Juon Eo Ejouj Enaaj Lo Jeraam̦m̦an

LEL̦O̦K menin katok ko ej juon iaan wãween ko raorõk jej kabuñ ñan Anij im kar kõm̦m̦ane jãn iien ko eto. RiIsrael ro rekõn katok kõn menninmour ko, im Kũrjin ro el̦ap aer buñbuñ kõn aer “wũjtak [ak nõbar] etan” Anij. Bõtab, ebar lõñ wãween ko jet Kũrjin ro remaroñ katok kaki ilo kõkkar me rej kabuñbũruon Anij. (Hi. 13:15, 16, UBS) Im men kein renaaj kalañlõñ im bõktok jeraam̦m̦an ko ñan kõj ãinwõt an kar wal̦o̦k ñan ro m̦okta me jej pojak in etali.

Hanna, juon eo ear tiljek ñan Anij, eto an kar kõn̦aan bwe en wõr juon nejin l̦addik ak ear jab maroñ kõnke ear wõrañe. Juon iien ke ear jar ñan Jeova, ear kallim̦uri bwe el̦aññe enaaj bõro̦ro kõn juon nejin l̦addik, enaaj kar ‘lel̦o̦ke ñan Jeova raan otemjej in an mour.’ (1 Sa. 1:10, 11) Ejjabto, Hanna ear bõro̦ro im ear keotak l̦adik eo nejin etan, Samuel. Ãlikin an kar bõjrak an Samuel ninnin ippãn jinen, Hanna ear bõkl̦o̦ke ñan tampel̦ eo ãinwõt an kar kallim̦ur. Jeova ear kõjeraam̦m̦an Hanna kõn an kar jab l̦õmn̦ak kõn e make ilo an kar m̦õn̦õn̦õ in aje l̦adik in nejin. Kõn men in, kar bar kõjeraam̦m̦ane kõn 5 nejin ajri, im Samuel ear juon rũkanaan im rijeje Baibõl̦.—1 Sa. 2:21, UBS.

Kũrjin ro ilo raan kein rebar jeraam̦m̦an ãinwõt kar Hanna im Samuel kõnke remaroñ ajel̦o̦k mour eo aer ñan jerbal ñan Rũkõm̦anm̦an eo aer. Bareinwõt, Jesus ear kallim̦ur bwe eo ej m̦õn̦õn̦õ in aje jabdewõt men ko ippãn ñan karejar ñan Jeova, enaaj lo jeraam̦m̦an.—Mark 10:28-30.

Ilo tõre ko an Kũrjin ro jinoin, ekar wõr juon kõrã etan Dorkas im ear juon rũttõmak. Elõñ rar jel̦ã kajjien kõn an kar jouj im ‘kõm̦m̦ani jerbal ko rem̦m̦an, im jipañ ro rijjeram̦õl.’ Bõtab juon iien, ke Dorkas “ear nañinmej im ear mej,” aolepen eklejia eo ear lukkuun bũrom̦õj. Ke rũkal̦oor ro rar roñ ke Piter ear pãd ilo bukwõn eo epaake er, rar m̦õkaj im ba en itok. Baj l̦õmn̦akel̦o̦k m̦õk joñan an kar l̦ap m̦õn̦õn̦õ ke Piter ear itok im kõjerkakpeje e! Eñin iien eo jinointata kar je ilo Baibõl̦ kõn an juon rijjilõk kõjerkakpejeik juon armej. (Jrb. 9:36-41, UBS) Ealikkar bwe Anij ear jab mel̦o̦kl̦o̦k jerbal ko rem̦m̦an an Dorkas. (Hi. 6:10) Ilo Baibõl̦, kar je bwebwenatoon kõn an kar kwal̦o̦k jouj im ej juon joñak em̦m̦an bwe jen l̦oore.

Rijjilõk Paul ej bar juon joñak em̦m̦an kõn an kar kwal̦o̦k jouj im m̦õn̦õn̦õ in kaarmejjeteik iien im maroñ ko an ñan jipañ ro jet. Ke ear jeje ñan Kũrjin ro ilo Korint, ear ba: “Inaaj m̦õn̦õn̦õ in kõjerbal men otemjej ewõr ippa, im bareinwõt mour eo aõ, bwe in jipañ kom̦.” (2 Ko. 12:15, UBS) Ilo aolepen mour eo an Paul, ear ekkatak im kile bwe el̦apl̦o̦k an juon naaj m̦õn̦õn̦õ ñe ej kaarmejjeteik e make ñan jipañ ro jet. El̦aptata, Jeova enaaj m̦õn̦õn̦õ ippãd im enaaj kõjeraam̦m̦an kõj.—Jrb. 20:24, 35, UBS.

Alikkar, el̦ap an Jeova m̦õn̦õn̦õ ñe jej kaarmejjeteik iien im maroñ ko ad ñan kowõnm̦aanl̦o̦k jerbal ko an Aelõñ eo im jipañ rũttõmak ro jeid im jatid. Ak ebar wõr ke wãween ko jet jemaroñ kõm̦m̦ani ñan rejetake jerbalin kwal̦o̦k naan? Aet! Kobal̦o̦k ippãn jerbal kein, jemaroñ nõbar im kaiboojoj Anij ikijjeen jabawõt ko ad. Jabawõt ko ad rej jipañ elõñ kain jerbal ko. Rej jipañ kowõnm̦aanl̦o̦k jerbalin kwal̦o̦k naan ipel̦aakin lal̦ in, ekitibuj jerbalin mijinede im full-time. Ej bar jipañl̦o̦k jerbalin ukok im aer kõm̦m̦ani bok ko im pijain alwõj ko. Bareinwõt, jerbal eo ñan jipañ ro jeid im jatid ilo jikin ko rar jorrããn im jerbalin ekkal Im̦õn Kweilo̦k ko. Baibõl̦ eo ej kallim̦uri kõj bwe ñe juon ej kwal̦o̦k jouj innem enaaj “lo jeraam̦m̦an.” Bareinwõt jej nõbar Jeova ñe jej lel̦o̦k ñane men ko raorõktata ippãd.—JK. 3:9; 22:9, UBS.

Wãween ko Ro Jet Rej Pepe in Jabawõt ñan Jerbalin Kwal̦o̦k Naan Ipel̦aakin Lal̦

Ãinwõt ilo raan ko an Paul, elõñ ilo raan kein rej “kõjenolo̦k jet” jããn im likũti ilo bo̦o̦k in jabawõt eo an eklejia eo, ijo ej ba “Jipañ Jerbalin Kwal̦o̦k Naan Ipel̦aakin Lal̦.” (1 Ko. 16:2, UBS) Ilo kajjojo allõñ, eklejia ko rej jilkinl̦o̦k jabawõt kein ñan ra eo rej pãd ium̦win. Kwõmaroñ bar kajju jilkinl̦o̦k jabawõt ko ñan ra eo ilo aelõñ eo kwõj pãd ie. Ñan jel̦ã mel̦el̦e ko rel̦l̦apl̦o̦k kõn ia eo kwõmaroñ jilkinl̦o̦k jabawõt ko am̦ ñane im ilo etan wõn, kwõmaroñ kappok mel̦el̦e jãn ra eo kwõj pãd ium̦win. Kwõmaroñ loe atõrej in ra eo ilo www.jw.org/mh. Ta ko kwõmaroñ jabawõt kaki im ewi wãween? Jouj im lale wãween kein em̦õj kõllaajraki:

JABAWÕT KÕN JÃÃN IM M̦WEIUK KO RAORÕK

Kwõmaroñ jabawõt im jilkinl̦o̦k jããn jãn jããn ko am̦ ilo pããñ, ak ikijjeen debit card, ak credit card. Ilo jet ra ko, kwõmaroñ kõjerbale jw.org ñan jabawõt ak bar juon weep jait me ra eo ej kamãlimi.
Kwõmaroñ jabawõt kõn jããn ak men ko m̦weiõm̦ raorõk, ãinwõt m̦arm̦ar, riiñ, ak bar men ko jet raorõk. Im kwõmaroñ je juon lõta ñan kõmel̦el̦e bwe kwõj jabawõt kaki.

JUON KARÕK ÑAN KARO̦O̦LWAJ JABAWÕT KO AM̦ ÑE KWÕNAAJ AIKUJI

Kwõmaroñ jabawõt kõn jããn ko am̦, bõtab ñe kwõnaaj bar aikuji remaroñ bar karo̦o̦liwaj.
Je juon lõta ñan kwal̦o̦k bwe el̦aññe kwõnaaj aikuji jããn eo ilju im jekl̦aj, innem ren bar karo̦o̦lwaj.

WÃWEEN KO JET JEMAROÑ JABAWÕT

Ijello̦kun ad jabawõt kõn jããn im men ko m̦weied, ebar wõr wãween ko jet jemaroñ kõm̦m̦ani ñan rejetak jerbalin kwal̦o̦k naan kõn Aelõñ eo an Anij ipel̦aakin lal̦ in. Ñe kwõj l̦õmn̦ak in kõjerbal juon ak elõñl̦o̦k jãn juon iaan wãween kein em̦õj kõllaajraki itulal̦, jouj im kajjioñ ko̦o̦l̦ ak jeje ñan ra eo me aelõñ eo am̦ ej pãd ium̦win ñan lale ta wãween ko kwõmaroñ kõjerbali ñan jabawõt. Kõnke eoktak kien ko jãn doon ilo kajjojo aelõñ im wãween aer kõl̦l̦ã eowõj, em̦m̦an ñe kwõj kepaak juon eo ejel̦ã kõn kakien ko im wãween kõl̦l̦ã eowõj m̦okta jãn am̦ kããlõt juon iaan wãween kein ñan jabawõt.

Insurance im Jããn in Retire: Ej juon karõk in jabawõt me kwõj likũt etan doulul in ñan kamãlim an naaj jããn in insurance eo am̦ ak jããn in joortoklik ak jããn in retire ko am̦ etal ñan doulul in.

Jããn ko ilo Pããñ: El̦aññe ej juon men emãlim ilo pããñ eo kwõj kõjerbale, kwõmaroñ likũt etan doulul in ilo account ko am̦ ilo pããñ bwe en wõr an maroñ ioon jããn ko am̦ ñe kwõmej.

Kõj eo Am̦ ilo Juon Kom̦bani im M̦uri ko an Ro Jet Ippam̦: El̦aññe ewõr am̦ kõj ilo juon kom̦bani ak juon kom̦bani em̦uri ippam̦, kwõmaroñ likũt etan doulul in bwe kõj eo am̦ im jããn ko kom̦bani eo ear m̦uriiki ren kajju etal ñan doulul in. Ñe ejjab, kwõmaroñ kõm̦m̦an kon̦ bwe ren kab etal ñan doulul in ñe kwõmej.

Wãto, Em̦, ak Building Ko: Kwõmaroñ lel̦o̦k men kein bwe doulul in en jolõti, ak ikijjeen jikin jokwe eo, kwõmaroñ karõk bwe kwõn pãdwõt ie toon wõt am̦ mour, ak ñe kwõmej emaroñ etal ñan doulul in.

Juon Kein Kam̦ool: Kwõmaroñ kõm̦m̦ane juon peba in kallim̦ur ñan kwal̦o̦k kõn̦aan eo am̦ kõn men ko m̦weiõm̦ ak kwal̦o̦k bwe kwõj kappeiki doulul in ñan an naaj jolõti men ko m̦weiõm̦ im jããn ko am̦ ñe kwõnaaj mej. Karõk rot in emaroñ tõll̦o̦k eok ñan bõk jet tokjãn ko ikijjeen kõl̦l̦ã eowõj ñan kien.

Jej aikuj l̦õmn̦ak l̦o̦k im̦aan ñe jej pepe in lel̦o̦k ak jaba ilo wãween kein. Ñan jipañ jabdewõt eo ekõn̦aan kõjerbal wãween kein ñan jabawõt ñan jipañ jerbal eo an Ri Kõnnaan ro an Jeova ipel̦aakin lal̦, ewõr juon bok em̦õj kõm̦m̦ane ilo kajin Pãlle im Spanish. Taitõl̦in ej “Wãween ko Jemaroñ Jabawõt ñan Jipañ Jerbalin Kwal̦o̦k Naan Ipel̦aakin Lal̦” (Charitable Planning to Benefit Kingdom Service Worldwide). Bok in ej kõmel̦el̦e kõn wãween jabawõt ko reoktak jãn doon me jemaroñ lil̦o̦k kiiõ ak tokãlik ñe jemej. Ejjab aolep mel̦el̦e ko ilo bok in remaroñ ekkar kõnke emaroñ oktak kakien ko ilo aelõñ eo kwõj pãd ie ak wãween kõl̦l̦ã eowõj. Elõñ rar kõjerbal wãween jabawõt kein ñan jipañ im rejetake jerbal im m̦akũtkũt ko jej kõm̦m̦ani ipel̦aakin lal̦ in im men in ear jipañ er ilo aer kõl̦l̦ã eowõj. El̦aññe ewõr bok in ilo aelõñ eo kwõj pãd ie, kwõmaroñ kajjitõk am̦ kaape jãn jekretari eo an eklejia eo am̦.

Ñan bõk mel̦el̦e ko rel̦l̦apl̦o̦k, etal ñan ijo ej ba “Jabawõt ñan Jipañ Jerbal eo Am Ipel̦aakin Lal̦ In” me ej pãd itulal̦ ilo jw.org/mh, ak jeje ñan ra eo me aelõñ eo am̦ ej pãd ium̦win.