Ewi Wãwen Jemaroñ Kõmman Ri Kalor Ro Ilo Ad Kajerbal Knowledge Book Eo
1 Juõn mejenkajjik emõn ñan Christian ro otemjej ej ñan katakin mol eo ñan ro jet im kõmman ri kalor ro kin “jabrewõt ar likit ir bwe ren mour in drio.” (Jerbal 13:48; Mat. 28:19, 20) Dolul eo an Jehovah ear likit ilo peid juõn kein jerbal emõnmõn ñan kõtõbrak men in—book eo Knowledge That Leads to Everlasting Life (Jelãlokjen Eo Ej Tellok Ñan Mour Indio). Unin tel eo an ej kalikar aorõkin kõmman Bible study ko, bwe mour indio ej wawa ion air bõk jelãlokjen eo kin Jehovah, Anij eo emol, im kin Nejin, Jesus Christ.—Jon 17:3.
2 Book eo Knowledge ej kiõ book eo elaptata Society ej kajerbale ilo kõmman Bible study ko. Ilo kajerbale, jenaj maroñ katakin mol eo ilo juõn wãwen elamwan, alikar, im ilo kadu. Men in enaj jibañ kij ñan tõbar buruen ro jej katakin ir. (Luk 24:32) Emol, ewõr aikwij eo bwe armij eo ej tel en kajerbal kõl ko remõn ñan katakin. Ñan kõtõbrak karõk in, kar keboje insert (peij eo iloa) in ñan letok nan in rejañ im kakememej ko kin kõl ko kilen katakin rebolemen. Ilo kajerbal lolokjen, im ekkar ñan wãwen ko ibben armij eo, kwonaj maroñ jerbale jidik kin jidik jet elañe jab aolep nan in rejañ ko ilo katak in. Kejbãrok insert in, im en emakijkij am eliji. Point ko relõñ iloan remaroñ jibañ yuk ñan an bolemen lok am kajerbal book in Knowledge ñan kõmman ri kalor ro.
3 Kõmman juõn Bible Study ej Wõnmanlok: Kwalok itoklimo eo emol im mãnãn ilo ri katak eo einwõt juõn eo emaroñ erom juõn Christian ri kalor im juõn jein ak jatin maan ak kõrã ilo jitõb. Kwon kwalok juõn jitõb in jimjera emãnãn im kijejeto. Ilo am juõn ri roñjake emõn, enaj emõnlok am jelã kajjen armij eo juõn—bwebwenato in mour eo an mokta im wãwen ko ilo mour eo an kiõ—me enaj jibañ yuk ñan jelã ewi wãwen eo emõntata ñan jibañ e ilo jitõb. Kwon mõnõnõ in lelok yuk make ñan tokjen eo an ri katak eo.—1 Tes. 2:8.
4 Ñe kwoj jino juõn Bible study, enaj emõnlok elañe kwoj katak katak ko ilo book eo Knowledge ekkar ñan lajrak in katak ko kar likiti. Men in enaj kõtlok bwe ri katak eo en bõk melele ko jidik kin jidik kin mol eo, einwõt ke book eo ej ejaak katak ko ilo Bible ekkar ñan juõn lajrak ekwon. Kõmman bwe katak eo en lamwan im kaitoktoklimo bwe en mõkaj an wõnmanlok. (Rom 12:11) Ekkar ñan wãwen ko im maroñ ko an ri katak eo, kwo maroñ kadedelok elõñ katak ko kajjojo ilo juõn ien katak me ej juõn awa aetokin, ilo am jab ekaiuriur kake. Enaj emõnlok an ri katak eo wõnmanlok ñe ri katakin im ri katak eo jimor rej kejbãrok karõk in katak eo air kajjojo week. Ilo wãwen in, ñan elõñ armij, remaroñ kadedelok katak ko 19 ilo book eo ilo jiljino alliñ ko.
5 Jino ien katak ko kajjojo kin nan ko rekadu me rej kaitoklimoen armij eo ilo katak eo. Kwonaj lo bwe title eo an kajjojo katak ej unin tel eo an, eo kwoj aikwij kalikare. Kajjojo unin tel ko redik ej kajenolok juõn point elap, im ej jibañ yuk ñan kalimjeklok unin tel in katak eo. Lale bwe en jab lap am kamelele. Jen men in, kajeoñ in bõk lemnak ko an ri katak eo. Kajitõkin ri katak eo kin kajitõk ko rej tel, ko rej bedbed ion men ko ededelok an jelã kaki, naj jibañ e ñan kõmmanwa im bõk jemlok ko rejimwe. (Mat. 17:24-26; Luk 10:25-37; lale School Guidebook, peij 51, paragraph 10.) Eddeb wõt ñan kamelele ko rej bed ilo Knowledge book eo. Kwalok tibdikdik in kamelele ko jet remaroñ bõk jen ak kõmman bwe point ko relap ren jab alikar im naj kaetoklok katak eo. (Jon 16:12) Elañe ri katak eo ej bõkmantak juõn kajitõk me eoktak jen men eo komij katak kake, ilo enañin aolep case ko kwo maroñ uake ilo jemlokin ien katak eo. Men in enaj kõtlok bwe komin etale aolepen katak eo ilo am jab mad ibben men ko jet. Kameleleik ri katak eo bwe ejjabto enañin aolep kajitõk ko an make naj uaki ñe katak eo ej wõnmanlok wõt.—Lale School Guidebook, peij 94, paragraph 14.
6 Elañe ri katak eo ej bin an tõmak ilo Trinity (jilu anij ilo juõn), bwe aan armij ejjab mij, hades, ak katak ko jet rewan, im men eo ear katak kake ilo Knowledge book eo ejjab kajuburuen, kwo maroñ lelok ñan e book in Kõmmanwa eo ak book ko jet me rej konono kake katak eo. Jiroñ e bwe kwonaj bwebwenato ibben kin katak eo elikin ej lemnak kin ta eo ej readi.
7 Jino im kajemlok katak eo kin jar ñan kajitõk kin tel im kajerammõn jen Jehovah ej kautiej ien katak eo, kõmman bwe en jimwe lemnak eo an armij eo, im kareilok armij ñan Jehovah einwõt Ri Kaki eo emol. (Jon 6:45) Elañe ri katak eo ej kõbatat wõt, kwo maroñ aikwij kajitõk ibben bwe en jab kõmmane ilo ien katak eo.—Jerbal 24:16; Jem. 4:3.
8 Katakin ilo Bolemen ilo Kajerbal Eon ko, Pija ko, im Kajitõk in Elij ko: Jekdon jete alen ri katakin eo ear katak kin katak eo mokta, juõn ri katakin ekabel enaj elij kajjojo katak ilo an lemnak kin ri katak eo. Men in enaj jibañ e bwe en bojak ñan uak jet ian kajitõk ko an ri katak eo. Bwe en bolemen am katakin, melele ilo alikar point ko relap ilo katak eo. Lale aolep eon ko ñan lo ewi wãwen rej jerbal ñan katak eo, im bebe ta eon ko kwoj aikwij readi ilo ien katak eo. Lemnak kin ewi wãwen kwo maroñ katakin ilo am kajerbal pija ko im kajitõk in elij ko ilo jemlokin katak eo.
9 Ilo am kajerbal ilo bolemen eon ko, kwonaj jibañ ri katak eo ñan kile bwe ej lukkun katak kin Bible eo. (Jerbal 17:11) Ilo kajerbal box eo “Put Your Bible to Good Use (Kortokjen Bible eo Am),” ilo peij 14 in book in Knowledge, katakin e kilen bukõte eon ko. Katakin e kin ewi wãwen emaroñ kile eon ko rar eliji nan kin nan ilo katak eo. Ñe ewõr ien, bukõt im read eon ko kar kwaloki me rar jab eliji nan kin nan. Kõtlok bwe ri katak eo en kwalok kin ewi wãwen eon ko rej jurak ak kalikar ta eo ej ba ilo paragraph eo. Kalikar mõttan ko rejejjet ilo eon eo bwe en kile un ko unin point ko relap ilo katak eo. (Nih. 8:8) Ekkã, an ejelok unin ñan an ri katakin eo kobaik eon ko jet ilo bwebwenato eo ijellokin ko rej walok ilo book eo. Kwalok kin aorõkin air jelã ãt ko etan im lajrak in book ko ilo Bible. Emaroñ juõn men in jibañ ñan ri katak eo bwe en read peij 27-30 ilo June 15, 1991, Watchtower ilo kajin belle. Ñe ekkar, rejañ e ñan kajerbal New World Translation eo. Jidik kin jidik kwo maroñ kwalok kin ewi wãwen emaroñ kajerbal mõttan ko relap iloan, einwõt marginal reference ko (eon in jibañ ko) im index in nan ko ilo Bible.
10 Katak 34 ilo Theocratic Ministry School Guidebook eo ej kamelele bwe wanjoñok ko rej kamakit lemnak im kõmman bwe en bidodolok ñan bõk lemnak ko rekãl. Rej kobaik emejaja in lemnak im kajur in eñjake, bwe ennan eo ren kwaloke ilo juõn wãwen ekajur me ekkã an jab maroñ walok ñe kwoj baj ba wõt juõn men. (Mat. 13:34) Knowledge book eo ewõr elõñ wanjoñok in katakin ko me relamwan ak rekajur. Ñan wanjoñok, juõn wanjoñok rej kajerbale ilo katak 17 ej kaddeklok kamolol eo kin ewi wãwen, ilo jitõb, Jehovah ej letok mõñã, nuknuk, im jikin kejbãrok ikijen congregation in Christian eo. Jemaroñ kajerbal pija ko raibujuij ilo Knowledge book eo ñan kamakit eñjake. Iumin unin tel eo edik “The Joyous Resurrection (Jerkakbiji eo Ekalañliñ),” ilo peij 185, tokjen eo ekajur ilo paragraph 18 enaj laplok elañe ri katak eo ej lale pija eo ilo peij 86. Men in emaroñ kamakit e ñan lemnak kin jerkakbiji einwõt juõn men emol iumin Ailiñ eo an Anij.
11 Ri katak kin Bible ro rej aikwij kõmman wõnmanlok ilo jitõb elikin kajjojo katak. Kin unin in, jab likjap in kajitõk kajitõk in elij ko ilo box eo “Test Your Knowledge (Melejoñe Jelãlokjen eo Am)” me ej walok ilo tu-jemlokin kajjojo katak. Eoroñ ennan jab kin kamelele ko wõt ilo katak eo. Jet ian kajitõk kein kar karõki bwe ren kalikar ta eo ilo buruen armij eo. Ñan wanjoñok, lale peij 31, ijo ej kajitõkin ri katak eo: “Ta kadkad ko kadkadin Jehovah Anij elap air kareel yuk?”—2 Kor. 13:5.
12 Kamineneik Ri Katak eo ñan Kebojak kin Katak eo: Juõn ri katak eo ej konono katak eo lok iman, kakõlleik uak ko, im lemnak kin ewi wãwen emaroñ kwaloki ilo nan ko an make naj mõkajlok an kõmman wõnmanlok ko ilo jitõb. Ikijen wanjoñok im nan in rejañ eo am, kwo maroñ kamineneik e ñan kebojak ñan katak eo. Kwalok book eo am ñan e, eo emwij am kar kakõlleik nan ko raorõk. Kameleleik e kin ewi wãwen emaroñ lo uak ko ñan kajitõk ko kar jeje kaki. Keboje juõn katak ibben don emaroñ juõn men in jibañ ñan ri katak eo. Rejañ e bwe en uak ilo nan ko an make. Ilo wãwen in enaj alikar elañe ej melele kake katak eo. Elañe ej konono kin uak eo an jen book eo, kwo maroñ kamakit lemnak eo an ilo am kajitõk ibben kin ewi wãwen emaroñ kameleleik point in ñan bar juõn armij ilo nan ko an make.
13 Rejañ ri katak eo ñan lale eon ko einwõt mõttan kebojak eo an ilo kajjojo week, kinke emaroñ jabwe ien ñan konono aolepeir ilo ien katak eo. Nebar e kin jibadbad ko ej kõmmane ilo an keboje katak ko an. (2 Pit. 1:5; lale Imõniaroñroñ, February 1, 1994, peij 22-23 [August 15, 1993, Watchtower ilo kajin belle, peij 13-14], kin nan in rejañ ko jet kin ta eo ri katakin im ri katak ro jimor remaroñ kõmmani ñan kalaplok maroñ in katak ilo juõn ien katak Bible.) Ilo wãwen in, kwoj kamineneik ri katak eo ñan kebojak im ñan an bõk kunan ilo an uak ilo emõn im melak ilo kwelok ko an congregation eo. Enaj kaddek manit ko remõn ñan katak ibben make me enaj kamaroñ e ñan kõmman wõt wõnmanlok ko ilo mol eo elikin katak kin Bible eo an ilo Knowledge book eo ej ededelok.—1 Tim. 4:15; 1 Pit. 2:2.
14 Kareilok Ri Katak ro ñan Dolul eo an Jehovah: Ej eddo eo an ri kõmman ri kalor ro ñan jitõñlok ri katak eo ñan dolul eo an Jehovah. Ri katak eo enaj mõkaj an wõnmanlok im rittolok ilo jitõb elañe ej kile im kamolol kin dolul eo im ej kile aikwij eo ñan an erom mõttan dolul eo. Jekõnan bwe en lo mõnõnõ in koba ibben armij ro an Anij im ñan reimanlok ñan bed ibbed ilo Kingdom Hall eo, ijo emaroñ bõk jurak ilo jitõb im eñjake me congregation in Christian ej letoke.—1 Tim. 3:15.
15 Brochure eo Jehovah’s Witnesses—Unitedly Doing God’s Will Worldwide kar kõmmane ñan jibañ kajjojo armij ñan jelã kajjen dolul eo wõt eo jemaroñ loe me Jehovah ej kajerbale rainin ñan kõtõbrak ankil an. Ñe kwoj jino juõn Bible study, etke kwojjab lelok juõn copy ñan ri katak eo? Jen jinoin, kirtok wõt ri katak eo ñan kwelok ko. Kameleleik e kin ewi wãwen rej kõmmane. Kwo maroñ jiroñ e kin unin tel in public talk eo ak kwalok katak eo jenaj etale ilo Watchtower Study eo. Bõlen kwo maroñ bõklok e bwe en lo Kingdom Hall eo ñe ejelok juõn kwelok bwe en jolok jabdewõt inebata emaroñ wõr ibben ñe ej kab juõn alen ej etal ñan juõn jikin ekãl. Kwo maroñ ba bwe kwoj mõnõnõ in ektake e ñan kwelok ko. Ñe ej kwelok, kõmman bwe en eñjake an ruwainene. (Mat. 7:12) Kwalok e ñan Ri Kennan ro jet, ekoba elder ro. Jej kejatdikdik, enaj jino watõk congregation eo einwõt family eo an ilo jitõb. (Mat. 12:49, 50; Mark 10:29, 30) Kwo maroñ likit juõn an mejenkajjik, einwõt bed ilo juõn kwelok ilo kajjojo week, im jidik kin jidik kalaplok mejenkajjik eo.—Hib. 10:24, 25.
16 Ke katak kin Bible eo ej wõnmanlok ilo Knowledge book eo, kalikar mõttan ko me rej kwalok kin aikwij eo ñan keini an koba ibben congregation eo ilo kwelok ko. Lale elaptata peij 52, 115, 137-9, 159, im bareinwõt katak 17. Kwalok eñjake ko am remũlal kin dolul eo an Jehovah. (Mat. 24:45-47) Konono men ko remõn kin congregation eo ilo bukwon eo im kin ta eo kwar katak ilo kwelok ko. (Sam 84:10; 133:1-3) Enaj emõn elañe ri katak eo emaroñ aluij kajjojo video ko an Society, jino kin Jehovah’s Witnesses—The Organization Behind the Name. Kin lemnak ko jet kin ewi wãwen kwo maroñ jitõñlok armij ñan dolul eo, lale Dijemba 1984, Imõniaroñroñ, peij 10-16 (November 1, 1984, Watchtower ilo kajin belle, peij 14-18), im April 1993 Ad Jerbal Ñõn Ailiñ eo peij eo iloa.
17 Rejañ Ri Katak ro ñan Kwalok Nan ñan Ro Jet: Mejenkajjik eo ad ñan katak ibben armij ej ñan kõmman ri kalor ro me rej kwalok kin Jehovah. (Ais. 43:10-12) Ej melelen men in bwe ri katakin eo en rejañ ri katak eo ñan konono ibben ro jet kin ta eo ej katak kake jen Bible eo. Kwo maroñ kõmman men in ilo am baj kajitõk: “Ewi wãwen kwonaj kamelele kin mol in ñan family eo am?” ak “Ta eon eo kwonaj kajerbale ñan kamol men in ñan juõn mõttam?” Kalikar jikin ko ilo Knowledge book eo ijo rej rejañ kin kwalok nan, einwõt ilo peij 22, 93-5, 105-6, im bareinwõt katak 18. Ñe ekkar, kwo maroñ lelok jet tract ko ñan ri katak eo ñan kajerbali ñe ej kwalok nan ibben ro jet ilo jabdewõt ien emõn tok. Rejañ e bwe en kir ro uan family eo an ñan jijet ibben ñe ej katak Bible. Ewõr ke ro mõttan me rekõnan katak? Kajitõk ibben ñan jitõñlok yuk ñan ro rej itoklimo.
18 Ilo an bed ilo Theocratic Ministry School im Service Meeting eo, armij eo me ekõnan erom juõn ri kalor emaroñ bõk kaminene im rejañ ko jet me remaroñ jibañ e ñan erom juõn ri kwalok kin news eo emõn. Ñe ej kwalok an kõnan kadeloñ etan ilo school eo ak erom juõn ri kwalok ejañin baptais, kakabilek ko ilo peij 98 im 99 ilo Our Ministry book eo naj jerbal. Elañe ewõr juõn men ilo mour eo an me ej bõprae e jen an tellokin, kwo maroñ kabuk ilo book ko an Society kin katak ko me rej jerbale men in im kwaloki ñan e. Ñan wanjoñok, emaroñ bin an juõn ri katak anjo ion an añũri tobacco ak uno ko rekajur ko jet. Book in Kõmmanwa eo ej jitõñlok ñan un ko rekajur jen Jeje ko kin etke Christian ro rej ilok jen manit kein rekauwatata, im ilo peij 112 ej kõlajrak juõn wãwen me ear wõr tõbrak ñan jibañ ro jet ñan kanemkwoj ir jen manit kein. Jar ibben kin men in, im katakin e ñan kalek liki eo an ion Jehovah kin jibañ.—Jem. 4:8.
19 Kõl eo ñan lore ñan jelã elañe juõn ej tellokin bõk kunan ilo jerbal in kwalok nan rej kõlajrake ilo July 1, 1996, Imõniaroñroñ, peij 10, paragraph 6. (January 15, 1996, Watchtower ilo kajin belle, peij 16, paragraph 6). Ñe ri katak eo ej tellokin, enaj juõn men in jibañ ñan kõmman juõn ien kamelmel ibben ñan keboj e ñan ran eo kein kajuõn ilo an kwalok nan. Ilo juõn wãwen emõn, bwebwenato ibben kin wãwen armij ro renaj emmakit im nan in jumae ko me ekkã an walok ilo territory eo am. Elañe emaroñ en jino ilo jerbal in kwalok nan jen em ñan em mokta, im jidik kin jidik kamineneik e kin jerbal ko jet. Elañe ennan eo am ej lamwan im kadu, enaj bidodo an kajeoñe. Kwon kõketak im rejañ, im kwalok am lañliñ ilo jerbal eo, bwe en kile jitõb in lañliñ eo am im kajeoñe. (Jerbal 18:25) Mejenkajjik eo an juõn ri kalor ekãl ej bwe en erom juõn ri kwalok ekkeini im kijejeto kin news eo emõn. Bõlen kwo maroñ jibañ e ñan kõmman juõn schedule in kwalok nan ekeie. Bwe en wõnmanlok ilo maroñ eo an ñan kwalok nan ñan ro jet, kwo maroñ rejañ e ñan read Imõniaroñroñ in Septemba 1984, peij 24-30 (August 15, 1984, Watchtower ilo kajin belle, peij 15-25); Watchtower ilo kajin belle in July 15, 1988, peij 9-20; Imõniaroñroñ in July 1, 1991, peij 25-30 (January 15, 1991, Watchtower ilo kajin belle, peij 15-20); Imõniaroñroñ in July 1, 1994, peij 16-21 (January 1, 1994, Watchtower ilo kajin belle, peij 20-5).
20 Kamakit Ri Katak ro Ñan Wujleplok im Baptais: Emaroñ bwe jelãlokjen eo juõn ri katak eo emol buruen ej bõke ikijen an katak ilo Knowledge book eo ñan wujleplok an mour ñan Anij im tellokin an baptais. (Keidi Jerbal 8:27-39; 16:25-34.) Bõtab, mokta jen an juõn armij maroñ emmakit ñan wujleplok an mour, ej aikwij kaddek an tiljek ñan Jehovah. (Sam 73:25-28) Ilo ien katak eo an, kabuk ien ko remõn ñan kalek kamolol kin kadkad ko kadkadin Jehovah. Kwalok eñjake ko am remũlal kin Anij. Jibañ ri katak eo ñan lemnak kin an ejaake juõn kõtan emãnãn ibben Jehovah. Elañe elukkun jelã im yokwe Anij, inem enaj karejar ñan E ilo tiljek, bwe tiljek eo ekwojarjar ej ekkejel ibben eñjake eo ad kin Jehovah einwõt juõn armij.—1 Tim. 4:7, 8; lale School Guidebook eo, peij 76, paragraph 11.
21 Kate yuk ñan tõbar buruen ri katak eo. (Sam 119:11; Jerbal 16:14; Rom 10:10) Ej aikwij lo ewi wãwen mol eo ej jelet e make im ñan bebe kin ta eo en kõmmane kin ta eo ear katak kake. (Rom 12:2) Ej lukkun tõmak ke mol eo eo rej kwaloke ñan e kajjojo week? (1 Tes. 2:13) Ñan kõtõbrak men in, kwo maroñ jelã ta eo iburuen ri katak eo ilo am kajitõk ibben kajitõk ko kin lemnak eo an, einwõt: Ewi lemnak eo am kin men in? Ewi wãwen kwo maroñ jerbale men in ilo mour eo am? Ikijen uak ko an kwo maroñ jelã ia eo elaplok an aikwiji jibañ ie ñan tõbar buruen. (Luk 8:15; lale School Guidebook eo, peij 52, paragraph 11.) Nan ko tu-lal in pija ko ilo peij 172 im 174 ilo book in Knowledge ej kajitõk: “Kwo nañin ke ajelok am mour ñan Anij ilo jar?” im “Ta ej kautameik yuk jen am baptais?” Kajitõk kein remaroñ kamakit ri katak eo ñan jerbal.
22 Wãwen eo ñan lore ñe juõn ri kwalok ejañin baptais ekõnan baptais rej kõlajrake ilo magazine in Imõniaroñroñ in July 1, 1996, peij 11, paragraph 9 (Watchtower ilo kajin belle, January 15, 1996, peij 17, paragraph 9). Kar je Knowledge book eo kin mejenkajjik eo ñan kamaroñ armij eo ñan uak “Questions for Those Desiring to Be Baptized (Kajitõk ko ñan Ro Rekõnan Baptais),” jemaroñ loi ilo appendix eo an Our Ministry book eo, ko elder ro renaj eliji ibben. Elañe kwar kalikar uak ko ñan kajitõk kein emwij je ilo Knowledge book eo, ri katak eo enaj bojak ñan ien ko ñe elder ro renaj etale kajitõk kein ibben ilo kebojak ñan an baptais.
23 Jibañ Ro me Ededelok Air Katak Bible eo: Jej aikwij kõtmene bwe ñe juõn armij ededelok an katak Knowledge book eo, mũlal im mol in itoklimo eo an ñan karejar ñan Anij enaj alikar. (Mat. 13:23) Eñin unin unin tel eo edik eliktata ilo book eo ej kajitõk, “What Will You Do (Kwo Naj Et)?” Paragraph ko ilo jemlokin ej owar ñan ri katak eo ñan kalimjeklok kõtan eo en kar kaddeke ibben Anij, aikwij eo ñan jerbale jelãlokjen eo ear katak kake, im aikwij eo ñan emmakit ilo mõkaj ñan kwalok yokwe eo an ñan Jehovah. Ejelok lajrak in katak book ko jet ibben ro ededelok air katak Knowledge book eo. Ilo joij im alikar kamelele ñan ri katak eo ej likjap in emmakit ñan jelãlokjen eo an Anij kin ta eo ej aikwij kõmmane ñan kõmman wõnmanlok ko ilo jitõb. Kwo maroñ lolok e jen ien ñan ien, im kõmman bwe en bellok wõt ial eo bwe en bõk buñten ne ko me renaj tellok ñan mour indio.—Ekk. 12:13.
24 Juõn ri kalor ekãl eo ej bõk mol eo im baptais ej aikwij eddeklok wõt ilo jelãlokjen im melele eo an bwe en bin ilo tõmak. (Kol. 2:6, 7) Jen am wõnmanlok im katak Bible ibben elikin ededelok an katak Knowledge book eo, kwo maroñ bojak ñan lelok jibañ eo ej aikwiji ñan an rittolok ilo jitõb. (Gal. 6:10; Hib. 6:1) Ijo kunan, emaroñ kõmman bwe en eyu melele eo an ilo an read Bible ran otemjej, make katak Imõniaroñroñ eo im book ko jet an ‘dri korijer’ eo, kebojak ñan im bed ilo aolep kwelok ko, im bwebwenato kin mol eo ibben ri tõmak ro jet. (Mat. 24:45-47; Sam 1:2; Jerbal 2:41, 42; Kol. 1:9, 10) An read i Our Ministry book eo im jerbale ta ej read i enaj jibañ e bwe en kwon ilo theocratic ñan kajejjet jerbal eo an.—2 Tim. 2:2; 4:5.
25 Kaddek Kabel in Katakin: Kar kakien kij ñan “kõmõn dri ailiñ ko otemjej bwe ren dri kalor [ro] . . . , katakin ir.” (Mat. 28:19, 20) Kinke kabel in katakin ej ekkejel ibben kõmman ri kalor ro, jekõnan kakõmõnmõnlok maroñ eo ad einwõt ri katakin ro. (1 Tim. 4:16; 2 Tim. 4:2) Kin nan in rejañ ko jet kin ewi wãwen jemaroñ kaddek kabel in katakin, kwo maroñ kõnan read: “Developing the Art of Teaching (Kaddek Kabel in Katakin)” im “Reaching the Heart of Your Listeners (Tõbar Buruen Ro Rej Roñjake)” ilo School Guidebook eo, katak 10 im 15; “Teacher, Teaching (Ri Katakin, Katakin)” ilo Insight book eo, Volume 2; im katak ko ilo Imõniaroñroñ “Ekkal kin Wijkinen ko Roke Ñõn Kijeek” im “Ñe Kwoj Katakin, Tobar Buruon,” an September 1984 (August 1, 1984, Watchtower ilo kajin belle); “Do You Effectively Reason From the Scriptures?,” March 1, 1986, Watchtower ilo kajin belle; im “How to Find Joy in Disciple Making,” February 15, 1996, Watchtower ilo kajin belle.
26 Ñe kwoj kate yuk ñan kõmman ri kalor ro, ilo kajerbal book in Knowledge, ien otemjej jar ñan Jehovah, eo “Ej kadreklok,” bwe en kajerammõn jibadbad ko am in tõbar buruen armij kin news eo emõn kin Ailiñ eo. (1 Kor. 3:5-7) Kimij kejatdikdik bwe kwonaj lo lañliñ in katakin ro jet ñan melele, kamolol, im ñan emmakit kin jelãlokjen eo ej tellok ñan mour indio!