Kwalok Tiljek in Christian Ñe juõn Nukõm Ej Bukwelok
1. Ta wãwen eo emaroñ melejoñe tiljek eo an juõn Ri Christian?
1 Elap an kajur lukluk eo ikõtan ro uan family eo. Men in ej bõktok juõn melejoñ elap ñan juõn Ri Christian ñe eo belen, juõn nejin, jemen ak jinen, ak bar juõn nukin ebak ej bukwelok ak ej make ilok jen congregation eo. (Mat. 10:37) Ilo wãwen et eo Ri Christian ro retiljek ren jerbal ibben nukin rot in? En oktak ke wãwen eo jej jerbal ñan ir elañe armij eo ej jokwe ibben family eo? Mokta, jen elij ta eo Bible ej ba kin katak in, nan in kaiñi ko rej jerbal ñan ro rej bukwelok im ro rej make ilok jen congregation eo.
2. Ekkar ñan Bible eo, ewi wãwen an Ri Christian ro aikwij jerbal ibben ro rar bukwelok jen congregation eo?
2 Ewi Wãwen Jen Jerbal Ibben Ro Rej Bukwelok: Nan in Anij ej kakien Ri Christian ro bwe ren jab kamao ak tel air ibben juõn armij eo ej bukwelok jen congregation eo: “Komin jab kõmao iben [jabdewõt armij, New World Translation] elañe naetan jimjãn jimjãten im e dri lũñ, ak dri ankwõnak, ak dri kabuñ ñõn ekjõp, ak dri kajirere, ak dri karek, ak dri koaroñ; emõn jab mõña iben juõn einwõt. . . . Komin jolok leo enana jen ibemi.” (1 Kor. 5:11, 13) Nan ko an Jesus emwij je ilo Matu 18:17 ej bareinwõt jerbal ñan men in: “Kwon likit e [eo ej bukwelok] einwõt dri pegan im dri tel owõj.” Ro rar roñjake Jesus rar jelã bwe Ri Jew ro ilo ran eo rar jab koba lok ñan jidik ibben Ri Gentile ro im rar kajekdon ri teltel owoj im watõk ir einwõt ro renana. Ilo wãwen in Jesus ear kaiñ ri kalor ro bwe ren jab kamao ibben ro rej bukwelok.—Lale The Watchtower an September 15, 1981, peij 18-20.
3, 4. Kain kamao rot emo ibben ro rej bukwelok im ro rar make ilok jen congregation eo?
3 Men in ej melelen bwe Ri Christian ro retiljek rejjab kamao ibben jabdewõt armij emwij an bukwelok jen congregation eo kin men ko ilo jitõb. Ak ej kitibuj elaplok jen men in. Nan in Anij ej ba bwe ‘emõn jab mõña iben juõn einwõt.’ (1 Kor. 5:11) Kin men in, jej bareinwõt bõprae ad kakije im bed ibben juõn armij emwij an bukwelok. Men in ej kitibuj ad jab koba ibben ilo juõn picnic, party, ikkure, ak etal ñan juõn jikin kaikujkuj, jikin aluij pija ak jijet im mõñã ibben ilo mweo ak ilo juõn restaurant.
4 Ta kin ad konono ibben juõn armij emwij an bukwelok? Ke Bible ejjab kwalok kin aolep wãwen ko remaroñ walok, 2 Jon 10 ej jibañ kij ñan bõk lemnak eo an Jehovah kin men ko: “Elañe jabrewõt armij ej iwij ñõn kom, im jab bõkwoj katak in, komin jab bõk e ilo mweo imwemi, im jab yokyokwe e.” Ilo an konono kin men in, The Watchtower an September 15, 1981, peij 25, ej ba: “Juõn nan in ‘yokyokwe’ elamwan ñan juõn armij emaroñ buñten nee eo mokta me ej tellok ñan juõn bwebwenato im bõlen juõn jimjera. Jekõnan bõk ke buñten nee en mokta ibben juõn armij emwij an bukwelok?”
5. Ñe ej bukwelok, ta eo armij eo ej luji?
5 Emol, ej einwõt ta eo peij 31 ilo ejja magazine in The Watchtower ej ba: “Ñe juõn Ri Christian ej bo ilo jerawiwi im rej aikwij bukwelok e, elõñ men ko ej luji: kõtan eo an emõn ibben Anij; . . . kamao emõn ibben Christian ro jein im jatin ilo congregation eo, ekoba ro nukin rej Ri Christian ro.”
6. Juõn Ri Christian ej aikwij ke bõjrak an kamao ñan jidik ibben juõn nukin e bukwelok eo ej jokwe ilo ejja mweo wõt? Kamelele.
6 Ro Rej Bed ilo Ejja Family eo Wõt: Ej melelen ke men in bwe Ri Christian ro rej bed ilo ejja family eo wõt ibben eo ej bukwelok rej aikwij bõprae air konono, mõñã, im kamao ibben armij eo ke rej kõmman makitkit ko air jen ran ñan ran? The Watchtower an April 15, 1991 ilo kajin English, ilo footnote eo ilo peij 22, ej ba: “Elañe ewõr juõn nukin ej bukwelok ilo family eo an juõn Ri Christian, armij eo enaj wõr wõt kunan ilo jerbal im makitkit ko jen ran ñan ran an family eo.” Kin men in, ej kunan ro uan family eo ñan bebe kin ewi joñan renaj kobaik eo ej bukwelok ñe rej mõñã ak kõmman jerbal ak makitkit ko jet ilo mweo. Ak, rejjab kõnan bwe Christian ro jeiir im jatiir ren bõk juõn lemnak bwe men ko rej bed ilo ejja wãwen eo wõt mokta jen an kar walok bukwelok eo.
7. Ewi wãwen kamao eo ilo jitõb ilo mweo ej oktak ñe juõn uan family eo ej bukwelok?
7 Bõtab, The Watchtower an September 15, 1981 ilo kajin English, peij 28, ej kwalok kin armij eo ej bukwelok ak ej make ilok jen congregation eo: “Lukluk ko mokta ilo jitõb ear lukkun tũm. Men in ej mol bareinwõt ibben ro nukin, ekoba ro ilo family eo an. . . . Men in ej melelen bwe enaj wõr oktak ko ilo kamao ko ilo jitõb me ear wõr ilo mweo. Ñan wanjoñok, elañe leo ri belele ej bukwelok, lio belen im ro nejin rejamin jokane elañe ej tel ilo katak Bible eo an family eo ak ilo read Bible im jar. Elañe ekõnan jar, einwõt mokta jen ien mõñã, ewõr an maroñ ñan kõmman eindein ilo mweo imõn make. Ak remaroñ make jar ilo burueir ñan Anij. (Ken. 28:9; Sam 119:145, 146) Ta elañe armij eo ilo mweo eo ej bukwelok ekõnan bed ke family eo ej konono Bible ibben don ak rej katak Bible einwõt juõn family? Ro jet remaroñ kõtlok an bed ñan roñjake elañe ejjab kajeoñ in katakin ir ak kwalok lemnak in kabuñ ko an.”
8. Eddo ta eo ewõr ibben Christian ro jemen im jinen ñan juõn ajiri ejjab kanuij ritto eo ej jokwe ilo mweo im e bukwelok?
8 Elañe juõn ajiri ejjab kanuij ritto ilo mweo ej bukwelok, Christian jemen im jinen ewõr wõt eddo eo ñan kakajiririk e. The Watchtower an November 15, 1988, peij 20, ej ba: “Einwõt rej wõnmanlok im lelok ñan e kijen, ballin, im jikin an jokwe, rej aikwij katakin im kauweik e ekkar ñan Nan eo an Anij. (Jabõn Kennan Ko 6:20-22; 29:17) Ro jemen im jinen reyokwe remaroñ karõk ñan katak Bible ibben, meñe ej bukwelok. Bõlen enaj bõk kajimwe eo elaptata an wõr tokjen jen air katak ibben make. Ak remaroñ bebe bwe en wõnmanlok im bed ilo lajrak in katak Bible einwõt juõn family.”—Lale bareinwõt The Watchtower an October 1, 2001, peij 16-17.
9. Ñan joñan et eo juõn Ri Christian en kebake juõn nukin ej bukwelok eo ej jokwe ilo bar juõn em?
9 Ro Nukin Rejjab Jokwe ilo Ejja Mweo Wõt: “Wãwen eo eoktak elañe eo ej bukwelok ak ear ilok jen congregation eo ej juõn nukin ejjab uan family eo im ejjab jokwe ilo ejja mweo wõt,” The Watchtower an April 15, 1988 ilo kajin English, peij 28 ej ba. “Kwomaroñ jab aikwij konono ak lo eo nukim. Meñe emaroñ wõr jet un ko unin am aikwij kebak eo nukim, en jab ikutkut,” ilo errã ibben kien eo an Anij ñan “jab kõmao iben juõn armij” eo ej jerawiwi ilo ejelok jitõb in ukwelok ibben. (1 Kor. 5:11) Ri Christian ro retiljek rej aikwij bõprae air kamao ibben juõn nukin rot in elañe ejjab juõn men in aikwij, im bareinwõt kõmman bwe en diktata am aikwij kebak e ikijen jerbal in business.—Lale bareinwõt The Watchtower an September 15, 1981 ilo kajin English, peij 29-30.
10, 11. Ta eo juõn Ri Christian en lemnak kake mokta jen an kõtlok bwe juõn nukin e bukwelok en emmakit tok ñan mweo imõn?
10 The Watchtower ej kareilok kij ñan bar juõn wãwen me emaroñ walok: “Ta elañe juõn nukin ebak, einwõt juõn nejin likao ak juõn jemen ak jinen eo ejjab jokwe ilo mweo, ej bukwelok im kiõ ekõnan bar jeblak ñan mweo? Family eo emaroñ kõmman bebe kin ta eo renaj kõmmane ekkar ñan wãwen eo ej walok. Ñan wanjoñok, juõn jemen ak jinen e bukwelok emaroñ nañinmij ak ejjab maroñ kabwe aikwij ko an ak kejbãrok ejmour eo an. Ri Christian ro nejin ewõr eddo eo ekkar ñan Bible im kien mwil emõn ñan lelok jibañ. (1 Tim. 5:8) . . . Men eo rej kõmmane emaroñ wawa ion men ko einwõt aikwij ko remol an jemen ak jinen, lemnak eo an im itoklimo eo an bõran family eo kin ejmour eo ilo jitõb an family eo.”—The Watchtower an September 15, 1981, peij 28-9.
11 Ikijen juõn nejin, ejja katak eo wõt ej wõnmanlok: “Jet ien Christian jemen im jinen rar kõtlok bwe nejiir e bukwelok eo e nañinmij ilo kanniek ak eñjake emaroñ jeblak ñan mweo iumin juõn ien kar karõke. Ak ilo kajjojo case jemen im jinen remaroñ etale wãwen ko ibben. Likao eo nejiir e bukwelok ear make ian ke, im kiõ ejjab maroñ? Ak ekõnan ke bar jeblak kinke enaj bidodo lok an mour? Ta kin mwil ko mwilin im lemnak eo an? Enaj bõktok ke ‘leaven’ ilo mweo?—Gal. 5:9.”
12. Ta jet ian tokjen ko jej bõki jen lajrak in bukwelok eo?
12 Tokjen ko kin Am Tiljek ñan Jehovah: Ad jerbal ekkar ñan lajrak eo ilo Bible ñan bukwelok im kajekdon ri nana ro rejjab ukwelok ewõr tokjen. Ej kejbãrok erreo eo an congregation eo im kalikar kij einwõt ro rej kejbãrok kien ko reutiej ilo Bible kin mwil erreo. (1 Pit. 1:14-16) Ej kejbãrok kij jen kilan ko rej kokkure. (Gal. 5:7-9) Emaroñ bareinwõt lelok ñan ri nana eo juõn ien emõn ñan bõk tokjen jen kaje eo ear bõke, eo emaroñ jibañ e ñan kwalok “leen kwojarjar e ainemõn.”—Hib. 12:11.
13. Ta oktak ko juõn family ear kõmmani, im kin ta tokjen ko?
13 Elikin air kar roñjake juõn katak ilo juõn circuit assembly, juõn brother im bo kõrã eo jein im jatin rar kile bwe rar aikwij kõmman oktak ko ilo wãwen eo rar jerbal ibben jineir, eo ear jokwe ilo bar juõn jikin im ear bukwelok iumin jiljino yiõ ko. Ilo ien eo emõkajtata elikin assembly eo, leo ear telephone lok ñan jinen, im elikin an kwalok nan in kamol kin air yokwe e, ear kamelele bwe rar jab maroñ wõnmanlok im bwebwenato ibben elañe ear jab men ko raorõk kin family eo. Ejjabto tokelik, jinen ear jino bed ilo kwelok ko im eliktata ear jeblak ñan dolul eo. Bareinwõt, leo belen eo ejjab juõn ri tõmak ear jino katak im tokelik ear baptais.
14. Etke ej aikwij tiljek ad jurake lajrak in bukwelok eo?
14 Tiljek ilo ad jurak lajrak in bukwelok eo einwõt kar kõlajrake ilo Bible ej kwalok yokwe eo ad ñan Jehovah im ej lelok juõn uak ñan eo ej kinak e. (Ken. 27:11) Ilo oktan, jemaroñ liki kin kajerammõn eo an Jehovah. King David ear je ikijen Jehovah: “Kin kien ko An, I ar jab ilok jeni. Ibben juõn eo etiljek kwonaj jerbal ilo tiljek.”—2 Sam. 22:23, 26, NW.