Kwalok Jitõbõn Pioneer
1 Meñe remaroñ jerbal kiõ einwõt pioneer ro ak jab, aolep ri kwalok ro kin Ailiñ eo remaroñ kwalok jitõbõn pioneer. Elap air kõnan bokake kien eo ñan kwalok nan im kõmman ri kalor ro. (Mat. 28:19, 20; Jerbal 18:5) Rej kea kake armij im rej kõmman katok ko ñan kõtõbrak jerbal in kwalok nan eo air. (Mat. 9:36; Jerbal 20:24) Ri karejar ro an Jehovah rej mõnõnõ in kõmman jabdewõt men ej men in aikwij ñan jibañ ro jet ñan katak kin mol eo. (1 Kor. 9:19-23) Jen etale juõn wanjoñok kin juõn eo ear kwalok juõn jitõb rot in, Philip ri evanjel eo.
2 Kwalok Nan im Katakin: Philip ear lolorjake eddo ko relap ilo congregation eo ilo ebeben eo kein kajuõn. (Jerbal 6:1-6) Ak, elaptata ear juõn ri kwalok ekijejeto kin news eo emõn. (Jerbal 8:40) Inem rainin, ke rej lale eddo ko kar jitõñ ir kaki, elder ro im ministerial servant ro remaroñ kwalok jitõbõn pioneer ilo air tel ilo kijejeto ilo jerbal in kwalok nan. Men in elap an kakajurlok jitõb in congregation eo!—Rom 12:11.
3 Elikin mij eo an Stephen, matõrtõr ear bõktok juõn bwok elap ilo mour ko an ri kalor ro. Bõtab, Philip ear wõnmanlok im kwalok nan, im ear lap kunan ñan kabellok jerbal eo ibwiljin ro Ri Samaria. (Jerbal 8:1, 4-6, 12, 14-17) Jemaroñ anõk wanjoñok eo an ilo ad wõnmanlok im kwalok kin news eo emõn ñe jej iion melejoñ ko im ilo ad kwalok nan ilo ejelok kalijeklok ñan jabdewõt armij jej iion ir.—Jon 4:9.
4 Ilo bwebwenato eo kin oktak eo an Ri Ethiopia eunuch eo jemaroñ lo wãwen kabel eo an Philip einwõt juõn ri katakin Nan in Anij. (Jerbal 8:26-38) Ilo ad kaddeklok maroñ eo ñan kajerbal Bible eo im ñan ‘kamelele ñan ir jen Jeje ko’ ej bar juõn wãwen jemaroñ kwalok jitõbõn pioneer. (Jerbal 17:2, 3) Einwõt Philip, jej kate kij ñan kwalok kin news eo emõn ilo jabdewõt jikin jemaroñ lo armij ro ie im ilo jabdewõt ien ekkar.
5 Family im Congregation eo: Ejelok bere bwe lemnak im wanjoñok eo an Philip ear jelet limaro nejin ilo juõn wãwen emõn. (Jerbal 21:9) Eindein lok wõt, Christian ro jemen im jinen me rej keolaplape mour ko air ion men ko an Ailiñ eo ej rejañ ro nejiir ñan kõmman eindein. Meñe remõk kin air boub ilo aolepen week eo, juõn jemen ak jinen eo ej kijejeto im kwalok nan ñan ro jet emaroñ lap an jelet buruen ajiri eo.—Ken. 22:6.
6 Philip ear karuwaineneik Paul im Luke, Ri Christian ro rekijejeto me rar kate ir ilo jerbal eo an Jehovah. (Jerbal 21:8, 10) Ewi wãwen jemaroñ kwalok ad kamolol im jurake ro rej kijejeto rainin? Bõlen jemaroñ jerbal ibben pioneer ro ilo juõn jibboñ ak raelep ñe eiet armij ro rej bõk kunair ilo jerbal in kwalok nan. (Pil. 2:4) Jemaroñ bareinwõt kirtok ir ñan moko imwid kin kamao ko rekõketak. Jekdon ta wãwen ko ibbed, jen aolep kate kij ñan kwalok jitõbõn pioneer.
[Kajjitõk ko]
1. Ewi wãwen kwon kar kameleleik jitõb in pioneer eo?
2. Ewi wãwen elder ro im ministerial servant ro remaroñ kajeoñe kijejeto eo an Philip kin jerbal in kwalok nan?
3. Ewi wãwen jemaroñ kwalok jitõbõn pioneer ñe jej jelmae melejoñ ko?
4. Ta wanjoñok eo Philip ear likiti einwõt juõn ri katakin?
5. Ta eo emaroñ jibañ Christian jemen im jinen ro ñan kaddeklok jitõbõn pioneer ilo buruen ro nejiir?
6. Ewi wãwen jemaroñ kwalok ad kamolol kin pioneer ro ilo congregation eo ad?