KAJJITÕK KO BAIBÕL̦ EJ UWAAKI

Ro remej renaaj ke bar mour?

Jeova Anij ej wũnjãn mour. (Sam 36:9, UBS) Men in ej lukkuun kaalikkar bwe ewõr an Anij maroñ ñan bar kõmour ro rar mej. Baibõl̦ ej lukkuun jipañ kõj ñan tõmak bwe enaaj kõm̦m̦ane men in ilju im jekl̦aj. (Riit Jerbal 24:15, UBS.) Etke enaaj kõm̦m̦ane men in?

Jãn jinoin an kar Rũkõm̦anm̦an eo ad kõn̦aan bwe armej ren mour ñan indeeo ijin ioon lal̦. (Jenesis 1:31; 2:15-17) Kõn̦aan in an Anij ñan kõj ejjañin jako. El̦ap an bũrom̦õj ñe ej lo apañ im inepata ko jej iiooni ilo raan kein im an kadu ad mour.​—Riit Job 14:1, 14, 15.

Ia eo ro renaaj bar mour renaaj pãd ie?

Anij ear ke kõm̦anm̦an armej bwe ren pãd ilañ? Jaab. Anij ear kõm̦anm̦an enjel̦ ro bwe ren pãd ilañ. Bõtab, ear kõm̦anm̦an armej ro bwe ren pãd ijin ioon lal̦. (Jenesis 1:28; Job 38:4, 7, UBS) L̦õmn̦ak m̦õk kõn armej ro me Jijej ear bar kõmour er ke rar mej. Ke ear kõmour armej ro, rar bar mour im pãd ijin ioon lal̦. Ãindeinl̦o̦k wõt, enañin aolep ro renaaj jerkak jãn mej renaaj bar mour ijin ioon lal̦.​—Riit Jon 5:28, 29, UBS; 11:44.

Bõtab, em̦õj an Anij kããlõt jet bwe ren jerkakpeje im mour ilañ im renaaj erom jetõb. (Luk 12:32; 1 Korint 15:49, 50, UBS) Rein me renaaj jerkakpeje im mour ilañ renaaj kiiñ ippãn Kũraij im tõl armej ro ioon lal̦.​—Riit Revelesõn 5:9, 10.