Ewõr Ke Juon Kabuñ Em̦ool me Kwõmaroñ Tõmak im Lõke?

El̦aññe kwaar inepata im illu ippãn juon kabuñ kõn men ko ej kõm̦m̦ani, bõlen men in ej kõm̦m̦an am̦ jab tõmak jabdewõt kabuñ. Bõtab, ewõr kein kam̦ool ko bwe ewõr juon kabuñ em̦ool me kwõmaroñ tõmake im lõke. Ke Jijej ear pãd ijin ioon lal̦, ear aini juon kumi in armej ro me rar tiljek ilo aer l̦oore. Ear katakin er ñan kõm̦m̦ani men ko me Anij ear kõn̦aan bwe ren kõm̦m̦ani. Ilo raan kein, ej lõñ wõt armej ro im rej lukkuun kate er ñan l̦oor Kũraij ilo mour ko aer. Kabuñ ta eo kwõmaroñ lo armej rein ie?

Estelle, kõrã eo me jaar kõnono kake ilo katak ko l̦o̦k im̦aan ej ba: “Ij kab katak Baibõl̦ ke iar katak ippãn Ri Kõnnaan ro an Jeova. Ejjabto tokãlik iar lukkuun mel̦el̦e im errã ilo eoon eo ilo Jon 8:32 (UBS) me ej ba, ‘Kom̦ naaj jel̦ã m̦ool eo, im m̦ool eo enaaj kanemkwõj kom̦.’”

Ray, em̦m̦aan eo me jaar kõnono kake ilo bar katak ko l̦o̦k im̦aan ej ba: “Ke iar katak ippãn Ri Kõnnaan ro an Jeova ij kab jel̦ã bwe apañ ko jej iiooni rejjab ankilaan Anij. Iar m̦õn̦õn̦õ in katak bwe ewõr unin an Anij kõtl̦o̦k bwe armej ro ren eñtaan. Im bwe meñe jej eñtaan kiiõ ak Anij ej kallim̦ur bwe m̦õttan jidik enaaj jol̦o̦k aolep men ko renana.”

Ñe ej wõr juon aet ekajoor, ejjab pidodo ñan aõ. Ãindein, ekanooj pen ñan kõm̦m̦ani men ko rejim̦we ñe enañin aolep armej rej kõm̦m̦ani men ko renana. Bõtab ewõr ad maroñ ñan kõm̦m̦ani men ko rejim̦we. Elõñ armej ro rej kõn̦aan bwe juon en jipañ er ñan mel̦el̦e im jel̦ã kilen l̦oore ta eo Baibõl̦ ej ba. Eñin unin Ri Kõnnaan ro an Jeova rej katak Baibõl̦ ippãn elõñ milien armej ro ilo ijoko otemjej. Im ejjel̦o̦k on̦ean aer katak Baibõl̦ ippãn armej ro. Kajjojo wiik, bwijin armej ro rej katak kõn katak ko rem̦ool jãn Baibõl̦. Kõn aer kõm̦m̦ane men in, rej ruwaakl̦o̦k ñan Ri Kõm̦anm̦an eo im el̦apl̦o̦k aer m̦õn̦õn̦õ ilo mour ko aer.a (Lale kõmel̦el̦e eo itulal̦.)

Ñe kwõj bar kõnono ippãn Ri Kõnnaan ro an Jeova kwõmaroñ kajjitõk ippãer kõn etke rej tõmak im lõke kabuñ eo aer. Etali men ko rej katakin armej ro im lale el̦aññe rej l̦oore ta eo Baibõl̦ ej ba ilo mour ko aer. Innem kwõnaaj maroñ make jel̦ã el̦aññe ewõr juon kabuñ em̦ool me kwõmaroñ tõmake im lõke.