Bõk L̦õmn̦ak eo Ejim̦we kõn Likjab im Bõd Ko

Don im Margaret rar m̦õn̦õn̦õ kõn an kar ledik eo nejierro im baam̦le eo an lol̦o̦k erro.a (Lale kõmel̦el̦e eo itulal̦.) Margaret ear jerbal ãinwõt juon rũkõmat m̦okta im em̦õj an kar retire jãn jerbal in an. Ilo iien kõjota eo aereañ, m̦okta jãn an baam̦le eo jepl̦aak, Margaret ear kõmat macaroni im cheese ñan baam̦le eo kõnke enno̦ ippãn l̦adik ro ruo jibwin.

Ke aolep rej jijet ilo tebõl̦ eo, Margaret ej bõktok m̦õñã eo im likũti iol̦apl̦apin tebõl̦ eo. Ke ej kõpel̦l̦o̦ke mejãn kõnno̦ eo, Margaret ear loe bwe ekar likũti wõt cheese im ear mel̦o̦kl̦o̦k in kobaiki macaroni eo!b (Lale kõmel̦el̦e eo itulal̦.)

Jekdo̦o̦n ewi joñan dettad ak joñan imminene ko ad, bõtab kõj aolep jej likjab im kõm̦m̦an bõd. Bõlen ewõr iien jaar ba juon men ilo ad jab l̦õmn̦ak kake m̦okta, ak jaar kõm̦m̦ane juon men em̦m̦an bõtab ear jab jejjet iien eo, ak bõlen ewõr juon men jaar mel̦o̦kl̦o̦k in kõm̦m̦ane. Etke jej likjab im kõm̦m̦an bõd? Ta eo jemaroñ kõm̦m̦ane ñe ej wal̦o̦k men in? Im ta ko jemaroñ kõm̦m̦ani ñan bõbrae ad kõm̦m̦an bõd? Jen etale l̦õmn̦ak eo ejim̦we kõn men in bwe jen jel̦ã uwaakin kajjitõk kein.

L̦ÕMN̦AK EO AD IM L̦ÕMN̦AK EO AN ANIJ KÕN LIKJAB KO

Ñe em̦m̦an wãween ad kar kõm̦m̦ane juon men, jej m̦õn̦õn̦õ ñe armej ro rej kile men in im rej nõbar kõj kake. Innem ñe jej kõm̦m̦an bõd, jekdo̦o̦n ñe jirilo̦k im ro jet rejjab jel̦ã kake, jen ke kar bareinwõt kile men in im m̦õn̦õn̦õ in kajim̦we? Bwe jen maroñ kõm̦m̦ane men in, ej aikuj wõr ettã bõro ippãd.

El̦aññe el̦ap jãn joñan ad l̦õmn̦ak kõn kõj make, jemaroñ oktak im jekpen kõn bõd ko ad, ak bõlen n̦aruon ro jet kaki, ak bõlen jemaroñ m̦akoko in kwal̦o̦k bwe ad bõd eo. Wãween kein ekkã aer tõll̦o̦k ñan apañ ak jorrããn ko. Emaroñ kõm̦m̦an bwe apañ eo en jab jako, im emaroñ jelõt ro ejjel̦o̦k rueer. Meñe jaar kõm̦m̦an likjab ak bõd im jaar jab iioon apañ, jej aikuj keememej bwe ilo jem̦l̦o̦kin, “kajjojo iaad naaj aikuj in kwal̦o̦k ñan Anij wãween an kar mour.”​—Rom 14:12, UBS.

Elukkuun pel̦an wãween l̦õmn̦ak eo an Anij kõn likjab im bõd ko an armej. Bokin Sam ej kwal̦o̦k bwe Anij “ekanooj tũriam̦o im jouj . . . eban en̦o̦uk iien otemjej, im ejjãmin dãpij an illu ñan indeeo.” Anij ejel̦ã bwe kõj armej jejjab weeppãn im emel̦el̦e kõn m̦õjn̦o̦ ko ad kõnke ej “keememej bwe [kõj] bũñal.”​—Sam 103:8, 9, 14.

Bareinwõt, Anij, eo ej ãinwõt juon jemãd etũriam̦o, ekõn̦aan bwe kõj ro nejin, jen bõk ejja l̦õmn̦ak eo wõt an kõn likjab im bõd ko. (Sam 130:3, UBS) Ikijjeen naan ko an ilo Baibõl̦, ej letok elõñ naanin kakapilõk ko im naanin tõl ko ñan jipañ kõj ak ro jet ñe jej likjab im kõm̦m̦an bõd.

KILEN KÕM̦ADM̦ÕDI LIKJAB AK BÕD KO

Ñe armej ro rej likjab ak kõm̦m̦an bõd, ekkã aer jol̦o̦k el̦ap iien ñan n̦aruon ro jet ak jekpen kõn men eo rar ba ak kõm̦m̦ane. Bõtab, el̦aññe kwõj ba juon men ej kainepataik juon armej, em̦m̦anl̦o̦k ñe kwõj jol̦o̦k am̦ bõd im kajim̦we men eo kwaar kõm̦m̦ane ñan kõjparok wõt jem̦jerã eo am̦ ippãn. Ewõr ke men en̦ ebõd kwaar kõm̦m̦ane im ear kainepataik kwe make ak bar juon armej? Ijello̦kun am̦ illu ippam̦ make ak n̦aruon ro jet, kwõmaroñ ke kate eok joñan wõt am̦ maroñ ñan kõm̦adm̦õde apañ eo? El̦aññe kwõj wõnm̦aanl̦o̦k wõt im n̦aruon ro jet, men in enaaj kõm̦m̦an an wõr wõt inepata im kal̦apl̦o̦k wõt apañ eo. Ijello̦kun am̦ ãindein, em̦m̦anl̦o̦k ñe kwõj katak jãn likjab eo am̦, kajim̦we, im kõm̦m̦ani men ko kwõj aikuj in kõm̦m̦ani bwe en jako apañ eo.

Ñe juon armej ej likjab ak kõm̦m̦an bõd, ekkã ad kwal̦o̦k ad jab m̦õn̦õn̦õ ippãer. Bõtab, em̦m̦anl̦o̦k ñe jej l̦oore naanin kakapilõk eo an Jesus Christ ke ear ba: “Men otemjej jabdewõt kom̦ij kõn̦aan bwe armej ren kõm̦anm̦an ñan kom̦, en ãindein ami kõm̦anm̦an ñan er.” (Matu 7:12) El̦aññe kwaar likjab im kõm̦m̦an bõd, jekdo̦o̦n ñe ej juon bõd edik, ak ejjel̦o̦k pere kwõnaaj kar kõn̦aan bwe ro jet ren kwal̦o̦k jouj im tũriam̦o ñan eok, im jab l̦õmn̦ake men eo kwaar kõm̦m̦ane. Kõn men in, kwõmaroñ ke bar kate eok ñan kwal̦o̦k jouj im tũriam̦o ñan ro jet ñe rej likjab ak kõm̦m̦an bõd?​—Epesõs 4:32, UBS.

NAANIN KAKAPILÕK KO ME REMAROÑ JIPAÑ KADIKL̦O̦K KÕM̦M̦AN BÕD

Juon tũkjinede ej kõmel̦el̦e im ba bwe likjab im bõd ko rej wal̦o̦k ñe ebõd mel̦el̦e eo an juon armej, ejabwe jel̦ã eo ippãn, ak ñe ejjab lukkuun roñjake. Ejjel̦o̦k pere bwe kõj aolep jej errã bwe ewõr iien jaar kõm̦m̦ani jet iaan men kein. Meñe ãindein, ak jemaroñ kadikl̦o̦k ad likjab im kõm̦m̦ani bõd ko el̦aññe jej l̦oore jet iaan naanin kakapilõk ko raorõk ilo Baibõl̦.

Juon iaan naanin kakapilõk kein epãd ilo bokin Jabõn Kõnnaan 18:13. Ej ba: “Eo ej uwaak m̦okta jãn an roñjake, eñin menin bwebwe im kajook ñan e.” (Jabõn Kõnnaan 18:13) Em̦ool bwe el̦aññe kwõnaaj bõk am̦ iien ñan roñjake im l̦õmn̦ak m̦okta kõn wãween am̦ naaj uwaak, ejjel̦o̦k pere bwe men in enaaj bõbrae eok jãn am̦ kõnnaan tak wõt ak m̦õkaj ñan aolep men. Ñe kwõj kal̦apl̦o̦k am̦ jel̦a kõn juon men ilo am̦ lukkuun roñjake, men in enaaj bõbrae eok bwe en jab bõd am̦ mel̦el̦e im kõm̦m̦an likjab.

Bar juon naanin kakapilõk ilo Baibõl̦ ej ba: “Kom̦win mour ilo aenõm̦m̦an ippãn armej otemjej joñan wõt ami maroñ.” (Rom 12:18, UBS) Kõn men in, kate eok joñan wõt am̦ maroñ ñan kõm̦m̦an bwe en wõr wõt aenõm̦m̦an im bõrokuk. Ñe kwõj jerbal ippãn ro jet, em̦m̦an ñe kwõj kwal̦o̦k kautiej im jouj ñan er, im kate eok ñan kam̦m̦oolol im rõjañ er. Ñe ãindein ami kõm̦m̦an ñan doon, innem enaaj pidodo ami jol̦o̦k an doon bõd im jab watõk ñe juon ej likjab ilo naan ak kõm̦m̦an. Joñan, enaaj em̦m̦an wãween ami kõm̦adm̦õdi bõd ko rel̦l̦ap.

Lale ta ko kwõmaroñ katak jãn likjab ko ak bõd ko. Ijello̦kun am̦ jekpen kõn men eo kwaar ba ak kõm̦m̦ane, em̦m̦an ñe kwõj kõjerbal iien in ñan kal̦apl̦o̦k am̦ kwal̦o̦k wãween ko rem̦m̦an. Ñan waanjoñak, kwõj aikuj ke kal̦apl̦o̦k am̦ kwal̦o̦k kijenmej, jouj, ak jel̦ã irooj ioon eñjake ko am̦? Kwõj aikuj ke bar kal̦apl̦o̦k am̦ kwal̦o̦k ineem̦m̦an, aenõm̦m̦an, im yokwe? (Galetia 5:22, 23) Kwõmaroñ katak jãn bõd eo am̦ ilo am̦ jab bar kõm̦m̦ane ejja likjab eo wõt. Em̦m̦an ñan kajim̦we bõd eo, bõtab en jab l̦ap jãn joñan am̦ l̦õmn̦ak im inepata kõn bõd eo kwaar kõm̦m̦ane. Ñe kwõj kõm̦m̦an an wõr ettõñ, emaroñ dikl̦o̦k an wõr inepata.

TOKJÃN AM̦ BÕK L̦ÕMN̦AK EO EJIM̦WE

El̦aññe ejim̦we l̦õmn̦ak eo ad ñe ej wõr likjab im bõd, men in enaaj jipañ kõj ñan jel̦ã kõm̦adm̦õdi. Innem enaaj l̦apl̦o̦k an aenõm̦m̦an bũruod im kõtaan eo ad ippãn ro jet. El̦aññe jej kate kõj im katak jãn bõd ko ad, enaaj l̦apl̦o̦k mãlõtlõt ippãd im ro jet renaaj m̦õn̦õn̦õ in pãd ippãd. Bareinwõt, eban l̦ap jãn joñan ad ebbeer ak illu ippãd make. Ñe jej keememej bwe ro jet rej bareinwõt kijenmej kõn likjab ko aer, men in enaaj kõm̦m̦an ad kõn̦aan epaakel̦o̦k er. El̦aptata, enaaj l̦ap ad bõk tokjãn ñe jej anõke joñak eo an Anij kõn an kwal̦o̦k yokwe im m̦õn̦õn̦õ in jol̦o̦k an armej bõd.​—Sam 86:5.

Men eo Margaret ear mel̦o̦kl̦o̦k in kõm̦m̦ane, ãinwõt an jinoin katak in kar kwal̦o̦ke, ear ke ko̦kkure an baam̦le eo m̦õn̦õn̦õ ippãn doon? Ejjab ñan jidik. Aolepeer rar ettõñ kake men in, el̦aptata Margaret, im rar kañe m̦õñã eo meñe ear ejjel̦o̦k macaroni ie! Elõñ iiõ tokãlik, l̦adik ro ruo jibwin rar bar kwal̦o̦k bwebwenato in ñan ro nejier, im kõn iien ko aer rekam̦õn̦õn̦õ ippãn lel̦l̦ap in jibwier im l̦al̦l̦ap eo jim̦m̦aer. Ealikkar bwe likjab eo ej jirilo̦k in bõd.