Lolorjake Mweiuk ko an Master eo

¹ Ilo ien ko ilo Bible juõn ri karejar kar bed ilo juõn jerbal ewor elap liki ie. Abraham ear lelok ñõn ri karejaran jerbal eo ñõn kabuk juõn belen leo nejin, Isaac. (Jen. 24:1-4) Ilo juõn wãwen, ri karejar eo ear bõk eddo eo ñõn kõmmõn bwe line eo an Abraham en wõnmanlok wõt. Ear juõn eddo elap! Ejelok bwilõñ bwe ri jilek Paul ear ba: “A ijin rej kajitõkin dri kõmñe, bwe ren lo an armij tiljek”!​—1 Kor. 4:2.

Christian Ri Karejaran

² Jet wãwen ko kin jerbal in Christian rej kalikari ilo Bible eo einwõt stewardship (jerbal an juõn ri karejar). Ñõn wanjoñok, ri jilek Paul ear konono ibben ri Ephesus ro kin “jerbal in joij an Anij eo emwij letok ñõn iõ kin kom.” (Ep. 3:2; Kol. 1:25) Ear watõk jerbal eo an ñõn bõklok news eo emõn ñõn ri ailiñ ko einwõt juõn stewardship me ear aikwij kajejjete ilo tiljek. (Jerbal 9:15; 22:21) Ri jilek Peter ear jeje ñõn ri kabit ro jein im jatin: “Im komin keni dron im jab lotan. Einwõt jabrewõt iami e ar bõk men in lewoj, en jibõñ dron kake, einwõt dri kõmñe remõn an joij an Anij, elõñ wãwen.” (1 Pet. 4:9, 10; Hib. 13:16) Jabdewõt men me ear wor ibben Christian ro ilo ebeben eo kein kajuõn ikijen mweiuk kar itok ikijen joij eo an Jehovah. Kin men in, rar ri jerbal ro kin men kein im rar aikwij kajerbali ilo juõn wãwen Christian.

³ Rainin, Ri Kennan ro an Jehovah ewor juõn lemnak einlok wõt kin men ko. Rar wujleplok air mour ñõn Jehovah Anij im rej watõk aolep men ko ibbeir​—mour ko air, kajur in enbwiniir, mweiuk ko air​—einwõt leen ko an “joij an Anij, elõñ wãwen.” Einwõt ri karejar ro remõn, rej eñjake air aikwij uak ñõn Jehovah Anij kin wãwen eo rej kajerbal men kein. Bareinwõt, kar lelok ñõn ir jelalokjen eo kin news eo emõn. Men in bareinwõt ej juõn eddo me rekõnan kajerbale ilo wãwen eo emõntata: ñõn kaibujuij etan Jehovah im ñõn jibañ ro jet ñõn bõk jelalokjen kin mol eo.​—Mat. 28:19, 20; 1 Tim. 2:3, 4; 2 Tim. 1:13, 14.

⁴ Ewi wãwen Ri Kennan ro an Jehovah rej kajejjet eddo ko air einwõt ri karejar ro? Report in yiõ eo ej kwalok bwe ilo yiõ eo lok wõt, ibelakin lõl rar kajerbal elõñlok jen juõn billion awa ko ñõn kwalok “news eo emõn kin Ailiñ eo” im rar kõmmõn elõñlok jen 4,500,000 katak kin Bible ko ilo mõko imõn armij ro rej itoklimo. (Mat. 24:14) Tiljek eo air einwõt ri karejar ro an Jehovah ear bareinwõt alikar ilo jabawõt ko air ñõn jerbal eo ibelakin lõl im ñõn jurake Kingdom Hall ko ilo bukwon ko, ikijen air karuaineneik overseer ro rej itoitak im ro jet, im ikijen joij eo air elap ñõn ro rej bed ilo aikwij​—einwõt ro rej jorrãn ilo tarinae ko. Einwõt juõn kumi, Christian ro remol ej emõn air lolorjake mweiuk ko an Master eo.

“Dri Kõmñe eo Etiljek, im Meletlet”

⁵ Ewor stewardship ejjab ilo level an kajjojo armij wõt ak bareinwõt einwõt juõn dolul. Jesus ear naetan congregation in Christian ro emwij kabit ir ion lõl “dri kõmñe eo etiljek im meletlet.” (Luke 12:42) Eddo eo an “dri kõmñe in etiljek” ej ñõn lelok “kijeir” im ñõn tel jerbal in kwalok nan ibelakin lõl kin news eo emõn. (Rev. 12:17) Ekoba ibben men in, class in ri karejar ro retiljek, eo ej jutak ikijen Governing Body eo, ewor juõn eddo letok in Anij ñõn lolorjake ilo ekkar “talent” ko ilo kanniek im jitõb. (Mat. 25:15) Ilo burukuk ibben joñok eo an ‘dri kõmñe eo etiljek,’ corporation ko an kajjojo ra ko rej kõmmõn jibadbad ko ñõn kajerbal aolep jabawõt ko ilo juõn wãwen emõn, ñõn kalaplok tokjen ko an Ailiñ eo. Aolep jabawõt ko armij rej leloki ilo liki, im “dri kõmñe eo etiljek im meletlet” ej bõk eddon ñõn kõmmõn bwe ren kajerbali ilo wãwen eo kar karõki im bwe ren kajerbali ilo meletlet, tiljek, im ñõn tokjen ko remõn.

⁶ Juõn joñok kin wãwen eo emeletlet rej kajerbal jabawõt ko ej alikar ilo eddeklok eo kin jerbal in printing (jeje) book ko an Ri Kennan ro an Jehovah ilo ebeben eo kein ka 20. Jaketo-jaketak kin Bible im bareinwõt literature ko jet​—magazine ko, book ko, brochure ko, booklet ko, tract ko, im Kingdom News ko​—kar kõmmõn juõn jerbal elap ñõn kajededlok “news eo emõn” ilo “ran kein eliktata.” (Mark 13:10 (NW); 2 Tim. 3:1) Im magazine in Imõniaroñroñ kar juõn kein jerbal elap ñõn lelok “kijeir ilo ien ejejit” ñõn ro “nukin Anij” im ro mõttair, “jar eo elap” in “sheep ro jet.”​—Mat. 24:45; Ep. 2:19; Rev. 7:9; John 10:16 (NW).

⁷ Mokta, aolep book ko an Ri Kennan ro an Jehovah business ko jet ko im rej print book ko rar kõmmõni. Ak ilo yiõ ko ilo 1920, rar bebe bwe enaj laplok an keie im dik wõnãn elañe ri karejar ro an Jehovah rar make print book ko air. Jino ilo juõn wãwen edik ilo 1920, jerbal in printing ear eddeklok jidik kin jidik ilo Brooklyn, New York, mae ien ear lukkun lap. Tok ñõn 1967 mõko rej print im kõmmõn book ko ie kar bõk tarrin emen block ko ilo jikin kwelok eo. Printing book ko kar kõmmõne bareinwõt ilo ene ko jet, ak ilo elõñ iair, kar bõjrak ilo Bata eo an Lõl in kein ka 2.

⁸ Meñe jerbal in kõmmõn book ko kar laplok ilo United States, ear jabwe ñõn kabwe book ko ñõn belakin lõl. Kin men in, ilo yiõ ko elikin bata eo, jerbal in printing kar kajutake ak ear dedelok an jerbal ilo ailiñ ko jet, ekoba Canada, Denmark, England, Greece, South Africa, Switzerland, im West Germany. Tok ñõn jinoin yiõ ko ilo 1970, Australia, Brazil, Finland, Ghana, Japan, Nigeria, im Philippines kar kadeloñi ilo lãjrak eo. Jet ian ailiñ kein rar bareinwõt kõmmõn bound book ko. Bareinwõt ilo jinoin yiõ ko ilo 1970, missionary ro rar diojlok jen Gilead kar kamineneik ir kin kabel ko ñõn kõmmõn book im kar jilkinlok ir ñõn jet ian ailiñ kein ñõn jibañ brother ro ilo bukwon eo kin jerbal in printing im kõmmõn book.

⁹ Ilo yiõ ko ilo 1980, oran ailiñ ko ijo rar print magazine ko ie kar tõbar 51.a Kar juõn wãwen emõn ñõn kajerbal mweiuk ko an Master eo! Im ear juõn men in kamol ekajur kin joij eo an million ian kajjojo Ri Kennan ro an Jehovah me rar “kaibujuij Jeova kin mweieir’! (Jabõn Kennan 3:9) Ilo wãwen in, rar kamol ir make einwõt ri karejar ro remõn kin ta eo Jehovah ear kajerammõn ir kake ilo elõñ wãwen ko.

Juõn Oktak ilo Men eo Rar Kalimjeklok

¹⁰ Ilo yiõ ko ilo 1970 im ilo jinoin yiõ ko ilo 1980, wõnmanlok ko relap kar kõmmõni ilo technology in printing, im Ri Kennan ro an Jehovah rar bõk kõl ko rekãl kin printing. Mokta, rar kajerbal letterpress style in printing me ekkã kar kajerbale. Men in ear oktak jidik kin jidik ke rar jino bõk offset printing ko rekãl. Tokjen men in, rar kõmmõn book ko reaibujuij ibben pija ko elõñ unokair, im jab pija ko ruo wõt unokan (kilmej im bar juõn uno) me ear maroñ ion letterpress ko remor. Bareinwõt, computer technology ear ukõt aolepen prepress operation (jerbal in kebojak ñõn jeje). Ri Kennan ro an Jehovah rar kõmmõn juõn Multilanguage Electronic Phototypesetting System (MEPS), juõn computerized system me rej kiõ jurake jerbal in printing ilo elõñlok jen 370 kajin ko reoktak jen don. Ejelok juõn commercial program ej einlok wõt MEPS ilo maroñ eo ñõn jerbal ilo elõñ kajin ko.

¹¹ Kin jibañ jen MEPS computer technology im kajerbal kein jerbal ko jet rekãl einwõt electronic mail, bar juõn wõnmanlok elap kar kõmmõne ñõn kõmmõn mõñã ko lor jitõb ilo ien ejejjet. Mokta, ilo kajerbal technology ko remor, magazine ko rejjab ilo kajin belle kar wor kamelele ko elõñ alliñ ko ak meñe juõn yiõ erumijlok jen an walok ilo kajin English. Kiõ, Imõniaroñroñ ej walok ilo ejja ien eo wõt ilo 115 kajin ko, im Awake! ilo 62. Men in ej melelen bwe ibelakin lõl elõñlok jen 95 percent ian ro rej bed ilo Katak in Imõniaroñroñ an Ri Kennan ro an Jehovah ilo kajjojo week remaroñ etale ejja katak eo ilo ejja ien eo wõt. Ej juõn jerammõn elap! Emol ear juõn wãwen emõn ñõn kajerbal mweiuk eo an Master eo ilo kajerbale ilo technology ekãl!

Aikwij ko Reinjuõn an Dolul eo

¹² System kein rekãl rar ukõt aikwij ko an dolul eo kin jerbal in printing ibelakin lõl an Ri Kennan ro an Jehovah. Web offset press ko remõkaj jen letterpress ko remor, ak elaplok wõnãn bareinwõt. Computer system ko me rej jurake jerbal ko jet, einwõt jeje, ukok, pija, im graphic, meñe elaplok maroñ ko im emõnlok wãwen in jerbal jen system ko remor, rej bareinwõt laplok wõnair. Ejjabto ear alikar bwe ear jab dik wõnãn ñõn print magazine ko ilo kajjojo 51 ailiñ ko. Kin men in, ilo yiõ ko ilo 1990, “dri kõmñe eo etiljek” ear bar etale wãwen ko. Kar ta jemlok eo?

¹³ Ekkatak ko rar kalikar bwe “mweien” Ri Kennan ro an Jehovah im ro mõttair rar jabawõt kaki enaj laplok an wor tokjen elañe rar kakobaik jerbal in printing ko. Inem rar kadiklok oran ra ko rej print. Germany ear bõk eddon kõmmõn magazine ko ilo ene ko ilo Eastern im Western Europe, ekoba jet rar make bõk eddon printing ko air mokta. Italy ej kabwe magazine im book ko ñõn jet mõttan ko ilo Africa im turak turear in Europe, ekoba Greece im Albania. Ilo Africa, magazine ko rej kõmmõni ilo Nigeria im South Africa. Eindein lok kakobaba ko rar kõmmõni ibelakin lõl.

Men ko ñõn Lemnak kaki

¹⁴ Ilo July 1998, kõmmõn magazine ko renaj kar kabõjrake ilo elõñ ailiñ ko ilo Europe, ekoba Austria, Denmark, France, Greece, Netherlands, im Switzerland. Britain, Finland, Germany, Italy, Spain, im Sweden renaj bõk eddon printing ko ilo Europe. Ilo wãwen in, remaroñ bõprae expenses ko rejjab men in aikwij im jabawõt ko remaroñ kajerbali ilo wãwen eo emõntata ñõn jerbal eo ibelakin lõl. Ewi wãwen rar bebe kin ailiñ et ko renaj wõnmanlok einwõt jikin ko renaj print wõt im ko renaj bõjrak air print? Ñõn burukuk ibben kakien eo ñõn lolorjake ilo meletlet mweiuk ko an Master eo, “dri kõmñe eo etiljek” ear lukkun etale an keie in print ilo kajjojo jikin ko.

¹⁵ Un eo elaptata unin rar kabõjrak printing ko ilo jet ailiñ ko im kakobaik ko jet kar bwe en keie air jerbal. Ñõn kõmmõn bwe juõn ailiñ en print literature ñõn ailiñ ko jet ej laplok an bidodo im elaplok air kortokjen kein jerbal ko elap wõnair. Kiõ printing rej kõmmõne ilo jikin ko ediklok wõnãn men ko, ebidodo bõk kein jerbal ko, im emõn jikin ijiliklok men ko. Ilo wãwen in, mweiuk ko an Master eo rej kajerbali ilo wãwen eo ekkar. Emol, kabõjrak printing ilo juõn ailiñ ejjab melelen bwe jerbal in kwalok nan ijo enaj bõjrak. Enaj bwe literature ko im elõñ buki thousand Ri Kennan ro an Jehovah ilo ene kein renaj wõnmanlok ilo kijejeto ñõn jiroñ ro ri turiir kin “news eo emõn kin ainemõn.” (Ep. 2:17, NW ) Bar kõkkar eo ear bareinwõt walok ilo tokjen ko jet.

¹⁶ Ñõn kwalok juõn tokjen, elõñ ian printing press ko rekãl jen Denmark, Greece, Netherlands, im Switzerland kar jilkinloki ñõn Nigeria im Philippines. Ro rej kabel ilo kajerbal printing press kein jen ailiñ ko ilo Europe rar bõk nan in kir eo ñõn etal ibben printing press ko im kamineneik ri jerbal ro ilo bukwon eo kin kilen kajerbale. Ilo wãwen in, ailiñ kein rej kiõ bõk ejja magazine ko remõn me ailiñ ko jet rej bõki.

¹⁷ Lemnak kin bar juõn tokjen: Ene ko reiet ijo jerbal in printing ej wõnmanlok wõt rej kiõ bõk eddon wõnãn print magazine ko. Tokjen men in, ilo ene ko ijo rar kabõjrak air print literature ko, money ko remaroñ kiõ kajerbali ñõn karõk ko jet, einwõt kalek Kingdom Hall ko im jibañ lale aikwij ko an brother ro ilo ene ko elap air jeramel. Kin men in, kajerbal mweiuk ko an Master eo ilo juõn wãwen emõn ej melelen bwe jemaroñ jerbale nan ko an Paul ñõn ri Korint ro ilo juõn wãwen elaplok an keie ibelakin lõl: “Bwe I jab ba men in bwe armij ro jet ren jerammõn, im kom jorran: A kin jibjibõñ dron; iomin ien in, ami jerammõn en kõke air jeramel . . . bwe en jokwõn wõt juõn.”​—2 Kor. 8:13, 14.

¹⁸ Tokjen kakobaba in, Ri Kennan ro an Jehovah ibelakin lõl rej ebakelok don jen mokta. Ejjab juõn abañ ñõn Ri Kennan ro ilo Denmark ñõn bõk magazine ko air rej kõmmõne ilo Germany, meñe rar make kõmmõne mokta. Rej kamolol kin jerbal eo an brother ro ilo Germany. Ri Kennan ro an Jehovah ilo Germany rej abõnõnõ ke bwe jabawõt ko air rej kajerbali ñõn kabwe book in Bible ko ñõn Denmark​—ak ñõn Russia, Ukraine, im ene ko jet? Emol jaab! Rej mõnõnõ in jela bwe jabawõt ko an ro jeiir im jatiir ilo ene kein remaroñ kiõ kajerbale ñõn karõk ko jet rej men in aikwij.

Lolorjake Mweiuk ko

¹⁹ Ilo kajjojo Kingdom Hall an Ri Kennan ro an Jehovah ibelakin lõl, ewor juõn box in jabawõt rej kakõlleiki “Jabawõt ko ñõn Jerbal eo Ibelakin Lõl an Society​—Matthew 24:14.” Jabawõt ko rejjab owar kake me armij rej likiti ilo box ko rej bed ñõn air kajerbale ñe ewor juõn aikwij. Wãwen eo rej kajerbal jabawõt ko “dri kõmñe eo etiljek” im kajjojo dolul in ra ko rej bebe kake. Kin men in, ijo emelim jen kien, money ko rej likiti ilo box in jabawõt ilo juõn ailiñ remaroñ kajerbali ñõn jurake jerbal eo ilo bar juõn ailiñ elõñ thousand mile ko rettolok. Jabawõt ko rar kajerbali ilo jet ene ko ñõn lelok jibañ ñõn ri tõmak ro mõttair rej iñtan jen men ko rar iriñ im walok einwõt lañ ko, aire ko, makitkit lõl ko, im tarinae. Im jabawõt rot kein rej kajerbali ilo jet ene ko ñõn jurake missionary ro ilo elõñlok jen 200 ene ko.

²⁰ Ilo congregation ko an Ri Kennan ro an Jehovah, einwõt juõn rule ekkã lore, men ko ikijen finance rej kõjela kake juõn wõt alen ilo juõn alliñ​—im iumin jet wõt minute ko. Ejelok plate in jabawõt ko rej letoletak ilo Kingdom Hall ko ak ilo kwelok ko relap. Ejelok letter in owar kin money rej jilkinloke ñõn kajjojo armij. Rejjab kõllã wõnãn fund-raisers (ro rej aini money). Ekkã, an walok ilo juõn yiõ juõn wõt katak ilo Imõniaroñroñ ñõn kamelele kin ewi wãwen ro rekõnan maroñ kõmmõn jabawõt ko ñõn Watch Tower Bible and Tract Society ñõn jurake jerbal eo ibelakin lõl. Ekkã air jab konono kin finance ko an Society ilo magazine in Awake! Inem, ewi wãwen jerbal eo elap ñõn kwalok kin news eo emõn ibelakin lõl, kalek Kingdom Hall ko rej men in aikwij, lale ro rej bed ilo special full-time service, im lelok jibañ ñõn Christian ro rej bed ilo aikwij rej tõbrak? Jehovah ear kajerammõn armij ro an ilo juõn wãwen ekabwilõñlõñ kin juõn jitõb in joij im emmol. (2 Kor. 8:2) Kimij kõnan bõk ien in ñõn kamolol aolep ro rar bõk kwunair ñõn ‘kaibujuij Jeova kin mweieir.’ Remaroñ liki bwe “dri kõmñe eo etiljek” naj wõnmanlok in lolorjake mweiuk ko an Master eo. Im kimij jar bwe Jehovah enaj wõnmanlok in kajerammõn aolep karõk ko jej kõmmõni ñõn kalaplok jerbal eo ibelakin lõl.

[Footnote]