Etke Tract ko Elap air Aorõk
1 Ilo January 1, 1991, magazine in The Watchtower ilo kajin English, peij 30, ear walok juõn experience kar naetan “Ear Lo juõn Tract Iumin Ial in Train eo.” Kar ikijen juõn supervisor eo ej kejbãrok ial in train, eo ear lo juõn ian tract ko ad ej eddeb iumin juõn iron ilo ial in train eo. Ear mõkaj an readi tract eo inem ba ñan leo belen kõrã eo nejin: “Rainin iar lo mol eo!” Lõmarein ruo rar order jet book ko im katak kaki. Kiõ, elõñlok jen jibuki ian ro bwijiir rej kijejeto ilo mol eo. Men in ej kwalok kin ta eo emaroñ walok jen air read juõn wõt tract.
2 Kortokjen Ien ko Remõn: Ekeie an Ri Kennan ro an Jehovah ijoko otemjej kajerbal tract ko. Juõn jodikdik ear lo bwe ri kaki in school eo an ear buromõj kin mij an juõn uan family eo an. Ear je juõn letter in kainemõn ñan ri kaki eo an im kobaik tract eo Ta Kejatrikrik eo Kin Ro Rejitenburu Rej Mij? Ri kaki eo ear kamolol jiroñ eo im kiõ ej keini an bõk magazine ko jen e.
3 Ej emõn joñan kilep in tract ko im ebidodo ad bõki ibbed ñan jabdewõt jikin jej etal ie. Ñe jej baj bwebwenato ibben ro jet, ruwamaejet ro ak ro mõttad bareinwõt, jej aikwij kate kij ñan kwalok juõn nan ekadu me emaroñ tellok ñan ad bwebwenato kin juõn ian tract ko ewõr ibbed. Jemaroñ kõmman men in ñe jej konono ibben ro ri turid, ñe jej kaikujkuj ak kõttar juõn appointment, ñe jej lolok ro nukid, ak ilo jabdewõt ien ko jet.
4 Etke Ekeie: Tract ko remejaja kin an lõñ unokair. Rekadu. Ro ilo mweko im ro jej iion ir ilo jabdewõt ien emõntok rejjab iabuñ kake, im eñjake bwe rej aikwij jolok elap ien ñan readi. Ak, ennan eo elap an kaitoktoklimo im katakin. Armij eo ej readi ej bõk juõn melele ejimwe ekkar ñan Bible kin katak eo me tract eo ej konono kake. Elikin an bõk tract eo Mour ilo Ainemmõn ilo Juõn Lõl Ekãl im rar etale ibben, juõn likao ear ba: “I jañin roñ kamelele rot in ekõketak kin wãwen eo ilo lal in!”
5 Jekõnan kajerbal tract kein ilo jabdewõt ien rekkar. Elõñ ri kwalok ro rar lo bwe elap air jibañ ñan ijjino bwebwenato ñe jej kwalok nan jen em-ñan-em. Elõñ Bible study rej kõmmani kiõ rar jino kin juõn tract. Aet, tract ko redik ak rej kein jerbal ko raorõk ilo jerbal in kwalok nan eo ad.