Kwõnaaj Ke Kõm̦adm̦õdi Apañ ko im Kõm̦m̦an bwe en Wõr Wõt Aenõm̦m̦an

JEOVA ANIJ ekõn̦aan bwe ro rej kabuñ ñane ren kõjparok aenõm̦m̦an. Ekõn̦aan bwe ren kõm̦m̦an aenõm̦m̦an ippãn doon. Ñe renaaj kõm̦m̦ane men in, enaaj wõr aenõm̦m̦an ilo eklejia, im enaaj kareel tok elõñ armej ñan ilowaan eklejia eo.

Ñan waanjoñak, juon em̦m̦aan ebuñbuñ kõn an kõjerbal uno in anijnij ilo Madagascar, ear lo wãween an Ri Kõnnaan ro an Jeova bõrokuk ippãn doon. Ear ba ippãn make, ‘Ñe inaaj kõn̦aan l̦oore juon kabuñ, eñin ej kabuñ eo inaaj pãd ie.’ Tokãlik, ear bõjrak jãn an kõjerbal uno in anijnij, ear kõm̦m̦an oktak ilo mour in pãlele eo an, im ear jino kabuñ ñan Jeova, eo ej Anij in aenõm̦m̦an.

Ãinwõt em̦m̦aan in, elõñ to̦ujin armej kajjojo iiõ rej oktak im ro uwaan eklejia eo im rej lo aenõm̦m̦an eo ie, aenõm̦m̦an in me el̦ap aer kõn̦aan bwe en wõr ippãer. Ak Baibõl̦ ej lukkuun kaalikkar bwe ñe ewõr “ebbanban” im “akwããl” ilo eklejia eo, enaaj ko̦kkure jem̦jerã ko ikõtaad im kõm̦m̦an an wõr apañ. (Jem. 3:14-16) Baibõl̦ eo ej bareinwõt letok naanin rõjañ ñan kõj kõn kilen ad maroñ bõbrae apañ ko im kõm̦m̦an bwe en wõr wõt aenõm̦m̦an. Jen lale ewi wãween naanin kakapilõklõk in ear jipañ jet ke ear wal̦o̦k apañ in ñan er.

APAÑ KO IM KILEN KÕM̦ADM̦ÕDI

“Epen aõ aenõm̦m̦an ippãn juon jeiũ im jatũ em̦m̦aan me ej bar jerbal ippa. Juon iien kõm̦ro ar bũroñe doon, im ewõr bar ruo armej rar itok im loe am̦ro lu doon.”​—CHRIS.

“Ilo jidimkij juon jeid im jatid kõrã me kõm̦ro kõn kwal̦o̦k naan ippãn doon, ekar bõjrak an kõm̦m̦an karõk bwe kõm̦ro en jerbal ippãn doon, im ear bareinwõt bõjrak jãn an kõnono ippa. Ejjel̦o̦k aõ kar mel̦el̦e etke ear ãindein.”​—JANET.

“Iar kõnono ilo talboon ilo wãween eo me jilu armej rej kõnnaan im roñjake doon ilo juon wõt iien. Armej eo juon ekar kõjem̦l̦o̦k an kõnono im ij ba wõt ekar kune talboon eo an. Kiiõ iar ba jet naan ko rejjab em̦m̦an kõn e ñan armej eo juon, ak ear roñ ta ko ij ba kõnke ejjañin kar kune talboon eo an.”​—MICHAEL.

“Ilo eklejia eo am, ear wõr juon apañ ikõtaan ruo bainier. Ekkã wõt aerro lu doon im akwããle doon, im wãween in erro ar kõm̦m̦ane ear lukkuun kabbeere ro jet.”​—GARY.

Bõlen kwõmaroñ l̦õmn̦ak bwe wãween kein ej kab m̦õj ad kõnono kaki rej jet men ko reddik. Ak wãween kein remaroñ kõm̦m̦an bwe en wõr eñjake ko me enaaj to kũtien aer kõmetak bũrueer, im kam̦õjn̦o̦ik tõmak eo an rein rej iioon apañ kein. Kwõnaaj m̦õn̦õn̦õ in jel̦ã bwe ear bar wõr aenõm̦m̦an ikõtaan rein jeid im jatid ke rar aolep kõtl̦o̦k bwe Baibõl̦ eo en tõl er. Ta naanin tõl ko ilo Baibõl̦ kwõj l̦õmn̦ak bwe rar kõjerbali im rar lukkuun jipañ er?

“Lale kom̦ar akwããl ilo ami ilo̦k.” (Jen. 45:24, UBS) Josep ear lel̦o̦k naanin kakapilõklõk in ñan l̦õm̦aro jein im jatin ilo iien eo ke rar ro̦o̦l ñan ippãn jemãer. Elukkuun kar mãlõtlõt wãween an kar kõnono! Ñe juon armej ejjab maroñ dãpij an inepata im em̦õkaj an illu, emaroñ kõm̦m̦an bwe ro jet ren bar illu. Chris ear kile bwe m̦õjn̦o̦ ko an kar utiej bõro, im m̦akoko in roñjake an ro jet lel̦o̦k naanin tõl ñane. Ke ear kõn̦aan kõm̦m̦an oktak, ekar jol̦o̦k an bõd ippãn eo jein im jatin me ear akwããl ippãn im ear lukkuun kate e bwe en jel̦ã dãpij an illu. Ke Chris ear kõm̦m̦an oktak, rijerbal eo m̦õttan ear kile im e ear bar kõm̦m̦an oktak. Kiiõ erro ej m̦õn̦õn̦õ in karejar ñan Jeova ippãn doon.

“Ijo ejjel̦o̦k pepe, em̦õj kajettokjãn l̦õmn̦ak ko m̦okta.” (JK. 15:22) Ke ear bõjrak an kõrã eo jeran Janet kõnono ippãn, Janet ear kõn̦aan kõjerbal eoon in ilo Baibõl̦ ñan lo mejal̦an apañ in aerro. Ear pepe bwe en kõnono ippãn kõrã eo jein im jatin. Ilo iien in erro ar kõnono, Janet ear kajjitõk ippãn kõrã eo jein im jatin bwe en kwal̦o̦k jãn bũruon kõn ta eo ej lukkuun inepata kake. Ilo m̦ool ear pen ilo jinoin, ak ekar em̦m̦anl̦o̦k ke erro ar wõnm̦aanl̦o̦k wõt im kõnono kõn apañ eo aerro ilo juon wãween me eineem̦m̦an. Kõrã eo jein im jatin Janet ekar kile bwe ear bõd wãween an l̦õmn̦ak. Innem ear jol̦o̦k an bõd, im erro ar bar m̦õttãik doon im wõnm̦aanl̦o̦k wõt im karejar ñan Jeova ippãn doon.

“Innem el̦aññe kwõpojak in lel̦o̦k menin joortak eo am̦ ñan Anij ilo lokatok im kwõj keememej bwe ewõr am̦ bõd n̦ae jeim̦ im jatũm̦, Kwõn likũt menin joortak eo am̦ im̦aan lokatok eo im m̦õkajl̦o̦k in jol̦o̦k am̦ bõd ippãn jeim̦ im jatũm̦.” (Matu 5:23, 24, UBS) Kwõmaroñ keememej naanin kakapilõklõk in me Jijej ear kwal̦o̦ke ilo katak eo an ioon tol̦ eo. Michael ear lukkuun bũrom̦õj im nana an mour ke ear kwal̦o̦k naan ko rejjab em̦m̦an kõn em̦m̦aan eo juon jein im jatin. Ear pepe bwe enaaj kate ñan kõm̦m̦an bwe en wõr aenõm̦m̦an. Kõn men in, ear kepaake em̦m̦aan eo jein im jatin me ear kõmetake im lukkuun jol̦o̦k an bõd. Im ta eo ear wal̦o̦k? Michael ej ba: “Ilo jouj, em̦m̦aan eo jeiũ im jatũ ear m̦oolin jol̦o̦k aõ bõd.” Innem, Michael im em̦m̦aan eo jein im jatin rar bar jino aerro epaak im m̦õttãiki doon.

“Kom̦win jipañ doon, im jeorl̦o̦k an doon bõd ilo jabdewõt iien el̦aññe ewõr iaami ej ba n̦ae doon.” (Kol. 3:12-14, UBS) Kwõj ke keememej bainier ro ruo me rar akwããle doon ilo iien eo erro ar kwal̦o̦k naan? Ilo jouj, juon em̦m̦aan me ej lale eklejia ear jipañ bwe erro en kile bwe men eo erro ar kõm̦m̦ane ear kainepataik im ko̦kkure eñjake ko an ro jet. Ear kakeememej erro bwe ren kijenmej ippãn doon, im kõm̦m̦an bwe en jab jako aenõm̦m̦an eo ilowaan eklejia eo. Innem erro ar m̦õn̦õn̦õ in roñjake naanin kakapilõklõk in an em̦m̦aan in im jerbale. Kiiõ erro ej m̦õn̦õn̦õ ilo aerro kwal̦o̦k naan ippãn doon.

Ñe juon ej kainepataik im kõmetak eok, kwõmaroñ l̦oore naanin kakapilõklõk in jãn Baibõl̦ ilo Kolosse 3:12-14. Elõñ rar lo bwe ñe ettã bũrueer, remaroñ jol̦o̦k bõd ko an ro jet im mel̦o̦kl̦o̦ki. Ak ñe kwõj lo bwe juon men epen ñan am̦ kõm̦m̦ane ej jol̦o̦k bõd, eokwe kwõmaroñ l̦oore naanin kakapilõklõk eo ilo Matu 18:15. Meñe Jijej ear kõnnaan kõn bõd ko rel̦l̦ap ilo eoon in, ak ear kwal̦o̦k kõn juon men jemaroñ kõm̦m̦ane ñe ej wõr apañ ko rej wal̦o̦k ikõtaad im ro jeid im jatid. Ilo jouj, jemaroñ kepaak eo jeid im jatid im kõnono kõn apañ eo im kajjioñ kõm̦adm̦õde.

Elõñ naanin kakapilõklõk ko jet Baibõl̦ ej litoki ñan jipañ kõj. Elõñ iaaer rekitibuj ad atartar ioon kajoor eo an Anij bwe jen maroñ kwal̦o̦k men ko “leen Jetõb.” Wãween kein rekitibuj “yokwe, lañlõñ, aenõm̦m̦an, meanwõd, jouj, em̦m̦an, tiljek, ineem̦m̦an, jatõr.” (Ga. 5:22, 23) Ãinwõt an juon injin aikuj oil bwe en em̦m̦an an jerbal, ãindein wãween kein rem̦m̦an an Jeova renaaj kõm̦m̦an bwe en pidodo ad kõm̦adm̦õdi apañ ko rej wal̦o̦k ikõtaad im ro jeid im jatid.

AD OKTAK JÃN DOON EJ KÕM̦M̦AN BWE EKLEJIA EO EN JUON JIKIN EO ELEM̦ÕN̦ÕN̦Õ

Kõj kajjojo jeoktak jãn doon. Eoktak wãween ko ippãd, wãween ad l̦õmn̦ak, im wãween ad kwal̦o̦k eñjake ko ad. Im wãween kein remaroñ kõm̦m̦an bwe jem̦jerã ko ad ippãn ro jet en em̦m̦an im kãitoktoklimo. Bõtab kõnke jeoktak jãn doon, jet iien jemaroñ inepata im jab errã ippãn doon. Juon em̦m̦aan ej lale eklejia me el̦ap imminene ippãn, ear kwal̦o̦k juon waanjoñak kõn men in. Ear ba: “Juon eo me ejjel̦o̦k an naan emaroñ pen an pãd ippãn juon eo me em̦m̦an ippãn bwebwenato, im epidodo an kepaak ro jet. Jemaroñ l̦õmn̦ak bwe men in ejjab lukkuun aorõk bõtab emaroñ kõm̦m̦an bwe en wõr apañ ko rel̦l̦ap.” Kwõj ke l̦õmn̦ak bwe ruo armej reoktak jãn doon reban maroñ epaake doon? Eokwe, jen lale juon waanjoñak kõn ruo iaan rijjilõk ro. Ñe jej l̦õmn̦ak kõn Piter, jemaroñ l̦õmn̦ak kõn juon eo me aolep iien ej kajju kwal̦o̦k l̦õmn̦ak ko an. Im ñe jej l̦õmn̦ak kõn Jon, jemaroñ l̦õmn̦ak kõn juon jeid im jatid em̦m̦aan me el̦ap yokwe ippãn, im ekõn l̦õmn̦ak m̦okta jãn an kõnnaan im kõm̦m̦ane juon men. Piter im Jon rar oktak jãn doon. Bõtab, ear em̦m̦an aerro jerbal ippãn doon ke rar karejar ñan Jeova. (Jrb. 8:14; Ga. 2:9) Emaroñ bar ãindein kõj ilo raan kein. Meñe Kũrjin ro relukkuun oktak jãn doon, ak remaroñ jerbal ippãn doon im epaake doon.

Bõlen ewõr juon jeim̦ im jatũm̦ kõrã ak em̦m̦aan me wãween an kõnnaan im kõm̦m̦an ñan kwe ekaabn̦õn̦õik eok. Meñe ãindein, ak em̦m̦an ñe kwõj keememej bwe Kũraij ear mej kõn armej eo ãinwõt an kar bar mej kõn kwe, im ekõn̦aan bwe kwõn kwal̦o̦k yokwe. (Jon 13:34, 35; Rom 5:6-8) Innem ijello̦kun am̦ jab kõn̦aan m̦õttãiki armej eo im jab kepaake ak kõnnaanl̦o̦k ñane, em̦m̦an kwõn kajjitõk ippam̦ make: ‘Kõrã ak em̦m̦aan in jeiũ im jatũ ej ke kõm̦m̦ane juon men me ej n̦ae Baibõl̦ eo? Ej ke kõm̦m̦ane men in kõnke ekõn̦aan kõmetak eõ? Ak ej ke kõn am̦ro oktak jãn doon?’ Bareinwõt ebar aorõk ñan l̦õmn̦ak kõn kajjitõk in: ‘Ta juon iaan wãween ko rem̦m̦an ej kwal̦o̦ki me imaroñ bõk tokjãn jãne?’

Kajjitõk in ilõñ ãliktata el̦ap an aorõk. El̦aññe juon armej em̦m̦an ippãn kõnnaan ak kwe kwõj juon eo ejjel̦o̦k an naan, l̦õmn̦ak kõn an pidodo wãween an armej in jino kõnnaan ippãn armej ro ilo iien kwal̦o̦k naan. Kwõmaroñ kajjitõk ippãn bwe komiro en jerbal ippãn doon ilo kwal̦o̦k naan, im lale ta ko kwõmaroñ katak jãne. Ak ta el̦aññe kwõj kile bwe el̦apl̦o̦k an armej in jouj jãn kwe? Kwõj kile ke m̦õn̦õn̦õ eo ilo am̦ kwal̦o̦k jouj im lel̦o̦k ñan ro rerũtto me renañinmej im rej pãd ilo aikuj? Kwõmaroñ ke katak jãn armej in ñan bar kwal̦o̦k jouj ñan ro jet? Eokwe, boin eo eaorõk in ej bwe meñe komiro oktak jãn doon, ak kwe im em̦m̦aan ak kõrã eo jeim̦ im jatũm̦ komiro maroñ epaake doon, ilo amiro l̦õmn̦ak wõt kõn men ko rem̦m̦an komiro ej kõm̦m̦ani. Ilo am̦ kõm̦m̦ane men in, emaroñ kõm̦m̦an bwe komiro en epaake doon, im enaaj l̦ap amiro aenõm̦m̦an im bareinwõt eklejia eo.

Emaroñ kar lukkuun oktak wãween an kar Euodia im Sintike l̦õmn̦ak im kõm̦m̦an jãn doon. Bõtab, Paul ear rõjañ erro bwe ren “jouj im bõro wõt juon ãinwõt jemjein jemjatin ilo Irooj.” (Pil. 4:2, UBS) Kõj bareinwõt jekõn̦aan kabuñ ñan Jeova ippãn ro jeid im jatid im kõm̦m̦an bwe en jab jako aenõm̦m̦an eo ilowaan eklejia eo.

JAB KÕTL̦O̦K BWE APAÑ KO IKÕTAAM̦ IM RO JEIM̦ IM JATŨM̦ REN WÕNM̦AANL̦O̦K WÕT

Etke jej aikuj m̦õkaj im jol̦o̦k jabdewõt kain l̦õmn̦ak ko rejjab em̦m̦an ippãd kõn ro jet? Jemaroñ keidi l̦õmn̦ak kein ñan ujooj ko renana me rej eddek ibwiljin wũt ko raiboojoj. El̦aññe jejjab m̦õkaj im tũm̦wi im julo̦k ujooj kein, jidik kõn jidik remaroñ lõñl̦o̦k im ko̦kkure an wũt ko rem̦m̦an eddek. Ejja ãindeinl̦o̦k wõt, el̦aññe el̦ap ad bõk l̦õmn̦ak ko rejjab em̦m̦an kõn ro jet, men in emaroñ jelõt aolep ro ilowaan eklejia eo. Bõtab, el̦aññe jej yokwe Jeova im ro jeid im jatid, jenaaj kate kõj joñan wõt ad maroñ bwe jen kõjparok aenõm̦m̦an eo ilowaan eklejia eo.

Jemaroñ bwilõñ kõn an naaj em̦m̦an aolep men ñe jej kajjioñ kõm̦m̦an aenõm̦m̦an ippãn ro jet. L̦õmn̦ak m̦õk kõn waanjoñak in kõn juon jeid im jatid. Ej ba: “Iar l̦õmn̦ak bwe wãween an juon jeiũ im jatũ kõrã ilo eklejia eo kõm̦m̦an ñan ña ej ãinwõt ñe ña juon ajri. Men in ear lukkuun kaabn̦õn̦õik eõ. Innem ke ear l̦apl̦o̦k aõ matõrtõr, ear jino an nana im eddo aõ kõnnaan ñane. Iar l̦õmn̦ak ippa make, ‘kõnke kõrã in ejjab kwal̦o̦k kautiej ñan ña, eokwe ijjab bar kwal̦o̦k kautiej ñane.’”

Kõrã in jeid im jatid ear jino l̦õmn̦ak kõn wãween an kõm̦m̦an ñan kõrã eo juon. Ej ba: “Iar jino kile likjab im m̦õjn̦o̦ ko aõ, im ear lukkuun nana aõ mour. Iar kile bwe ij aikuj ukot wãween aõ l̦õmn̦ak. Innem ãlikin aõ kar jar ñan Jeova kõn apañ in ear wal̦o̦k, iar bõkl̦o̦k juon m̦weien kõrã eo jeiũ im jatũ, im je juon an card jidikdik ñan jol̦o̦k aõ bõd kõn an kar jab em̦m̦an wãween aõ kõm̦m̦an ñane. Kõm̦ro ar atbo̦kwõje doon im jim̦or errã bwe kõm̦ro en mel̦o̦kl̦o̦k apañ eo. Kiiõ ejjel̦o̦k bar juon apañ ej wal̦o̦k ikõtaamro.”

Aolep armej rekõn̦aan bwe en wõr aenõm̦m̦an. Ak ñe ej utiej bũruon armej im rej l̦õmn̦ak wõt kõn er make, wãween aer kõm̦m̦an ñan ro jet enaaj kõm̦m̦an bwe en ejjel̦o̦k aenõm̦m̦an. Jej loe an men in wal̦o̦k ippãn ro rejjab kabuñ ñan Jeova. Bõtab, Jeova ej kõtmãne bwe armej ro rej karejar ñane ren oktak. Ej aikuj wõr aenõm̦m̦an im bõrokuk ibwiljin Ri kõnnaan ro an. Jeova ear kõm̦akũt Paul bwe en je naan kein: “Innem ña . . . ij akwel̦ap ñan kom̦ bwe kom̦win mour ekkar ñan joñak in mour eo Anij ear likũti ke ear kũr kom̦. Kom̦win ettã im ineem̦m̦an im kijenmej iien otemjej. Kom̦win kwal̦o̦k ami yokwe ilo ami jipañ doon. Kom̦win kate kom̦ joñan wõt ami maroñ, bwe kom̦win bõro wõt juon ilo Jetõb Kwõjarjar, kõn aenõm̦m̦an eo ej lukwõj kom̦ ippãn doon.” (Ep. 4:1-3, UBS) ‘Aenõm̦m̦an eo ej lukwõj kõj ippãn doon’ elukkuun aorõk. Kõn men in, kõj kajjojo jen kate kõj joñan wõt ad maroñ ñan kõm̦m̦an bwe en wõr aenõm̦m̦an, im kajjioñ kõm̦adm̦õdi jabdewõt apañ ko remaroñ wal̦o̦k ikõtaad im ro jeid im jatid.