Ejjel̦o̦k Bar Juon Menin Letok Ãinwõt Menin Letok In

JORDAN ej jibwe juon kein jemjem pinjel̦ me jekjekin wõt juon tim̦a. Jemaroñ l̦õmn̦ak bwe kein jemjem in ejjab lukkuun aorõk. Bõtab, men in ej juon iaan men ko el̦ap an lukkuun aorõk ippãn Jordan. Ej ba: “L̦al̦l̦ap eo etan Russell me elukkuun kar epaake baam̦le e ammim, ear letok men in ke iar dik.” Ãlikin an kar l̦al̦l̦ap in jako, Jordan ear roñ kõn jet men ko ear kõm̦m̦ani me rar lukkuun jipañ jim̦m̦aan im rũtto ro jinen im jemãn ilo iien ko rar pen ñan er. Jordan ej ba, “Kiiõ ke elõñl̦o̦k men ko ijel̦ã kõn Russell, el̦apl̦o̦k aõ kaorõk menin letok eo an kar ñan ña.”

Ãinwõt an waanjoñak eo ilõñ kwal̦o̦k, armej ro remaroñ jab l̦õmn̦ak bwe menin lel̦o̦k eo an Jordan elukkuun aorõk. Bõtab ippãn Jordan, men in elukkuun aorõk. Jabdewõt armej me kar lel̦o̦k juon menin lel̦o̦k ñane, enaaj lukkuun kam̦m̦oolol im kaorõk menin lel̦o̦k eo an. Ilo m̦ool Baibõl̦ ej kwal̦o̦k kõn juon menin letok ekanooj aorõk im jejuwaan, im ej alikkar ilo juon eoon me aolep rejel̦ã kake. Eoon in ej ba: “Bwe joñan an Anij yokwe lal̦, ear letok Nejin eo ej make wõt, bwe jabdewõt eo ej tõmak ilo e en jab jako, ak en mour indeeo.”​—Jon 3:16, UBS.

Menin letok in emaroñ bõktok ñan kõj mour indeeo! Innem ewõr ke bar juon menin letok me ekanooj in l̦ap ãinwõt menin letok in? Jet remaroñ jab kile joñan aorõkin menin letok in, bõtab Kũrjin ro rem̦ool rej kaorõke im watõke bwe ej juon men “ekanooj l̦ap.” (Sam 49:8, UBS; 1 Piter 1:18, 19, UBS) Bõtab etke Anij ear letok mour eo an Nejin ãinwõt juon menin letok ñan kõj armej?

Rijjilõk Paul ear kaalikkar uwaak eo ke ear ba naan kein: “Kõn men in, ãinwõt kõn juon armej, jerawiwi ear del̦o̦ñ ilo lal̦, im mej kõn jerawiwi; im ãindein mej ear itok ioon armej otemjej.” (Rom 5:12) Adam, em̦m̦aan eo m̦oktata, ear wõnm̦aanl̦o̦k wõt im jerawiwi meñe ear jel̦ã bwe ebõd men eo ear kõm̦m̦ane. Innem kõn an kar jab pokake Anij ear mej. Kõn wõt Adam, mej ear ajeeded ñan aolep armej ro ilo lal̦ in.

“Bwe on̦ãn jerawiwi, mej; ak menin letok eo an Anij, ej mour indeeo, ilo ad juon wõt ippãn Kũraij Jijej ad Irooj.” (Rom 6:23, UBS) Anij ear kõpel̦l̦o̦k juon ial̦ ñan kanemkwõj armej ro jãn mej ilo an kar jilkintok Nejin, Jijej Kũraij, bwe en katok kõn mour eo an eweeppãn kõn aolep armej. Aolep ro rej kwal̦o̦k aer tõmak ilo katok in mour eo an Jijej renaaj mour ñan indeeo.​—Rom 3:24, UBS.

Paul ear ba kõn aolep jeraam̦m̦an ko Anij ej lil̦o̦k ñan rũkarejar ro an ikijjeen Jijej Kũraij: “Jen kam̦m̦oolol Anij kõn menin letok eo an el̦ap jãn maroñ in ba.” (2 Korint 9:15, UBS) Ealikkar bwe katok in mour eo an Jijej elukkuun aorõk, im joñan an aorõk el̦ap jãn maroñ in ba. Bõtab iaan aolep menin letok ko an Anij ñan armej, etke katok in mour eo an Jijej el̦aptata an aorõk? Etke elukkuun jejuwaan im oktak jãn menin letok ko jet an Anij?a (Lale kõmel̦el̦e eo itulal̦.) Im menin letok in ej aikuj kõm̦akũt kõj ñan ta? Kõmij kũr eok ñan etale uwaak ko jãn Baibõl̦ ñan kajjitõk kein ilo katak ko tok ruo ãlikin wõt katak in.