Naan in Kakapilõk ko kõn Ro Ejjel̦o̦k Pãleer im Ro Ewõr Pãleer

“Ij ba men in bwe . . . komin kõmmõn men eo ejimwe im jejjet, im lukkun lelok kom make ñõn jerbal eo an Iroij im en ejjelok menin kamad kom.”​​—1 KORINT 7:35, UBS.

1, 2. Etke jej aikuj katak kõn ta eo Baibõl̦ eo ej ba kõn ro ejjel̦o̦k pãleed im ro me ewõr pãleer?

ELÕÑ iien l̦õm̦aro im lim̦aro rej m̦õn̦õn̦õ, inepata, im illu ippãn doon. Kõnke jej bõk kain eñjake kein, jej aikuj kajjitõk ippãn Anij bwe en jipañ ak tõl kõj. Elõñ bar un ko jet jej aikuj kajjitõk ippãn Anij bwe en tõl kõj. Ñan waanjoñak, ewõr jet Kũrjin ro me rej m̦õn̦õn̦õ ilo mour eo aer meñe ejjel̦o̦k rejetaer. Bõtab, baam̦le ko aer im ro m̦õttaer remaroñ jiped er bwe ren m̦are. Ro jet remaroñ kõn̦aan m̦are bõtab rejañin lo juon eo em̦m̦an ippãer. Bareinwõt, ro me rej date rej aikuj jipañ kõn wãween remaroñ pojak ñan aer ineek eddo ko aer ãlikin aer m̦are. Im Kũrjin ro meñe ewõr pãleer ak ejjel̦o̦k pãleer, rej aikuj kõjparok er jãn mour in l̦õñ.

² Men kein remaroñ kõm̦m̦an bwe jen jab m̦õn̦õn̦õ. El̦aptata, remaroñ ko̦kkure jem̦jerã eo ad ippãn Anij. Ilo 1 Korint jebta 7, rijjelõk Paul ear kwal̦o̦k naan in kakapilõk ko kõn ro im ejjel̦o̦k pãleed im ro ewõr pãleer. Ear kõn̦aan bwe ro rej riiti naan ko an ren kõm̦m̦ane men eo ejim̦we im wõnm̦aanl̦o̦k wõt ilo aer jerbal ñan Anij kõn aolepen bũrueer im jab m̦ad. (1 Korint 7:35, UBS) Naan in kakapilõk ko an Paul kõn men kein raorõk remaroñ jipañ eok. Ear kõn̦aan bwe ro ejjel̦o̦k pãleed ren kõjerbal iien in rej make iaaer ñan kal̦apl̦o̦k aer karejar ñan Jeova. Ear bar kõn̦aan bwe ri pãlele ro ren kõm̦m̦ane men in.

Jokãlõt eo an Juon Armej Make

3, 4. (1) Ta eo emaroñ wal̦o̦k ñe ro jet rej iuuni juon bwe en m̦are? (2) Ewi wãween naan ko an Paul remaroñ jipañ kõj ñan bõk l̦õmn̦ak eo ejim̦we kõn m̦are?

³ Ri Ju ro ilo iien ko an rũkal̦oor ro rar l̦õmn̦ak bwe elukkuun aorõk ñan an juon m̦are. Ãindein bar l̦õmn̦ak eo an elõñ armej ro ilo raan kein. El̦aññe juon armej etal im erũtto ak ejañin m̦are, baam̦le eo an im ro m̦õttan remaroñ inepata kake. Kiiõ remaroñ l̦õmn̦ak bwe rej aikuj rõjañ e ñan m̦are. Remaroñ jiroñl̦o̦k e im ba bwe edik an kappok, en bar lukkuun to̦o̦re mejen im lale. Ak remaroñ kwal̦o̦k wõn eo rej l̦õmn̦ak bwe em̦m̦an ñan e. Jet armej rej karõk ruo armej ñan doon kõnke rej l̦õmn̦ak bwe erro ej aikuj m̦are. Bõtab el̦aññe armej ro rej kõm̦m̦ani men kein, remaroñ kajook armej eo rej kapok l̦o̦k pãleen im emaroñ jako aer epaake doon. Bareinwõt remaroñ kõmetak armej ro ruo im rej kõpãleleik er.

⁴ Paul ear jab jiroñ ro jet bwe rej aikuj m̦are. Ear jab bar jiroñ ro jet bwe rejjab aikuj pãlele. (1 Korint 7:7, UBS) Paul ear m̦õn̦õn̦õ ilo an kar jerbal ñan Jeova meñe ear ejjel̦o̦k pãleen. Bõtab, ear jab kananaik armej ro me rar kõn̦aan m̦are. Kũrjin ro rainin ewõr aer maroñ ñan peek er make. Ej aer pepe el̦aññe rekõn̦aan m̦are ak make iaaer. Ro jet rejjab aikuj jiroñ er ta eo rej aikuj kõm̦m̦ane.

Jemaroñ M̦õn̦õn̦õ Wõt Meñe Ejjel̦o̦k Pãleed

5, 6. Etke Paul ear rõjañ Kũrjin ro bwe em̦m̦an ñe rejjab pãlele?

⁵ Naan ko an Paul ñan ri Korint ro rej kwal̦o̦k bwe enaaj em̦m̦an an Kũrjin ro jerbal ñan Anij ñe ejjel̦o̦k pãleer. (Riit 1 Korint 7:​8, UBS.) Jet ri tõl ro jãn kabuñ ko reriab me ejjel̦o̦k pãleer rej l̦õmn̦ak bwe rem̦m̦anl̦o̦k jãn ro me ewõr pãleer. Ak ear jab ãindein an Paul l̦õmn̦ak. Meñe ear ejjel̦o̦k pãleen, ak ear jab l̦õmn̦ak bwe em̦m̦anl̦o̦k jãn ro ewõr pãleer. Paul ear kwal̦o̦k bwe elõñ men ko ro ejjel̦o̦k pãleer remaroñ kõm̦m̦ani ilo jerbal eo an Anij me ro ewõr pãleer rejjab maroñ kõm̦m̦ani. Ta mel̦el̦ein men in?

⁶ Ekkã an juon Kũrjin eo ejjel̦o̦k pãleen maroñ bõk jerbal ko me ro im ewõr pãleer rejjab maroñ bũki. Paul ear bõk juon jeraam̦m̦an el̦ap ilo an kar bõk jerbal in “rũ jelõk ñan ri aelõñ ko.” (Rom 11:13) Jemaroñ riit kõn mour eo an Paul ilo bok in Jerbal jebta 13 ñan 20. Paul ear itoitak ippãn mejinede ro m̦õttan im kwal̦o̦k naan ilo jikin ko jet, im rar kajutak elõñ congregation ko. Ear kijenmej ium̦win mãlejjoñ ko reppen ke ear kwal̦o̦k naan im ejjab aolep rainin renaaj iioni. (2 Korint 11:23-​27, 32, 33, UBS) Bõtab Paul ear m̦õn̦õn̦õ in kijenmej ium̦win aolep wãween kein reppen bwe en maroñ kõm̦m̦an rũkal̦oor ro. Im men in ear l̦ap an kalañlõñ e. (1 Tessalonika 1:2-7, 9; 2:19) El̦aññe Paul ear pãlele, bõlen eban kar maroñ kõm̦m̦ani aolep men ko me ear kõm̦m̦ani.

7. Ewi wãween an kar ruo sister ro im ejjel̦o̦k pãleer kal̦apl̦o̦k ijo kun̦aaer ilo jerbal in kwal̦o̦k naan kõn Aelõñ eo?

⁷ Elõñ Kũrjin ro ejjel̦o̦k pãleer remaroñ kal̦apl̦o̦k ijo kun̦aaer ilo jerbal in kwal̦o̦k naan kõnke ejjel̦o̦k menin kapañ er. Sara im Limbania, ruo sister ejjel̦o̦k pãleer, rej jim̦or pioneer ilo aelõñ in Bolivia. Erro ar em̦m̦akũtl̦o̦k ñan juon bukwõn me ekij elõñ iiõ in aer jab kwal̦o̦k naan ie. Ear ejjel̦o̦k jarom ilo jikin in. Sister rein ruo rar ba bwe el̦ap an armej ro ilo bukwõn in itoklimo in riit kõnke ear ejjel̦o̦k nejier TV im retio ñan kam̦ad er. Jet iaan armej ro rej pãddo riiti bok ko rem̦or an Ri Kõnnaan ro an Jeova me ejako aer kõm̦m̦ani kiiõ. Ilo enañin aolep kejam ko sister rein rar etal ñani, rar iion armej ro me rekõn̦aan katak Baibõl̦. Kõn men in, ear bõk iien ñan aerro etal ñan aolep m̦oko ilo bukwõn eo. Juon lel̦l̦ap ear jiroñ sister rein ruo: “Bõlen epaak jem̦l̦o̦kin kõnke Ri Kõnnaan ro an Jeova retõpar tok kõm.” Ejjabto tokãlik, armej ro ilo bukwõn eo rar jino etal ñan iien kweilo̦k ko.

8, 9. (1) Etke Paul ear ba bwe enaaj em̦m̦an an Kũrjin ro jerbal ñan Anij ñe ejjel̦o̦k pãleer? (2) Ta em̦m̦anin ñe ejjel̦o̦k pãleen juon?

⁸ Em̦ool bwe ebar wõr tokjãn ko rem̦m̦an Kũrjin ri pãlele ro rej loi ñe rej kwal̦o̦k naan ilo jikin ko epen kwal̦o̦k naan ie. Bõtab, ro ejjel̦o̦k pãleer im rej pioneer remaroñ kõm̦m̦ani jet jerbal ko me emaroñ pen ñan Kũrjin ro ewõr pãleer im nejier ajri. Ke Paul ear jejel̦o̦k ñan congregation ko, ear jel̦ã bwe elõñ wõt men ko remaroñ kõm̦m̦ani ñan kajeded nuuj eo em̦m̦an. Im kõnke ear lo lañlõñ ilo an kar kõm̦m̦an rũkal̦oor ro, ear kõn̦aan bwe aolep ren bareinwõt lo lañlõñ ilo aer kõm̦m̦ane men in. Eñin unin Paul ear ba bwe enaaj em̦m̦an an Kũrjin ro jerbal ñan Anij ñe ejjel̦o̦k pãleer.

⁹ Juon sister ej pioneer me ej jãn Amedka ear kwal̦o̦k eñjake im l̦õmn̦ak eo an kõn an jab pãlele. Ear ba bwe jet armej rej l̦õmn̦ak bwe ro ejjel̦o̦k pãleer rejjab maroñ m̦õn̦õn̦õ. Im ear ba bwe meñe juon emaroñ ejjel̦o̦k pãleen ak el̦aññe epaak kõtaan eo an ippãn Jeova enaaj m̦õn̦õn̦õ wõt. Bareinwõt, el̦aññe armej in ej kõjerbal mour eo an ilo wãween eo em̦m̦an meñe epen ñan jab pãlele ak emaroñ juon jeraam̦m̦an. Ñe jej make iaad, ejjab mel̦el̦ein bwe jeban m̦õn̦õn̦õ. Ilo m̦ool, emaroñ juon ial̦ ñan ad lo m̦õn̦õn̦õ. Sister in ear ba: “Jeova ej kwal̦o̦k yokwe ñan kajjojo armej, jekdo̦o̦n ñe ewõr pãleer ak ejjel̦o̦k pãleer.” Sister in ej kiiõ karejar ñan Jeova ilo juon aelõñ me el̦ap aer aikuj ri kwal̦o̦k naan ro ie. El̦aññe kwõj juon eo ejjel̦o̦k pãleen, kwõmaroñ ke kal̦apl̦o̦k ijo kun̦aam̦ ñan katakin ro jet kõn m̦ool eo? El̦aññe kwõmaroñ, innem an ejjel̦o̦k pãleem̦ ej juon menin letok jãn Jeova.

Armej ro Rekõn̦aan M̦are

10, 11. Ewi wãween an Jeova jipañ ro me rejañin lo juon eo em̦m̦an ñan mareiki?

¹⁰ Tokãlik juon armej eo me eto an make iaan, emaroñ kiiõ kõn̦aan m̦are. Innem kõnke ejel̦ã bwe ej aikuj jipañ ñan pukot juon rejetan, ej kajjitõk ippãn Jeova ñan jipañe bwe en maroñ loe juon eo emaroñ mareiki im m̦õn̦õn̦õ ippãn. 1 Korint 7:36, (NW), ej ba: “Ak el̦aññe jabdewõt ej l̦õmn̦ak bwe ejjab maroñ dãpij an kõn̦aan pãlele, ñe em̦õj an le jãn iien em̦m̦an dred, im men in em̦m̦an wõt, en kõm̦m̦ane men eo ekõn̦aan; ejjel̦o̦k jerawiwi ilo men in. Kõtl̦o̦k bwe ren m̦are.”

¹¹ El̦aññe kokõn̦aan mareiki juon eo ej karejar ñan Jeova kõn aolepen bũruon, jab bõjrak jãn am̦ jar ñan Jeova kõn kõn̦aan in am̦. (Pilippai 4:6, 7) Jab ebbeer meñe emaroñ to am̦ kõttar. Jeova ejel̦ã ta eo kwõj aikuji, im el̦aññe kwõj lõke e, enaaj jipañ eok ñan kijenmej wõt.​​—Hibru 13:⁠6.

12. El̦aññe juon ej kajjitõke eok, ta eo kwõj aikuj l̦õmn̦ak kake m̦okta?

¹² Ta el̦aññe juon ej kajjitõke eok bõtab ejjab kajoor kõtaan eo an ippãn Anij ak ejjab juon iaan Ri Kõnnaan ro an Jeova? Bõlen kõn̦aan eo am̦ ñan m̦are elukkuun kajoor. Ak el̦aññe ebõd kããlõt eo am̦, enaaj l̦apl̦o̦k am̦ bũrom̦õj jãn ke kwaar bũrom̦õj ke kwaar make iaam. Keememej bwe kwõnaaj aikuj tiljek wõt ñan armej eo kwaar kããlõt ñan mareiki. Jokããlõt eo am̦ kiiõ enaaj jelõt aolepen mour eo am̦. (1 Korint 7:27, UBS) Kwõn jab m̦are kõnke kwõj l̦õmn̦ak bwe kwõban bar lo juon. Kwõmaroñ naaj ajl̦o̦k im iañaktok am̦ tokãlik.​​—Riit 1 Korint 7:​39, UBS.

Pojak ñan Mour in M̦are

13-15. Ta ko ro rej date rej aikuj kõnono ippãn doon kaki m̦okta jãn aerro m̦are bwe en jab wõr apañ ikõtaaerro tokãlik?

¹³ Paul ear ba bwe em̦m̦an karejar ñan Jeova ñe juon ejjel̦o̦k pãleen. Ak ear jab l̦õmn̦ak bwe em̦m̦anl̦o̦k e jãn ro rar pepe in m̦are. Paul ear kõn̦aan jipañ ro em̦õj aer m̦are. Naan in kakapilõk eo ear je ej jipañ ri pãlele ro ñan jel̦ã ta eo ren kõtmãne kake ãlikin aer m̦are im jel̦ã ewi wãween remaroñ tiljek wõt ñan doon.

¹⁴ Jet l̦õm̦aro im lim̦aro rej aikuj kajim̦we l̦õmn̦ak ko aer kõn ta ko renaaj wal̦o̦k ñe renaaj m̦are. Ilo iien eo rej date, remaroñ ba bwe relukkuun yokwe doon. Remaroñ l̦õmn̦ak bwe er wõt rej bõk eñjake in. Ãindein aer eñjake ilo jinoin ke em̦õj aerro m̦are. Im rej l̦õmn̦ak bwe erro jamin bũrom̦õj ak erro naaj m̦õn̦õn̦õ wõt. Bõtab, ejjab m̦ool im jim̦we l̦õmn̦ak in. Ejjab aolep iien jenaaj m̦õn̦õn̦õ. Em̦ool bwe yokwe eo ikõtaan juon jiroñ im likao emaroñ kõm̦m̦an bwe ren m̦õn̦õn̦õ. Ak yokwe in eban aolep iien kõm̦adm̦õde apañ im inepata ko me aolep ri pãlele rej iioni ãlikin aer m̦are.​​—Riit 1 Korint 7:​28, UBS.a

¹⁵ Ãlikin aer m̦are, jet ri pãlele rej ilbõk im inepata ñe rejjab errã ippãn doon kõn jet pepe ko raorõk. Ñan waanjoñak, remaroñ jab errã ippãn doon kõn wãween rej aikuj kõjerbal jããn ko aer. Ak remaroñ jab errã kõn ta ko renaaj kõm̦m̦ani ikijjeen menin kam̦õn̦õn̦õ ko ak aerro kakkije, im ia eo renaaj jokwe ie, im ewi ikutkut in aer naaj lol̦o̦k baam̦le ko aer. Bareinwõt, likjab ak m̦õjn̦o̦ ko aerro jim̦or remaroñ kõm̦m̦an aerro illu im inepata ippãn doon. Ñe ruo armej rej date, remaroñ l̦õmn̦ak bwe rejjab aikuj kõnono ippãn doon kõn men kein el̦ap aer aorõk. Ak el̦aññe rejjab kõnnaan kaki, remaroñ kõm̦m̦an bwe en wõr apañ ikõtaaerro tokãlik. Kõn men in, em̦m̦anl̦o̦k ñe erro en kõnono ippãn doon kõn men kein m̦okta jãn aerro m̦are.

16. Etke ro rej l̦õmn̦ak in m̦are rej aikuj errã ippãn doon kõn ewi wãween renaaj kõm̦adm̦õde apañ ko aer?

¹⁶ Bwe ruo armej ren m̦õn̦õn̦õ wõt ippãn doon, rej aikuj errã ippãn doon kõn ewi wãween renaaj kõm̦m̦ani eddo ko aer. Bareinwõt, rej aikuj errã ippãn doon kõn ewi wãween renaaj katakin ro nejier im lale im kõjparok jemãer im jineer ñe relukkuun rũtto. Aolep baam̦le ewõr aer apañ. Bõtab, men kein rejjab aikuj kõjepel erro. Naan in kakapilõk eo ilo Baibõl̦ emaroñ jipañ erro ñan kõm̦adm̦õde apañ ko rej iioni im kijenmej kõn apañ ko me epen aer n̦amejal̦ãer, im m̦õn̦õn̦õ wõt ippãn doon.​​—1 Korint 7:10, 11, UBS.

17. Etke ro em̦õj aer m̦are rej inepata “kin men ko an lõl”?

¹⁷ Paul ear kõmel̦el̦el̦o̦k wõt kõn ta ko rej wal̦o̦k ñe ruo armej rej m̦are ilo 1 Korint 7:32-​34, (UBS). (Riit.) Armej ro em̦õj aer m̦are rej inepata “kin men ko an lõl.” Ta kein? Rej men ko ãinwõt m̦õñã, nuknuk, jikin jokwe, im bar aikuj ko jet. Etke ri pãlele ro rej inepata “kin men ko an lõl”? Ñan waanjoñak, ke juon brother ear ejjel̦o̦k rejetan, bõlen ear l̦ap an iien im ekõn kamaatl̦o̦k an ilo jerbal in kwal̦o̦k naan. Ak ãlikin an m̦are, ej aikuj kiiõ kõjerbal iien ko an ñan kõjparok lio pãleen. Ãindein, lio ej aikuj bar kõm̦m̦ane men in ñan l̦eo pãleen. Jeova emel̦el̦e bwe l̦eo im lio jim̦or rekõn̦aan kam̦õn̦õn̦õik doon. Ejel̦ã bwe ri pãlele ro remaroñ jab ãinwõt m̦okta ke ekõn l̦ap aer iien im maroñ ñan kõm̦m̦ane jerbal eo an ke rejañin kar m̦are. Kiiõ renaaj aikuj kõjerbal iien im maroñ ko aer ñan kakajoor kõtaan eo aer ippãn doon.

18. Ta oktak ko ri pãlele ro rej aikuj kõm̦m̦ani kõn wãween aer kõjerbal iien ko aer ñan menin kam̦õn̦õn̦õ ko?

¹⁸ Ak ta kõn iien ko l̦eo im lio rekõn kõm̦m̦ane menin kam̦õn̦õn̦õ ko ak men ko jet ke ear ejjel̦o̦k pãleer? Eokwe el̦aññe ri pãlele ro rej aikuj kadikl̦o̦k jidik aer kõjerbal iien im maroñ ko aer ilo jerbal eo an Jeova ñan kakajoorl̦o̦k kõtaan eo aerro, rej aikuj bar kõm̦m̦an ãindein kõn menin kam̦õn̦õn̦õ ko. El̦aññe l̦eo ej jol̦o̦k el̦ap iien im iukkure ippãn ro m̦õttan ãinwõt ekõn kõm̦m̦ane m̦okta jãn an kar m̦are, ewi an naaj lio pãleen eñjake? Ak ewi naaj eñjake eo an l̦eo el̦aññe lio pãleen ej jol̦o̦k el̦ap iien ippãn ro m̦õttan ãinwõt ekõn kõm̦m̦ane m̦okta jãn aerro kar m̦are? Erro jim̦or remaroñ bũrom̦õj, jab m̦õn̦õn̦õ, im eñjake bwe eo juon ejjab yokwe e. Ñan bõbrae bwe men in en jab wal̦o̦k, ri pãlele ro rej aikuj kamaat joñan aer maroñ ñan kakajoorl̦o̦k kõtaan eo aerro.​​—Epesõs 5:31.

Jeova Ekõn̦aan bwe Jen Dãpij Ad Erreo

19, 20. (1) Etke ri pãlele ro rej aikuj kõjparok er make jãn mour in l̦õñ? (2) Etke ekauwõtata ñe l̦eo im lio rej jenolo̦k jãn doon ium̦win juon iien eaitok?

¹⁹ Ri karejar ro an Jeova rej kate er bwe ren erreo wõt. Jet rej pepe in m̦are kõnke rej l̦õmn̦ak bwe men in enaaj kõjparok er bwe ren jab l̦õñ. Ak jekdo̦o̦n ñe juon em̦õj an m̦are ak ej aikuj bar kõjparok e jãn l̦õñ. Ri m̦are ro rej aikuj bar kõjparok er jãn mour in l̦õñ. Ilo iien ko etto, ekkã aer kalõk juon worwor el̦ap im pen ipel̦aakin juon jikin kweilo̦k. El̦aññe juon armej ej pãd wõt iloan jikin kweilo̦k eo, ejamin uwõta. Bõtab, el̦aññe ej diwõjl̦o̦k jãn wõrwõr eo, emaroñ kauwõtata kõnke elõñ ri nana im ri ko̦o̦t inabõjin worwor eo. Jeova ear kõm̦m̦an bwe l̦eo im lio ren pãd ippãn doon. Men in ej ãinwõt wõrwõr eo epen me ej pãd ipel̦aakin jikin kweilo̦k eo. Wãween eo wõt bwe ri pãlele ro ren kõjparok er jãn l̦õñ ej ñe rej pokake kien ko an Jeova ñan pãd wõt ippãn doon.

²⁰ Paul ear kwal̦o̦k kõn men in ilo 1 Korint 7:2-5, (UBS). Lio wõt ewõr an maroñ ioon ãnbwinin l̦eo ñan pãd ippãn. Im l̦eo bareinwõt ewõr an maroñ ñan peeke ãnbwinin lio pãleen. Anij ear ba bwe kajjojo iaerro ej aikuj “komman men ko kwonaan.” Mel̦el̦ein bwe el̦aññe l̦eo ak lio ekõn̦aan pãd ippãn eo pãleen, innem eo pãleen ej aikuj kajejjete kõn̦aan eo an. El̦aññe ri pãlele ro rej jenolo̦k jãn doon ilo juon iien eaitok, rejjab maroñ kabwe aikuj ko an doon. Jet rej etal ñan jet jikin rettol̦o̦k im kakkije ie ak eo pãleer ejako ippãer. Bareinwõt jet rej jako jen iturin eo pãleer ium̦win juon iien eaitok kõn jikin jerbal. Setan emaroñ kõjerbal wãween kein ñan ko̦kkure kõtaan eo an ri pãlele ro. El̦aññe l̦eo ak lio ejjab lale ijo kun̦aan ñan kabwe aikuj jab in aerro eo pãleen, eokwe juon iaerro emaroñ bo ilo aujiid eo ñan l̦õñ. Jeova enaaj kajeraam̦m̦an l̦õm̦aro me rej kabwe aikuj ko an baam̦le ko aer ak rejjab kõm̦m̦ani men ko me renaaj rupe kõtaan eo aer ippãn lim̦aro pãleer.​​—Sam 37:25, UBS.

Pokake Naan in Kakapilõk ko ilo Baibõl̦

21. (1) Etke jokãlõt eo ñan jab pãlele im ñan m̦are ejjab pidodo? (2) Ewi wãween naan in kakapilõk ko ilo 1 Korint jebta 7 rej jipañ kõj?

²¹ Jokãlõt eo ñan jab pãlele im ñan m̦are ejjab pidodo. Jekdo̦o̦n ta jokãlõt eo am̦, kwõnaaj baj iion apañ kõnke aolep rejjab weeppãn. Im meñe Jeova ej kajeraam̦m̦an armej ro an, ak jet iien renaaj inepata kõn men ko rej wal̦o̦k ilo mour ko aer. Bõtab naan in kakapilõk ko rem̦m̦an an Paul ilo 1 Korint jebta 7 emaroñ jipañ eok ñan bõbrae an wal̦o̦k apañ ko me jaar etali ilo katak in. Innem jekdo̦o̦n ñe ejjel̦o̦k pãleed ak em̦õj ad m̦are, jemaroñ kabuñbũruon Jeova. Baibõl̦ eo ej ba: “Innem l̦eo ej bareinwõt m̦are kõnke ekõn̦aan pãlele ej kõm̦m̦an em̦m̦an; ak eo ejjab pãlele, em̦m̦anl̦o̦k an kõm̦m̦an.” (1 Korint 7:38, NW) Ñe Jeova ej buñbũruon ippãd men in ej make wõt im juon jeraam̦m̦an el̦ap. Jemaroñ kabuñbũruon kiiõ im bareinwõt ilo ilju im jekl̦aj ñe jenaaj mour ilo lal̦ eo ekããl me Anij ear kallim̦ur kake. Ilo iien in, l̦õm̦aro im lim̦aro reban iion ijjiped im apañ ko rej jelm̦aiki rainin.

[Kamelele eo itulal]

Ta Uwaak eo Am̦?

• Etke ejjel̦o̦k juon ej aikuj iuuni ro jet ñan m̦are?

• Ewi wãween kwõmaroñ kortokjãn iien eo ke ejjel̦o̦k pãleem̦?

• Ewi wãween armej ro rej date remaroñ kepoj er make ñan jel̦ã kõm̦adm̦õde apañ ko ãlikin aer m̦are?

• Etke ri pãlele ro rej aikuj kõjparok er make jãn mour in l̦õñ?

[Pija ilo peij 14]

Kũrjin ro ejjel̦o̦k pãleer me rej kal̦apl̦o̦k aer iien ñan kwal̦o̦k naan rej lo lañlõñ

[Pija ilo peij 16]

Ta oktak ko jet rej aikuj kõm̦m̦ani ãlikin aer m̦are?