KATAK KO KÕN TAITÕL̦IN BOK IN | KOKÕN̦AAN KE KATAK BAIBÕL̦?

Juon Bũrookraam̦ In Katak Baibõl̦ Ñan Aolep

Elõñ armej rejel̦ã kõn Ri Kõnnaan ro an Jeova kõn aer itoitak im kwal̦o̦k naan ñan armej ro. Ak kwaar ke jel̦ã bwe ebar wõr juon ammim bũrookraam̦ in katak Baibõl̦ me ej wal̦o̦k ipel̦aakin lal̦ in?

Ilo 2014 eo, elõñl̦o̦k jãn 8 milien Ri Kõnnaan ro an Jeova ilo 240 aelõñ ko rar katak Baibõl̦ ippãn enañin 9,500,000 armej ro kajjojo allõñ.a (Lale kõmel̦el̦e eo itulal̦.) Ilo m̦ool, elõñl̦o̦k oran ro rej katak Baibõl̦ ippemmim jãn oran armej ro ilo kajjojo 140 aelõñ ko!

Ri Kõnnaan ro an Jeova rar kõm̦m̦ane elõñl̦o̦k jãn 1 bilien Baibõl̦ ko, bok ko, im kein katak ko jet ilo elõñl̦o̦k jãn 700 kajin ko, bwe ren maroñ kajejjet jerbal in ñan katak ippãn armej ro! Tõprak kein rar kate er ñan kõm̦m̦ani rej jipañ elõñ armej ñan katak Baibõl̦ ilo kajin eo remel̦el̦e kake.

“Ekar jab lukkuun em̦m̦an ippa katak ilo jikuul̦, ak katak Baibõl̦ elukkuun kãitoktoklimo. Bareinwõt, men ko iar katak kaki relukkuun kaenõm̦m̦an eõ!”—Katlego, jãn South Africa.

“Ear uwaak aolep kajjitõk ko aõ ke iar katak.”—Bertha, jãn Mexico.

“Iar katak Baibõl̦ ilo m̦weo im̦õ ilo awa eo me em̦õj aõ karõke im em̦m̦an ippa. Eñin kõn̦aan eo aõ im ejjel̦o̦k bar juon men imaroñ kajjitõk kake!”—Eziquiel, jãn Brazil.

“Jet iien, ebõk 15 l̦o̦k ñan 30 minit ñan katak im jet iien ej aetokl̦o̦k jãn joñan in, ekkar ñan joñan iien eo em̦m̦an ippa.”—Viniana, jãn Aujtõrõlia.

“Elukkuun em̦m̦an bwe ekar ejjel̦o̦k on̦ãn aõ katak!”—Aimé, jãn Benin.

“Eo ear katak Baibõl̦ ippa elukkuun jouj im jel̦ã kijenmej. Kõmro kar lukkuun epaake doon.”—Karen, jãn Northern Ireland.

“Elõñ rej katak Baibõl̦ ak rejjab oktak im erom Ri Kõnnaan ro an Jeova.”—Denton, jãn Iñlen.

UWAAKIN KAJJITÕK KO EKKÃ AER KAJJITÕK KAKI KÕN BŨROOKRAAM̦ IN KATAK BAIBÕL̦ EO AMMIM

Ta ko jej katak kaki?

Kõmij kããlõt katak ko reoktak jãn doon me rej pedped ilo Baibõl̦ im etale ta ko Baibõl̦ ej ba kõn men kein. Ñan waanjoñak, Baibõl̦ ej uwaaki kajjitõk ko ãinwõt: Wõn in Anij? Kain Anij rot e? Ewõr ke etan? Ej pãd ia? Jemaroñ ke epaake? Men eo epen ej ñan jel̦ã eoon ta ko ilo Baibõl̦ me rej uwaaki kajjitõk kein.

Ñan jipañ armej ro bwe ren lo uwaakin kajjitõk ko aer, ekkã ammim kõjerbal juon bok etan Katak ko Rem̦ool jãn Baibõl̦ Eo.b (Lale kõmel̦el̦e eo itulal̦.) Kar kõm̦m̦ane bok in ñan jipañ armej ro mel̦el̦e kõn katak ko ilo Baibõl̦. Ekitibuj katak ko kõn Anij, Jijej Kũraij, an armej eñtaan, kõn jerkakpeje, jar, im ebar lõñ katak ko jet.

Ñããt im ia ko jej katak ie?

Kõmij katak ippãn armej ro ilo jikin ko im iien ko rem̦m̦an ippãer.

Ewi aetokin iien katak ko?

Elõñ armej rej kõjenolo̦k juon awa ak l̦apl̦o̦k ilo kajjojo wiik bwe ren katak Baibõl̦. Bõtab, iien katak ko im aetokier rej ekkar ñan kajjojo armej. Kõm naaj karõk iien ko ammim bwe ren ekkar ñan iien ko repel̦l̦o̦k ñan kwe. Jet armej rej katak ium̦win wõt 10 ak 15 minit kajjojo wiik.

Jete on̦ãn katak?

Ejjel̦o̦k on̦ãn katak im ebar ejjel̦o̦k on̦ãn bok ko kwõnaaj kõjerbali ñan katak. Kõmij l̦oor naanin tõl eo an Jijej ñan rũkal̦oor ro an ke ear ba: “Em̦õj lewaj kõn ejjel̦o̦k on̦ãn, innem kom̦win lel̦o̦k im jab bõk on̦ãn.”—Matu 10:8, UBS.

Ewi toon ammim katak ippãn juon armej?

Ej am̦ wõt pepe kõn ewi toon ammim katak ippam̦. Ewõr 19 katak ko ilo bok eo etan Katak ko Rem̦ool jãn Baibõl̦ Eo. Kwõmaroñ katak kõn jabdewõt iaan katak ko rem̦m̦an ippam̦ ilo bok in ak kõjem̦l̦o̦k aolep katak ko ie ekkar ñan joñan maroñ eo am̦.

Ij aikuj ke oktak im juon iaan Ri Kõnnaan ro an Jeova?

Jaab. Kõmij kwal̦o̦k ammim kautiej im kile bwe ej an juon armej make pepe ñan kããlõt ta eo ej tõmake. Bõtab, ãlikin an juon katak im jel̦ã kõn katak ko rem̦ool jãn Baibõl̦, enaaj aikuj kwal̦o̦k pepe eo an el̦aññe ekõn̦aan oktak ak jaab.

Ia eo imaroñ kal̦apl̦o̦k aõ mel̦el̦e ie?

Weep jait eo jw.org/mh ej kwal̦o̦k mel̦el̦e ko rejim̦we im jejjet kõn tõmak im m̦akũtkũt ko me Ri Kõnnaan ro an Jeova rej kõm̦m̦ani.

Ewi wãween bwe juon en maroñ itok im katak Baibõl̦ ippa?

Etal ñan www.jw.org/mh im kanne form in katak Baibõl̦ eo bwe juon en iwõj im katak ippam̦.
Jeje ñan juon iaan atõrej ko me repaake ijo kwõj jokwe ie. Atõrej kein repãd ilo peij 2 in bok in.
Kajjitõk ippãn Ri Kõnnaan ro an Jeova ilo jikin eo kwõj jokwe ie.

a Ekkã ammim katak Baibõl̦ ippãn kajjojo armej ak juon kumi edik.

b Ri Kõnnaan ro an Jeova rar kõm̦m̦ane bok in. Elõñl̦o̦k jãn 230 milien kaape in bok in em̦õj bũriini ilo elõñl̦o̦k jãn 260 kajin ko.

KATAK BAIBÕL̦ EJ JIPAÑ BAAM̦LE KO

“Ke kõrã eo ippa ear jino katak Baibõl̦, iar lo el̦ap oktak ko ippãn. Wãween mour eo an baam̦le eo am̦ro ear em̦m̦anl̦o̦k. Kõn aõ kar kõn̦aan jel̦ã ta ko ej katak kaki, iar jino katak. Men ko iar katak kaki rar jipañ eõ bwe in juon armej em̦m̦an. Kõn aõ kar katak Baibõl̦, men in ear kõm̦m̦an bwe baam̦le e aõ en epaake doon.”—Eziquiel.

“Ãlikin aõ kar jino katak Baibõl̦, iar bõjrak jãn aõ bõk uno ko rekkajjoor im kadek, im iar katak ñan jel̦ã dãpij aõ illu. M̦weo m̦õ elukkuun erreo l̦o̦k im kon̦ kiiõ. El̦apl̦o̦k aõ kaorõk baam̦le e aõ im em̦m̦an ippa kõm̦m̦ani men ko rej kam̦õn̦õn̦õik er. El̦apl̦o̦k aõ m̦õn̦õn̦õ kiiõ.”—Karen.

“Jet armej rar kananaik eõ kõn aõ katak Baibõl̦. Ak l̦eo ippa ear rejetak eõ ilo pepe in aõ, ear ba: ‘Ijjab kea ta ko armej rej ba. Men eo eaorõk ippa ej ñe ij lo am̦ kõm̦m̦ani oktak ko rem̦m̦an. Wõnm̦aanl̦o̦k wõt im kõm̦m̦ane men n̦e kwõj kõm̦m̦ane.’ Baam̦le e am̦ro ejjañin kar m̦õn̦õn̦õ ãinwõt kiiõ!”—Viniana.