Kautiej Ãt eo Eaibujuij Etan Jehovah
1 Satan ear katton ãt eo etan Anij ke ear kareel ro jemed im jined moktata ñan jerawiwi. Devil eo ear ba ilo etao bwe Jehovah ear riap ñan Adam. (Jen. 3:1-5) Kinke ãt eo ekwojarjar ej ekkejel ibben maroñ eo an Anij ñan kajejjet nan eo an, ruruwe eo an Satan kar juõn eo enana tata. Ilo an kajejjet kitien karõk eo an ekwojarjar jidik kin jidik, Jehovah ear karreoik etan im kõmman an aibujuij.—Ais. 63:12-14.
2 Kij jej armij ro me Jehovah ej kir ‘ir kin etan.’ (Jerbal 15:14, 17) Men in ej letok ñan kij ien eo emõn ñan kwalok lemnak eo ad kin kokwojarjar etan. Jej lo bwe ãt eo etan Jehovah ej mol an aibujuij, ke ej jutak kin men otemjej remõn, joij, yokwe, tiriamokake, im wãnik. Jej obrak kin lelñoñ kin lapin ãt eo eaibujuij etan Anij. (Sam 8:1; 99:3; 148:13) Ta eo jen kar emmakit in kõmmane?
3 Kokwojarjar Etan Anij: Ejjab maroñ laplok ad kokwojarjar etan Anij bwe ededelok an kwojarjar tata. Ak ikijen mwilid erreo im ad kwalok kin Ailiñ eo, jemaroñ kwalok bwe elap ad kautiej etan Anij. Jen keañ: “Komin kamolol Jeova, kir etan, kwalok men in kõmõn ko An iben dri ailiñ ko, komin ba bwe e utiej wõt etan.” (Ais. 12:4) Ewi wãwen jemaroñ kõmmane men in?
4 Jemaroñ kortokjen aolep ien ko remõn ñan keañ kin etan Jehovah im kin men otemjej ej jutak ikijen. Meñe jej kwalok nan ekkar ñan karõk ko ak ilo jabdewõt ien emõn tok, jen em ñan em ak jen mõn wia ñan mõn wia, iturin ial ak ikijen kajerbal telephone, jerbal eo ad ej nebar Jehovah. Ñe jej iion armij ro rej itoklimo, jej aikwij kõmman karõk ko ñan bar jeblak im katakin ir kin Jehovah. Ej melelen bwe jej aikwij kajejjet karõk kein ilo ejelok likjap im kate kij ilo jibadbad ko ad ñan jino Bible study ko. Ekamõnõnõ, bwe kajjojo yiõ elõñ buki thousand rej katak ñan jelã, kautiej, im kokwojarjar ãt eo eaibujuij etan Jehovah.
5 Ad bõk kunad kin aolepen buruõd ilo jerbal in kokwojarjar ãt eo etan Anij ej kalikar tu-ia eo jej jutak ie ikijen aitwerõk eo Satan ear bõkmantak ilo jikin kallip in Eden. Jerbal in ej jerbal eo elaptata an utiej jemaroñ kõmmane. Ilo kijejeto jen kautiej im nebar ãt eo eaibujuij etan Jehovah!—1 Kron. 29:13.