Kwaar Jel̦ã Ke?

Etke ri-kal̦oor eo Stipen ear maroñ aenõm̦m̦an wõt meñe ear iioon jum̦ae?

STIPEN ear jelm̦ae juon kumi in em̦m̦aan me rar lãj. Ear wõr 71 uwaan ri-ekajet ro ilo im̦õn ekajet eo el̦ap an ri-Ju ro, etan Sanhedrin, im em̦m̦aan rein rar make wõt kajoor ilo aelõñ in. Bũrij eo El̦ap etan Kaiepas ear kakobaik ri-ekajet rein ñan jikin ekajet in, im jejjo allõñ m̦okta jãn iien in, e eo me ear tõl ri-ekajet ro ke rar liaakel̦o̦k Jesus ñan mej. (Matu 26:57, 59; Jrb. 6:8-12, UBS) Ke rar bõktok jet armej juon ilo̦k juon bwe ren kwal̦o̦k naan in riab ko, rar kalimjeke Stipen im bwilõñ bwe mejãn ear “ãinwõt turin mejãn enjel̦.”​—Jrb. 6:13-15, UBS.

Etke Stipen ear maroñ aenõm̦m̦an wõt meñe ear pãd ilo juon wãween ekaamijak? M̦okta jãn an kar Stipen iioon mãlejjoñ in, ear juon eo me el̦ap an kijejeto ilo jerbal ko an Anij kõn an kar kajoor eo an Anij jipañe. (Jrb. 6:3-7, UBS) Ilo iien eo ke rej ekajete, ejja kajoor eo wõt an Anij ear jipañe ikijjeen an kaenõm̦m̦ane im kakeememeje eoon ko. (Jon 14:16) Kõn an kar Stipen peran ilo an kwal̦o̦k m̦ool ñan ri-ekajet ro kõn tõmak eo an ãinwõt an bokin Jerbal jebta 7 kwal̦o̦k kake, kajoor eo an Anij ear kakeememeje kõn 20 ak bõlen elõñl̦o̦k eoon ko ilo jeje ko ilo kajin Hibru. (Jon 14:26, UBS) Bareinwõt tõmak eo an Stipen ear l̦apl̦o̦k an kajoor ke ear reilo̦k im loe Jesus ilo juon pijen ej jutak ianbwijmaroñin Anij.​—Jrb. 7:54-56, 59, 60, UBS.

Juon iien jemaroñ bar iioon jum̦ae im matõrtõr. (Jon 15:20) Ak ilo ad niknik riiti Naanin Anij im kijejeto ilo jerbalin kwal̦o̦k naan, jej kõtl̦o̦k bwe kajoor eo an Anij en pãd ippãd. Im jenaaj maroñ kijenmej wõt ium̦win mãlejjoñ ko jemaroñ iiooni im aenõm̦m̦an wõt.​—1 Pi. 4:12-14, UBS.