Tokjen eo Elaptata kin Meletlet eo Ekwojarjar
1 Jet armij rej lemnak bwe Ri Kennan ro an Jehovah ren kar kalaplok jibadbad ko air ñan jibañ kadiklok abañ ko armij rej jelmaiki rainin. Armij rein rej likjap in kile tokjen eo elaptata kin jerbal eo ad ñan katakin Bible eo. Ej einwõt an kar ri jilek Paul je: “Bwe nan kin [alal in kaeñtan, New World Translation], ñõn ro rej joko, e bwebwe; a ñõn kij jej mour, e kajur an Anij.” (1 Kor. 1:18) Emol, jej jelã bwe jerbal in kwalok nan eo an Christian ej jerbal eo eaorõktata jej kõmmane ion lal rainin.
2 Juõn Mour Emõnlok Kiõ: Jibadbad ko an armij ñan kamadmõde abañ ko rej walok ilo jidik wõt tokjen ko. Kien ko nae kõmman ko renana rar jab kabõjrak an laplok kowadoñ. Kwon ko ñan kõmman ainemõn im jar in tarinae ko ñan kejbãrok ainemõn rar jab bõktok jemlok ñan tarinae. Program ko an jukjuk im bed eo rar likjap in jolok jeramel. (Sam 146:3, 4; Jer. 8:9, NW) Ak, ennan in Ailiñ eo ear ukõt mour ko an elõñ million armij ro ilo an jibañ ir ñan kõnak armij eo ekãl me Anij ej buñburuen kake. (Rom. 12:2; Kol. 3:9, 10) Ilo air kõmmane men in, rej lañliñ kin juõn wãwen mour emõnlok kiõ.—1 Tim. 4:8.
3 Juõn Ilju Elemõnõnõ: Ijellokin an jibañ kij ñan lo tõbrak in jerbale abañ ko an mour, meletlet eo ekwojarjar ej kamaroñ kij ñan kõmman karõk ko remõn ñan ilju im jeklaj. (Sam 119:105) Ej kejbãrok kij jen ad kõmman jibadbad ko ejelok tokjeir ñan ukõt jukjuk im bed eo kiõ. (Ekkl. 1:15; Rom. 8:20) Elap ad kamolol bwe jejjab jerwane mour ko ad ilo ad jibadõk mejenkajjik ko me re jadkaju! Jen men in, jej keolaplape jibadbad ko ad ion kallimur eo emol an Jehovah kin “lõñ ko rekal im lõl ekal” eo kwojarjar ej jokwe iloan. Ñe ran in ekajet eo an Jehovah ej itok, enaj alikar bwe ro rar atartar ion meletlet eo ekwojarjar rar kõmmane jokãlet eo ejimwe.—2 Pit. 3:10-13; Sam 37:34.
4 Meñe ro rej madjake “meletlet eo an jukjuk im bed in,” rej watõk bwe meletlet eo ekwojarjar ejjab keie, ilo mol ej ial eo wõt emõn ñan lore. (1 Kor. 1:21; 2:6-8, NW) Kin men in, jej wõnmanlok im keañ ilo belakin lal ennan eo me ej jarõk jen Anij, me “e wõt meletlet.”—Rom. 16:27.