M̦ool Ke bwe Epen Ad Mel̦el̦e kõn Anij?

TÕMAK EO AN ELÕÑ ARMEJ

Juon bok ej ba bwe kabuñ in Orthodox ilo Europe im kabuñ in Katlik kab Bũrotijen, rej aolep tõmak bwe Anij ej jilu anij ilo juon ak Trinity. Jemãn ej Anij, Nejin ej Anij, im Jetõb Kwõjarjar ej bar Anij. Ekkar ñan kabuñ kein rej ba bwe ejjab mel̦el̦ein bwe ewõr jilu Anij ak ej bwe Jemãn, Nejin im Jetõb Kwõjarjar rej juon wõt Anij.​—The New Encyclopædia Britannica.

MEN EO BAIBÕL̦ EJ BA

Nejin Anij, Jijej, ear jab ba bwe e Anij im ear jab ba bwe erro Jemãn ej joñan wõt juon. Ak ear ba: “Ij ilo̦k ñan Jema, bwe Jema el̦ap jãn Ña.” (Jon 14:28) Ear bar ba ñan juon iaan rũkal̦oor ro an: “Ij wanlõñl̦o̦k ñan Jema, im Jememi, im ñan Aõ Anij, im ami Anij.”​—Jon 20:17.

Jetõb Kwõjarjar ejjab Anij. Kũrjin ro ilo iien ko an rijjilõk ro rar “obrak kõn Jetõb Kwõjarjar” im Jeova ear ba: “Inaaj lutõk aõ Jetõb ioon kanniõk otemjej.” (Jerbal 2:1-4, 17) Jetõb Kwõjarjar ejjab anij ak ej kajoor eo an Anij.​—Lale kõmel̦el̦e eo kõn Jenesis 1:2, UBS ilo tulal̦ in peij eo.

UNIN AN AORÕK ÑAN JEL̦Ã M̦OOL EO

Elõñ rej ba bwe elukkuun pen ad mel̦el̦e kõn Anij. Ekkar ñan juon bok ej ba bwe jekdo̦o̦n ewi joñan an juon armej mãlõtlõt ak eban maroñ mel̦el̦e ewi wãween jilu Anij rej maroñ juon wõt Anij kõnke elukkuun pen kõmel̦el̦eik men in. (Orthodox Encyclopedia, vol. II) Ak kajjitõk eo in, kwõmaroñ ke yokwe juon eo me epen am̦ jel̦ã im mel̦el̦e kõn e? Eokwe, tõmak eo kõn jilu Anij ilo juon ej kõm̦m̦an bwe en pen an armej ro jel̦ã kõn Anij, eo im el̦ap yokwe ippãn.

Marco, eo me kar kwal̦o̦k ilo katak ko l̦o̦k ear kile bwe unin an pen ñan epaake Anij ej kõn tõmak eo kõn Trinity ak jilu Anij ilo juon. Kõn an pen an mel̦el̦e kõn tõmak in, ej ba: “Iar l̦õmn̦ak bwe Anij ejjab kõn̦aan bwe in jel̦ã kõn e. Eñin men eo ear bar kõm̦m̦an aõ l̦õmn̦ak bwe Anij ejjab epaake kõj armej, im bwe epen ñan mel̦el̦e kake im ejjel̦o̦k an kea ak yokwe.” Bõtab, Anij ekõn̦aan bwe jen jel̦ã im mel̦el̦e kõn e. Baibõl̦ ej ba: “Ilo m̦ool Anij ejjab ettol̦o̦k jãn kajjojo iaad.” (Jerbal 17:27, UBS) Bareinwõt, Jijej ear ba: “Kõm jel̦ã eo kõmij kabuñ ñan e.”​—Jon 4:22.

Marco ear ba: “Ilo iien eo iar katak im jel̦ã bwe Anij ejjab jilu Anij ilo juon, ij kab jino kiiõ epaake e.” El̦aññe jej mel̦el̦e im jel̦ã kõn Jeova Anij, enaaj pidodo ad yokwe e. Baibõl̦ ej ba: “Eo ejjab yokwe ejjab jel̦ã Anij, bwe Anij yokwe.”​—1 Jon 4:8.