Jeova Ear M̦õn̦õn̦õ in Jol̦o̦k Am̦ Bõd

Juon ri jeje bwebwenato etan Edward Herbert me ear mour 400 iiõ ko remootl̦o̦k, ear ba bwe juon eo ejjab jol̦o̦k an ro jet bõd enaaj kõm̦m̦an bwe ro jet ren jab jol̦o̦k an bõd. Men in ej kaalikkar unin ad aikuj jol̦o̦k an ro jet bõd. Ewõr iien jenaaj aikuj bar kajjitõk bwe ro jet ren jol̦o̦k ad bõd. (Matu 7:12) Bõtab, ewõr juon un el̦apl̦o̦k unin ad aikuj jol̦o̦k an ro jet bõd. Rijjelõk Paul ear je: “Kom̦win meanwõd ñan doon, im jeorl̦o̦k nana jãn doon, el̦aññe ippãn jabdewõt iaami ewõr ruõn ippãn bar juon; im ãinwõt [Jeova, NW] ear jeorl̦o̦k ami nana, en ãindein bareinwõt ami kõm̦m̦an ñan doon.”​—Kolosse 3:13.

Kõj aolep jejjab weeppãn. Eñin unin ewõr iien jej uwaan kakũtõtõ ippãn ro jet ak ro jet rej uwaan kakũtõtõ ippãd. (Rom 3:23, UBS) Kõnke jejjab weeppãn, ta eo jemaroñ kõm̦m̦ane bwe en wõr wõt aenõm̦m̦an ikõtaad im ro jet? Anij ear kamaroñ Paul ikijjeen kajoor eo an ñan rõjañ kõj bwe jen jel̦ã kijenmej im jol̦o̦k an doon bõd. Meñe kar je men in enañin 2,000 iiõ ko, ak emaroñ bar jipañ kõj rainin. Jen etale naan kein an Paul.

“Kom̦win meanwõd ñan doon.” Naan kein “kom̦win meanwõd ñan doon” emaroñ bar kitibuj ad kijenmej wõt ippãn ro jet. Juon bok ej ba bwe Kũrjin ro me rej kwal̦o̦k wãween in “rej m̦õn̦õn̦õ in kijenmej wõt ippãn ro jet rej me men ko rej kõm̦m̦ani rej kalluuk er.” Naan kein “ñan doon” ej kwal̦o̦k bwe armej ro jim̦or rej aikuj kijenmej kake doon. Innem, ñe jej keememej bwe ewõr wãween ko ippãd me jowaan kakũtõtõ kaki ippãn ro jet, jeban kõtl̦o̦k bwe men eo jedike kõn armej eo en ko̦kkure ad aenõm̦m̦an ippãer. Ak ta el̦aññe armej eo ear bõd n̦ae kõj?

“Kom̦win . . . jeorl̦o̦k nana jãn doon.” Ekkar ñan juon ri mãlõtlõt, naan in Grik eo me kar likũti ilo eoon in ñan “jeorl̦o̦k nana” ak jol̦o̦k bõd em̦wilal̦ mel̦el̦ein. Ej jitõñl̦o̦k ñan juon eo me ejouj im ekõn̦aan jol̦o̦k an armej bõd. Bar juon bok ej ba bwe naan in emaroñ mel̦el̦ein “ñan kõm̦m̦ane juon men ekajubõro, kokõn̦aan kõm̦m̦ane im ewõr tokjãn ñan kwe.” Jemaroñ kwal̦o̦k jouj ilo ad m̦õn̦õn̦õ in jol̦o̦k an armej eo bõd meñe ewõr ruõn ippãd. Etke jej m̦õn̦õn̦õ in jol̦o̦k an armej eo bõd meñe ewõr ruõn ippãd? Eokwe, ej kõnke emaroñ wõr juon iien me jemaroñ bõd n̦ae e im jenaaj bar kajjitõk bwe en jol̦o̦k ad bõd.

“Ãinwõt [Jeova, NW] ear jeorl̦o̦k ami nana, en ãindein bareinwõt ami kõm̦m̦an ñan doon.” Eñin un eo el̦aptata unin ad aikuj m̦õn̦õn̦õ in jol̦o̦k an ro jet bõd: Jeova Anij ej m̦õn̦õn̦õ in jeorl̦o̦k ad nana ak bõd. (Maika 7:18) L̦õmn̦ak m̦õk kõn joñan an Jeova jouj ñan ro rej ukel̦o̦k jãn jerawiwi ko aer. Jeova eoktak jãn kõj kõnke ejjab maroñ jerawiwi ak kõm̦m̦an bõd. Meñe ãindein ak ej m̦õn̦õn̦õ in jol̦o̦k an ro rej ukel̦o̦k bõd. Jekdo̦o̦n ñe ejel̦ã bwe eban aikuj kajjitõk an bõd ippãer kõnke eban jerawiwi n̦ae er. Alikkar bwe Jeova eo el̦aptata an m̦õn̦õn̦õ in jol̦o̦k an ro ri jerawiwi bõd!

Kõn an Jeova tũriam̦okake kõj, ekõm̦m̦an menin ad epaakel̦o̦k e im kõn̦aan kajjioñe e. (Epesõs 4:32–5:1, UBS) Jen l̦õmn̦ak m̦õk kõn men in. Jeova ej m̦õn̦õn̦õ in jol̦o̦k ad bõd. Innem, el̦aññe juon ear bõd n̦ae kõj im ebũrom̦õj kõn men eo ear kõm̦m̦ane, etke jejjab jol̦o̦k an bõd?​—Luk 17:3, 4, UBS.