Jerammõn ko kin Jerbal in Pioneer

¹ “I jelã bwe ejelok bar juõn jerbal emaroñ bõktok juburu ñan iõ me ear itok jen aõ jaketo-jaketak mol eo ibben ro jet,” juõn pioneer ear ba. Bar juõn ear ba: “Ilo jemlokin kajjojo ran, emõn aõ kiki, im buruõ eobrak kin lañliñ.” Pioneer rein rej jutak kin brother im sister ro ijoko otemjej me rar edjoñe jerammõn ko kin jerbal in pioneer.​—Ken. 10:22.

² Ilo ad jibañ ro jet ñan bõk jelãlokjen eo kin Nan eo an Anij eo ej lomoren armij men in ej bõktok juburu eo emol. (Jerbal 20:35; 1 Tess. 2:19, 20) “Ej kairujruj im kakajurlok tõmak ñan lo ewi joñan kajur in Nan eo an Anij ilo an kamakit armij ñan kõmman oktak ko ilo air mour,” juõn eo etto an pioneer ear ba. Aet, ilo air mõnõnõ in jibañ armij im kõmman Bible study ko, pioneer ro rej iion jerammõn rot kein.

³ Atartar ion Jehovah: Ilo air atartar ion jitõb eo an Anij ran otemjej ke rej kajejjet jerbal in kwalok nan eo air ej jibañ pioneer ro ñan kaddeklok “leen jitõb” eo im jerbal einwõt juõn kein kejbãrok ñan ir. (Gal. 5:16, 22, 23) Bareinwõt, kinke emakijkij air kajerbal Nan in Anij, pioneer ro ekkã air tijemlok ilo air kajerbal Jeje ko ñan jojomare mol eo im ñan kakajur lok ro jet. (2 Tim. 2:15) Juõn brother eo etto an kar pioneer ear ba: “Jerbal in pioneer ear jibañ iõ ñan bõk juõn jelãlokjen emũlal kin Bible eo, jelãlokjen eo iar kajerbale ñan jibañ elõñ armij ñan jelã Jehovah im karõk ko an.” Elap an kajuburu!

⁴ Regular pioneer ro rej aikwij atartar ion Jehovah ilo elõñ wãwen ko jet bareinwõt. Ej kakajurlok tõmak eo air ke rej lo an kajerammõn jibadbad ko air ñan kabwe aikwij ko air ilo kanniek. Juõn regular pioneer 72 an yiõ eo ear pioneer iumin 55 yiõ ko ear ba: “Jehovah ear jab likjap in kajejjet kõtmene ko ad.” Bareinwõt, ilo air kõmman bwe en lamwan wãwen mour ko air, pioneer ro rej kejbãrok ir jen elõñ inebata ko an mour. Men in ej kareel ke yuk?​—Mat. 6:22; Hib. 13:5, 6.

⁵ Ruaklok ñan Anij: Kõtan eo ad ibben Jehovah ej men eo eaorõktata ewõr ibbed. (Sam 63:3) Ñe jej bõk kunad ilo jerbal in kwalok nan joñan wõt ad maroñ kin yokwe eo ad ñan Jehovah, ej laplok ad ebakelok ñan e. (Jem. 4:8) Juõn pioneer eo ear bed ilo jerbal in elõñlok jen 18 yiõ ko ear ba: “Jerbal in pioneer ej kõtlok ad ‘erjoñ im lo bwe Jehovah e joij’ im kajjojo ran jej kalek juõn kõtan ebakelok ñan Ri Kõmanman eo ad.”​—Sam 34:8.

⁶ Ijellokin an wõr ibbeir wãwen ko remõn me rej kõmman bwe ren maroñ pioneer, ej aikwij wõr ibbeir bareinwõt juõn tõmak ekajur, yokwe eo emol ñan Anij im ri turiir, im juõn mõnõnõ ñan karmijeteik kõnan ko air make. (Mat. 16:24; 17:20; 22:37-39) Bõtab, einwõt mej ko remõnõnõ mejen pioneer ro ijoko otemjej rej kamole, jerammõn ko kin jerbal in pioneer elap jen men ko rej aikwij katok kaki. (Mal. 3:10) Jerammõn kein rejjab ñan pioneer ro wõt, ak family ko air im congregation eo rej bareinwõt bõk elap tokjen jen jitõb eo emõn me pioneer ro rej kwaloke.​—Pil. 4:23.

[Kajjitõk ko]

1, 2. Ta jerammõn ko rej itok ibben jerbal in pioneer, im etke?

3, 4. Ewi wãwen jerbal in pioneer ej katakin juõn ñan atartar ion Jehovah, im ewi wãwen an men in jibañ e ñan eddeklok ilo jitõb?

5. Ewi wãwen jerbal in pioneer ej jibañ juõn ñan an ruaklok ñan Jehovah?

6. Ta eo ej aikwij wõr ibben pioneer ro, im bar wõn ro rej bõk tokjen ijellokin pioneer ro?