M̦ool eo kõn Aelõñ eo an Anij
Jesus ear katakin ri-kal̦oor ro an bwe ren jar im ba: “Jememwõj ilañ, en kwõjarjar etam̦, en itok am̦ Aelõñ. En jejjet ankilaam̦ ilo lal̦ in ãinwõt an jejjet ilo lañ.” (Matu 6:9, 10) Ta in Aelõñ eo an Anij? Ta ko ej kõm̦m̦ani? Im etke jej aikuj jar kake?
Jesus ej Kiiñ in Aelõñ eo an Anij.
Luk 1:31-33: “Kwõnaaj n̦aetan Jesus. Enaaj juon eo elukkuun aorõk im naaj n̦aetan Nejin eo Eutiejtata. Jeova Anij enaaj lel̦o̦k ñane tũroon eo an Devid, eo jemãn, im enaaj Kiiñ ioon ro bwijjin Jekob ñan indeeo, im Aelõñ eo an ejjãmin jako.”
Men eo el̦ap an kar Jesus kwal̦o̦k naan kake ej kõn Aelõñ eo.
Matu 9:35: “Jesus ear jibadekl̦o̦k aolep jikin ko im bukwõn ko, im ear katakin armej ilo im̦õn kabuñ ko aer im kwal̦o̦k naan kõn ennaan eo em̦m̦an kõn Aelõñ eo. Bareinwõt, ear kõmour armej ro jãn jabdewõt kain nañinmej.”
Jesus ear kwal̦o̦k ñan ri-kal̦oor ro an kõkal̦l̦e ko ñan jipañ er bwe ren jel̦ã ñããt enaaj itok Aelõñ eo an Anij.
Matu 24:7: “Juon lal̦ enaaj tarin̦aeik bar juon lal̦, im aelõñ ko renaaj tarin̦aeik doon. Bareinwõt, enaaj wõr ñũta im m̦akũtkũt lal̦ ilo elõñ jikin ko.”
Ri-kal̦oor ro an Jesus kiiõ rej kwal̦o̦k naan kõn Aelõñ eo ipel̦aakin lal̦ in.
Matu 24:14: “Im naaj kwal̦o̦k ennaan eo em̦m̦an kõn Aelõñ eo ipel̦aakin lal̦ in bwe aolep armej ren roñ, innem ej kab naaj itok jem̦l̦o̦kin.”