Ebream​—Juon Armej El̦ap an Tõmak

Ebream ej jutak inabõj ilo juon boñ me ejjel̦o̦k ekeroro. Ke ej reilõñl̦o̦k ñan lañ im lo bwijin iju ko, men eo wõt ej l̦õmn̦ak kake ej kallim̦ur eo an Anij bwe ro ineen renaaj lõñ ãinwõt iju ko ilañ. (Jenesis 15:5) Ippãn Ebream, iju ko ilañ rar kein kakeememej e kõn kallim̦ur eo an Jeova ñan e. Rar bareinwõt kalikkar bwe enaaj jejjet im m̦ool. El̦aññe Jeova ewõr an maroñ ñan kõm̦anm̦an men ko otemjej ilañ im ioon lal̦, alikkar bwe enaaj kõm̦m̦an bwe en maroñ wõr juon nejin Ebream im Sera. Eñin men eo ear kõm̦m̦an bwe Ebream en tõmak.

TA IN TÕMAK? Ekkar ñan Baibõl̦, “tõmak ej ãinwõt lõke kõn men ko jej kõjatdikdik kõj kaki, im reel bũruod kõn men ko je jab loi.” (Hibru 11:1) Juon armej ej tõmak ilo Anij ej reim̦aanl̦o̦k wõt ñan iien eo enaaj jejjet kitien kallim̦ur ko an Jeova, im joñan an lõke bwe renaaj jejjet kitieer ej ãinwõt ñe em̦õj aer jejjet kadede.

EWI WÃWEEN EBREAM EAR KWAL̦O̦K AN TÕMAK? Ebream ear kwal̦o̦k bwe ear tõmaki kallim̦ur ko an Anij. Kõn an kajoor tõmak eo an Ebream, ear em̦m̦akũt jãn l̦ãm̦oran eo an, im ear lõke bwe Jeova enaaj kam̦ool naan ko An bwe enaaj kwal̦o̦k bar juon ãne ñan e. Kõn tõmak, Ebream ear itoitak ilujen Kenean, im ear lõke bwe ro ineen renaaj tokãlik jukjuk im amn̦ak ilo ãne in. Im kõn tõmak, Ebream ear pokake wõt ke ear kajjioñ katok kõn Aisak, im ear lõke bwe el̦aññe emenin aikuj, Jeova enaaj bar kõmour Aisak.​—Hibru 11:8, 9, 17-19.

Ebream ear l̦õmn̦ak wõt kõn raan ko rej pãd im̦aan im jab reilikl̦o̦k. Meñe ear em̦m̦anl̦o̦k kõjeãn Ebream im Sera ilo Õr jãn ke rar jokwe ilo Kenean, bõtab “rar jab l̦õmn̦ak kõn aelõñ eo rar ilo̦k jãne.” (Hibru 11:15, UBS) Jãn aer ãindein, rar l̦õmn̦ak wõt kõn wãween Anij enaaj kajeraam̦m̦an er im ro ineer ilo raan ko rej pãd im̦aan.​—Hibru 11:16.

Ewõr ke unin an kar Ebream tõmak? Aet, kõnke Jeova ear kajejjet kajjojo iaan kallim̦ur ko an ñan Ebream. Tokãlik, ro ineen Ebream rar orl̦o̦k im ejaake juon aelõñ ekajoor etan Israel. Ejjabto, Ri Israel ro rar etal im jokwe ilo ãnen Kenean, ãneo me Jeova ear kallim̦ur kake ñan Ebream.​—Joshua 11:23.

TA KO JEMAROÑ KATAK JÃN MEN IN? Jemaroñ lõke bwe Jeova enaaj kajejjet kitien kallim̦ur ko an. Meñe armej remaroñ l̦õmn̦ak bwe eban tõprak, ak jej lõke bwe “Anij emaroñe men otemjej.”​—Matu 19:26, UBS.

Joñak eo an Ebream ej bareinwõt katakin kõj ñan l̦õmn̦ak wõt kõn men ko im jenaaj lañlõñ kaki ilju im jekl̦aj im jab reilikl̦o̦k ñan kar wãween mour eo ad m̦okta. Eñin men eo me juon em̦m̦aan etan Jason ear katak ñan kõm̦m̦ane. Jason ej bõk juon nañinmej me ear kõm̦m̦an an m̦õjn̦o̦ im mej ãnbwinnin. L̦ein ear ba, “Em̦ool bwe ewõr iien ij emel̦ake men ko ikõn kõm̦m̦ani m̦okta jãn aõ kar bõk nañinmej in, men ko ãinl̦o̦k wõt aõ kõn atbo̦kwõj lio pãleeõ Amanda.”

Jekdo̦o̦n ak el̦ap an Jason tõmak bwe Jeova enaaj kajejjet kitien kallim̦ur ko an, ekoba kallim̦ur eo bwe lal̦ in enaaj erom juon pedetaij im bwe armej ro retiljek renaaj maroñ mour indeeo im renaaj lukkuun ãjmour.a (Lale kõmel̦el̦e eo itulal̦.) (Sam 37:10, 11, 29; Aiseia 35:5, 6; Revelesõn 21:3, 4) Jason ej kõmel̦el̦e im ba: “Ij kakeememej ña make bwe iien ko rem̦m̦antata rej pãd im̦aan. Ejjabto enaaj jako an nana ad mour, ad inepata, m̦õk, im bũrom̦õj. Men kein renaaj jako ñan indeeo.” Ekanooj in em̦m̦an tõmak in an l̦ein ãinwõt kar Ebream!

[Komel̦el̦e eo itulal̦]