Kwal̦o̦k Kam̦m̦oolol ñan Jeova im Kwõnaaj Jeraam̦m̦an

1. Etke el̦ap an aorõk bwe jen kwal̦o̦k kam̦m̦oolol ñan Jeova?

EL̦AP an aorõk bwe jen kwal̦o̦k kam̦m̦oolol ñan Jeova kõnke “aolep menin letok ko rem̦m̦an im weeppãn” rej itok jãne. (Jemes 1:17, UBS) Jeova ej Jabõt eo ad im ej yokwe kõj. Ej litok aolep aikuj ko ad ekoba katak ko jãn Baibõl̦ ñan kakajoor wõt jem̦jerã eo ad ippãn. (Sam 23:1-3) Jeova ej “ad likõppejñak im ad kajoor,” im epojak in jipañ kõj iien otemjej, el̦aptata ilo iien ko jej bũrom̦õj im eñtaan. (Sam 46:1, UBS) Ejjel̦o̦k pere bwe el̦ap ad errã ilo naan ko an rijeje sam ke ear ba: “Kom̦win kam̦m̦oolol Irooj, kõnke ejouj; yokwe eo an ej ñan indeeo.”​—Sam 106:1, UBS.

2, 3. (1) Etke ekauwõtata ñe juon ejaje kwal̦o̦k kam̦m̦oolol? (2) Ta kajjitõk ko jenaaj lo uwaakier ilo katak in?

² Etke el̦ap ad aikuj in kam̦m̦oolol Jeova? Kar kanaan m̦oktal̦o̦k bwe armej ro ilo raan kein ãliktata renaaj jaje kam̦m̦oolol. (2 Timote 3:2) Elõñ rejjab kwal̦o̦k aer kam̦m̦oolol kõn aolep men ko rem̦m̦an Jeova ear kõm̦m̦ani ñan er. Jej mour ilo jukjukun pãd in me el̦ap an lõñ menin karreelel ko. Im men kein rej kõm̦m̦an an armej kõn̦aan wia elõñ kain m̦weiuk ko meñe rejjab aikuji. Kõn men in, ekõm̦m̦an bwe ren jab m̦õn̦õn̦õ kõn men ko ewõr kadede ippãer. Men in emaroñ bar wal̦o̦k ñan kõj, im jemaroñ oktak im ãinwõt RiIsrael ro jaje bar kwal̦o̦k kam̦m̦oolol. Emaroñ ejjel̦o̦k ad kam̦m̦oolol kõn jeraam̦m̦an ko jaar bũki jãn Jeova, im enaaj oktak im jorrããn jem̦jerã eo ad ippãn.​—Sam 106:7, 11-13.

³ Eaorõk bwe jen kõl̦mãnl̦o̦kjen̦ kõn ta eo emaroñ wal̦o̦k ñe jenaaj iioon apañ ko reppen. Apañ ko jej iiooni remaroñ kõm̦m̦an an l̦e jãn joñan ad inepata, im kõm̦m̦an ad mel̦o̦kl̦o̦k kõn jeraam̦m̦an ko jej bũki. (Sam 116:3, UBS) Ta eo emaroñ jipañ kõj bwe jen jab mel̦o̦kl̦o̦k in kwal̦o̦k wõt ad kam̦m̦oolol? Ta eo emaroñ jipañ kõj ñan l̦õmn̦ak wõt kõn men ko rem̦m̦an meñe jej iioon apañ ko reppen? Eokwe jen lale.

“O JEOVA AÕ ANIJ, KWAAR KÕM̦M̦AN ELÕÑ MENIN BWILÕÑ”

4. Bwe en jab bõjrak ad kwal̦o̦k kam̦m̦oolol ñan Jeova, ta ko jej aikuj in kõm̦m̦ani?

⁴ Bwe en jab bõjrak ad kwal̦o̦k kam̦m̦oolol ñan Jeova, elõñ men ko jej aikuj kate kõj ñan kõm̦m̦ani. M̦oktata, jej aikuj kõl̦mãnl̦o̦kjen̦ kõn jeraam̦m̦an ko Jeova ej litok ñan kõj kajjojo. Innem ãlikin, jej aikuj kõl̦mãnl̦o̦kjen̦ kõn joñan an Anij yokwe kõj ilo an kajeraam̦m̦an kõj. Juon iaan ro rar je bokin Sam ekar kõm̦m̦ane men in, im ear lukkuun bwilõñ kõn aolep men ko rel̦l̦ap im rem̦m̦an Jeova ear kõm̦m̦ani ñane.​—Riit Sam 40:5; 107:43, UBS.

5. Ta eo jemaroñ katak jãn rijjilõk Paul kõn kwal̦o̦k kam̦m̦oolol?

⁵ Ilo ad kõl̦mãnl̦o̦kjen̦ kõn waanjoñak eo an rijjilõk Paul, men in enaaj jipañ kõj ñan jel̦ã kilen kam̦m̦oolol Jeova. Jejel̦ã bwe Paul ear kõl̦mãnl̦o̦kjen̦ kõn jeraam̦m̦an ko Jeova ear lil̦o̦k ñane kõnke aolep iien ear jar im kam̦m̦oolol Anij. Paul ear jel̦ã bwe e kar juon eo ekõn ‘kajjirere, matõrtõr im lãj.’ Meñe elõñ men ko renana ear kõm̦m̦ani m̦okta, ak ear kam̦m̦oolol Anij im Kũraij bwe rar tũriam̦okake im lel̦o̦k ñane jeraam̦m̦an eo ñan kwal̦o̦k ñan ro jet. (Riit 1 Timote 1:12-14.) Bareinwõt, Paul ear m̦õn̦õn̦õ kõn Kũrjin ro jein im jatin. Kõn men in, aolep iien ear kam̦m̦oolol Jeova kõn aer lukkuun em̦m̦an im kate er wõt ilo aer karejar ñan E ilo tiljek. (Pilippai 1:3-5, 7, UBS; 1 Tessalonika 1:2, 3) Paul ear m̦õkaj in kam̦m̦oolol Jeova kõn ro jein im jatin kõn aer kar jipañe ilo iien ko ear iioon mãlejjoñ. (Jerbal 28:15, UBS; 2 Korint 7:5-7, UBS) Ejjel̦o̦k pere bwe Paul ear rõjañ aolep Kũrjin ro bwe ren kwal̦o̦k kam̦m̦oolol ke ear ba: “Kom̦win kam̦m̦oolol . . . , im kauwe doon ilo mãlõtlõt otemjej. Kom̦win al kõn Sam ko, al in nõbar ko, im al ko rekwõjarjar.”—Kolosse 3:15-17, UBS.

JAR IM KÕL̦MÃNL̦O̦KJEN̦ REJ JIPAÑ KÕJ ÑAN KWAL̦O̦K WÕT KAM̦M̦OOLOL

6. Ta ko el̦ap am̦ kam̦m̦oolol Jeova kaki?

⁶ Ewi wãween ad maroñ l̦oore joñak eo an Paul? Eokwe, jemaroñ kõl̦mãnl̦o̦kjen̦ kõn ta ko Jeova ear kõm̦m̦ani ñan kõj kajjojo. (Sam 116:12) El̦aññe juon enaaj kar kajjitõk ippam̦ im ba: “Ta jeraam̦m̦an ko jãn Jeova me el̦ap am̦ kõn̦aan kam̦m̦oolole kaki?” Ta eo kwõnaaj kar ba? Kwõnaaj ke ba bwe juon iaaer ej jem̦jerã eo am̦ ippãn Jeova? Ke ta, kwõnaaj ke ba bwe juon iaaer ej kõn An jeorl̦o̦k jerawiwi ko am̦ kõn katok in mour eo an Kũraij? Kwõnaaj ke ba bwe kwõj kam̦m̦oolole kõn Kũrjin ro jeim̦ im jatũm̦ me rar jipañ eok ilo iien ko reppen? Kwõnaaj ke kwal̦o̦k bwe el̦ap am̦ kam̦m̦oolol kõn eo pãleem̦ im ro nejũm̦? El̦ap an aorõk bwe jen kõm̦m̦an iien ñan kõl̦mãnl̦o̦kjen̦ kõn jeraam̦m̦an kein ej litoki. Am̦ kõm̦m̦ane men in, enaaj kõm̦akũt eok ñan kwal̦o̦k kam̦m̦oolol ñan E aolep raan.​—Riit Sam 92:1, 2.

7. (1) Etke jej aikuj kwal̦o̦k kam̦m̦oolol ñan Jeova ñe jej jar? (2) Ta men ko rem̦m̦an renaaj wal̦o̦k ñan eok el̦aññe kwõj kam̦m̦oolol Jeova ilo jar ko am̦?

⁷ El̦aññe jej kõl̦mãnl̦o̦kjen̦ kõn aolep jeraam̦m̦an ko Jeova ej litok, jenaaj kõn̦aan kwal̦o̦k wõt ad kam̦m̦oolole. (Sam 95:2, UBS; 100:4, 5) Jet armej rej jar ñan Anij ilo iien ko wõt me ewõr aer aikuj. Bõtab, jejel̦ã bwe Jeova ej m̦õn̦õn̦õ ñe jej jar ñan kwal̦o̦k ad kam̦m̦oolole kõn men ko ewõr ippãd. Elõñ bwebwenato ko jemaroñ loi ilo Baibõl̦ kõn ro rar jar im kwal̦o̦k aer kam̦m̦oolol Jeova. Jet iaan armej ro ej Hanna im Hezekaia. (1 Samuel 2:1-10; Aiseia 38:9-20, UBS) Kõn men in, kwõn l̦oori joñak kein aer im kwal̦o̦k kam̦m̦oolol ñan Jeova kõn aolep jeraam̦m̦an ko ej liwaj. (1 Tessalonika 5:17, 18) El̦aññe kwõj kwal̦o̦k kam̦m̦oolol, innem enaaj em̦m̦an am̦ mour, enaaj l̦apl̦o̦k am̦ yokwe Anij, im enaaj epaakl̦o̦k wõt jem̦jerã eo am̦ ippãn.​—Jemes 4:8.

8. Ta ko remaroñ kõm̦m̦an bwe en jino jakol̦o̦k ad kwal̦o̦k kam̦m̦oolol ñan Jeova?

⁸ Epidodo an juon jakol̦o̦k an kwal̦o̦k kam̦m̦oolol ñan Jeova ñe ejjab lukkuun kõjparok. Etke? Kõnke jejjab weeppãn, im jej bõdañe Adam im Iv. Kõn men in, epidodo ad jab kwal̦o̦k kam̦m̦oolol. Jeova ear lel̦o̦k ñan Adam im Iv juon jikin eaiboojoj bwe erro en jokwe ie, im ear kabwe aikuj ko aer. Joñan erro maroñ kar mour im aenõm̦m̦an ñan indeeo. (Jenesis 1:28) Bõtab, rein rar jab kwal̦o̦k aerro kam̦m̦oolol kõn jeraam̦m̦an kein. Bareinwõt, rar kũbbon̦ im kõn̦aan bõk men ko rel̦l̦apl̦o̦k. Im ilo jem̦l̦o̦kin, rar luuji aolep jeraam̦m̦an kein. (Jenesis 3:6, 7, 17-19) Jej mour ilo juon lal̦ me eobrak kõn armej ro rejaje kam̦m̦oolol. Kõn men in, el̦aññe jelukkuun m̦ad kõn men ko an lal̦ in, jemaroñ bar oktak im juon eo ejjel̦o̦k an kam̦m̦oolol kõn aolep jeraam̦m̦an ko jej bũki jãn Jeova. Jet iaan men kein ej jem̦jerã eo ad ippãn, im jeraam̦m̦an eo bwe jej m̦õttan doulul in an. (1 Jon 2:15-17) Ñan kõjparok kõj jãn ad m̦ad, jej aikuj kõl̦mãnl̦o̦kjen̦ kõn aolep jeraam̦m̦an ko Jeova ear litoki. Bareinwõt, jen ekkeini ad jar im kam̦m̦oolole bwe jej ro doon.​—Riit Sam 27:4, UBS.

KIJENMEJ ÑE JEJ JELM̦AE APAÑ KO

9. Ilo iien ko jej iioon apañ ko rel̦l̦ap, etke eaorõk ñan kõl̦mãnl̦o̦kjen̦ kõn jeraam̦m̦an ko ad jãn Jeova?

⁹ Ñe jejel̦ã kam̦m̦oolol, men in enaaj jipañ kõj ñan kijenmej ium̦win apañ ko rel̦l̦ap. Jemaroñ lukkuun inepata im bũrom̦õj ñe juon apañ ejidimkij ej wal̦o̦k im jelõt mour ko ad. Jet iaan apañ kein emaroñ kõn an eo pãleed jab tiljek ñan kõj, ad bõk juon nañinmej ekauwõtata, an mej juon eo ejitõnbõro ippãd, ak bõlen an wal̦o̦k jorrããn ak l̦añ ko rel̦l̦ap me rej jelõt kõj. Ñe jej kõl̦mãnl̦o̦kjen̦ kõn jeraam̦m̦an ko ad jãn Jeova, men in enaaj kaenõm̦m̦an im kakajoor kõj bwe jen maroñ kijenmej wõt. Kõl̦mãnl̦o̦kjen̦ kõn bwebwenato kein jej pojak in etali.

10. Ta men ko rem̦m̦an rar wal̦o̦k ñan Irina kõn an kõl̦mãnl̦o̦kjen̦ kõn jeraam̦m̦an ko jãn Jeova?

¹⁰ Juon rekũl̦ar bainier ilo Amedka etan Irina, ear m̦areik juon iaan em̦m̦aan ro me rej lale eklejia eo. Bõtab tokãlik, l̦ein pãleen ear ellolo jãne, im ear jol̦o̦k Irina im ajri ro 3 nejierro.a (Lale kõmel̦el̦e eo itulal̦.) Ta eo ear jipañ Irina bwe en tiljek wõt ilo an karejar ñan Jeova? Irina ej ba: “El̦ap aõ kam̦m̦oolol Jeova kõn an lukkuun kea kõn ña. Im ñe ij kõl̦mãnl̦o̦kjen̦ kõn oran jeraam̦m̦an ko ej litoki kajjojo raan, ij kile bwe ej juon jeraam̦m̦an el̦ap ñe jejel̦ã bwe eo Jemãd ilañ ejel̦ã kajjied im el̦ap an yokwe kõj. Ijel̦ã bwe eban el̦l̦o̦k jãn eõ.” Meñe elõñ apañ ko rel̦l̦ap Irina ear jelm̦aiki ilo mour eo an, ak kõn an l̦õmn̦ak wõt kõn men ko rem̦m̦an, men in ear jipañe ñan kijenmej wõt. Im ro jet rej bõk kõketak jãn joñak in an.

11. Ta eo ear jipañ Kyung-sook bwe en maroñ kijenmej wõt meñe ear bõk juon nañinmej ekauwõtata?

¹¹ Juon jeid im jatid kõrã ilo Eijia etan Kyung-sook, e im l̦eo ippãn rar bainier ium̦win elõñl̦o̦k jãn 20 iiõ. Ilo jidimkij, kõrã in jeid im jatid ear kããnjõr ãrin, im kar jiroñl̦o̦ke bwe m̦õttan 3 l̦o̦k ñan 6 allõñ in an mour. Meñe elõñ alen aerro l̦eo ippãn iioon apañ, ak aolep iien ear em̦m̦an wõt ãjmour ko aerro. Bõtab, ke kõrã in ear jino roñ kõn nañinmej eo an, ej ba, “El̦ap an kar men in lukkuun jelõt eõ. Iar l̦õmn̦ak bwe iluuji aolep men, im iar lukkuun mijak.” Ta eo ear jipañ Kyung-sook bwe en maroñ kijenmej wõt? Ej ba: “Aolep boñ m̦okta jãn aõ etal im kiki, ij wanlõñl̦o̦k ñan raan m̦weo im̦õm̦ro im jar. Im ñe ij jar ij kwal̦o̦k ainikiõ im kwal̦o̦k aõ kam̦m̦oolol kõn l̦alem iaan men ko iar m̦õn̦õn̦õ kaki ilo raan eo. Men in ekõm̦m̦an bwe in aenõm̦m̦an, im ej kõm̦akũt eõ ñan kwal̦o̦k aõ yokwe Jeova.” Ta eo ear wal̦o̦k ñan Kyung-sook itok wõt jãn an ekkeini an jar in boñ? Ej ba: “Ij kab kile bwe Jeova ej jipañ kõj ilo iien rot kein reppen. Im ij kab bar kile bwe el̦apl̦o̦k an lõñ jeraam̦m̦an ko jej bũki ñe keidi ippãn apañ ko jej jelm̦aiki.”

12. Ta eo ear jipañ Jason bwe en maroñ kijenmej wõt?

¹² Juon jeid im jatid em̦m̦aan etan Jason me ej jerbal ilo ra eo ilo Africa, ear buul̦ taim̦ ium̦win elõñl̦o̦k jãn 30 iiõ. Jason ej ba: “Emootl̦o̦k de 7 iiõ jãn ke kõrã eo ippa ear mej, im ewõr iien men in elukkuun kabũrom̦õj eõ. Jet iien ñe ij l̦õmn̦ak kõn joñan an kar eñtaan kõn nañinmej in kããnjõr, men in elukkuun kõmetak bũruõ.” Ta eo ear jipañ Jason bwe en maroñ kijenmej wõt? Ej ba: “Iar keememejtok juon iien elukkuun em̦m̦an me kõmro kar lio ippa jol̦o̦k iien ippãn doon, im iar jar ñan kam̦m̦oolol Jeova kõn kar iien in. Kõn men in, ear jino em̦m̦anl̦o̦k aõ mour im iar jino ekkeini aõ kam̦m̦oolol Jeova kõn men ko rem̦m̦an ij keememeji. Aõ kwal̦o̦k kam̦m̦oolol ear jipañ eõ bwe in kajim̦we l̦õmn̦ak ko aõ. Ij bũrom̦õj wõt kõn an mej lio ippa. Bõtab, ij kam̦m̦oolol Jeova kõn an kar em̦m̦an pãd eo am̦ro. Bareinwõt, kõn an kar letok juon eo el̦ap an yokwe E bwe kõmro en jim̦or karejar ñane. Ñe ij kam̦m̦oolole Jeova, em̦m̦anl̦o̦k aõ mour.”

13. Ta eo ear jipañ Sheryl bwe en maroñ kijenmej wõt meñe ear jako enañin aolep ro ilo baam̦le eo an?

¹³ Ilo kar 2013 eo, ekar wal̦o̦k juon taibuun el̦ap ilo Philippine me rej n̦aetan Haiyan. Juon iaan ro me el̦ap aer kar jorrããn jãn taibuun in ej Sheryl, juon leddik 13 an iiõ. Enañin aolep men ko raorõk ippãn im ro rejitõnbõro ippãn rar jako. Sheryl ej ba: “Ear jako m̦weo im̦õ, im enañin aolep ro ilo baam̦le eo aõ.” Jinen im jemãn Sheryl kab 3 iaan ajri ro jatin rar mej jãn wõt kar taibuun eo. Ta eo ear jipañ Sheryl bwe en maroñ kijenmej wõt im jab ebbeer? Sheryl ear maroñ kwal̦o̦k wõt an kam̦m̦oolol Jeova kõn an kõl̦mãnl̦o̦kjen̦ kõn jeraam̦m̦an ko ej lil̦o̦k ñane. Ej ba: “Iar loe aolep men ko ro jeid im jatid rar kõm̦m̦ani ñan kaenõm̦m̦an im kakajoor ro me rar aikuj jipañ. Im iar jel̦ã bwe ro jeid im jatid ipel̦aakin lal̦ in rar jar kõn ña. El̦ap aõ kam̦m̦oolol bwe Jeova ej aõ Anij. Aolep iien Jeova ej litok men ko jej aikuji.” Ñe jej kwal̦o̦k ad kam̦m̦oolol kõn aolep jeraam̦m̦an ko jej bũki, enaaj kõm̦m̦an bwe en dikl̦o̦k ad inepata im bũrom̦õj. Innem, jenaaj maroñ kijenmej ium̦win aolep men ko reppen me jemaroñ iiooni.​—Epesõs 5:20, UBS; riit Pilippai 4:6, 7.

“ÑA, INAAJ LAÑLÕÑ ILO JEOVA”

14. Ta kõjatdikdik eo me jelukkuun kijoorore an wal̦o̦k? (Lale pija eo ilo jinoin katak in.)

¹⁴ Jãn etto in an armej ro an Jeova kwal̦o̦k aer kam̦m̦oolol kõn an kajeraam̦m̦an er. Ñan waanjoñak, Jeova ear lo̦mo̦o̦ren RiIsrael ro jãn Pero im jarin tarin̦ae eo an ilo kar Lom̦al̦o eo Ekilmir. Ãlikin iien in, RiIsrael ro rar al kõn aer lañlõñ im nõbar im kam̦m̦oolol Jeova. (Exodus 15:1-21) Ilo raan kein, juon iaan jeraam̦m̦an ko ewõr ippãd ej kõn ad jel̦ã bwe ejjabto jãn kiiõ jeban bar eñtaan im bũrom̦õj. (Sam 37:9-11; Aiseia 25:8; 33:24) Baj pijaikl̦o̦k m̦õk joñan ad nãj m̦õn̦õn̦õ ñe Jeova enaaj ko̦kkure aolep ro rej jum̦aik E. Bareinwõt, an Jeova naaj karwaineneik kõj aolep ñan jukjukun pãd eo ekããl me el̦ap aenõm̦m̦an ie, im eobrak kõn armej ro rem̦m̦an. Enaaj juon raan me enaaj l̦ap ad kwal̦o̦k kam̦m̦oolol ñan Jeova!​—Revelesõn 20:1-3; 21:3, 4.

15. Ta eo kwõj pepe in kõm̦m̦ane ilo iiõ in?

¹⁵ Jej aolep reim̦aanl̦o̦k kõn jeraam̦m̦an ko Jeova ej pojak in litoki lowaan iiõ in. Ejjel̦o̦k pere bwe ej nãj wõr wõt apañ ko jenaaj jelm̦aiki. Bõtab, jekdo̦o̦n ta eo enaaj wal̦o̦k, jejel̦ã bwe Jeova eban el̦l̦o̦k jãn. (Duteronomi 31:8; Sam 9:9, 10) Jeova enaaj wõnm̦aanl̦o̦k wõt litok aolep men ko jej aikuji ñan jipañ kõj ñan tiljek wõt ilo ad karejar ñane. Jen kate kõj ñan bõk ejja l̦õmn̦ak eo wõt an kar rũkanaan Habakkuk. Ear ba: “Meñe wõjke fig ejjab ebbõl, im ejjab wõr leen vain, im ejjel̦o̦k leen wõjke oliv, im jikin kallib ejjab kwal̦o̦k m̦õñã, bwijjin jiip rejako jãn wõrwõr eo, im ejjel̦o̦k kau ilo jikin kau, Ña, Inaaj lañlõñ ilo Jeova; Inaaj m̦õn̦õn̦õ ilo Anij in aõ lo̦mo̦o̦r.” (Habakkuk 3:17, 18) Ilo naaj iiõ in, jen wõnm̦aanl̦o̦k wõt im kõl̦mãnl̦o̦kjen̦ kõn aolep jeraam̦m̦an ko jãn Jeova. Bareinwõt jen l̦oore naanin rõjañ eo me ej pedped ioon unin tõl eo an iiõ in, 2015 me ej ba: “Kom̦win kam̦m̦oolol Irooj [Jeova], kõnke ejouj.”​—Sam 106:1, UBS.