KAJJITÕK KO BAIBÕL̦ EJ UWAAKI

Etan Anij?

Kajjojo armej ilo baam̦le eo ad ewõr etaer. Ak Anij ewõr ke etan? Baibõl̦ ej kwal̦o̦k bwe elõñ taitõl̦ ko ippãn Anij. Ñan waanjoñak, ej Anij L̦apl̦ap, Irooj Bõtata, im Ri Kõm̦anm̦an. Bõtab, Baibõl̦ ej bar kwal̦o̦k bwe ewõr etan Anij.​—Riit Aiseia 42:8.

Elõñ ukok in Baibõl̦ ko rej kwal̦o̦k kõn ãt eo etan Anij ilo Sam 83:18. Ñan waanjoñak, ilo Baibõl̦ eo Naan ko Rejouj Ministries, eoon in ej ba: “Bwe ren jel̦ã bwe Kwe wõt, im etam̦ Jeova, Kwe eo e utiejtata ioon aolepen lal̦ in.”

Etke jej aikuj kõjerbal etan Anij?

Anij ekõn̦aan bwe jen kõjerbal ãt eo etan. Ñe jej kõnono ippãn ro jej epaake er ãinwõt ro m̦õttad, ekkã wõt ad ãñinñin er kõn ãt ko etaer. Jej aikuj bar ãindein ñe jej jar im kõnono ippãn Anij. Jijej Kũraij ear bareinwõt ba bwe jej aikuj kõjerbal ãt eo etan Anij.​—Riit Matu 6:9; Jon 17:26.

Bõtab, ejabwe ñan ad baj jel̦ã wõt ãt eo etan Anij. El̦aññe jekõn̦aan epaake Anij ãinwõt juon jerad, jej aikuj bar kal̦apl̦o̦k ad jel̦ã kajjien. Ñan waanjoñak, kain Anij rot e? M̦ool ke bwe jemaroñ epaake Anij? Eokwe, kwõmaroñ lo uwaak ko ilo Baibõl̦ ñan kajjitõk kein. Ñan kal̦apl̦o̦k am̦ mel̦el̦e, jouj im lale katak 1 ilo bok in me Ri Kõnnaan ro an Jeova rar kõm̦m̦ane.