Nebar Jeova ilo Am Uak ilo Ien Kwelok ko
1. Ta eo ebellok ñõn kij ilo ien kwelok ko ar, im en kar ewi wãwen ar lemnok kake?
1 Ebellok ien bwe jen kwalok ar tõmak im rejañ ro jet kin uak ko ar ilo kwelok ko. (Ken. 20:15; Hib. 10:23, 24) Jen kar watõk ar uak einwõt juõn jerammõn im kate bwe jen keini ar uak. Ewi wãwen eo emõntata ñõn ar kõmõne men in?
2. (a) Ewi wãwen ar kõmõn uak ko remõntata? (b) Kain uak rot ko jen jab kõmõne?
2 Uak ko remõntata rekaru, rebiruru ar melele, im rej wawa ion buk eo jej katak jene. Eo ej uak moktata en kajejit uak in kajitõk eo, im kõtlok bwe ro jet ren kwalok melele ko jet. Uak ko raetok im relã jen joñõn rej bõk ien im bõpraik an ro jet uak. Jen am riit wõt ejja nan kin nan ilo buk eo, kwon uak kin nan ko am mõke. Uak ko jet remaroñ kakobaik melele ko jen eon ko im kar jab kwalok kobbair. Lukkun roñjake ñe ro jet rej uak bwe kwon jab eliji ejja nan ko wõt.
3. (a) Ewi wãwen an jet lemnok kin uak ko an ro redrik im bareinwõt ro re jaminene? (b) Ewi wãwen an Jeova im Jisõs lemnok kin men in?
3 Jet remaroñ lemnok bwe ilo an ajiri ro konono ñe ridto ro rej ber, ejjab juõn menin koutiej. Bar ridto ro remaroñ lemnok bwe emõnlok air kõtar an ro re ridtolok ak reminenelok jen ir uak mokta. Ak ear jab wãwen drein an Jisõs lemnok. Ke jet rar kwalok air illu kin an ajiri ro redrik lamij im nebar Messaia eo, Jisõs ear ba: “Kom ar jab konono ilo buk ke, Kw’ar kowãppen nebar jen loñin niñniñ ro im ro rej ninnin?” (Mat. 21:15, 16) Uak ko rej walok jen buruen ajiri ro im ro rekãl ilo mol eo rej kakajurlok ro reridto, elaptata elañe rej uak ilo nan ko air mõke. Emol, bwe uak rot kein rej menin nebar ñõn Jeova.
4. Emõnin kwelok ko ar rej wawa ion ta?
4 Jen lukkun mol ilo ar kapojõk bwe jen bõk kwonad im uak ilo ien ko rebellok ñõn dri kwelok ro. Kememej bwe emõnin kwelok kein rej wawa ion mõnõnõ eo ar im uak ko rebolemeir.—Sam. 26:12.