Ejjel̦o̦k Bar Juon Wãween Mour Em̦m̦anl̦o̦k

Ta ko kwõmaroñ kõm̦m̦ani bwe kwõn maroñ epaake Anij? Em̦õj ad etale ta ko jemaroñ kõm̦m̦ani bwe jen maroñ epaake E. Erkein ej men ko:

1. Jel̦ã bwe etan Anij ej Jeova im kõjerbale ãt in.

2. En ikkutkut am̦ kõnnaan ak bwebwenato ippãn ilo am̦ jar ñane im katak Naan ko an ilo Baibõl̦.

3. Kõm̦m̦ani wõt men ko rej kabuñbũruon Jeova.

Ãlikin am̦ kar etale men kein, kwõmaroñ ke ba bwe kwõj kõm̦m̦ani men ko kwõj aikuj kõm̦m̦ani bwe kwõn epaake Anij? Ewõr ke iaan men kein kwõj kile bwe kwõmaroñ kakõm̦anm̦anl̦o̦k? Meñe emaroñ naaj pen, ak keememej bwe ewõr tokjãn am̦ naaj kate eok.

Jennifer, juon kõrã ilo Amedka, ej ba: “Elukkuun l̦ap tokjãn am̦ kate eok ñan kõm̦m̦an bwe kwõn maroñ epaake Anij. Elõñ jeraam̦m̦an ko rej wal̦o̦k. El̦apl̦o̦k am̦ lõke Anij, mel̦el̦e kõn kain Anij rot e, im el̦aptata, el̦apl̦o̦k am̦ yokwe E. Ejjel̦o̦k bar juon wãween mour em̦m̦anl̦o̦k!”

Ñe kokõn̦aan epaake Anij, Ri Kõnnaan ro an Jeova renaaj m̦õn̦õn̦õ in jipañ eok. Remaroñ karõk ñan katak Baibõl̦ ippam̦ ilo ejjel̦o̦k on̦ãn. Kwõj bareinwõt ruwainene in kobal̦o̦k ilo iien kweilo̦k ko aer ilo Im̦õn Kweilo̦k eo epaake eok. Ñe kwõnaaj kobal̦o̦k, kwõnaaj iioon im bwebwenato ippãn armej ro me rej kaorõk jem̦jerã ko aer ippãn Anij.a (Lale kõmel̦el̦e eo itulal̦.) Ilo am̦ naaj kõm̦m̦ane men in, kwe bareinwõt kwõnaaj bõk eñjake eo an kar juon iaan ro rar je bokin Sam, ke ear ba: “Ak ña, ekanooj em̦m̦an aõ pãd epaake Anij!”​—Sam 73:28, UBS.