M̦ool eo kõn Anij im Christ

Wõn Anij?

Etan Anij? Anij make ej ba: “Ña Jeova, eñin eta.” (Aiseia 42:8) Ãt in etan Anij ej wal̦o̦k elõñl̦o̦k jãn 7,000 alen ilo Baibõl̦ eo. Ijoke, elõñ ukokin Baibõl̦ ko me em̦õj ukote etan ñan taitõl̦, ãinwõt “Irooj.” Anij ekõn̦aan bwe kwõn jeran, kõn men in ej rõjañ eok bwe kwõn “kũr ñan etan.”​—Sam 105:1.

Taitõl̦ ko an Jeova. Baibõl̦ eo ej kõjerbal taitõl̦ kein ãinwõt “Anij,” “Kajoor Bõtata,” “ri-Kõm̦anm̦an,” “Jema,” im “Irooj Bõtata,” ñan jitõñl̦o̦k ñan Jeova. Elõñ jar ko an ro ilo Baibõl̦ me ej kwal̦o̦k aer kũr Jeova kõn taitõl̦ kein im kõn ãt eo etan make, Jeova.​—Daniel 9:4.

Nemãmeen Anij. Anij ej juon jetõb jejjab maroñ loe. (Jon 4:24) Innem Baibõl̦ eo ej lukkuun kwal̦o̦k bwe “ejjel̦o̦k armej enañin kar lo Anij.” (Jon 1:18) Baibõl̦ eo ej kwal̦o̦k kõn eñjake ko an Anij. Armej ro remaroñ kabũrom̦õje, ak remaroñ bõktok “m̦õn̦õn̦õ” ñane.​—Jabõn Kõnnaan 11:20; Sam 78:40, 41, UBS.

Kadkad ko Rem̦m̦an Kadkadin Anij. Anij ejjab kwal̦o̦k kalijekl̦o̦k ñan armej otemjej jãn aolep aelõñ im kõn kain armej rot er. (Jerbal 10:34, 35) Ej bar “tũriam̦okake, im ejouj, erum̦wij An illu, im el̦ap An tũriam̦okake im m̦ool.” (Exodus 34:6, 7) Ijoke, ebar wõr emãn kadkad ko jet rem̦m̦an kadkadin Anij.

Kajoor. Kõnke ej “Anij Ekajoor Bõtata,” ejjel̦o̦k men en̦ ebane ñan an kajejjet jabdewõt men ko ear kallim̦ur kaki.​—Jenesis 17:1, UBS.

Mãlõtlõt. El̦apl̦o̦k an Anij mãlõtlõt jãn aolep. Kõn men in, Baibõl̦ eo ej ba bwe ej “make wõt mãlõtlõt.”—Rom 16:27.

Ekajet Jim̦we. Aolep iien Anij ej kõm̦m̦ani men ko rejim̦we. Kõm̦m̦an ko an ‘reweeppãn’ im “ejjel̦o̦k nana Ippãn.”—Duteronomi 32:4.

Yokwe. Baibõl̦ ej ba “Anij yokwe.” (1 Jon 4:8) Anij ejjab baj kwal̦o̦k wõt yokwe ak e eo ej wũnjãn yokwe. Aolep men ko ej kõm̦m̦ani ej kõm̦m̦ani kõn an l̦ap an yokwe, im el̦ap ad bõk tokjãn ilo elõñ wãween ko.

Jem̦jerã eo an Anij Ippãn Armej Ro. Anij ej Jemãdwõj ilañ eo el̦ap an yokwe kõj. (Matu 6:9) Ñe jej likũt ad tõmak ilo e, jemaroñ ro jeran. (Sam 25:14, UBS) Ilo m̦ool, Anij ej kũr eok bwe kwõn jar ñane im ‘likũt ippãn aolepen men ko kwõj eddodo kaki, kõnke ej kaorõk eok.’​—1 Piter 5:7; Jemes 4:8.

Ta Oktak eo Ikõtaan Anij im Christ?

Jesus Ejjab Anij. Jesus ej juon eo ejejuwaan, kõnke e wõt Anij ear make kõm̦anm̦ane. Eñin unin Baibõl̦ eo ej n̦aetan Nejin Anij. (Jon 1:14) Ãlikin an kar kõm̦anm̦an Jesus, Jeova ear kõjerbal m̦aanje eo nejin ãinwõt juon eo “ekapeel ilo jerbal” ñan kõm̦anm̦an men otemjej im aolep ro jet.​—Jabõn Kõnnaan 8:30, 31; Kolosse 1:15, 16.

Ejjel̦o̦k juon iien Jesus ear ba bwe e Anij. Ijoke, ear kõmel̦el̦e im ba: “Iar itok ilo etan [Anij], im E eo ear jilkintok eõ.” (Jon 7:29) Ke ear kõnono ñan juon iaan ri-kal̦oor ro an, Jesus ear ba men in kõn Jeova “Jema, eo ej bar Jememi” im “aõ Anij, eo ej bar ami Anij.” (Jon 20:17) Ãlikin an Jesus kar mej, Jeova ear kõjerkakpejeik e ñan mour ilañ im lel̦o̦k ñane juon maroñ el̦ap ke ej pãd Ituanbwijmaroñin pein.​—Matu 28:18; Jerbal 2:32, 33.

Jesus Christ Emaroñ Jipañ Eok ñan Epaakel̦o̦k Anij

Jesus ear itok ñan lal̦ in bwe en katakin kõj kõn Jemãn. Jeova make ear ba kõn Jesus im ba: “Eñin Nejũ, eo ejitõnbõro ippa, kom̦win roñjake e.” (Mark 9:7) El̦apl̦o̦k an Jesus jel̦ã kajjien Anij jãn jabdewõt. Ear ba: “Ejjel̦o̦k en̦ ejel̦ã kõn Jema ak ña wõt im ro ij m̦õn̦õn̦õ in kwal̦o̦k kõn Jema ñan er.”​—Luk 10:22.

Elukkuun jejjet wãween an Jesus kwal̦o̦k kadkad ko kadkadin Anij. Joñan an lukkuun jejjet an Jesus anõke kadkad ko kadkadin Jemãn, ear maroñ ba: “Jabdewõt eo em̦õj an lo ña, em̦õj an bar lo Jema.” (Jon 14:9) Jesus ear karuwaakl̦o̦k armej ro ñan Anij ilo an anõke yokwe eo an Jemãn, ilo naan im kõm̦m̦an ko an. Ear ba: “Ña ij ial̦ eo im m̦ool eo im mour eo. Ejjel̦o̦k en̦ ej ilo̦k ñan ippãn Jema el̦aññe ejjab kõn ña.” (Jon 14:6) Ear bar ba: “Ro em̦ool aer karejar ñan Jemãdwõj ilañ renaaj kabuñ ñane ekkar ñan tõl eo an jetõb kwõjarjar im ekkar ñan m̦ool eo. Jemãdwõj ilañ ej kappukot ro rekõn̦aan kabuñ ñane ilo wãween in.” (Jon 4:23) Baj l̦õmn̦ak m̦õk! Jeova ej pukot armej ro ãinwõt kwe me rekõn̦aan jel̦ã kõn m̦ool eo kõn e.