik im ñõn ro me armij ro renana rar kaiñtan ir im kõmõni men ko renana ñõn ir. Eo elaptata me naj ekajete ibwiljin ro renana ej jemen dri nana otemjej, Setan Devil eo.—Jon 8:44.
2. Etke kar aikwij ien ñõn kamarmir aituerõk eo kar bõkmantak ilo jikin kallip in Iden?
2 Kin an kar Setan le jen joñõn an kõnan koutiej e mõke, ear kõmõn bwe armij ro ren kejekron wãwen iroij eo an Jeova ilo kar jikin kallip in Iden. Tokjen men in, ro jemer im jiner moktata rar kobalok iben Setan ilo air jumae maroñ in iroij eo an Jeova im erom dri jerawiwi ro iman mejen Anij. (Rom. 5:12-14) Emol, Jeova ear jela kin ta eo enaj kar walok ñõn ir kin air kar jumae im jab kwalok koutiej. Bõtab, tokjen air kar jumae e ear aikwij alikar ñõn aolep menin kõmõnmõn ko an remeletlet. Kin men in, kar aikwij ien ñõn kamarmir aituerõk eo im kamol bwe rein rar jumae rar lukkun bwir.
3. Ewi wãwen jej aikwij watõk kien ko an armij?
3 Kin an kar armij kejekron tel eo an Jeova, rar aikwij kajutõk kien ko air mõke. Ke dri jilik Paul ear jeje ñõn dri tõmak ro mõtõn ilo Rom, ear jitõñlok ñõn kien ko an armij einwõt “ro routiej.” Ilo ran ko an Paul, ro routiej kar kien eo an Rom me ear ber iomin tel eo an Iroij Nero, eo me ear iroij jen yiõ ko 54-68. Paul ear ba bwe “Anij e ar likiti” dri utiej rein. (Riit Dri Rom 13:1, 2.) Melelen ke bwe Paul ear rejetak wãwen iroij eo an armij einwõt eutiejlok jen wãwen iroij eo an Anij? Jab otem jab. Jen an eindrein, ear baj ba wõt bwe toõn wõt an Jeova kõtlok bwe kien ko an armij ren ber, dri Kristian ro rej aikwij koutiej karõk eo an Anij im kiblie ñõn dri tel rein.
Ial eo Ej Tellok ñõn Jorran
4. Kemelele etke wãwen iroij eo an armij ro ejamin lo tõbrõk.
4 Meñe eindrein, wãwen iroij eo an armij iomin kajur eo an Setan ejamin lo tõbrõk. Etke? Juõn un ej kinke ejjab berber ion meletlet eo jen Anij. Jeova wõt eor iben meletlet eo eyu im wãppen. Kin men in, jemaroñ liki wõt tel eo an Jeova ñõn lo tõbrõk. (Jerm. 8:9; Rom. 16:27) Ilo an oktõk jen armij ro me ekkã air katak jen bwir ko air, ien otemjej Jeova ejela wãwen eo emõntata ñõn emakõt. Jabrewõt kien me ejjab lor tel eo an ejamin lo tõbrõk. Kin un in im bareinwõt un eo ekibbon, karõk eo an Setan ñõn iroij ikijen kien ko an armij ear jab lo tõbrõk jen jinoin.
5, 6. Ta eo ear tel Setan ñõn an jumaik Jeova?
5 Juõn armij emeletlet enaj bõprae jen an jino jibarek juõn men me ejamin lo tõbrõk ie. Elañe ej kate wõt im wõnmanlok ilo an jibarek kõtõbar eo an, enaj itak im lo leen. Elõñ alen bwebwenato ko an armij rar kamol bwe ejelok tokjen ñõn jutõk nae Dri Kõmõnmõn eo ekajur otem kajur. (Riit Jabõn Kennan Ko 21:30.) Bõtab, utiej buru im kõnan eo ñõn koutiej e mõke rar kabiloik Setan im kõmõn bwe en jumaik Jeova. Kin men in Devil eo mõke ear kãlet ial eo me ej tellok ñõn jorran.
6 Utiej buru eo an Setan ear tokelik alikar iben kiñ eo an Babilõn me kar jeje kake kin an kimjãje: “I naj wõnliñlok ñõn lõñ, I naj leliñlok aõ tron ilõñin iju ko an Anij; im I naj jijõt ion tol in kwelok ko, ilo mõtõn ko etoloktata iuñ; I naj wõnliñlok ilõñin kõro ko; I naj mõke kõmõn iõ einwõt Eo e Utiejtata.” (Ais. 14:13-15) Kiñ in ear jab lo tõbrõk ilo jibarbar im kõtõbar eo an, im lain eo an kiñ in ailiñ in Babilõn ear jemlok ilo juõn wãwen enana. Ilo ejja wãwen in lok wõt, mõtõn jidrik Setan im jukjuk im ber in an renaj lukkun joko.
Etke Anij Ear Kõtlok an Armij Mõke Iroij Ioir?
7, 8. Ta jet ian tokjen ko rej itok jen an Jeova kõtlok bwe nana en ber iomin jidrik ien?
7 Jet remaroñ lemnok etke Jeova ear jab kabwijrõk armij ro jen air kobalok iben Setan im jen air lor bar juõn wãwen iroij me ejamin lo tõbrõk. Einwõt Anij eo ekajur otem kajur, ilo mol emaroñ kar kõmõn eindrein. (Ex. 6:3) Bõtab, ear jab. Meletlet eo an ear kwalok bwe an jab kabwijrõk jumae eo an armij ro iomin jidrik ien, ilo jemlokõn enaj bõktok tokjen ko remõn. Eliktata, naj kamol bwe Jeova ej juõn Iroij ewãnik im elap yokwe iben, im armij ro retiljek renaj bõk tokjen jen bebe in me ear kõmõne.
8 Armij ro reban kar lo jorran elañe rar kejekron kõtõbar ko an Setan im jab kajenolok ir jen iroij eo an Anij! Meñe eindrein, bebe eo an Jeova ñõn kõtlok bwe armij ro ren iroij ioir mõke iomin jidrik ien, ear or tokjen. Ear lukkun jelet ro emol burueir ñõn kile bwe emenin meletlet ñõn roñjake Anij im liki e. Iomin elõñ ebeben ko, armij ro rar kajeoñ elõñ kain kien ko ak ejelok juõn iair enañin lo tõbrõk. Men in ear kakajurlok liki eo an dri kabuñ ro an Anij bwe wãwen iroij eo an Jeova ej emõntata. Emol, an Jeova kõtlok wãwen iroij eo enana an Setan, men in ear kõmõn bwe armij ro ren iion iñtan, ekoba ro me rej kabuñ ñõn Anij ilo tiljek. Bõtab, an kõtlok bwe nana en walok iomin jidrik ien ej bareinwõt bõktok tokjen ko remõn ñõn dri kabuñ rein retiljek.
Jumae eo Ear Oktõk im Kaibujuij Jeova
9, 10. Kemelele ewi wãwen iroij eo an Setan ear oktõk im kaibujuij Jeova.
9 An Jeova kõtlok bwe armij ro ren ber iomin kajur eo an Setan im iroij ioir mõke ejjab kananaik wãwen iroij eo an. Ejjab ñõn jidrik! Bwebwenato ko an armij rej kamol bwe nan ko an Jeremaia me kar kakõrmol e ñõn ba kin an armij ro jab maroñ iroij ioir mõke, rejejit im mol. (Riit Jeremia10:23.) Bareinwõt, jumae eo an Setan ear kebellok juõn ien emõn ñõn an Jeova kwalok karkar ko remõn karkarin ilo juõn wãwen elaplok an alikar. Ewi wãwen?
10 Kinke jemaroñ lo jorran ko rej waloktok jen iroij eo an Setan, karkar ko remõn karkarin Jeova elaplok air alikar jen ñe en kar jab kõtlok bwe men in en walok. Ilo wãwen in, ej aibujuij iman mejen ro rej yokwe e. Aet, jen an kananaik wãwen iroij eo an Jeova, wãwen iroij eo an Setan ear oktõk im kaibujuij Anij. Ear kalikar wãwen eo ekanuij emõn Jeova ear kamarmire aituerõk eo kin iroij potata eo an. Ñõn kwalok bwe emol men in, jen etale ilo tukaru jet ian karkar ko karkarin Jeova im lale ewi wãwen iroij eo enana an Setan ear kamakõt Jeova ñõn kwalok karkar kein ilo wãwen ko relaplok.
11. Ewi wãwen Jeova ear kalikar yokwe eo an?
11 Yokwe. Jeje ko rej jiroñ kij bwe “Anij [ej] yokwe.” (1 Jon 4:8) Kakõlen yokwe eo an Anij ear alikar ilo jinoin ke ear kõmõnmõn armij ro. Bareinwõt, wãwen kar kõmõnmõn kij ej menin lelñoñ im bwilõñ, eo me ej kamol yokwe eo an Anij. Jeova ear bareinwõt letok juõn jikin jokwe eaibujuij me eobrõk kin men ko me rej kamõnõnõik armij ro. (Jen. 1:29-31; 2:8, 9; Sam 139:14-16) Bõtab, ke armij ro rar jerawiwi, Jeova ear kwalok yokwe eo an ilo wãwen ko rejañin kar walok mokta. Ewi wãwen? Dri jilik Jon ear je nan ko an Jisõs ke ear ba: “Kin an Anij yokwe lõl, E ar letok juõn wõt Nejin E ar keutak, bwe jabrewõt eo ej liki E en jab joko, a en mour in drio.” (Jon 3:16) Ejelok bar juõn wãwen emõnlok ñõn an Anij kwalok yokwe eo an ñõn armij ro jen an kar jilkintok Nejin eo ej mõke wõt ñõn lõl bwe en binmour kin armij ro rejerawiwi. (Jon 15:13) Wãwen in elap me Anij ear kwalok an yokwe ej bareinwõt juõn joñok ñõn armij ro. Men in ej kebellok juõn ien emõn ñõn air kwalok yokwe eo me ej kamakõt ir ñõn karmijeteik kõnan ko air mõke ilo mour ko air jen ran ñõn ran, einwõt kar Jisõs.—Jon 17:25, 26.
12. Ilo wãwen it kar kwalok kin kajur eo an Jeova?
12 Kajur. “Anij ekajur otem kajur” im e wõt eor an maroñ ñõn letok mour. (Rev. 11:17; Sam 36:9) Ñe juõn armij ej lotaktok, mour eo an ej einwõt juõn peba ejelok jeje ie ilo kõkkar. Ilo ien eo emij, ej obrõk peba eo kin jeje ko ikijen bebe ko, jerbal ko, im men ko ear iioni ilo mour eo an me rej kwalok kin e mõke im karkar ko karkarin. Men kein remaroñ ber ilo ememej eo an Jeova. Ilo ien eo ejejit, Jeova emaroñ bar kajeblak mour eo an armij eo, ekitibuj aolep wãwen im karkar ko karkarin rejejuair me rej kwalok kin e. (Jon 5:28, 29) Kin men in, meñe mij ear jab karõk eo an Anij jen jinoin, ear kebellok juõn ien emõn ñõn an Jeova kwalok bwe eor an kajur ñõn kejerkakbiji ro remij. Emol, Jeova ej “Anij ekajur otem kajur.”
13. Ewi wãwen katok in binmour eo an Jisõs ej kwalok kin ekajet jime eo an Jeova?
13 Ekajet Jime. Jeova ej kwalok ekajet jime im ejjab riõp. (Dut. 32:4; Tait. 1:2) Ien otemjej ej edrep ñõn kien ko an kin ekajet jime im mol, meñe an kõmõn eindrein emaroñ bin iben. (Rom. 8:32) Elap wõt an kar bin iben Jeova ke ear lo an Jisõs, eo ej mõke wõt Nejin, mij ion alal in iñtan eo einwõt ñe ear juõn dri nana im juõn eo ear blaspim! Bõtab, kin an Jeova yokwe armij ro rejjab wãppen, ear mõnõnõ in kõtlok bwe men in ebin en walok ñõn an kejbãrok kien eo an ewãppen kin ekajet jime. (Riit Dri Rom 5:18-21.) An lõl in obrõk kij jab ekajet jime ear kebellok juõn ien emõn ñõn an Jeova kwalok bwe elap ekajet jime iben.
14, 15. Ta jet ian wãwen ko me rar kalikar meletlet eo elap im kijenmij eo an Jeova?
14 Meletlet. Ilo ien eo wõt elikin an kar Adam im Iv jerawiwi, Jeova ear kwalok juõn wãwen ñõn an jolok aolep men ko renana rar walok jen air kar jumae. (Jen. 3:15) An kar emakõt ilo mõkõj, bareinwõt ilo an kar jidrik kin jidrik kalikarlok karõk eo an ñõn dri korijer ro an, men in ear lukkun kalikar meletlet eo an Jeova. (Rom. 11:33) Ejelok juõn men emaroñ bõprae maroñ eo iben Anij ñõn kamarmir abañ ko. An lõl in obrõk kin mour etton, tõrinae, nana, kiblia, lej, kaljiklok, im jela mon, ear lelok elap ien ñõn an Jeova kwalok ñõn menin kõmõnmõn ko an ta in meletlet eo emol. Dri kalor Jemes ear ba: “A meletlet jen lõñ ej erreo mokta, inem e ainemõn, joij, ebiruru an rel, eobrõk kin tiriamokake im leen ko remõn, im ejelok akwail ak jela mon iben.”—Jem. 3:17.
15 Kijenmij im Meanwõr. Karkar ko karkarin Jeova kin kijenmij im meanwõr ear laplok air alikar ilo wãwen an kar Jeova kamarmir jab wãppen eo an armij, ak jerawiwi ko im likjõp ko air. An kar Jeova mõnõnõ in kõmõne men in iomin elõñ tausan yiõ ko ej kwalok bwe ekanuij lap karkar kein remõn iben, im kin men in elaplok ar aikwij kamolol e. Emol an kar dri jilik Piter ba bwe jej aikwij ‘watõk meanwõr an ar Iroij einwõt lomor.’—2 Pit. 3:9, 15.
16. Etke an Jeova mõnõnõ in jeorlok bwir ej bõktok elap lõñliñ?
16 Mõnõnõ in Jeorlok Bwir. Kij aolep dri jerawiwi, im kij otemjej emakijkij ar kõmõn bwir. (Jem. 3:2; 1 Jon 1:8, 9) Ej aikwij lap ar kamolol bwe Jeova ej mõnõnõ in jeorlok bwir ko ar ilo juõn wãwen elap! (Ais. 55:7) Bareinwõt lemnok kin men in: Kin ar kar lotak einwõt armij ro rejjab wãppen im rejerawiwi, ñe Anij ej jeorlok bwir ko ar, elap ar lõñliñ. (Sam 51:5, 9, 17) Ar lo an Jeova kwalok karkar in ñõn kij ej kakajurlok yokwe eo ar ñõn e im rejañ kij ñõn lor wõt joñok in an ilo ar kõmõn ñõn ro jet.—Riit Dri Epesõs 4:32.
Etke Lõl in Ejorran
17, 18. Ilo wãwen it ko iroij eo an Setan ear jab lo tõbrõk?
17 Aolepen jukjuk im ber eo an Setan me ear itok jen wãwen iroij eo an, elõñ alen ear jab lo tõbrõk im ear eindrein manlok wõt iomin elõñ ebeben ko. Ilo 1991, juõn newspaper ear ba bwe lõl in ejorran, ejjab kinke Anij ear kejorrane ak kinke armij ro rar kokkure. Elukkun mol men in! Setan ear kareel ro jemer im jiner moktata bwe ren kãlet bwe armij ren iroij ioir mõke im jab Jeova. Kin men in, rar jinoe juõn wãwen iroij me ejamin lo tõbrõk. Iñtan im buromõj ko an armij ro ibelakin lõl rej kamol bwe wãwen iroij eo an armij ejorran.
18 Wãwen iroij eo an Setan ej berber ion kibbon. Bõtab, kibbon ejjab maroñ anjo ion yokwe, eo me ej berber in iroij eo an Jeova. Wãwen iroij eo an Setan ear jab lo tõbrõk ñõn bõktok ainemõn, mõnõnõ, ak jokõne. Men in ej kamol an jime wãwen Iroij eo an Jeova! Eor ke iber menin kamol ko ilo ran kein? Aet, jenaj loe ilo katak eo tok juõn.
Ta eo Jar Katak kin Wãwen Iroij ke Jar Riiti . . .
• Dri Rom 13:1, 2?
• Jabõn Kennan Ko 21:30?
• Jeremaia 10:23?
• Dri Kolosse 3:13?
[Kamelele in juõn pija ilo peij 25]
Wãwen iroij eo an Setan ejamin bõktok tokjen ko remõn ñõn armij ro
[Kamelele in juõn pija ilo peij 25]
U.S. Army photo
[Kamelele in juõn pija ilo peij 25]
WHO photo by P. Almasy
[Kamelele in juõn pija ilo peij 26]
Eor an Jeova kajur ñõn kejerkakbiji ro remij
[Kamelele in juõn pija ilo peij 27]
Yokwe im ekajet jime eo an Jeova rar alikar ilo katok in binmour eo an Jisõs