Etan Anij?

Ñe kokõn̦aan jel̦ã kajjien juon armej, men eo m̦oktata kwõj kajjitõk ej, “Etam̦?” El̦aññe kwõn kar kajjitõk ippãn Anij kajjitõk in, en kar ba ta?

“Ña Jeova, eñin Eta.”​—Aiseia 42:8.

Ekããl ke am̦ roñ ãt in? Joñan in emaroñ kããl am̦ roñ kõnke ro rar ukote Baibõl̦ eo, elõñ iaaer ejeja aer kar likũt etan Anij, im jet rar jab likũt etan Anij ilo ukok ko aer. Ekkã an rein jol̦o̦k etan Anij im likũt taitõl̦ in “IROOJ.” Ak ilo kajin eo jinointata me kar je Baibõl̦, elõñl̦o̦k jãn 7,000 alen in an wal̦o̦k etan Anij ie. Ewõr emãn lõta ko ilo kajin Hibru kõn jipeel̦in ãt eo etan, ãinwõt YHWH ak JHVH. Im jãn iien ko etto, kar ukote ñan “Jehovah” ilo kajin Pãlle.

Elõñ alen an wal̦o̦k ãt eo etan Anij ilo Jeje ko ilo kajin Hibru im elõñ ukokin Baibõl̦ ko jet

UNIN AN AORÕK ETAN ANIJ

Eaorõk ippãn Anij ãt eo etan. Ejjel̦o̦k en̦ ear lel̦o̦k etan Anij, ak e eo ear make kããlõte. Jeova ear ba: “Eñin ãt eo eta ñan indeeo; eñin ãt eo ro ilo epepen ko tokãlik renaaj keememej eõ kake.” (Exodus 3:15, UBS) Ilo Baibõl̦, elõñl̦o̦k alen an wal̦o̦k ãt eo etan Anij jãn taitõl̦ ko an, ãinwõt Irooj Bõtata, Jema, Irooj, ak Anij, im bareinwõt jãn ãt ko jet ilo Baibõl̦ ãinwõt Ebream, Moses, Devid, ak Jesus. Alikkar, Jeova ekõn̦aan bwe armej ro ren jel̦ã etan. Baibõl̦ ej ba: “Bwe ren jel̦ã bwe Kwe wõt, im etam̦ Jeova, Kwe eo eutiejtata ioon aolepen lal̦ in.”​—Sam 83:18.

Eaorõk ãt eo etan Anij ippãn Jesus. Ilo jar eo an Jesus me elõñ rej n̦aetan Jar eo an Irooj, Jesus ear katakin ri-kal̦oor ro bwe ren jar ñan Anij im ba: “En kwõjarjar etam̦.” (Matu 6:9) Jesus make ear jar ñan Anij im ba: “Jema, kwõn kaiboojoj etam̦.” (Jon 12:28) Men eo ear aorõktata ilo mour eo an Jesus ej ñan kaiboojoje etan Anij, eñin unin ear maroñ jar im ba: “Iar kwal̦o̦k Etam̦ ñan er, im Inaaj kwal̦o̦ke.”​—Jon 17:26.

Eaorõk ãt eo etan Anij ippãn ro rejel̦ã kajjien. Armej ro an Anij ilo iien ko etto rar jel̦ã bwe ñan aer bõk lo̦mo̦o̦r im kõjparok, men in ej ekkejell̦o̦k ñan ãt eo etan Anij me ejejuwaan. “Etan Jeova [ej] juon em̦ utiej im pen; ri-wãnõk ej ko ñane innem ejjel̦o̦k an uwõta.” (Jabõn Kõnnaan 18:10) “Innem aolep ro rej kũr ñan etan Jeova, naaj lo̦mo̦o̦ren er.” (Joel 2:32) Baibõl̦ ej kwal̦o̦k bwe ãt eo etan Anij enaaj kar kaalikkar wõn ri-karejar ro an. “Meñe aolep armej rej etal, jabdewõt iaaer, ilo etan anij ro aer; kõj, jenaaj etal ilo etan Jeova, Anij eo ad, ñan indeeo im indeeo.”​—Maika 4:5; Jerbal 15:14.

TA EO ÃT EO ETAN EJ KAALIKKARE

Ãt eo etan ej kwal̦o̦k kõn Anij. Elõñ ri-mãlõtlõt ro rej ba bwe ãt in Jeova ej mel̦el̦ein, “Ej Kõm̦m̦an bwe En Erom.” Jeova ear kwal̦o̦k kõn mel̦el̦ein etan ke ear ba naan kein ñan Moses: “Ña Eo, Ña E.” (Exodus 3:14) Ilo ukok eo jinoin ilo kajin Hibru ñan eoon in ej ba, “Inaaj Erom Jabdewõt Men Ij Aikuj Erom.” Ãt eo etan Anij ejjab baj kwal̦o̦k wõt bwe ej ri-Kõm̦anm̦an eo, im bwe ear kõm̦anm̦an men otemjej bwe ren pãd im wal̦o̦k. Ak etan ej bareinwõt kwal̦o̦k bwe ewõr an maroñ ñan kõm̦m̦an bwe E make im menin kõm̦anm̦an ko an ren erom jabdewõt men ej aikuji ñan kajejjet karõk ko an. Meñe taitõl̦ ko ippãn Anij remaroñ kaalikkar kõn kajoor im maroñ ko ippãn, bõtab, ãt in etan make, Jeova, ej jutak kõn aolep mel̦el̦e ko kõn e im men otemjej emaroñ erom ñan kajejjet ankilaan.

Ãt eo etan ej kaalikkar an itoklimo kõn kõj. Mel̦el̦ein etan Anij ej kwal̦o̦k bwe ej wõnm̦aanl̦o̦k wõt im kaorõk menin kõm̦anm̦an ko an, ekitibuj bar kõj. An Anij kwal̦o̦k kõn etan ej kaalikkar an kõn̦aan bwe jen jel̦ã kõn e. Ilo m̦ool e eo m̦oktata ear kwal̦o̦k etan ñan kõj. Jej kile bwe Anij ekõn̦aan bwe jen watõke ãinwõt juon Eo me jemaroñ epaake, im jab ãinwõt juon anij me ettol̦o̦k jãn kõj.​—Sam 73:28.

Ad kõjerbale etan Anij ej kaalikkar ad itoklimo kake e. Ñan waanjoñak, ejjel̦o̦k pere kwõnaaj kõn̦aan bwe juon eo kwõj m̦õttãiki en kũr eok kõn etam̦. Innem en kar ewi wãween am̦ eñjake el̦aññe armej eo em̦akoko in kõjerbale etam̦? Jidik kõn jidik kwõmaroñ jino bõk l̦õmn̦ak eo bwe bõlen armej in ejjab kõn̦aan epaake eok. Ejjel̦o̦k oktak ippãn Jeova. Ear kwal̦o̦k etan ñan kõj im ekõn̦aan bwe jen kõjerbale etan. Im ñe jej kõm̦m̦ane men in, jej kaalikkar ñan Jeova bwe jekõn̦aan epaake e. Joñan, ej kile im loe ro rej “l̦õmn̦ak kõn Etan,” ak kaorõke ãt eo etan.​—Malakai 3:16.

Bwe kwõn jel̦ã kajjien Anij, men eo m̦oktata kwõj aikuj jel̦ã kõn e ej etan. Ak ejjab bõjrak wõt ijin. Jej aikuj katak im jel̦ã kõn kain Anij rot e.