“Ear Pãd Ia Anij?”

ÑE EJ WAL̦O̦K JORRÃÃN KO, KWÕJ KE L̦ÕMN̦AK IM BA, ‘EAR PÃD IA ANIJ?’ AK ENAÑIN KE KAR WAL̦O̦K JUON APAÑ ILO MOUR N̦E AM̦ IM KÕM̦M̦AN AM̦ L̦ÕMN̦AK EL̦AÑÑE ANIJ EJ KEA KÕN EOK?

Bõlen kwõj bõk ejja eñjake in wõt an Sheila, eo ej jokwe ilo Amedka. Ear rũttol̦o̦k ilo juon baam̦le me rekõn etal ñan jar aolep iien. Sheila ej ba: “Jãn ke iar dik, ear l̦ap aõ kaorõk Anij kõnke ej Rũkõm̦anm̦an eo ad. Meñe ãindein ak iar jab eñjake aõ epaake e. Iar l̦õmn̦ak bwe ej reitok im lo eõ jãn juon jikin ettol̦o̦k. Iar jab l̦õmn̦ak bwe Anij ear dike eõ, bareinwõt iar jab tõmak bwe ej yokwe eõ.” Etke Sheila ear pere bwe Anij ejjab yokwe e? Ej kõmel̦el̦e im ba: “Elõñ apañ ko baam̦le eo aõ ear iioone, ak ear ãinwõt ñe Anij ear jab jipañ ñan jidik.”

Bõlen kwõj ãinwõt Sheila im kwõj tõmak bwe ewõr juon Anij Ekajoor Bõtata. Bõtab, bõlen kwõmaroñ l̦õmn̦ak el̦aññe ej lukkuun yokwe eok. Em̦m̦aan eo ewãnõk Job, eo ear tõmak bwe ekajoor im emãlõtlõt Rũkõm̦anm̦an eo, ear bar wõr an eñjake in pere. (Job 2:3; 9:4) Elõñ apañ ko ear eñtaan kaki, im ear l̦õmn̦ak ejjel̦o̦k men en̦ emaroñ jipañe. Kõn men in, ear kajjitõk ippãn Anij im ba: “Etke kwõj pinej turin mejam̦, im likũt eõ Am̦ rũkõjdat?”​—Job 13:24.

Ta eo Baibõl̦ ej ba? Ejim̦we ke ñan n̦aruon Anij ñe ej wal̦o̦k jorrããn? Ewõr ke kein kam̦ool bwe Anij ej yokwe aolep armej im kõj wõj kajjojo? Ilo l̦õmn̦ak eo am̦ make, jemaroñ ke tõmak im jel̦ã bwe ej kea kõn kõj, mel̦el̦e kõn kõj, tũriam̦o kõn kõj, ak bwe emaroñ jipañ kõj kõn apañ ko ad?

Ilo katak ko tok jet, jenaaj etale ewi wãween an menin kõm̦anm̦an ko kwal̦o̦k kõn an Anij yokwe kõj. (Rom 1:20) Innem, jenaaj etale ta eo Baibõl̦ ej kwal̦o̦k kake kõn an yokwe kõj. Ñe el̦apl̦o̦k am̦ ‘jel̦ã kõn E’ ilo am̦ etale menin kõm̦anm̦an ko an im Naan eo an, innem enaaj l̦apl̦o̦k am̦ tõmak im lõke bwe “kwõaorõk ippãn.”​—1 Jon 2:3; 1 Piter 5:7.