Katak jãn Naan in Anij
Ta ko Kwõj Aikuj Kõm̦m̦ani bwe Kwõn Ruwaakl̦o̦k ñan Anij?
Katak in ej uwaake jet kajjitõk ko me bõlen ekkã am̦ kajjitõk kaki. Im ej kwal̦o̦k eoon ko kwõmaroñ lo uwaak in kajjitõk kein ie ilo Baibõl̦ eo. Ri Kõnnaan ro an Jeova renaaj lukkuun m̦õn̦õn̦õ in kõmel̦el̦eik uwaak kein ñan eok.
1. Anij ej ke roñjake aolep jar ko?
Jeova ekõn̦aan bwe aolep armej ro jãn aelõñ otemjej ren ruwaakl̦o̦k ñan e ikijjeen jar. (Sam 65:2) Bõtab, ejjab aolep jar Anij ej roñjaki. Ñan waanjoñak, ke Ri Israel ro rar kõm̦m̦ani men ko renana, Anij ear jab roñjaki jar ko aer. (Aiseia 1:15) Bareinwõt, Anij eban roñjake jar ko an juon em̦m̦aan el̦aññe enana an kõm̦m̦an ñan kõrã eo pãleen. (1 Piter 3:7) Ak Anij emaroñ roñjake jar ko an ro rar kõm̦m̦an juon bõd el̦ap el̦aññe em̦ool aer ukel̦o̦k jãn bõd ko aer.—Riit 2 Kronikel 33:9-13.
2. Ewi wãween jej aikuj jar?
Ej juon jeraam̦m̦an ñan kõj bwe jemaroñ jar ñan Anij. Im ej juon iaan wãween ko jej kabuñ ñan Anij. Eñin unin Jeova wõt jej aikuj jar ñan e. (Matu 4:10; 6:9) Kõnke jejjab weeppãn, jejjab maroñ make karuwaakl̦o̦k kõj ñan Anij. Ak jej aikuj jar ikijjeen Jijej kõnke e ej “ial̦” ñan Anij. (Jon 14:6) Bareinwõt, Jeova ejjab kõn̦aan bwe jen ãliji jar ko ad ak jar jãn juon bok. Ekõn̦aan bwe jen jar jãn bũruod.—Riit Matu 6:7; Pilippai 4:6, 7.
Ñe jej jar ilo ejjel̦o̦k ainikien, Jeova ej roñ. (1 Samuel 1:12, 13) Ekõn̦aan bwe jen jar iien otemjej, ilo jibboñ, jota, iien m̦õñã, im ñe jej iion apañ.—Riit Sam 55:22; Matu 15:36.
3. Etke Kũrjin ro rej aikuj kweilo̦k ippãn doon?
Ejjab pidodo ñan ruwaakl̦o̦k ñan ippãn Anij kõnke jej mour ibwiljin armej ro im edik aer tõmak ilo Anij. Im rej kajjirere im pere kallim̦ur eo an Anij bwe enaaj wõr aenõm̦m̦an ilo lal̦ in. (2 Timote 3:1, 4; 2 Piter 3:3, 13) Kõn men in, jej aikuj kobal̦o̦k ippãn ri tõmak ro m̦õttad bwe jen kakajoor doon.—Riit Hibru 10:24, 25, UBS.
Ñe kwõj jem̦jerãik ro rej epaake Anij, men in enaaj bar jipañ eok ñan ruwaakl̦o̦k ñan Anij. Ilo kweilo̦k ko an Ri Kõnnaan ro an Jeova, rej kwal̦o̦k aer tõmak im kakajoor doon. Tõmak eo am̦ enaaj kajoorl̦o̦k ilo am̦ kobal̦o̦k ilo kweilo̦k kein.—Riit Sam 133:1.
4. Ewi wãween kõl̦mãnl̦o̦kjen̦ enaaj jipañ eok ñan ruwaakl̦o̦k ñan ippãn Anij?
Ñe kwõj kõl̦mãnl̦o̦kjen̦ kõn men ko kwõj katak kaki jãn Naan in Anij, men in enaaj karuwaakl̦o̦k eok ñan Jeova. Kwõn l̦õmn̦ak kõn jerbal ko an, naan in tõl ko an im kallim̦ur ko an. Lukkuun kõl̦mãnl̦o̦kjen̦ ñe kwõj jar ñan Jeova. Men in enaaj kal̦apl̦o̦k am̦ kam̦m̦oolol Jeova kõn an mãlõtlõt im kõn an yokwe armej.—Riit Joshua 1:8; Sam 1:1-3.
Ñe kwõj lõke im tõmak Anij, kwõnaaj epaake e. Bõtab, tõmak ej juon men me kwõj aikuj kakajoore iien otemjej bwe en jab jako. Wãween eo kwõmaroñ kakajoore tõmak eo am̦, ej ilo am̦ kõl̦mãnl̦o̦kjen̦ iien otemjej kõn men ko kwõj katak kaki.—Riit 1 Tessalonika 5:21; Hibru 11:1, 6.
5. Ta jeraam̦m̦an ko kwõmaroñ loi ñe kwõj ruwaakl̦o̦k ñan ippãn Anij?
El̦ap an Jeova yokwe ro rej yokwe e. Ej kõjparok er jãn jabdewõt men im enaaj ko̦kkure tõmak eo aer ilo E im tõmak eo aer kõn kallim̦ur eo ñan mour indeeo. (Sam 91:1, 2, 7-10) Ej kakkõl kõj kõn men ko im renaaj ko̦kkure ãjmour eo ad im kõm̦m̦an bwe jen jab m̦õn̦õn̦õ. El̦ap an Jeova katakin kõj kõn men ko me renaaj kõm̦m̦an bwe en em̦m̦an mour ko ad.—Riit Sam 73:27, 28; Jemes 4:4, 8.
Ñan kal̦apl̦o̦k am̦ mel̦el̦e, jouj im lale bok in ilo jebta 17. Bok in ej jeje in Ri Kõnnaan ro an Jeova.
Ta Eo Baibel Ej Lukkun Katakin?