Jijej Joñak Eo An Emaroñ Jipañ Kõj Lo M̦õn̦õn̦õ Ilo Mour Ko Ad

JIJEJ ear ke m̦õn̦õn̦õ ilo mour eo an? Jijej ear dik im rũttol̦o̦k ippãn juon baam̦le me ettã, im ear jab m̦weiie ilo aolepen mour eo an. Ilo m̦ool, Baibõl̦ ej ba bwe ear “ejjel̦o̦k jikin an babu im kakkije.” (Luk 9:57, 58, UBS) Kobal̦o̦k ippãn men in, armej ro rar matõrtõre, n̦aruon, im ãliktata rar m̦ane ñan mej.

Kwõmaroñ l̦õmn̦ak kõn mour eo an Jijej im ba bwe kain mour rot in eban kõm̦m̦an ad m̦õn̦õn̦õ. Bõtab, elõñl̦o̦k men ko jemaroñ katak kaki kõn mour eo an Jijej. Jen lale emãn iaan men kein.

1. UNIN AN KAR JIJEJ MOUR EJ ÑAN KÕM̦ANM̦AN ANKILAAN ANIJ.

“M̦õñã eo kijõ eñin: bwe in kõm̦anm̦an ankilaan eo ear jilkintok eõ.”​—Jon 4:34, UBS.

Naan im kõm̦m̦an ko an Jijej rar kaalikkar an kõn̦aan kõm̦anm̦an ankilaan Jeova, Jemãn ilañ.a (Lale kõmel̦el̦e eo itulal̦.) Jijej ear lukkuun m̦õn̦õn̦õ ke ear kõm̦m̦ani men ko Anij ekõn̦aan. Joñan, ear keidi men in ñan m̦õñã, ãinwõt an wal̦o̦k ilo eoon eo m̦oktal̦o̦k. Jen etale ta ko rar wal̦o̦k ilo tõre eo me Jijej ear ba naan kein.

Eraelep ke Jijej ear ba naan kein. (Jon 4:6, UBS) Ejjel̦o̦k pere bwe ilo tõre eo, Jijej ear kwõle kõnke ej kab m̦õj an etetal aolepen jibboñõn eo ilo tol̦ ko ilo Sameria. Ilo m̦ool, rũkal̦oor ro an rar akwel̦ap ñan Jijej im ba: “Rũkaki, kwõn m̦õñã!” (Jon 4:31, UBS) Bõtab, uwaak eo an Jijej ñan er ear kaalikkar bwe ilo an kõm̦m̦ane jerbal eo an Anij, men in ej kakajoor e. Men in ej kaalikkar bwe Jijej ear m̦õn̦õn̦õ ilo mour eo an.

2. JIJEJ EAR LUKKUUN YOKWE JEMÃN.

“Ña ij yokwe Jema.”​—Jon 14:31.

Ke Jijej ear mour ilañ, ear lukkuun yokwe im epaake Jemãn. Men in ear kõm̦akũt e ñan kwal̦o̦k kõn Jemãn ñan ro jet. Eñin unin ear katakin armej ro kõn etan Jemãn, karõk ko an, im kain Anij rot E. Wãween an Jijej kõnnaan, kõm̦m̦an, im l̦õmn̦ak rar kwal̦o̦k bwe ej ãinwõt Jemãn. Joñan, ñe jej riit im katak kõn Jijej, ej ãinwõt ñe jej bar riit im katak kõn Jemãn. Eñin unin ke Pilip ear kajjitõk ippãn Jijej: “Irooj, kwõn kwal̦o̦k jemam̦ ñan kõm,” Jijej ear ba: “Eo ear lo ña, ear lo Jema.”​—Jon 14:8, 9.

Joñan an kar Jijej yokwe Jemãn, ear m̦õn̦õn̦õ in pokake E ñan mej. (Pilippai 2:7, 8; 1 Jon 5:3) Jijej ear m̦õn̦õn̦õ ilo mour eo an kõnke ear lukkuun yokwe Anij.

3. JIJEJ EAR YOKWE ARMEJ RO.

“Ejjel̦o̦k yokwe ippãn armej el̦ap jãn yokwe in, bwe armej en lel̦o̦k an mour kõn ro jeran.”​—Jon 15:13.

Elõñ armej rej l̦õmn̦ak bwe kõnke jejjab weeppãn, ilju im jekl̦aj eo ad eban em̦m̦an. Baibõl̦ ej ba: “Ãinwõt kõn juon armej [Adam], jerawiwi ear del̦o̦ñ ilo lal̦, im mej kõn jerawiwi; im ãindein mej ear itok ioon armej otemjej, bwe er otemjej rar jerawiwi.” (Rom 5:12) Ealikkar bwe jeban ko jãn mej kõnke kõj armej ri jerawiwi.​—Rom 6:23.

Bõtab, el̦ap ad kam̦m̦oolol bwe Jeova ear kõm̦adm̦õde apañ in. Ear letok Jijej bwe en aje mour eo an im mej ñan lo̦mo̦o̦ren armej jãn jerawiwi im mej. Kõn yokwe eo an Jijej ñan Jemãn im ñan armej, ear m̦õn̦õn̦õ in ajel̦o̦k mour eo an eweeppãn kõn kõj. (Rom 5:6-8) Kõnke ear wõr ippãn Jijej kain yokwe rot in ñan Jemãn im ro jet, men in ear kõm̦m̦an bwe en m̦õn̦õn̦õ ilo mour eo an.b​—Lale kõmel̦el̦e eo itulal̦.

4. JIJEJ EAR JEL̦Ã BWE JEMÃN EAR YOKWE E IM BUÑBŨRUON KAKE.

“E in nejũ jitõnbõro ippa, Ij m̦õn̦õn̦õ kake.”​—Matu 3:17.

Jeova ear ba naan kein jãn ilañ ilo iien eo Jijej ear peptaij. Men in ej kwal̦o̦k bwe Jeova ejjab ãliklik in kwal̦o̦k an yokwe im kaorõk Jijej, eo Nejin. Eñin unin Jijej ear ba: “Jema ej yokwe eõ”! (Jon 10:17, UBS) Kõnke Jijej ear jel̦ã bwe Jemãn ej yokwe e im buñbũruon kake, men in ear kakajoor e ñan kijenmej wõt meñe armej ro rar matõrtõre im kaeñtaane. Men in ear bareinwõt jipañe bwe en m̦õn̦õn̦õ in mej. (Jon 10:18, UBS) Kõnke Jijej ear jel̦ã joñan an Jemãn yokwe e im m̦õn̦õn̦õ kake, men in ear kõm̦m̦an bwe en l̦apl̦o̦k an Jijej m̦õn̦õn̦õ ilo mour eo an.

Jijej ear lukkuun m̦õn̦õn̦õ ilo mour eo an. Ealikkar bwe jemaroñ katak elõñ men ko jãn e im kõn ewi wãween jemaroñ m̦õn̦õn̦õ ilo mour ko ad. Katak in tok juon enaaj kwal̦o̦k jet iaan naan in kakapilõk ko me Jijej ear kwal̦o̦ki ñan rũkal̦oor ro an kõn ta ko jej aikuj kõm̦m̦ani ilo mour ko ad bwe jen maroñ m̦õn̦õn̦õ.