Ewi Wãween Am̦ Naaj Kwal̦o̦k Kam̦m̦oolol kõn Menin Letok eo an Anij El̦aptata?

ÑE JUON ej letok juon menin letok el̦ap an aorõk, men in ej kõm̦akũt kõj ñan kwal̦o̦k ad kam̦m̦oolol. Jijej ear kaalikkar men in ãlikin an kar kõmour em̦m̦aan ro 10 jãn juon nañinmej me ejjel̦o̦k kar unokan. Juon iaan em̦m̦aan rein 10 ear ‘jepl̦aak im ej wũjtake Anij kõn juon ainikien el̦ap.’ Innem Jijej ear ba: “Ejjab joñoul em̦õj karreoik er ke? A ewi ruwatimjuon?” (Luk 17:12-17) Ta eo jej katak jãn men in? Jej katak bwe jet iien emaroñ m̦õkaj ad mel̦o̦kl̦o̦k an kar ro jet kwal̦o̦k jouj ñan kõj.

Katok in mour eo an Jijej ej juon menin letok ejej uwaan. Ej menin letok eo el̦aptata me kar letok ñan kõj. Innem, ewi wãween am̦ naaj kwal̦o̦k am̦ kam̦m̦oolol Anij kõn men in ear kõm̦m̦ane ñan eok?

• Kal̦apl̦o̦k am̦ jel̦ã kajjien Eo ear letok menin letok eo eaorõktata. Katok in mour eo an Jijej ejjab kajju bõktok mour indeeo ñan aolep armej. Ewõr juon men armej rej aikuj kõm̦m̦ane ñan aer bõk jeraam̦m̦an in. Jijej ear jar ñan Anij im ba: “Im men in mour indeeo, bwe ren jel̦ã Kwe juon wõt Anij em̦ool, im Jijej Kũraij, eo Kwaar jilkintok.” (Jon 17:3) El̦aññe juon ear ba ñan kwe bwe juon em̦m̦aan ear lo̦mo̦o̦ren eok ke kwaar dik, kwõjjab ke naaj kar kõn̦aan jel̦ã unin an kar lo̦mo̦o̦ren eok im kal̦apl̦o̦k am̦ jel̦ã kajjeen? Ejjel̦o̦k pere bwe kwõnaaj kar kõn̦aan. Eokwe Jeova Anij, eo me ear lo̦mo̦o̦ren kõj ikijjeen katok in mour eo an Jijej, ekõn̦aan bwe kwõn jab baj jel̦ã wõt kõn e, ak ebar kõn̦aan bwe kwõn epaakel̦o̦k e. Baibõl̦ ej ba: “Kom̦win ruwaakl̦o̦k ñan Anij, im Enaaj ruwaakwaj ñan kom̦.”​—Jemes 4:8.

• 

  Kwal̦o̦k am̦ tõmak ilo katok in mour eo an Jijej. “Jabdewõt eo ej tõmak Nejin ewõr an mour indeeo.” (Jon 3:36, UBS) Ewi wãween ad tõmak ilo Nejin? Men in ejjab wal̦o̦k wõt ilo naan ko ad ak ej aikuj alikkar ilo kõm̦m̦an ko ad. Kõn men in, kõm̦m̦an ko ad rej aikuj kaalikkar bwe jej tõmak ilo katok in mour eo an Jijej. (Jemes 2:17, UBS) Ta ko jej aikuj kõm̦m̦ani ñan kwal̦o̦k ad tõmak? Eokwe, bwe juon menin lewaj en maroñ am̦, kwõj aikuj em̦m̦akũt im bõke. Ejjel̦o̦k oktak, kwõj aikuj em̦m̦akũt im kwal̦o̦k am̦ tõmak ilo katok in mour eo an Jijej. Ewi wãween? Ilo am̦ katak ñan mour ilo wãween eo Anij ekõn̦aan im jerbal ekkar ñan men ko kwõj katak kaki.a (Lale kõmel̦el̦e eo itulal̦.) Jar ñan Anij bwe en jol̦o̦k am̦ bõd im bwe en lewaj juon bõklõkõt erreo. Kepaake im kwal̦o̦k am̦ lukkuun lõke bwe katok in mour eo an Jijej enaaj letok juon ilju im jekl̦aj eaenõm̦m̦an im jokwane, im enaaj bõktok elõñ jeraam̦m̦an ko ñan ro rej kwal̦o̦k aer tõmak!​—Hibru 11:1.

• 

  Pãd ilo iien Kwõjkwõjin Keememej mej eo an Jijej. Jijej ear kõm̦m̦ane juon iien eaorõk ñan kakeememej kõj kõn an kar katok kõn mour eo an. Ear kwal̦o̦k kake iien in ilo an kar ba: “Kom̦win kõm̦m̦an men in ilo ememej Eõ.” (Luk 22:19) Ri Kõnnaan ro an Jeova renaaj kõm̦m̦ane kwõjkwõjin keememej mej eo an Jijej ilo naaj Juje, Eprõl̦ 11, 2017 ãlikin an tulo̦k al̦. Enaaj wõr juon katak ilo iien in me juon awa aetokan im ej kwal̦o̦k kõn aorõkin mej eo an Jijej, im wãween an bõktok jeraam̦m̦an ko kiiõ im ilo ilju im jekl̦aj. Ilo iiõ eo l̦o̦k, ewõr joñan in 20 milien armej ipel̦aakin lal̦ in rar kobatok ilo iien Kwõjkwõj eo. Kõmij kũr eok ñan bar kobatok ilo iien in ñan ad kwal̦o̦k ad kam̦m̦oolol kõn menin letok in an Anij el̦aptata.