Kwalok Itoklimo Eo Eyokwe ñan Ro “Atajinimjin”
1 Jehovah ej “jemen ro ejelok jemeir.” (Sam 68:5) Itoklimo eo an kin emõn eo air ej alikar ilo kien in ear lelok ñan ailiñ in Israel eo etto: “Komin jab kejorran jabrewõt kõra e joko belen, ak eo atajinemjen. Elañe kwoj kejorran ir ilo jabrewõt wãwen, meñe jirik wõt air kir ñõn Iõ, emol I naj eoroñ air kir.” (Ex. 22:22, 23) Kien Anij ej bareinwõt koba karõk ko ñan jibañ rein kin aikwij ko air ilo kanniek. (Dut. 24:19-21) Ilo karõk eo an Christian, ej kakabilek ri kabuñ ro remol ñan “lolok ro atajinemjen im kõra ejoko beleir ilo air jorran.” (Jem. 1:27) Ewi wãwen jemaroñ kajeoñe itoklimo in eyokwe an Jehovah ilo ro rej rittolok ilo family ko me jemeir ak jineir ejelok rejetair ak rej jebel ikijen kabuñ?
2 Katakin ilo Jitõb: Elañe kwoj juõn jemen ak jinen ejelok rejetan ak ewõr juõn beleõm ejjab juõn ri tõmak, inem ekkeini katak Bible ibben ro nejõm emaroñ juõn aitwerõk elap. Ak juõn Bible study ekkeini kõmmane im ej kabwe aikwij ko an family eo eaorõk ñan air naj rittolok im armij ro rekabel im jokkin wõt juõn. (Ken. 22:6) Bwebwenato ibbeir ran otemjej kin men ko lor jitõb e bar aorõk. (Dut. 6:6-9) Jet ien, kwomaroñ bõk eñjake in buromõj, ak kwon jab ebwer. Reilok ñan Jehovah ñan bõk kakajur im tel ke kwoj “kakajiririik [ro nejõm] ilo kaje im kowe an Iroij.”—Ep. 6:4.
3 Elañe kwoj aikwiji jibañ ñan inek eddo ko am ekkar ñan Jeje ko, kwon kejelãik elder ro. Renaj maroñ lewõj nan in rejañ ko rekeie ak jibañ yuk ñan kajutak juõn manit emõn ikijen men ko lor jitõb ñan family eo am.
4 Ewi Wãwen Ro Jet Remaroñ Jibañ: Ilo ebeben eo kein kajuõn, Timothy ear erom juõn ri karejar eo ekijejeto an Jehovah meñe ear rittolok ilo juõn family ear wõr jebel ikijen kabuñ. Jibadbad ko retiljek an jinen im jibwin ñan katakin e kin jeje ko rekwojarjar ilo ien an jodikdik ejelok bere ear lap an jibañ. (Jerbal 16:1, 2; 2 Tim. 1:5; 3:15) Bõtab, ear bareinwõt bõk tokjen jen an kar kamao ibben Ri Christian ro jet, ekoba ri jilek Paul, eo ear konono kin Timothy einwõt “nejiõ jitenburu im etiljek ilo Iroij.”—1 Kor. 4:17.
5 Ejja eindein lok wõt rainin, elap an wõr tokjen ñe brother im sister ro reritto ilo jitõb rej kwalok juõn itoklimo eyokwe ñan ladik im ledik ro re atajinimjin ilo congregation eo! Kwoj jelã ke ãt eo etan kajjojo iair? Kwoj bwebwenato ke ibbeir ilo kwelok ko an Christian im ilo ien ko jet. Kir ir ñan etal ibbam ilo jerbal in kwalok nan. Bõlen jen ien ñan ien kwomaroñ kobaik ir, im bareinwõt jemeir ak jineir ej make iair ak rej ri tõmak eo, ilo ien katak an family eo am ak ilo karõk ko kin men in kamõnõnõ ko remõn. Ñe ajiri rein rej watõk yuk einwõt jerair, ekkã air naj anõk joñok eo am im bõk nan in rejañ ko am.—Pil. 2:4.
6 Elap an Jehovah itoklimo kin ladik im ledik ro re atajinimjin, im ej kajerammõn jibadbad ko ad reyokwe ñan jibañ ir ñan kõmman bwe mol eo en bed ilo burueir. Elõñ ro rar rittolok ilo family ko me ejelok rejetan jemeir ak jineir ak rejebel ikijen kabuñ rar bõk rejañ rot kein im kiõ rej jerbal einwõt pioneer ro, ministerial servant ro, elder ro, im overseer ro rej ito-itak, missionary ro, ak ro uan family in Bethel. Jen bukõt wãwen ko ñan an “laplok” yokwe eo ad kin ro atajinimjin, ilo kajeoñe Jemed ilañ.—2 Kor. 6:11-13.